Kapitulo 128

Nabuhi si Jesus!

SA DIHANG nakita sa mga babaye nga walay sulod ang gilubngan ni Jesus, si Maria Magdalena midagan aron sultihan si Pedro ug Juan. Apan, ang ubang mga babaye dayag nagpabilin ra diha sa lubnganan. Sa wala magdugay, nagpakita ang usa ka manulonda ug gidapit sila sa pagsulod.

Dinhi nakita sa mga babaye ang laing manulonda, ug ang usa sa mga manulonda miingon kanila: “Ayaw kamo kahadlok, kay nasayod ako nga nangita kamo kang Jesus nga gilansang. Wala na siya dinhi, kay siya nabanhaw, sumala sa iyang giingon. Dali, tan-awa ang dapit nga iyang nahimutangan. Ug adtoa ninyo dayon ug sultihi ang iyang mga tinun-an nga siya nabanhaw na gikan sa mga patay.” Busa uban sa kahadlok ug dakong kalipay, nanagan kining mga babayehana.

Niining panahona, nakita na ni Maria si Pedro ug Juan, ug siya mitaho kanila: “Ilang gikuha ang Ginoo gikan sa memoryal nga lubnganan, ug kami wala masayod kon diin siya nila ibutang.” Dihadiha ang duha ka apostol nanagan. Si Juan mas kusog nga modagan—tungod kay mas bata pa—ug unang nakaabot sa lubnganan. Niining panahona nakalakaw na ang mga babaye, busa walay tawo sa palibot. Mitikuko, gilili ni Juan ang lubnganan ug iyang nakita ang mga bendahe, apan wala siya mosulod.

Sa miabot si Pedro, siya wala magpanuko ug misulod dayon. Iyang nakita didto ang mga bendahe ug ang panapton usab nga gigamit sa pagputos sa ulo ni Jesus. Kini gipilo diha sa usa ka daplin. Karon si Juan misulod usab sa lubnganan, ug siya mituo sa gibalita ni Maria. Apan wala makasabot si Pedro ug Juan nga si Jesus gibanhaw, bisan pa nga kanunay Niya nga gisultihan sila nga Siya banhawon. Naglibog, ang duha namauli, apan si Maria, nga mibalik sa lubnganan, nagpabilin.

Kasamtangan, ang ubang mga babaye nagdalidali sa pagbalita sa mga tinun-an nga si Jesus gibanhaw, sumala sa gisugo kanila sa mga manulonda. Samtang sila nanagan sa makusog, gitagbo sila ni Jesus ug miingon: “Maayong adlaw!” Miluhod sa iyang tiilan, ilang gisimba siya. Unya miingon si Jesus: “Ayaw kamo kahadlok! Lakaw kamo, ug ingna ang akong mga igsoon nga mangadto sila sa Galilea; ug didto makita nila ako.”

Sayosayo, sa naglinog ug nagpakita ang mga manulonda, ang mga sundalo nga nagbantay nakurat ug daw nahimong mga patay. Sa dihang naulian, miadto dayon sila sa siyudad ug gisultihan ang pangulong mga saserdote sa nahitabo. Human mikonsulta sa “mga tigulang” sa mga Hudiyo, ang desisyon mao ang pagpahilom sa nahitabo pinaagi sa paghiphip sa mga sundalo. Sila gisugo: “Isulti kini sa mga tawo, ‘ang Iyang mga tinun-an mitungha sa kagabhion ug ilang gikawat siya samtang nangatulog kami.’”

Sanglit ang Romanhong mga sundalo silotan man sa kamatayon kon makatulog samtang sila magbantay, ang mga saserdote misaad: “Kon kini [taho bahin sa inyong pagkatulog] makaabot sa mga dalunggan sa gobernador, kami ray mag-igo sa pagsulti kaniya ug wala na kamoy angay nga kabalak-an.” Sanglit dako mang kantidad ang gihiphip, gisunod sa mga sundalo ang gisugo kanila. Ingong resulta, ang dili tinuod nga taho nga gikawat ang lawas ni Jesus mikaylap taliwala sa mga Hudiyo.

Si Maria Magdalena, nga nagpabilin sa luyo sa lubnganan, nasubo sa hilabihan. Hain na man kaha si Jesus? Mitikubo sa pagtan-aw sa lubnganan, iyang nakita ang duha ka manulonda nga nagsapot ug puti, nagpakita na usab! Ang usa naglingkod sa ulohan ug ang usa sa tiilan sa nahimutangan sa lawas ni Jesus. “Babaye, nganong naghilak ka man?” sila nangutana.

“Ila man god nga gikuha ang akong Ginoo,” mitubag si Maria, “ug wala ako mahibalo kon diin nila gibutang siya.” Unya siya miliso ug nakita niya ang usa nga nangutana pag-usab: “Babaye, nganong naghilak ka man?” Ug kini siya nangutana usab: “Kinsay imong gipangita?”

Naghunahuna nga kini siya mao ang tig-atiman sa tanaman nga nahimutangan sa lubnganan, siya miingon kaniya: “Senyor, kon ikaw maoy nagkuha kaniya, tug-ani ako kon diin nimo siya ibutang, ug kuhaon ko siya.”

“Maria!” ang tawo miingon. Ug dihadiha siya nakaila, tungod sa iyang pamilyar nga pagpakigsulti kaniya, nga siya si Jesus. “Rab·boʹni!” (nagkahulogang “Magtutudlo!”) siya miingon. Ug uban sa dakong kalipay, siya mikupot kaniya. Apan si Jesus miingon: “Ayaw ako pagkupti. Kay ako wala pa makasaka ngadto sa Amahan. Apan adtoa ang akong mga igsoon ug suginli sila, ‘Ako mosaka sa akong Amahan ug sa inyong Amahan ug sa akong Diyos ug inyong Diyos.’”

Karon si Maria midagan sa gitigoman sa mga apostoles ug sa kaubang mga tinun-an. Gidugangan niya ang balita nga gisulti sa mga babaye mahitungod sa pagkakita sa gibanhaw nga si Jesus. Apan, kining mga lalaki, nga wala motuo sa nahaunang mga babaye, dayag nga wala usab motuo kang Maria. Mateo 28:3-15; Marcos 16:5-8; Lucas 24:4-12; Juan 20:2-18.

▪ Sa nakakita nga walay sulod ang lubnganan, unsay gibuhat ni Maria Magdalena, ug unsa ang naeksperyensiyahan sa ubang mga babaye?

▪ Unsay reaksiyon ni Pedro ug Juan sa nakita nila ang lubnganan nga walay sulod?

▪ Unsa ang naengkuwentro sa ubang mga babaye sa ilang pag-adto aron sa pagsugid sa mga tinun-an bahin sa pagkabanhaw ni Jesus?

▪ Unsay nahitabo sa mga sundalo nga guwardiya, ug unsay reaksiyon sa mga saserdote sa ilang taho?

▪ Unsay nahitabo sa nag-inusara si Maria Magdalena sa lubnganan, ug unsay reaksiyon sa mga tinun-an bahin sa balita sa mga babaye?