Kapitulo 85

Nagapangita sa Nangawala

SI Jesus maikagon sa pagpangita ug sa pagkaplag sa mga tawong mapainubsanong moalagad sa Diyos. Busa siya nangita ug nakigsulti sa tanan bahin sa Gingharian, lakip sa iladong mga makasasala. Kining mga tawhana karon miduol ug namati kaniya.

Nakakita niini, gisaway sa mga Pariseo ug mga eskriba si Jesus tungod kay nakig-uban niining matanga sa mga tawo nga ilang giisip nga dili-takos. Sila nanag-ingon: “Kining tawhana nagaabiabi sa mga makasasala ug nakigsalo kanila sa pagpangaon.” Ubos kaayo kini sa ilang dignidad! Gitagad sa mga Pariseo ug mga eskriba ang komung mga tawo samag hugaw nga ubos sa ilang mga tiil. Sa pagkatinuod, ilang gigamit ang Hebreohanong ekspresyong ‘am ha·’aʹrets, “mga tawo sa yuta [kalibotan],” sa pagpakita sa kasuko niining mga tawhana.

Sa laing bahin, gitagad ni Jesus ang tanan nga may dignidad, kalulot, ug kaluoy. Ingong resulta, daghan niining mga tawong ubos, lakip sa mga tawo nga ilado nga nagahimog daotan, maikagong namati kaniya. Apan unsay ikasulti bahin sa pagsaway sa mga Pariseo kang Jesus tungod sa paghago alang niadtong ilang gilantawng dili-takos?

Gitubag ni Jesus ang ilang pagtutol pinaagi sa paggamit ug usa ka sambingay. Siya misulti gikan sa ilang kaugalingong panghunahuna sa mga Pariseo, ingon nga daw sila matarong ug luwas diha sa panon sa Diyos, samtang ang talamayong ‘am ha·’aʹrets nahisalaag ug anaa sa nawalang kahimtang. Pamati samtang siya nangutana:

“Kinsa bang tawhana kaninyo nga may usa ka gatos ka karnero, nga kon kawad-an siyag usa ka buok kanila, dili mobiya sa kasiyaman ug siyam diha sa kamingawan ug moadto sa pagpangita niadtong usa nga nawala? Sa iya na kining makaplagan kini pas-anon niya nga malipayon diha sa iyang mga abaga. Ug sa mahiuli na siya sa balay iyang tawgon ang iyang mga higala ug mga silingan, ug ingnon sila, ‘Pangalipay kamo uban nako, kay hingkaplagan ko ang akong karnero nga nawala.’”

Dayon gipadapat ni Jesus ang iyang sugilanon, nga nagbatbat: “Mao nga sultihan ko kamo nga sa ingon usab niana may labi pang kalipay unya didto sa langit tungod sa usa ka makasasala nga magahinulsol kay sa tungod sa kasiyaman ug siyam ka tawong matarong nga wala magkinahanglan sa paghinulsol.”

Giisip sa mga Pariseo ang ilang kaugalingon nga matarong ug busa wala magkinahanglan sa paghinulsol. Sa dihang gisaway sa pipila kanila si Jesus sa pila ka tuig nga milabay tungod kay nakigsalo sa pagpangaon uban sa mga maniningil ug buhis ug sa mga makasasala, iyang gisultihan sila: “Ako mianhi dili sa pagtawag sa mga matarong, kondili sa mga makasasala.” Ang nagpakamatarong sa kaugalingon nga mga Pariseo, kinsa napakyas sa pagkakita sa ilang panginahanglan sa paghinulsol, wala mohatag kalipay sa langit. Apan nakahatag kalipay ang tinuod nga mga mahinulsolong mga makasasala.

Aron dugang mapalig-on ang punto nga ang pagpasig-uli sa nangawalang mga makasasala mohatag dakong kalipay, miasoy si Jesus ug laing sambingay. Siya miingon: “Kinsa bang babayehana nga may napulo ka drakma, nga kon kawad-an siyag usa ka drakma, dili modagkot ug suga ug silhigan niya ang balay ug iya kining pangitaon pag-ayo hangtod nga iyang makaplagan? Ug sa makaplagan na niya kini iyang tawgon ang iyang mga higalang babaye ug mga silingan, ug magaingon, ‘Pangalipay kamo uban nako, kay hingkaplagan ko ang drakma nga nawala.’”

Dayon mihatag si Jesus ug samang aplikasyon. Siya mipadayon sa pag-ingon: “Busa, sultihan ko kamo, nga sa ingon usab niana may kalipay unya sa atubangan sa mga manulonda sa Diyos tungod sa usa ka makasasala nga magahinulsol.”

Pagkatagsaon kining mahigugmaong kabalaka sa mga manulonda sa Diyos aron mapasig-uli ang nangawalang mga makasasala! Ilabina kay kining mga ubos niadto, ang tinamayng ‘am ha·’aʹrets sa ulahi nahilinya sa pagkahimong membro sa langitnong Gingharian sa Diyos. Ingong resulta, ilang makab-ot ang posisyon sa langit nga mas taas kay sa mga manulonda mismo! Apan inay masina o masilo, ang mga manulonda mapainubsanong nagapabili sa kamatuoran nga kining makasasalang mga tawo nakaatubang ug nakabuntog sa mga kahimtang sa kinabuhi nga mosangkap kanila sa pag-alagad ingong may simpatiya ug maluluy-ong langitnong mga hari ug mga saserdote. Lucas 15:1-10; Mateo 9:13; 1 Corinto 6:2, 3; Pinadayag 20:6.

▪ Nganong nakig-uban si Jesus sa iladong mga makasasala, ug unsang pagsaway ang iyang nakuha gikan sa mga Pariseo?

▪ Unsay paglantaw sa mga Pariseo sa komung mga tawo?

▪ Unsang mga sambingay ang gigamit ni Jesus, ug unsay atong makat-onan gikan kanila?

▪ Nganong tagsaon ang kalipay sa mga manulonda?