Kapitulo 132

Diha sa Tuong Kamot sa Diyos

ANG pagbubo sa balaang espiritu sa Pentekostes maoy ebidensiya nga si Jesus nakabalik na sa langit. Ang panan-awon nga gihatag sa ulahi sa disipulong Esteban nagpamatuod usab nga Siya miabot na didto. Samtang si Esteban gibato tungod sa iyang matinumanong pagwali, siya mipatugbaw: “Tan-awa! nakita ko ang mga langit nga naabli ug ang Anak sa tawo nga nagatindog sa tuong kamot sa Diyos.”

Samtang diha sa tuong kamot sa Diyos, si Jesus naghulat sa sugo gikan sa iyang Amahan: “Magahari ka taliwala sa imong mga kaaway.” Apan kasamtangan, hangtod nga molihok siya batok sa iyang mga kaaway, unsay buhaton ni Jesus? Siya magmando, o maghari, ibabaw sa iyang dinihogang mga disipulo, magatultol kanila sa ilang buluhatong pagsangyaw ug giandam sila nga mahimo, pinaagi sa pagkabanhaw, nga kaubang mga hari uban kaniya diha sa Gingharian sa iyang Amahan.

Pananglitan, gipili ni Jesus si Saulo (sa ulahi nailhan sa iyang Romanong ngalan, si Pablo) nga maoy manguna sa buluhaton sa paghimog disipulo diha sa ubang kayutaan. Si Saulo masiboton sa Kasugoan sa Diyos, apan siya wala matultoli sa husto sa Hudiyonhong mga pangulo sa relihiyon. Ingong sangpotanan, dili lamang miuyon si Saulo sa pagpatay kang Esteban kondili siya mipadayon pa sa Damascus nga may awtoridad gikan sa hataas nga saserdoteng Caiapas sa pagdalag balik ngadto sa Jerusalem nga dinakpan sa tanang mga lalaki ug mga babaye nga iyang makaplagan didto kinsa mga sumusunod ni Jesus. Apan, samtang nagpaingon didto, usa ka masulaw nga kahayag mikalit pagsidlak libot kaniya ug natumba siya sa yuta.

“Saulo, Saulo, nganong gilutos mo ako?” usa ka tingog gikan sa dili-makitang tuboran nangutana. “Kinsa ka ba, Ginoo?” Si Saulo nangutana.

“Ako mao si Jesus, nga imong gilutos,” nga maoy tubag.

Si Saulo, nga nabutaan sa milagrosong kahayag, gisugo ni Jesus sa pagsulod sa Damascus ug maghulat sa mga instruksiyon. Unya si Jesus mipakita diha sa usa ka panan-awon kang Ananias, usa sa iyang mga disipulo. Mahitungod kang Saulo, gisultihan ni Jesus si Ananias: “Kining tawhana mao ang pinili nga galamiton ko sa pagdala sa akong ngalan ngadto sa mga nasod ug sa mga hari ug sa mga anak ni Israel.”

Sa pagkamatuod, pinaagi sa pagpaluyo ni Jesus, si Saulo (nga karon ginganlag Pablo) ug ubang mga magwawali dako ug kalamposan sa ilang buluhaton sa pagwali ug pagpanudlo. Gani, mga 25 ka tuig human sa pagpakita ni Jesus kaniya diha sa dalan paingon sa Damascus, si Pablo misulat nga “gikawali na sa tanang mga binuhat sa silong sa langit” ang “maayong balita.”

Sa paglabay sa daghang mga tuig, si Jesus mihatag ug sunod-sunod nga mga panan-awon sa iyang hinigugmang apostol, nga si Juan. Pinaagi sa maong mga panan-awon gihubit sa maong Juan diha sa basahon nga Pinadayag sa Bibliya, nga siya, sa pagkamatuod, buhi sa pagkakita sa pagbalik ni Jesus sa gahom sa Gingharian. Si Juan miingon nga “pinaagi sa pagdasig” siya gidala sa panahon sa “adlaw sa Ginoo.” Unsa man kadtong “adlawa”?

