Kapitulo 1

Mga Mensahe Gikan sa Langit

ANG tibuok Bibliya, sa pagkamatuod, maoy usa ka mensahe gikan sa langit, kay gitagana man sa atong langitnong Amahan alang sa atong instruksiyon. Ugaling, duha ka espesyal nga mensahe ang gipahayag duolag 2,000 ka tuig nga miagi pinaagi sa usa ka manulonda si kinsa “nagatindog haduol sa atubangan sa Diyos.” Ang iyang ngalan maoy Gabriel. Atong susihon ang mga kahimtang niining duha ka hinungdanong pagduaw sa yuta.

Ang tuig maoy 3 W.K.P. Sa kabungtoran sa Judea, lagmit dili kaayo layo sa Jerusalem, nagpuyo ang usa ka saserdote ni Jehova sa ngalang Zacarias. Siya tigulang na, ug mao usab ang iyang asawa, si Elizabeth. Ug sila walay mga anak. Si Zacarias nag-alagad sa iyang turno ingong saserdote sa templo sa Diyos sa Jerusalem. Sa kalit si Gabriel mitungha sa tuo nga kiliran sa halaran sa insienso.

Si Zacarias nahadlok sa hilabihan. Apan gihupay ni Gabriel ang iyang mga kahadlok, ug miingon, “Ayaw kahadlok, Zacarias, kay gidungog sa Diyos ang imong mga pag-ampo, ang imong asawa si Elizabeth makabaton ug usa ka anak, ug siya paganganlan nimong Juan.” Si Gabriel nagpadayon sa pag-ingon nga si Juan “mahimo man nga dako sa atubangan ni Jehova” ug nga siya “magaandam sa usa ka naandam nga katawhan alang kang Jehova.”

Apan, dili makatuo niadto si Zacarias. Mopatim-aw nga kadto imposible kaayo nga siya ug si Elizabeth sa ilang edad makabaton ug anak. Busa si Gabriel miingon kaniya: “Dili ka makasulti hangtod mahitabo kining mga butanga, tungod kay ikaw dili motuo kanako.”

Aw, kasamtangan, ang katawhan sa gawas natingala nganong si Zacarias nadugay kaayo sa templo. Sa dihang sa kataposan siya migawas, siya dili na makasulti kondili nakahimo lamag mga senyas pinaagi sa iyang mga kamot, ug ilang naamgohang siya nakakitag butang labaw sa kinaiyanhon.

Sa natapos ni Zacarias ang iyang yugto sa pag-alagad sa templo, siya mipauli. Ug sa wala madugay tapos niadto kadto nahitabo gayod—si Elizabeth nanamkon! Samtang nagpaabot siya nga matawo ang iyang anak, si Elizabeth nagpabilin sa balay nga halayo sa katawhan sulod sa lima ka bulan.

Sa ulahi si Gabriel mipakita na usab. Ug kang kinsa siya nakigsulti? Kadto maoy ngadto sa usa ka batan-ong dalaga nga ginganlag si Maria nga tagalungsod sa Nazaret. Unsang mensahe ang iyang gipahayag niadtong panahona? Pamati! “Ikaw gikahimut-an sa Diyos,” miingon si Gabriel kang Maria. “Tan-awa! ikaw manamkon ug manganak sa usa ka batang lalaki, ug siya imong paganganlang Jesus.” Midugang si Gabriel: “Siya mahimong dako ug pagatawgong ang Anak sa Labing Hataas; . . . ug siya magamando ingong hari sa ibabaw sa banay ni Jacob hangtod sa kahangtoran, ug ang iyang gingharian dili gayod matapos.”

Kita makapanegurong gibati ni Gabriel nga dakong pribilehiyo ang pagpahayag sa maong mga mensahe. Ug samtang kita magabasa ug dugang mahitungod kang Juan ug kang Jesus, atong hisabtan nga mas tin-aw kon nganong bililhon kaayo ang maong mga mensahe gikan sa langit. 2 Timoteo 3:16; Lucas 1:5-33.

▪ Unsang duha ka hinungdanong mensahe ang gipahayag gikan sa langit?

▪ Kinsay nagpahayag sa mga mensahe, ug kang kinsa kadto gipahayag?

▪ Nganong ang mga mensahe lisod kaayong tuohan?