Kapitulo 25

Kaluoy Alang sa Usa ka Sanlahon

SAMTANG giduaw ni Jesus ug sa iyang upat ka disipulo ang mga siyudad sa Galilea, ang balita bahin sa katingalahang butang nga iyang gihimo mikaylap sa tibuok dapit. Ang mga pulong bahin sa iyang mga buhat miabot sa usa ka siyudad diin didto may tawong sanlahon. Gibatbat siya ni doktor Lucas nga “nalukop sa sanla.” Kining sakita, sa iyang grabeng kahimtang, anam-anam nga magkutkot sa nagkalainlaing bahin sa lawas. Busa makaluluoy kaayo ang kahimtang niining maong sanlahon.

Sa miabot si Jesus sa siyudad, giduol siya sa sanlahon. Sumala sa Kasugoan sa Diyos, kinahanglang mosinggit ang sanlahon sa pagpasidaan, “Mahugaw, mahugaw!” sa pagsanta sa uban sa pagduol kay basig matakdan. Mihapa karon ang sanlahon, ug mihangyo kang Jesus: “Ginoo, kon buot ka, makahinlo ikaw kanako.”

Pagkadako sa pagtuo niining tawhana kang Jesus! Apan, pagkamakaluluoy niyang tan-awon tungod sa iyang sakit! Unsay buhaton ni Jesus? Unsay imong buhaton? Giabot ug kaluoy, gituyhad ni Jesus ang iyang kamot ug gihikap ang tawo, ug miingon: “Buot ko. Mamahinlo ka.” Ug dihadiha nawala kaniya ang sanla.

Gusto ka bag tawong maluloy-on kaayo sama niini ingong imong hari? Ang pagtagad ni Jesus niini nga sanlahon maoy pasalig kanato nga sa panahon sa pagmando sa Iyang Gingharian, ang tagna sa Bibliya matuman: “Iyang kaluy-an ang kabos, ug ang timawa, ug ang mga kalag sa mga timawa iyang pagaluwason.” Oo, tumanon unya ni Jesus ang tinguha sa iyang kasingkasing sa pagtabang sa tanang may mga balatian.

Bisan una pa sa pag-ayo sa sanlahon, ang ministeryo ni Jesus nakamugnag dakong kaikag sa katawhan. Sa katumanan sa tagna ni Isaias, gisugo ni Jesus karon ang naayong tawo: “Bantayi nga walay bisan kinsa ang imong suginlan.” Dayon iyang gisugo siya: “Umadto ka ug magpakita ka sa saserdote ug pagtanyag ug halad sa imong pagkahimong hinlo sumala sa gisugo ni Moises, sa pagpamatuod kanila.”

Apan hilabihang lipaya sa tawo nga dili siya makatago sa milagro. Siya milakaw ug misugod sa pagpakaylap sa balita bisan diin, nga maoy nakapukaw ug dakong kaikag ug sa pagkamaukit-ukiton sa katawhan nga tungod niana dili na libreng makasulod si Jesus sa usa ka siyudad. Busa, nagpabilin si Jesus sa hilit nga mga dapit nga walay nagpuyo, ug ang mga tawo gikan sa tanang dapit moadto didto sa pagpaminaw kaniya ug mamaayo sa ilang mga balatian. Lucas 5:12-16; Marcos 1:40-45; Mateo 8:2-4; Levitico 13:45; 14:10-13; Salmo 72:13; Isaias 42:1, 2.

▪ Unsa ang mga epekto sa sanla, ug unsang pasidaan ang ipahibalo sa sanlahon?

▪ Sa unsang paagi mihangyo ang sanlahon kang Jesus, ug unsay atong makat-onan bahin sa tubag ni Jesus?

▪ Sa unsang paagi napakyas ang naayong tawo sa pagsunod kang Jesus, ug unsay resulta?