Kapitulo 83

Giabiabi sa Usa ka Pariseo

SI Jesus didto gihapon sa balay sa usa ka iladong Pariseo ug bag-o pa siyang nakaayo sa usa ka tawo nga nag-antos sa panghupong. Samtang siya naniid sa kaubang mga dinapit nga namilig halangdong mga dapit diha sa kan-anan, siya nagtudlog pagtulon-an bahin sa pagkamapaubsanon.

“Kon adunay modapit kanimo sa usa ka kombira sa kasal,” misaysay si Jesus, “ayaw paglingkod sa dapit nga halangdon. Basi adunay laing dinapit nga labi pang inila kay kanimo, ug unya ang nagadapit kaninyong duha moduol ug moingon kanimo, ‘Pahawa diha ug maoy palingkora kining tawhana.’ Ug unya mobalhin ka nga naulawan ngadto sa ubos nga dapit.”

Busa si Jesus mitambag: “Sa diha nga dapiton ikaw, umadto ug lumingkod ka sa labing ubos nga dapit, aron inig-abot sa nagadapit kanimo basig moingon siya kanimo, ‘Higala, uswag ra didto sa ibabaw.’ Sa ingon niana kapasidunggan ikaw sa atubangan sa tanang kaubang mga dinapit.” Mihinapos, si Jesus miingon: “Kay ang matag-usa nga magapahitaas sa iyang kaugalingon igapahiubos ug ang magapaubos sa iyang kaugalingon, igapahitaas.”

Sunod, gisultihan ni Jesus ang Pariseo nga midapit kaniya ug gibatbat kon unsaon sa paghatag ug kombira nga may tinuod nga bili sa Diyos. “Sa magadalit ikawg kombira o panihapon, ayaw pagdapita ang imong mga higala o ang imong mga igsoong lalaki o ang imong mga paryente o ang imong mga dato nga silingan. Basi mobalos sila sa pagdapit kanimo ug unya mabaslan ka. Apan sa magakombira ikaw, maoy dapita ang mga kabus, ang mga pungkol, ang mga piang, ang mga buta; ug ikaw magmalipayon, tungod kay sila dili man makabalos kanimo.”

Ang pagdalit ug kombira alang sa mga alaot mohatag kalipay sa nagadalit niini tungod kay, sumala sa gisaysay ni Jesus ngadto sa iyang tagbalay, “Ikaw pagabalosan ra unya sa pagpamanhaw sa mga matarong.” Ang paghubit ni Jesus niining talagsaong kombira nakapahinumdom sa kaubang dinapit sa laing matang sa kombira. “Malipayon ang magakaon didto sa gingharian sa Diyos,” miingon kining maong dinapit. Apan, wala hatagig bili kanang malipayong palaabuton sa uban, sumala sa sunod nga gipakita ni Jesus pinaagig sambingay.

“Dihay usa ka tawo nga midalit ug dakong panihapon, ug daghan ang iyang gidapit. Ang mga dinapit iyang gipaadtoan sa iyang ulipon . . . sa pag-ingon sa mga dinapit, ‘Dali na kamo, kay ang tanan andam na.’ Apan silang tanan nga nanagkahiusa misugod sa pagpamalibad. Ang nahauna miingon kaniya, ‘Nakapalit akog uma, ug kinahanglan nga adtoon ug tan-awon ko kini; hangyoon ko ikaw, Pasayloa lang usa ako.’ Ug ang usa miingon, ‘Nakapalit akog lima ka paris nga baka ug moadto ako aron sulayan ko sila; hangyoon ko ikaw, Pasayloa lang usa ako.’ Ug may laing usa pa nga miingon, ‘Bag-o lang ako nga nakapangasawa ug sa maong hinungdan dili ako makaadto.’”

Pagkahuyang nga mga pasangil! Ang uma o mga binuhi sa normal susihon una sa dili pa kini paliton, busa wala gayoy tinuod nga panginahanglan sa pagtan-aw niini pagkahuman. Sa susama, ang kaminyoon sa usa ka tawo dili angay makapugong kaniya gikan sa pagdawat sa usa ka bililhong imbitasyon. Busa sa pagkadungog bahin niining maong mga pasangil, nasuko ang agalon ug gisugo ang iyang ulipon:

“‘Dumali ka sa pag-adto sa kadalanan ug mga agianan sa lungsod, ug dad-a dinhi ang mga kabos ug ang mga pungkol ug ang mga buta ug ang mga piang.’ Ug unya ang ulipon miingon, ‘Agalon, nahimo ko na ang imong gisugo, ngani aduna pay kasodlan.’ Ang agalon miingon sa ulipon, ‘Umadto ka sa kadalanan ug sa kakoralan, ug pugsa sila sa pag-anhi, aron mapuno kining akong balay . . . Walay bisan usa niadtong mga tawhana nga gidapit ang makatilaw sa akong kombira.’”

Unsang situwasyona ang gihubit sa sambingay? Buweno, “ang agalon” nga mihatag ug kombira naghawas kang Jehova nga Diyos; “ang ulipon” nga nagtanyag sa pagdapit, mao si Jesu-Kristo; ug ang “dakong panihapon,” mao ang mga higayon nga mahilinya alang sa Gingharian sa mga langit.

Kadtong unang gidapit aron mahilinya alang sa Gingharian mao, labaw sa ubang butang, ang Hudiyonhong mga lider sa relihiyon sa mga adlaw ni Jesus. Apan, ilang gisalikway ang maong pagdapit. Busa, sa sinugdan ilabina sa Pentekostes 33 K.P., ang ikaduhang pagdapit gitanyag sa mga tinamay ug mga kabos sa Hudiyonhong nasod. Apan diyutay ray misanong aron mapuno ang 144,000 ka dapit diha sa langitnong Gingharian sa Diyos. Busa sa 36 K.P., tulo ug tunga ka tuig sa ulahi, ang ikatulo ug ang kataposang pagdapit gitanyag ngadto sa walay-sirkunsisyong mga dili-Hudiyo, ug ang pagtigom kanila nagpadayon hangtod sa atong adlaw. Lucas 14:1-24.

▪ Unsang pagtulon-an bahin sa pagkamapaubsanon ang gitudlo ni Jesus?

▪ Sa unsang paagi makaandam ang tagbalay ug usa ka kombira nga may bili sa Diyos, ug nganong mohatag kini kaniyag kalipay?

▪ Nganong mahuyang ang mga pasangil sa mga dinapit?

▪ Unsay gihawasan sa sambingay ni Jesus bahin sa “dakong panihapon”?