Kapitulo 8

Mikalagiw Gikan sa Mapintas nga Hari

GIPUKAW ni Jose si Maria aron sultihan siya sa dinaliang balita. Mao pay pagpakita sa manulonda ni Jehova kaniya, nga nag-ingon: “Bangon, dad-a ang bata ug ang iyang inahan ug kumalagiw kamo ngadto sa Ehipto, ug pabilin didto hangtod ingnon ko ikaw; kay si Herodes mangita na sa bata aron sa pagpatay kaniya.”

Dihadiha, silang tulo mikalagiw. Ug igo ra gayod kadto sa panahon tungod kay nahibaloan ni Herodes nga gilansisan lang diay siya sa mga astrologo ug nakagawas na sa nasod. Hinumdomi, sila gipaabot nga motaho ug balik kaniya sa dihang ilang makit-an si Jesus. Nasuko kaayo si Herodes. Busa diha sa pagsulay sa pagpatay kang Jesus, siya nagsugo sa pagpatay sa tanang mga batang lalaki sa Bethlehem ug sa kasikbit nga mga dapit niini nga nagpanuigon gikan sa duha ka tuig ngadto sa ubos. Iyang gibase kining pagbanabana sa panuigon sumala sa iyang nakuhang impormasyon nga sayosayo gikan sa mga astrologo nga gikan sa Sidlakan.

Ang pagpamatay sa tanang batang mga lalaki makalilisang kaayong tan-awon! Gisulod sa mga sundalo ni Herodes ang tanang mga balay. Ug kon makakita silag batang lalaki, ilang sakmiton sila gikan sa mga bukton sa inahan. Kami walay ideya kon pila ka bata ang ilang gipamatay, apan ang dakong paghilak ug pagminatay sa mga inahan nagtuman sa tagna sa Bibliya pinaagi sa manalagna sa Diyos nga si Jeremias.

Kasamtangan, si Jose ug ang iyang pamilya luwas nga miabot sa Ehipto, ug sila sa maong panahon nagpuyo didto. Apan usa ka gabii ang manulonda ni Jehova mipakita na usab kang Jose diha sa usa ka damgo. “Bangon ug dad-a ang bata ug ang iyang inahan,” miingon ang manulonda, “ug balik ngadto sa yuta sa Israel, kay patay na ang nanagtinguha sa kalag sa bata.” Busa sa katumanan sa laing tagna sa Bibliya nga nag-ingon nga ang Anak sa Diyos pagatawgon gikan sa Ehipto, ang pamilya mipauli sa ilang lungsod.

Dayag nga si Jose buot mopuyo sa Judea, diin sila nagpuyo diha sa lungsod sa Bethlehem sa wala pa mikalagiw ngadto sa Ehipto. Apan iyang nahibaloan nga ang daotang anak nga lalaki ni Herodes nga si Arquelao mao na ang hari sa Judea, ug diha sa laing damgo gipasidan-an siya ni Jehova sa kapeligrohan. Busa si Jose ug ang iyang pamilya mipanaw pa amihanan ug nanimuyo sa lungsod sa Nazaret sa Galilea. Dinhi niining maong komunidad, halayo gikan sa sentro sa Hudiyonhon relihiyosong kinabuhi, nga si Jesus nagdako. Mateo 2:13-23; Jeremias 31:15; Oseas 11:1.

▪ Sa dihang ang mga astrologo wala na mobalik, unsang makalilisang butang ang gihimo ni Haring Herodes, apan sa unsang paagi napanalipdan si Jesus?

▪ Sa pagpamauli gikan sa Ehipto, nganong wala mopuyo pag-usab si Jose sa Bethlehem?

▪ Unsang mga tagna sa Bibliya ang natuman niining yugtoa sa panahon?