Kapitulo 38

Kulang ba ang Pagtuo ni Juan?

SI Juan Bautista, nga nabilanggo sa duolag usa na ka tuig, nakadawat ug taho mahitungod sa pagkabanhaw sa anak lalaki sa usa ka balo sa Nain. Apan buot ni Juan nga laktud madungog gikan kang Jesus ang kahulogan niini, mao nga iyang gisugo ang duha niya ka tinun-an sa pagpangutana: “Ikaw ba mao ang Umaabot o paaboton namo ang lain?”

Kana maorag katingad-anang pangutana, ilabina sanglit nakita ni Juan nga ang balaang espiritu mitugdong kang Jesus ug nadungog ang tingog sa Diyos nga miuyon sa dihang iyang gibawtismohan si Jesus duolag duha ka tuig nga miagi. Tungod sa pangutana ni Juan basin mohinapos ang pipila nga naluya ang iyang pagtuo. Apan kana dili tinuod. Si Jesus dili unta mamulong ug pagdayeg kang Juan, nga iyang gihimo sa maong higayon, kon si Juan misugod pa sa pagduhaduha. Nan, nganong si Juan nangutana sa maong pangutana?

Si Juan basin buot lamang ug pamatuod gikan kang Jesus nga Siya mao ang Mesiyas. Kana makapalig-on kaayo kang Juan samtang siya nag-antos sa bilanggoan. Apan lagmit may labaw pa niana ang pangutana ni Juan. Lagmit buot niyang masayran kon may lain pang moabot, usa ka sumusunod, ingnon ta, nga magahuman sa katumanan sa tanang butang gitagna nga pagabuhaton sa Mesiyas.

Sumala sa mga tagna sa Bibliya nga niana sinati si Juan, ang Dinihogang Usa sa Diyos maoy usa ka hari, manluluwas. Bisan pa niana, si Juan gibilanggo pa, sa daghan pang bulan tapos si Jesus mabawtismohi. Busa si Juan lagmit nangutana kang Jesus: ‘Ikaw ba gayod ang magatukod sa Gingharian sa Diyos sa gawasnong gahom, o may lain pa, usa ka sumusunod, nga among paaboton sa pagtuman sa tanang katingalahang mga tagna may kalabotan sa himaya sa Mesiyas?’

Inay sa pagsulti sa mga tinun-an ni Juan, ‘Siyempre ako ang usa nga moabot!’ si Jesus niadtong taknaa mismo naghimo sa talagsaong pasundayag pinaagi sa pag-ayo sa daghang tawo, nag-ayo kanila sa tanang matang sa sakit ug mga balatian. Unya iyang gisultihan ang mga tinun-an: “Lumakaw kamo, itaho kang Juan ang inyong nakita ug nadungog: ang mga buta nakakita, ang bakol nakalakaw, ang mga sanlahon nahinloan ug ang mga bungol nakadungog, ang mga patay gibanhaw, ang mga kabos gisultihan sa maayong balita.”

Sa laing mga pulong, ang pangutana ni Juan tingali magpasabot sa pagdahom nga si Jesus mobuhat ug labaw pa kay sa iyang gibuhat ug tingali sa pagpagawas kang Juan mismo. Si Jesus, hinunoa, nagsulti kang Juan nga dili magdahom ug labaw kay sa mga milagro nga gihimo ni Jesus.

Sa paglakaw sa mga tinun-an ni Juan, si Jesus miliso ngadto sa mga panon ug misulti kanila nga si Juan mao ang “mensahero” ni Jehova nga gitagna sa Malakias 3:1 ug mao usab ang propeta nga gitagna ni Elias sa Malakias 4:5, 6. Sa ingon iyang gituboy si Juan ingon nga pareho sa mga propeta nga nagkinabuhing una kaniya, nga misaysay: “Sa pagkamatuod ako magaingon kaninyo, Taliwala niadtong nangatawo gikan sa mga babaye walay mitungha nga labaw kay kang Juan nga Bautista; apan ang usa ka tawong ubos sa gingharian sa mga langit labaw kay kaniya. Apan sukad sa mga adlaw ni Juan Bautista hangtod karon ang gingharian sa mga langit mao ang dag-anan nga niana ang mga tawo nagapadayon.”

Si Jesus dinhi nagpakitang si Juan dili apil sa langitnong Gingharian, sanglit ang usang ubos dinha labaw kay kang Juan. Si Juan nag-andam sa dalan alang kang Jesus apan namatay una pa tak-opi ni Kristo ang pakigtugon, o kasabotan, uban sa iyang mga tinun-an, aron sila mahimo niyang kaubang magmamando sa iyang Gingharian. Kana ang hinungdan si Jesus miingon nga si Juan dili maapil sa langitnong Gingharian. Si Juan inay hinuon mahimong yutan-ong sakop sa Gingharian sa Diyos. Lucas 7:18-30; Mateo 11:2-15.

▪ Nganong si Juan nangutana kon kaha si Jesus mao ang Moabot o kon paaboton ba ang lain?

▪ Unsang mga tagna ang giingon ni Jesus gituman ni Juan?

▪ Nganong si Juan Bautista dili moadto sa langit uban kang Jesus?