Kapitulo 103

Miduaw Pag-usab sa Templo

SI Jesus ug ang iyang mga tinun-an nagpalabay sa ilang ikatulong gabii sa Bitaniya sukad nga miabot gikan sa Jerico. Karon sayo sa buntag sa Lunes, Nisan 10, didto na sila sa dalan paingon sa Jerusalem. Si Jesus gigutom. Busa sa dihang nakakita siya sa kahoyng igira nga may mga dahon, iyang giduol kini sa pagtan-aw kon kini duna bay mga bunga.

Ang kahoy wala sa panahon nga nanahon, sanglit ang tempo sa igira dili pa man hangtod sa Hunyo, ug ulahing bahin pa man karon sa Marso. Apan, tingali nagtuo si Jesus kay sayo man nga nanahon, basin namunga usab kini ug sayo. Apan nabalo siya. Ang mga dahon nakahatag sa kahoy ug malimbongong hitsura. Busa gitunglo ni Jesus ang kahoy, nga nagaingon: “Sukad karon dili ka na gayod hikan-an ug bunga.” Ang resulta sa gihimo ni Jesus ug sa kahulogan niini nakat-onan sa pagkasunod buntag.

Mipadayon, si Jesus ug ang iyang mga tinun-an sa ulahi miabot sa Jerusalem. Siya miadto sa templo, nga iyang nasusi sa miaging hapon. Apan, karong higayona, siya milihok, sama sa iyang gihimo sa tulo ka tuig sa miagi sa dihang miabot siya sa Paskuwa sa 30 K.P. Giabog ni Jesus ang nanagpamaligya ug nanagpamalit diha sa templo ug gipanglintuwad ang mga lamisa sa mga tigpang-ilis sa kuwarta ug ang mga lingkoranan sa mga namaligyag mga salampati. Ug walay gitugotan niya sa pag-agi sa templo sa pagdalag bisan unsang galamiton.

Gihukman ang mga tigpailis ug kuwarta ug namaligyag mga hayop sa templo, siya miingon: “Dili ba kini ang nasulat, ‘Ang akong balay pagatawgong balayng ampoanan alang sa tanang mga nasod’? Apan inyong gihimo kining langob sa mga tulisan.” Sila mga tulisan tungod kay sila nangayo ug mahal nga prisyo sa mga tawong walay mahimo gawas sa pagpalit gikan kanila sa mga hayop nga gikinahanglan alang sa halad. Busa gilantaw ni Jesus kining mga negosyoha nga usa ka porma sa panghukhok o panulis.

Sa dihang nakadungog ang pangulo sa mga saserdote, mga eskriba, ug mga kadagkoan sa mga tawo sa gihimo ni Jesus, sila nangita na usab ug paagi sa pagpatay kaniya. Busa sila nagpakita nga sila dili na mausab. Apan, sila walay paagi kon unsaon sa pagpatay kang Jesus, sanglit ang tanang mga tawo padayon man nga nagsunodsunod kaniya sa pagpamati niya.

Gawas sa kinaiyanhong mga Hudiyo, ang mga Hentil usab miabot alang sa Paskuwa. Kini sila maoy mga proselita, nga nagkahulogan nga sila nakabig sa relihiyon sa mga Hudiyo. Ang pila ka Grego, tingali mga proselita, karon miduol kang Felipe ug mihangyo nga makigkita kang Jesus. Si Felipe miadto kang Andres, tingali nangutana kon angay ba ang maong pakigkita. Tingali atua pa gihapon sa templo si Jesus, diin ang mga Grego nakakita usab kaniya.

Si Jesus nahibalo nga pipila na lamang ka adlaw ang nabilin sa iyang kinabuhi, busa maayo kaayo niyang pagkasambingay sa iyang kahimtang: “Ang takna nahiabot na nga pagahimayaon na ang Anak sa tawo. Sa pagkatinuod magaingon ako kaninyo, Gawas kon ang usa ka lugas sa trigo mahulog sa yuta ug mamatay, kini magpabilin nga usa lamang ka lugas; apan kon kini mamatay, mamunga kinig daghan.”

Ang usa ka lugas wala kaayoy bili. Apan, unsa kahay mahitabo kon kini ibutang sa yuta ug “mamatay,” nagtapos sa iyang kinabuhi ingon nga liso? Nan kini moturok ug sa ulahi motubo nga lindog nga mamunga ug daghan, daghang lugas sa trigo. Sa susama, si Jesus maoy usa lamang ka hingpit nga tawo. Apan kon siya mamatay nga matinumanon sa Diyos, siya mahimong kasangkapan sa paghatag kinabuhing walay kataposan sa mga matinumanon kinsa adunay samang espiritu sa pagsakripisyo sa kaugalingon nga sama kaniya. Busa, si Jesus miingon: “Ang mahigugma sa iyang kalag mawad-an hinoon niini, apan ang magadumot sa iyang kalag niining kalibotana magpatunhay niini alang sa kinabuhing walay kataposan.”

Si Jesus sa dayag wala maghunahuna sa iyang kaugalingon lamang, kay siya sunod miingon: “Kon kinsa ang moalagad kanako, kinahanglan magasunod siya kanako, ug diin gani ako, ang akong alagad atua usab didto. Kon kinsa ang moalagad kanako, ang Amahan magapasidungog kaniya.” Pagkakatingalahang ganti tungod sa pagsunod kang Jesus ug sa pag-alagad kaniya! Kini maoy ganti sa pagkahimong pinasidunggan sa Amahan aron makig-uban kang Kristo diha sa Gingharian.

Nagpalandong bahin sa dakong pag-antos ug masakit nga kamatayon nga naghulat kaniya, si Jesus mipadayon: “Ug karon naguol ang akong kalag, ug unsa may akong igaingon? Amahan, luwasa ako gikan niining taknaa.” Kon malikayan pa lang unta kanang naghulat kaniya! Apan, dili, kay siya miingon: “Niining maong tuyo nahiabot ako niining taknaa.” Si Jesus nahiuyon sa bug-os nga kahikayan sa Diyos, apil ang iyang kaugalingon haladnong kamatayon. Mateo 21:12, 13, 18, 19; Marcos 11:12-18; Lucas 19:45-48; Juan 12:20-27.

▪ Nganong nagdahom si Jesus nga makakitag bunga sa igira bisan dili pa tempo niini?

▪ Nganong gitawag ni Jesus kadtong nanagpamaligya sa templo nga “mga tulisan”?

▪ Sa unsang paagi sama si Jesus sa lugas sa trigo nga namatay?

▪ Unsay gibati ni Jesus bahin sa pag-antos ug sa kamatayon nga naghulat kaniya?