Kapitulo 45

Imposible nga Mahimong Disipulo

PAGKAMAKALILISANG nga talan-awon dihang miabot siya sa daplin sa baybayon! Duha ka mabangis kaayong mga tawo migula gikan sa duol nga sementeryo ug midalagan paingon kaniya. Sila giyawaan. Sanglit ang usa kanila tingali mas mabangis kay sa usa ug dugay nang nag-antos sa pagkontrolar sa demonyo, siya ang nahimong sentro sa pagtagad.

Kining makaluluoy nga tawo dugay na kaayong nagpuyo nga hubo diha sa mga lubong. Walay hunong, sa adlaw ug gabii, mosinggit siya ug samaran niya ang iyang kaugalingon sa mga bato. Siya mabangis kaayo nga wala gayoy nangahas sa pag-agi niadtong dalana. Gisulayan na siya sa paggapos, apan igo lang niyang putolputolon ang mga talikala ug balibalion ang mga puthaw nga gigapos sa iyang mga tiil. Wala gayoy bisan usa ang may kusog sa pagpildi kaniya.

Dihang miduol ang tawo kang Jesus ug mihapa sa iyang tiil, gipasinggit siya sa mga demonyo nga nagkontrolar kaniya: “Unsay imong labot kanako, Jesus, Anak sa Labing Hataas nga Diyos? Gipanumpa ko ikaw sa Diyos sa dili pagsakit kanako.”

“Gumula ka sa tawo, ikaw, espiritu nga mahugaw,” balikbalik nga misulti si Jesus. Apan dayon nangutana si Jesus: “Kinsay imong ngalan?”

“Ang akong ngalan Panon, tungod kay daghan man kami,” mao ang tubag. Malipay ang mga demonyo nga motan-aw sa mga pag-antos sa tawong ilang sudlan, tingali magkalipay sa pag-atake kanila pinaagi sa tinalawan nga espiritu sa panggubot sa panon. Apan sa nag-atubang kang Jesus, nagpakiluoy sila nga dili sila ipadala sa bung-aw. Atong nakita na usab nga si Jesus adunay dakong gahom; iyang gilupig bisan ang mapintas nga mga demonyo. Nagpakita usab kini nga ang mga demonyo nahibalo nga ang pagtambog kanila sa bung-aw uban sa ilang pangulo, si Satanas nga Yawa, mao ang kataposan nga paghukom sa Diyos kanila.

Dihay usa ka panon sa mga baboy nga duolan sa 2,000 ang nanag-ungad diha sa bakilid. Busa ang mga demonyo miingon: “Paadtoa kami nianang mga baboy ug pasudla kami nila.” Dayag nga ang mga demonyo nakabaton ug dili-kinaiyanhon, madagmalong kalipay sa pagsulod sa mga lawas sa unodnong linalang. Dihang gitugotan sila ni Jesus sa pagsulod sa mga baboy, ang tanang 2,000 kanila mihaguros padulhog sa pangpang ug nangalumos sila sa dagat.

Dihang nakita kini sa nag-atiman sa baboy, ila dayon kining gibalita sa siyudad ug sa kasikbit nga mga lugar. Niana, midugok ang mga tawo sa pagtan-aw sa nahitabo. Dihang miabot sila, ilang nakita ang tawo nga gigulaan sa mga demonyo. Gani, siya may senina na, ug maayo nag pangisip, nga naglingkod sa tiilan ni Jesus!

Ang mga nakasaksi nag-asoy sa mga tawo kon sa unsang paagi giayo ang tawo. Ilang gibalita usab ang makalilisang nga kamatayon sa mga baboy. Dihang nakadungog niini ang mga tawo, sila giabot ug dakong kahadlok, ug dakong paglugot nga ilang gihangyo si Jesus sa pagpahawa sa ilang lugar. Busa misugot siya ug misakay sa sakayan. Ang tawo nga gidemonyohan sa miagi mihangyo kang Jesus nga tugotan siya sa pag-uban kaniya. Apan gisultihan siya ni Jesus: “Pauli na sa imong mga paryente, ug isulti kanila ang tanang mga butang nga nahimo ni Jehova kanimo ug sa iyang kaluoy kanimo.”

Kasagarang sugoon ni Jesus ang mga tawo nga iyang mapaayo sa dili pagsulti niini sa uban, sanglit dili siya buot nga maghinapos ang mga tawo pinasukad sa pinasobrahang mga balita. Apan kini nga eksipsiyon tukma tungod kay ang tawong gisudlan ug demonyo niadto magapamatuod sa mga tawo nga hayan walay higayon si Jesus sa pagpamatuod. Dugang pa, ang presensiya sa tawo mohatag pamatuod mahitungod sa gahom ni Jesus sa paghimog maayo, magsumpo sa dili-maayong balita nga tingalig mokaylap tungod sa pagkamatay sa mga baboy.

Ingong pagsunod sa sugo ni Jesus, ang tawo nga gidemonyohan sa miagi milakaw. Siya misugod sa pagwali sa tibuok Decapolis sa tanang mga butang nga nahimo kaniya ni Jesus, ug ang mga tawo natingala. Mateo 8:28-34; Marcos 5:1-20; Lucas 8:26-39; Pinadayag 20:1-3.

▪ Ngano man nga nahimong sentro sa pagtagad ang usa ka tawong gisudlan ug demonyo dihang duha man ang presente?

▪ Unsay nagpakita nga nahibalo ang mga demonyo mahitungod sa umaabot nga pagtambog kanila sa bung-aw?

▪ Ngano kaha nga gustong mosulod ang mga demonyo sa mga tawo ug sa mga hayop?

▪ Nganong gihimong eksipsiyon ni Jesus ang tawong gisudlan ug demonyo sa miagi, nagsugo kaniya sa pagsulti sa uban mahitungod sa Iyang gihimo alang kaniya?