Kapitulo 11

Giandam ni Juan ang Dalan

NAPULOG-PITO na ka tuig ang milabay sukad nga si Jesus maoy usa ka 12 anyos nga bata nga nagbangon ug mga pangutana sa mga magtutudlo diha sa templo. Tingpamulak kadto sa tuig 29 K.P., ug ang tanan daw naghisgot mahitungod sa ig-agaw ni Jesus nga si Juan, kinsa nagwali sa tanang kayutaan nga kasikbit sa Subang Jordan.

Si Juan sa pagkamatuod maoy usa ka ambongan nga tawo, sa panagway ug sa sinultihan. Ang iyang besti maoy sa balhibo sa kamelyo, ug siya adunay bakos nga panit diha sa iyang hawak. Ang iyang pagkaon maoy mga dulon ug dugos sa kagulangan. Ug ang iyang mensahe? “Paghinulsol kamo, kay ang gingharian sa langit haduol na.”

Kini nga mensahe nakapukaw sa iyang mga mamiminaw. Daghan ang nakaamgo sa ilang panginahanglan ug paghinulsol, sa ato pa, sa pagbag-o sa ilang tinamdan ug sa pagsalikway sa ilang nangaging dalan sa kinabuhi ingon nga dili-maayo. Busa gikan sa tanang teritoryo nga kasikbit sa Jordan, ug bisan gikan sa Jerusalem, daghan kaayo ang nangadto kang Juan, ug iyang gibawtismohan sila, gituslob sila sa tubig sa Jordan. Ngano?

Si Juan nagpangbawtismo sa mga tawo ingong simbolo, o pag-ila, sa ilang kinasingkasing nga paghinulsol sa mga sala batok sa pakigsaad sa Kasugoan sa Diyos. Mao nga, sa dihang ang pipila ka Pariseo ug mga Saduseo nangadto sa Jordan, gihukman sila ni Juan. “Kamong mga anak sa bitin,” miingon siya. “Pamunga kamog mga bunga nga nahiangay sa paghinulsol; ug ayaw ninyo paghunahunaa ang pag-ingon sa inyong kaugalingon, ‘Si Abraham among amahan.’ Kay sultihan ko kamo nga ang Diyos makahimo sa pagpaliwat ug mga anak alang kang Abraham gikan niining mga bato. Bisan karon ang wasay gikataon na diha sa gamot sa mga kahoy; ug busa, ang matag usa ka kahoy nga wala mamungag maayong mga bunga pagaputlon ug isalibay ngadto sa kalayo.”

Tungod sa pagtagad nga nadawat ni Juan, ang mga Hudiyo nagpadalag mga saserdote ug mga Levihanon ngadto kaniya. Sila nangutana: “Kinsa ka man?”

“Ako dili mao ang Kristo,” si Juan miangkon.

“Nan, kinsa ka man diay?” sila nangutana. “Si Elias ka ba?”

“Dili,” siya mitubag.

“Ikaw ba mao Ang Propeta?”

“Dili!”

Busa sila miinsister sa pagpangutana: “Kinsa ka man lagi? aron kami adunay ikatubag sa mga nanagsugo kanamo. Unsa may imong ikasulti mahitungod sa imong kaugalingon?”

Si Juan misaysay: “Ako mao ang tingog sa usa nga nagsinggit sa kamingawan, ‘Tul-ira ninyo ang dalan ni Jehova,’ sumala sa giingon ni Isaias nga propeta.”

“Nan, nganong nagapangbawtismo ka man,” sila buot masayod, “kon dili ikaw mao ang Kristo ni si Elias o Ang Propeta?”

“Ako nagapangbawtismo sa tubig,” siya mitubag. “Sa taliwala ninyo anaay nagatindog nga wala ninyo hiilhi, siya mao ang magaanhi sunod kanako.”

Giandam ni Juan ang dalan aron maandam ang kahimtang sa kasingkasing sa mga tawo sa pagdawat sa Mesiyas, nga mahimong Hari. Mahitungod niini nga Usa, si Juan nag-ingon: “Siya nga magaanhi sunod kanako labi pang gamhanan kay kanako, kang kansang mga higot sa sandalyas ako dili takos sa pagbadbad.” Sa pagkamatuod, si Juan miingon pa gani: “Siya nga umaanhi sunod kanako nakauna na unahan kanako, kay siya naglungtad na man una pa kanako.”

Busa, ang mensahe ni Juan, “ang gingharian sa langit haduol na,” nagsilbing usa ka pagpahibalo sa katilingban nga ang ministeryo sa tinudlong Hari ni Jehova, si Jesu-Kristo, hapit nang magsugod. Juan 1:6-8, 15-28; Mateo 3:1-12; Lucas 3:1-18; Buhat 19:4.

▪ Unsang matanga sa tawo si Juan?

▪ Nganong nagapangbawtismo si Juan sa mga tawo

▪ Nganong makaingon si Juan nga ang Gingharian haduol na?