Kapitulo 72

Gipadala ni Jesus ang 70

KADTO tinghunlak sa 32 K.P., tibuok tulo ka tuig sukad sa pagbawtismo kang Jesus. Siya ug ang iyang mga tinun-an bag-o pang nanambong sa Piyesta sa mga Payag sa Jerusalem, ug lagmit sila didto pa sa duol. Ngani, gigugol ni Jesus ang kinadak-ang bahin sa nahibiling unom ka bulan sa iyang ministeryo didto kaha sa Judea o sa tabok lamang sa Subang Jordan sa distrito sa Perea. Kadtong teritoryoha kinahanglan usab nga mawalihan.

Matuod, tapos sa Paskuwa sa 30 K.P., si Jesus migugol ug mga walo ka bulan nga nagwali sa Judea. Apan tapos ang mga Hudiyo mosulay sa pagpatay kaniya didto sa Paskuwa sa 31 K.P., gigugol niya ang sunod nga tuig ug tunga sa pagpanudlo halos didto lamang sa Galilea. Sulod niadtong panahona, naugmad niya ang dako, maayong-pagkabansay nga organisasyon sa mga magwawali, butang nga wala niya mabatoni nga sayosayo. Busa sa maong panahon gilansad niya ang kataposan bug-os nga pagpangwali sa Judea.

Gisugdan ni Jesus ang maong kampanya pinaagi sa pagpilig 70 ka tinun-an ug pagpadala kanilang tinagurha. Busa, tanantanan may 35 ka tem sa mga magwawali sa Gingharian sa pagtrabaho sa teritoryo. Sila nag-una sa matag siyudad ug dapit nga giplanohan nga adtoan ni Jesus, lagmit nga giubanan sa iyang mga apostol.

Inay sugoon ang 70 sa pag-adto sa mga sinagoga, gisugo sila ni Jesus sa pag-adto sa pribadong mga balay, nga nagsaysay: “Inigsulod ninyo sa usa ka balay moingon una kamo, ‘Hinaot kining balaya may kalinaw.’ Ug kon anaa ang usa ka higala sa kalinaw, ang inyong kalinaw mahiadto kaniya.” Unsa man ang ilang mensahe? “Magpadayon sa pagsulti kanila,” matud ni Jesus, “ang gingharian sa Diyos haduol na kaninyo.” Mahitungod sa kalihokan sa 70, ang Matthew Henry’s Commentary nagtaho: “Sama sa ilang Agalon, sa bisan diin sila nagduaw, sila nagwali sa balay-balay.”

Ang mga instruksiyon ni Jesus ngadto sa 70 kaamgid niadtong gihatag sa 12 sa dihang gipadala niya sila sa usa ka kampanya sa pagwali sa Galilea duolan sa usa ka tuig nga miagi. Dili lamang nga iyang gipasidan-an ang 70 sa pagsupak nga ilang maatubang, ug giandam sila sa pagpahayag sa mensahe ngadto sa mga tagbalay, kondili iya silang gihatagag gahom sa pagpang-ayo sa masakiton. Busa, sa pag-abot ni Jesus sa wala madugay, daghan ang naikag sa pagsugat sa Agalon kansang mga tinun-an nakabuhat niadtong kahibulongang mga butang.

Ang pagwali sa 70 ug buluhaton nga pagsundal ni Jesus milungtad sa mubo lang nga panahon. Sa wala madugay ang 35 ka parisan sa mga magwawali sa Gingharian misugod sa pagbalik kang Jesus. “Ginoo,” sila miingon nga malipayon, “bisan ang mga demonyo nagpailalom kanamo pinaagi sa paggamit sa imong ngalan.” Ang maong maayong taho sa pag-alagad tinong nakalipay kang Jesus, kay siya mitubag: “Nakita ko nga si Satanas nahulog na sama sa liti gikan sa langit. Tan-awa! Gihatagan ko kamo sa gahom sa pagyatak sa mga bitin ug sa mga tanga.”

Si Jesus nasayod nga sa pagkatawo sa Gingharian sa Diyos sa panahon sa kataposan, si Satanas ug iyang mga demonyo igatambog gikan sa langit. Apan karon ang maong pagpagula sa dili-makitang mga demonyo pinaagi sa mga tawo lamang nagsilbing dugang pasalig sa maong umaabot nga hitabo. Busa, si Jesus namulong sa umaabot nga pagkahulog ni Satanas gikan sa langit ingong tino. Busa, maoy sa simbolikong diwa nga ang 70 gihatagag gahom sa pagyatak sa mga bitin ug sa mga tanga. Apan si Jesus miingon: “Ayaw kamo pagkalipay mahitungod niini, nga ang mga espiritu gipailalom kaninyo, kondili magkalipay tungod kay ang inyong mga ngalan gisulat sa mga langit.”

Si Jesus nalipay sa labihan ug sa dayag nagdayeg sa iyang Amahan tungod sa paggamit sa maong ubos nga mga alagad niya sa maong gamhanang paagi. Sa pagliso ngadto sa iyang mga tinun-an, siya miingon: “Malipayon ang mga mata nga nakakita sa mga butang nga inyong nakita. Kay ako magaingon kaninyo, Daghang manalagna ug mga hari ang nagtinguha sa pagtan-aw sa mga butang inyong nakita apan wala makakita kanila, ug sa pagkadungog sa mga butang inyong nadunggan apan wala makadungog kanila.” Lucas 10:1-24; Mateo 10:1-42; Pinadayag 12:7-12.

▪ Diin magwali si Jesus sa unang tulo ka tuig sa iyang ministeryo, ug unsang teritoryoha ang iyang gikobrehan sa iyang kataposang unom ka bulan?

▪ Diin sugoa ni Jesus nga moadto ang 70 aron sa pagkaplag sa mga tawo?

▪ Nganong si Jesus miingon nga iya nang nakita nga si Satanas nahulog na gikan sa langit?

▪ Sa unsang diwa ang 70 nagyatak sa mga bitin ug mga tanga?