Kapitulo 10

Mga Panaw Ngadto sa Jerusalem

ANG tingpamulak miabot na. Ug panahon na alang sa pamilya ni Jose, uban sa mga higala ug mga paryente, sa paghimo sa ilang tinuig nga tingpamulak nga biyahe ngadto sa Jerusalem aron sa pagsaulog sa Paskuwa. Sa dihang migikan sila sa duolan sa 100 ka kilometros nga biyahe, anaa ang naandang kahinam. Si Jesus karong panahona maoy 12 anyos na, ug nagpaabot siya uban ang linain nga kaikag sa piyesta.

Alang kang Jesus ug sa iyang pamilya, dili kay usa lamang ka adlaw nga kalihokan ang Paskuwa. Sila magpabilin usab alang sa sunod nga pito-ka-adlaw nga Piyetsa sa mga Tinapay nga Walay Lebadura, nga ilang giisip nga bahin sa panahon sa Paskuwa. Sa ingon, ang bug-os nga panaw gikan sa ilang puloy-anan sa Nazaret apil ang pag-estar sa Jerusalem, mokabat ug halos duha ka semana. Apan niining tuiga, tungod sa usa ka butang nga nalangkit si Jesus, kini milawig pa ug diyutay.

Ang suliran namatikdan sa namauli sila gikan sa Jerusalem. Si Jose ug si Maria nagdahom nga kauban ra si Jesus sa grupo sa mga paryente ug mga higala nga dungang nagbiyahe. Apan wala siya makita sa dihang sila mihunong sa pagpalabay sa gabii, ug nangita sila kaniya diha sa ilang mga kaubanan nga nagbiyahe. Siya wala makita. Busa si Jose ug si Maria mibalik sa Jerusalem aron sa pagpangita kaniya.

Tibuok adlaw silang nangita kaniya, apan walay kalamposan. Sa ikaduhang adlaw wala gihapon sila makakita kaniya. Sa kataposan, sa ikatulong adlaw, sila miadto sa templo. Didto, diha sa usa sa dagkong mga lawak niini, ilang nakit-an si Jesus nga naglingkod sa taliwala sa mga magtutudlong Hudiyo, namati kanila ug nagbangon ug mga pangutana.

“Anak, nganong gibuhatan mo man kami sa ingon?” nangutana si Maria. “Ang imong amahan ug ako sa among kabalaka nangita kanimo.”

Si Jesus nahibulong nga sila wala mahibalo kon asa siya pangitaa. “Nganong gipangita pa man ninyo ako?” siya nangutana. “Wala ba diay kamo mahibalo nga kinahanglang anhi gayod ako sa balay sa akong Amahan?”

Si Jesus wala makasabot kon nganong ang iyang mga ginikanan wala mahibalo niini. Niana, si Jesus mipauli uban sa iyang mga ginikanan ug nagpadayon sa pagpasakop kanila. Siya miuswag sa kaalam ug midako diha sa pag-uyon sa Diyos ug sa mga tawo. Oo, sukad sa iyang pagkabata, si Jesus naghatag ug maayong panig-ingnan dili lamang sa pagpangita sa espirituwal nga mga intereses kondili sa pagpakita usab ug pagtahod sa iyang mga ginikanan. Lucas 2:40-52; 22:7.

▪ Unsang biyahe sa tingpamulak ang regular nga ginahimo ni Jesus uban sa iyang pamilya, ug unsa ka dugay kini?

▪ Unsay nahitabo sa dihang nagpanaw sila sa 12 anyos pa si Jesus?

▪ Unsang panig-ingnan ang gihatag ni Jesus alang sa mga batan-on karong adlawa?