Kapitulo 37

Gialim ni Jesus ang Kaguol sa Babayeng Balo

HUMAN maayo ang sulogoon sa opisyal sa mga sundalo, si Jesus miadto sa Nain, usa ka siyudad nga kapin sa 32 ka kilometros sa sidlakan-kasadpan sa Capernaum. Miuban kaniya ang iyang mga tinun-an ug ang dakong panon sa mga tawo. Tingali kilomkilom na dihang miabot sila sa gawas sa Nain. Dinhi nakatagbo silag mga tawo nga mikuyog sa paglubong. Ang patayng lawas sa batan-ong lalaki giyayongan paggawas sa siyudad aron ilubong.

Ang kahimtang sa inahan makaguol gayod kaayo, tungod kay balo siya ug kini lamang ang iyang anak. Dihang namatay ang iyang bana, nalipay siya nga may nabilin pa kaniya nga anak. Ang iyang mga paglaom, tinguha, ug ambisyon nasentro sa kaugmaon sa iyang anak. Apan karon wala nay molipay kaniya. Dako gayod ang iyang kaguol dihang giubanan siya sa mga katagilungsod ngadto sa lubnganan.

Dihang nakita ni Jesus ang babaye, natandog ang iyang kasingkasing sa iyang grabeng kaguol. Busa sa kalulot, apan sa kalig-on nga naghatag pagsalig, siya miingon kaniya: “Ayaw na paghilak.” Ang iyang paagi ug aksiyon nakakuha sa pagtagad sa mga tawo. Busa dihang siya miduol ug gihikap ang andas nga gibutangan sa lawas nga giyayongan, ang mga nanagyayong mihunong. Tingali nahibulong ang tanan kon unsay iyang buhaton.

Tinuod nga kadtong miuban kang Jesus nakakita na kaniya nga nakahimog milagrosong pag-ayo sa mga sakit sa daghang mga tawo. Apan matin-aw nga wala pa gayod sila sukad nakakita kaniya nga nakabangon ug tawo gikan sa patay. Mahimo kaha niya kini? Gisultihan ang lawas, si Jesus misugo: “Dong, ingnon ko ikaw, Bangon!” Ug ang batan-on milingkod! Siya misugod sa pagsulti, ug gihatag siya ni Jesus sa iyang inahan.

Dihang nakita sa mga tawo nga tinuod nga nabuhi ang batan-on, sila misugod sa pag-ingon: “Usa ka dakong propeta mitungha sa atong taliwala.” Ang uban miingon: “Ang Diyos mibali sa iyang pagtagad sa iyang katawhan.” Dihadihang mikaylap ang balita mahitungod niining katingalahang buhat sa tibuok Judea ug sa tanang kanait nga nasod.

Si Juan Bautista atua gihapon sa bilanggoan, ug gusto siyag dugang kasayoran mahitungod sa mga milagro nga nahimo ni Jesus. Ang mga tinun-an ni Juan maoy nagsugilon kaniya bahin niining mga milagroha. Unsay iyang pagsanong? Lucas 7:11-18.

▪ Unsay nahitabo dihang nagsingabot si Jesus sa Nain?

▪ Sa unsang paagi naapektohan si Jesus sa iyang nakita, ug unsay iyang gihimo?

▪ Unsay pagsanong sa mga tawo sa milagro ni Jesus?