Kapitulo 95

Mga Pagtulon-an Mahitungod sa Diborsiyo ug sa Gugma Alang sa mga Bata

SI Jesus ug ang iyang mga tinun-an nagpaingon sa Jerusalem sa pagtambong sa Paskuwa sa 33 K.P. Sila mitabok sa Subang Jordan ug miagi sa distrito sa Perea. Si Jesus didto sa Perea sa pipila ka semana sayo pa niana, apan gipatawag siya ngadto sa Judea tungod kay ang iyang higalang si Lasaro nagkasakit. Samtang didto pa sa Perea, nakigsulti si Jesus sa mga Pariseo mahitungod sa diborsiyo, ug karon ilang gihisgotan ang maong butang pag-usab.

Taliwala sa mga Pariseo dunay nagkalainlaing mga hunahuna mahitungod sa diborsiyo. Si Moses miingon nga ang babaye mahimong bulagan tungod sa “usa ka butang malaw-ay sa iyang bahin.” Ang uban nagtuo nga kini nagpunting lamang sa pagkadili-putli. Apan giisip sa uban nga ang “usa ka butang malaw-ay” nag-apil sa gagmay kaayo nga mga kalapasan. Busa, aron sulayan si Jesus, ang mga Pariseo nangutana: “Uyon ba sa kasugoan alang sa usa ka lalaki sa pagbulag sa iyang asawa sa bisan unsang hinungdan?” Sila masaligon nga bisan unsay itubag ni Jesus malisdan siya sa mga Pariseo nga dunay lahig hunahuna.

Giatiman ni Jesus ang pangutana sa binatid nga paagi, wala modangop sa bisan unsang tawhanong opinyon, kondili nagpunting ug balik sa orihinal nga katuyoan sa kaminyoon. “Wala ba ninyo hibasahi,” siya nangutana, “nga siya nga nagbuhat kanila sukad sa sinugdan nagbuhat kanila nga lalaki ug babaye ug miingon, ‘Tungod niining maong hinungdan kinahanglan pagabiyaan sa lalaki ang iyang amahan ug ang iyang inahan ug makig-ipon siya sa iyang asawa, ug silang duha mahimong usa ka unod’? Tungod niana sila dili na duha, kondili usa ka unod. Busa, dili bulagon sa tawo ang gihiusa sa Diyos.”

Ang orihinal nga katuyoan sa Diyos, gipakita ni Jesus, mao nga ang mga kapikas sa kaminyoon mag-ipon, nga sila dili magbulag. Kon mao kana, ang Pariseo mitubag, “nan, nganong naghatag man lagi si Moises ug kasulatan sa pagbulag kaniya?”

“Si Moises, tungod sa katig-a sa inyong kasingkasing, nagtugot na lang kaninyo sa pagbulag sa inyong mga asawa,” mitubag si Jesus, “apan dili mao kini sukad sa sinugdan.” Oo, sa dihang gitukod sa Diyos ang matuod nga sukdanan alang sa kaminyoon diha sa tanaman sa Eden, siya wala maghatag ug mga tagana alang sa pagbulag.

Mipadayon si Jesus sa pagsulti sa mga Pariseo: “Magaingon ako kaninyo nga bisan kinsa nga magabulag sa iyang asawa, gawas kon ang hinungdan mao ang pakighilawas [Grego, por·neiʹa], ug unya mangasawag lain nakapanapaw siya.” Busa iyang gipakita nga ang por·neiʹa, nga usa ka grabeng seksuwal nga imoralidad, mao lamang ang hinungdan nga giuyonan sa Diyos sa pagbulag.

Nakaamgo nga ang kaminyoon kinahanglang maoy usa ka dumalayon nga panag-ubanay nga kini lamang ang hinungdan alang sa pagbulag, ang mga disipulo napukaw sa pag-ingon: “Kon mao kanay kahimtang sa lalaki labot sa iyang asawa, maayo pag dili na lang mangasawa.” Piho nga ang usa nga nagaplanong magminyo kinahanglang seryosong magpalandong sa pagkadumalayon sa bugkos sa kaminyoon!

Si Jesus mipadayon sa paghisgot bahin sa pagka-dili-minyo. Iyang gibatbat nga ang pipila ka batang lalaki nangatawo nga mga eunoko, nga dili makaminyo tungod kay wala maugmad sa seksuwal nga paagi. Ang uban gihimong mga eunoko sa mga tawo, nga sa mapintas gihimong inutil sa sekso. Sa kataposan, gipugngan sa uban ang tinguhang magminyo ug sa pagtagamtam sa relasyon sa sekso aron makagugol sila sa mas bug-os pa sa mga butang maylabot sa Gingharian sa mga langit. “Ang arang makahatag luna niini [pagkadili-minyo] maghatag luna niini,” mihinapos si Jesus.

Ang mga tawo karon misugod sa pagdala sa ilang gagmayng mga anak kang Jesus. Apan, gipangasab-an sa mga disipulo ang mga bata ug gipapahawa sila, sa walay duhaduha gusto nilang panalipdan si Jesus gikan sa wala-kinahanglanang tensiyon. Apan si Jesus miingon: “Paduola kanako ang gagmayng mga bata; ug ayaw ninyo sila pagpugngi, kay ang gingharian sa Diyos ila sa mga sama kanila. Sa pagkatinuod magaingon ako kaninyo, Bisan kinsa nga dili magadawat sa gingharian sa Diyos ingon sa dinawatan sa gamayng bata dili siya makasulod niini.”

Pagkamaayong pagtulon-an ang gihatag dinhi ni Jesus! Aron makadawat sa Gingharian sa Diyos, kinahanglan atong sundon ang pagkamapaubsanon ug pagkamatudloan sa gagmayng kabataan. Apan ang pananglitan ni Jesus nagailustrar usab kon unsa ka importante, ilabina sa mga ginikanan, ang paggugol ug panahon sa ilang mga anak. Gipakita karon ni Jesus ang iyang gugma alang sa mga gagmay nga bata pinaagi sa pagkugos kanila ug sa pagpanalangin kanila. Mateo 19:1-15; Deuteronomio 24:1; Lucas 16:18; Marcos 10:1-16; Lucas 18:15-17.

▪ Unsang lahi nga mga hunahuna ang gihuptan sa mga Pariseo mahitungod sa pagbulag, ug sa unsang paagi ilang gisulayan si Jesus?

▪ Sa unsang paagi giatubang ni Jesus ang paningkamot sa mga Pariseo sa pagsulay kaniya, ug unsay iyang gihatag nga bugtong hinungdan sa pagbulag?

▪ Nganong nag-ingon ang mga disipulo ni Jesus nga mas maayong dili na lang magminyo, ug unsang rekomendasyon ang gihatag ni Jesus?

▪ Unsay gitudlo kanato ni Jesus pinaagi sa iyang pakiglabot sa gagmayng kabataan?