Ang matukiong pagtuon sa mga tagna sa Bibliya, lakip sa kaugalingong tagna ni Jesus mahitungod sa kataposang mga adlaw, nagpadayag nga kanang maong “adlaw sa Ginoo” nagsugod sa makasaysayanhong tuig sa 1914, oo, sulod niining kaliwatana! Busa sa 1914 nagsugod ang dili-makitang pagbalik ni Jesus, nga walay paghugyaw sa publiko ug ang iyang matinumanong mga alagad lamang ang nahibalo sa iyang pagbalik. Sa maong tuig si Jehova mihatag kang Jesus sa sugo sa paghari taliwala sa iyang mga kaaway!

Nagsunod sa sugo sa iyang Amahan, gipapahawa ni Jesus si Satanas ug ang iyang mga demonyo sa langit, gitambog sila dinhi sa yuta. Human nakita nga natuman kining maong panan-awon, si Juan nakadungog ug tingog sa langit nga nagaingon: “Karon nahiabot na ang kaluwasan ug ang gahom ug ang gingharian sa atong Diyos ug ang awtoridad sa iyang Kristo!” Oo, sa 1914 si Kristo nagsugod sa pagmando ingong Hari!

Pagkamaayong balita kini alang sa mga magsisimba ni Jehova sa langit! Sila giawhag: “Paglipay kamo nga kalangitan ug kamo nga nagpuyo niini!” Apan unsay kahimtang niadtong anaa sa yuta? “Alaot ang yuta ug ang dagat,” mipadayon ang tingog gikan sa langit, “kay ang Yawa nahilusad kaninyo, nga puno sa dakong kapungot, sanglit nasayod man siya nga mubo na lamang ang iyang panahon.”

Kita nakadangat na nianang mubo nga panahon karon mismong adlawa. Ang mga tawo sa pagkakaron ginalain aron makasulod sa bag-ong kalibotan sa Diyos o mag-antos sa kalaglagan. Ang kamatuoran mao, ang imong kaugalingong kaugmaon karon ginatino pinaagi sa imong pagsanong sa maayong balita sa Gingharian sa Diyos nga ginawali sa tibuok yuta ilalom sa pagdumala ni Kristo.

Inigkatapos sa paglain sa mga tawo, si Jesu-Kristo mag-alagad ingong Ahente sa Diyos aron paphaan ang yuta sa tibuok nga sistema sa mga butang ni Satanas ug sa tanan nga nagasuportar niana. Himoon ni Jesus kining pagwagtang sa tanang pagkadaotan diha sa gubat nga gitawag sa Bibliya nga Har–Magedon, o Armageddon. Tapos niana, si Jesus, nga mao ang labing bantogang Persona sa uniberso sunod kang Jehova nga Diyos mismo, magasikop kang Satanas ug sa iyang mga demonyo ug gaposon sila sulod sa usa ka libo ka tuig diha sa usa ka “bung-aw,” sa ato pa, samag-patay walay-kalihokan nga kahimtang. Buhat 7:55-60; 8:1-3; 9:1-19; 16:6-10; Salmo 110:1, 2; Hebreohanon 10:12, 13; 1 Pedro 3:22; Lucas 22:28-30; Colosas 1:13, 23; Pinadayag 1:1, 10; 12:7-12; Pin 16:14-16; 20:1-3; Mateo 24:14; 25:31-33.

▪ Human mikayab si Jesus sa langit, diin siya nahimutang, ug unsay iyang gihulat?

▪ Ibabaw kang kinsa nagamando si Jesus tapos mikayab sa langit, ug sa unsang paagi ipasundayag kini nga pagmando?

▪ Kanus-a nagsugod ang “adlaw sa Ginoo,” ug unsay nahitabo sa pagsugod niini?

▪ Unsang buluhaton sa paglain ang ginahimo karong adlawa nga nagaapektar sa matag usa kanato sa personal, ug unsa ang basehanan nga ginahimo ang paglain?

▪ Inigkatapos sa buluhaton sa paglain, unsang mga hitabo ang mosunod?