Kapitulo 4

Mabdos Apan Dili Minyo

TULO na ka bulang nagsabak si Maria. Imong mahinumdomang iyang gipalabay ang iyang unang mga bulan sa pagsabak sa pagduaw kang Elizabeth, apan mipauli na siya karon sa Nazaret. Sa dili madugay mahibaloan ang iyang kahimtang sa mga tawo sa iyang lungsod. Siya, sa pagkamatuod, nahimutang sa malisod nga kahimtang!

Ang nakapasamot sa kalisod sa kahimtang mao nga sinayoran si Maria nga mahimong asawa sa karpentero nga si Jose. Ug siya nahibalo nga, ilalom sa kasugoan sa Diyos sa Israel, ang usa ka babaye nga sinayoran sa usa ka lalaki apan kinabubut-ong nakighilawas sa laing lalaki batohon hangtod nga mamatay. Unsaon kaha niya pagpatin-aw kang Jose nga siya nanamkon?

Sanglit nawala si Maria sa tulo ka bulan, makatino kita nga naghinamhinam si Jose nga makakita kaniya. Sa nagkita sila, seguradong gibalita kini ni Maria kaniya. Hayan gipatin-aw niya kinig maayo nga nanamkon siya pinaagi sa balaang espiritu sa Diyos. Apan, sumala sa imong mahanduraw, malisod kaayong tuohan kini ni Jose.

Nahibalo si Jose nga maayog dungog si Maria. Ug piho nga iyang gihigugma siya pag-ayo. Apan, bisan pa sa iyang gisulti, mopatim-aw nga gipamabdosan siya sa laing lalaki. Bisan pa, dili buot si Jose nga batoon siya hangtod nga mamatay o pakaulawan siya sa katilingban. Busa naglaraw siya nga diborsiyohan siya sa tago. Niadtong mga adlawa, ang mga sinayoran giisip nga kasal na, ug gikinahanglan ang diborsiyo aron matapos ang saad sa pagminyo.

Sa ulahi, samtang gipalandong ni Jose kining mga butanga, siya natulog. Mipakita kaniya ang manulonda ni Jehova pinaagi sa damgo ug miingon: “Ayaw kahadlok sa pagdala kang Maria nga imong asawa sa balay, tungod kay ang iyang gisamkon iya sa balaang espiritu. Siya manganak ug usa ka lalaki, ug siya imong paganganlang Jesus, tungod kay iyang pagaluwason ang iyang katawhan sa ilang mga sala.”

Sa pagmata ni Jose, pagkadako sa iyang pasalamat! Sa walay langan iyang gituman ang gisulti kaniya sa manulonda. Iyang gidala si Maria sa iyang balay. Kining publiko nga aksiyon nagsilbing seremonya sa kasal, nga nagpahibalo nga si Jose ug si Maria kasal na. Apan wala hilabti ni Jose si Maria samtang nagsabak siya kang Jesus.

Tan-awa! Dako na kaayog tiyan si Maria, apan gipasakay siya ni Jose sa asno. Asa sila moadto, ug nganong mobiyahi pa gayod sila nga talianak na man unta si Maria? Lucas 1:39-41, 56; Mateo 1:18-25; Deuteronomio 22:23, 24.

▪ Unsay hunahuna ni Jose sa pagkasayod nga nagsabak si Maria, ug ngano?

▪ Sa unsang paagi diborsiyohan ni Jose si Maria nga dili pa man sila kasal?

▪ Unsang publiko nga aksiyon ang nagsilbing seremonya sa kasal ni Jose ug Maria?