Kapitulo 16

Kadasig Alang sa Pagsimba ni Jehova

ANG mga igsoon ni Jesus sa inahan—ang ubang mga anak ni Maria—mao si Santiago, Jose, Simon, ug Judas. Una pa silang tanan mobiyahe kauban ni Jesus ug iyang mga tinun-an paingon sa Capernaum, usa ka siyudad nga duol sa Dagat sa Galilea, tingalig mihapit sila sa ilang balay sa Nazareth aron ang pamilya makaimpaki sa mga butang ilang kinahanglanon.

Apan nganong si Jesus moadto man sa Capernaum imbes magpadayon sa iyang ministeryo sa Cana, sa Nazareth, o sa laing dapit sa kabungtoran sa Galilea? Sa usa ka butang, ang Capernaum mas bantaaw nga pagkapahimutang ug lagmit mas dako nga siyudad. Gawas pa, ang kadaghanan sa bag-ong nabatonang mga tinun-an ni Jesus nagpuyo sa sulod o sa duol sa Capernaum, mao nga dili na kinahanglang sila mobiya sa ilang mga balay aron iyang mabansay.

Sa iyang pag-estar sa Capernaum, si Jesus nagbuhat ug daghang milagro, sumala sa iya mismong gipamatud-an pila ka bulan sa ulahi. Apan sa wala madugay si Jesus ug ang iyang mga kauban nanglakaw na usab. Karon maoy tingpamulak, ug sila nagpaingon sa Jerusalem aron motambong sa Paskuwa sa 30 K.P. Samtang didto sila, nakita sa mga tinun-an ang usa ka butang bahin kang Jesus nga tingali wala nila makita sa nangagi.

Sumala sa Kasugoan sa Diyos, ang mga Israelinhon gisugo sa paghalad sa mga halad nga hayop. Busa, aron masayon kanila, ang mga magpapatigayon sa Jerusalem nagbaligyag mga hayop o mga langgam alang sa maong katuyoan. Apan sila namaligya sa sulod mismo sa templo, ug gilimbongan nila ang mga tawo pinaagi sa pagsingil ug mahal kaayo.

Si Jesus, nga nahupong sa kasuko, nagbuhat ug usa ka latigo nga pisi ug iyang giabog ang mga namaligya. Giyabo niya ang mga salapi sa mga tigpang-ilis ug gipanglintuwad ang ilang mga lamesa. “Kuhaa ninyo kining mga butanga dinhi!” siya mipatugbaw ngadto sa mga namaligyag mga salampati. “Ayaw ninyog himoang merkado ang balay sa akong Amahan!”

Sa nakita kini sa mga tinun-an ni Jesus, sila nahinumdom sa tagna bahin sa Anak sa Diyos: “Ang kadasig alang sa imong balay magaut-ot kanako.” Apan nangutana ang mga Hudiyo: “Unsang ilhanan ang imong ikapakita kanamo, sanglit ginabuhat mo kining mga butanga?” Mitubag si Jesus: “Gub-a ninyo kining temploha, ug patindogon ko kini sa tulo ka adlaw.”

Gihunahuna sa mga Hudiyo nga si Jesus naghisgot sa literal nga templo, ug mao nga sila nangutana: “Kining temploha gitukod sa kap-atan ug unom ka tuig, ug imong patindogon kini sa tulo ka adlaw?” Ugaling, si Jesus naghisgot sa templo sa iyang lawas. Ug tulo ka tuig sa ulahi, nahinumdoman sa iyang mga tinun-an kining iyang gipamulong sa dihang siya gibanhaw gikan sa mga patay. Juan 2:12-22; Mateo 13:55; Lucas 4:23.

▪ Human sa kasal sa Cana, si Jesus miadto sa unsang mga dapit?

▪ Nganong nasuko si Jesus, ug unsay iyang gibuhat?

▪ Unsay nahinumdoman sa mga tinun-an ni Jesus sa pagkakita sa iyang mga gibuhat?

▪ Unsay giingon ni Jesus mahitungod sa ‘kining temploha,’ ug unsay iyang gipasabot?