Kapitulo 81

Dugang mga Pagsulay sa Pagpatay Kang Jesus

SANGLIT tingtugnaw na man, si Jesus naglakawlakaw sulod sa portiko ni Solomon. Tapad ra kini sa templo. Dinhi gialirongan siya sa mga Hudiyo nga nanag-ingon: “Unsa pa man kadugay ang imong pagpakulba-hinam kanamo? Kon ugaling ikaw man mao ang Kristo, nan tug-ani kami sa laktud gayod.”

“Gitug-anan ko na kamo,” mitubag si Jesus, “apan wala kamo managpanuo.” Sila wala direktaha sa pagsulti ni Jesus nga siya mao ang Kristo, sama sa iyang pagtug-an sa babayeng Samarianhon diha sa atabay. Apan siya, sa ingon, mibutyag sa iyang pagkatawo sa dihang iyang gisaysay ngadto kanila nga siya gikan sa gingharian sa itaas ug naglungtad na sa wala pa si Abraham.

Apan, buot ni Jesus nga maabot sa mga tawo mismo ang konklusyon nga siya mao ang Kristo pinaagi sa pagtandi sa iyang mga kalihokan nianang gitagna sa Bibliya nga buhaton ni Kristo. Maoy hinungdan nga sayosayo pa iyang gisugo ang iyang mga tinun-an sa dili pagsulti kang bisan kinsa nga siya mao ang Kristo. Ug maoy hinungdan nga siya karon mipadayon sa pag-ingon ngadto niining nangasukong mga Hudiyo: “Ang buhat nga akong ginahimo sa ngalan sa akong Amahan, kini nagpamatuod mahitungod kanako. Apan kamo wala magapanuo.”

Nganong wala man sila motuo? Tungod ba sa kakulang sa ebidensiya nga siya mao ang Kristo? Dili, kondili sa katarongan nga gihatag ni Jesus sa dihang miingon siya kanila: “Dili kamo akong mga karnero. Ang akong mga karnero nagapatalinghog sa akong tingog, ug ako nakaila kanila, ug sila nagasunod kanako. Ug hatagan ko sila ug kinabuhing dayon, ug sila dili gayod malaglag, ug walay bisan kinsa ang makaagaw kanila gikan sa akong kamot. Ang akong Amahan nga maoy naghatag kanila nganhi kanako mao ang labing dako sa tanan, ug walay bisan kinsa nga makahimo sa pag-agaw kanila gikan sa kamot sa Amahan.”

Unya gibatbat ni Jesus ang iyang suod nga relasyon sa iyang Amahan, nga nag-ingon: “Ako ug ang akong Amahan usa ra.” Sanglit si Jesus dinhi sa yuta ug ang iyang Amahan atua sa langit, sa matin-aw siya wala mag-ingon nga siya ug ang iyang Amahan sa literal, o sa pisikal, usa. Hinunoa, ang iyang gipasabot nga sila usa sa katuyoan, nga sila nagkahiusa.

Nasuko tungod sa mga gipamulong ni Jesus, namunit ang mga Hudiyo ug mga bato aron sa pagpatay kaniya, sama sa ilang gihimo sa sayo pa niana, sa panahon sa Piyesta sa mga Payag, o Balongbalong. Maisogong giatubang ang iyang mga mamumuno unta, si Jesus miingon: “Gipakitaan ko kamo ug daghang mga maayong buhat gikan sa Amahan. Unsa ba niining mga buhata ang hinungdan nga inyo akong gibato?”

“Gibato ka namo dili tungod sa pagbuhat ug maayo,” sila mitubag “kondili tungod sa pagpasipala batok sa Diyos, kay ikaw nagpakadiyos nga tawo ka ra man unta.” Sanglit wala man mangangkon si Jesus nga usa ka diyos, nganong gisulti man kini sa mga Hudiyo?

Tingali tungod kay giangkon ni Jesus ang mga gahom nga ilang gituohang iya lamang sa Diyos. Pananglitan, siya miingon bag-o pa mahitungod sa “mga karnero,” “hatagan ko sila ug kinabuhing dayon,” nga maoy usa ka butang nga dili mahimo sa tawo. Apan, nakalimtan sa mga Hudiyo ang kamatuoran nga giila ni Jesus nga nakadawat siyag gahom gikan sa iyang Amahan.

Nga nangangkon si Jesus nga ubos kay sa Diyos, iyang sunod gipakita pinaagi sa pagpangutana: “Dili ba nahisulat man kini sa inyong Kasugoan [sa Salmo 82:6], ‘Ako nag-ingon: “Kamo mga diyos”’? Kon iya man nganing ginganlan ug ‘mga diyos’ kadtong mga gisultihan sa pulong sa Diyos, . . . ingnon ba diay ninyo ako ang gibalaan sa Amahan ug gipadala nganhi sa kalibotan, ‘Ikaw nagapasipala,’ tungod lang kay nag-ingon ako, Anak ako sa Diyos?”

Bisan ang Kasulatan nagtawag pa gani sa dili-matarong nga mga tawong maghuhukom nga “mga diyos,” unsay sayop ang nakita niining maong mga Hudiyo sa pagsulti ni Jesus, “ako Anak sa Diyos”? Si Jesus midugang: “Kon ang akong ginabuhat dili mga buhat sa akong Amahan, nan ayaw kamo pagtuo kanako. Apan kon ginabuhat ko kini, bisag dili pa kamo motuo kanako, tuohi ang mga buhat, aron kamo mahibalo ug makasabot nga ang Amahan nahiusa kanako ug ako nahiusa sa Amahan.”

Sa dihang gisulti kini ni Jesus, naningkamot ang mga Hudiyo sa pagdakop kaniya. Apan siya nakaikyas, sama sa iyang nahimo sayo pa niana diha sa Piyesta sa mga Payag. Siya mibiya sa Jerusalem ug mipanaw tabok sa Subang Jordan sa dapit nga nagpamawtismo sa tubig si Juan mga upat ka tuig nga miagi. Hayan kining lugara dili ra layo sa habagatang baybayon sa Dagat sa Galilea, duha ka adlawng panaw o kapin pa gikan sa Jerusalem.

Daghang mga tawo miduol kang Jesus niining dapita nga nanag-ingon: “Si Juan, sa pagkatinuod, walay nahimong milagro, apan tinuod ang tanang gisulti ni Juan mahitungod niining tawhana.” Busa daghan ang mituo kang Jesus dinhi. Juan 10:22-42; 4:26; 8:23, 58; Mateo 16:20.

▪ Pinaagi sa unsa nga buot ni Jesus nga ang mga tawo makaila kaniya nga siya mao ang Kristo?

▪ Sa unsang paagi si Jesus ug ang iyang Amahan usa?

▪ Ngano, sa tinuod, miingon ang mga Hudiyo nga gipakadiyos ni Jesus ang iyang kaugalingon?

▪ Sa unsang paagi ang pagkutlo ni Jesus sa Salmo nagpakita nga siya wala mangangkon nga sama sa Diyos?