Kapitulo 33

Nagtuman sa Tagna ni Isaias

HUMAN nga nahibaloan ni Jesus nga ang mga Pariseo ug ang partido sa mga sumusunod ni Herodes nagplano sa pagpatay kaniya, siya ug ang iyang mga tinun-an mipaingon sa Dagat sa Galilea. Dinhi ang mga tawo sa tibuok Palestina, ug bisan sa gawas sa mga utlanan niini, midugok kaniya. Daghan ang iyang giayo, busa ang tanang grabe ug sakit nagdinutdotay aron makahikap kaniya.

Sanglit daghan man kaayo ang mga tawo, gisugo ni Jesus ang iyang mga tinun-an sa pag-andam ug sakayan nga iyang magamit dayon. Tungod kay nagpalayo gikan sa baybayon, iyang nalikayan ang panon sa mga tawo sa pagdutdot kaniya. Siya makahimo sa pagtudlo kanila gikan sa sakayan o sa pagbiyahe ngadto sa laing lugar diha sa daplin sa baybayon aron tabangan ang mga tawo didto.

Ang tinun-ang si Mateo nakamatikod nga ang kalihokan ni Jesus nagtuman “sa gisulti ni propetang Isaias.” Unya mikutlo si Mateo sa tagna nga gituman ni Jesus:

“Tan-awa! Ang sulogoon ko nga akong pinili, akong pinalangga, nga gikahimut-an sa akong kalag! Ipakunsad ko ang akong espiritu diha kaniya, ug ang hustisya iyang ipatin-aw ngadto sa kanasoran. Dili siya makiglalis, ni mosinggit, ug dili mo madunggan ang iyang tingog diha sa dagkong kadalanan. Dili gani siya mobali bisan sa tangbo nga nabasag na, ni mopalong siya bisan sa pabilo nga nagkaawop na, hangtod nga padag-on niya ang hustisya. Sa pagkatinuod, sa iyang ngalan managlaom ang kanasoran.”

Matuod, si Jesus, mao ang pinalanggang sulogoon nga gikahimut-an sa Diyos. Ug gipatin-aw ni Jesus kon unsa ang tinuod nga hustisya, nga gilubog sa bakak nga relihiyosong mga tradisyon. Tungod sa ilang dili-matarong nga pagpadapat sa kasugoan sa Diyos, ang mga Pariseo dili gani moduol sa pagtabang sa mga masakiton sa adlaw nga Igpapahulay! Gipatin-aw ang hustisya sa Diyos, gihumpay ni Jesus ang katawhan gikan sa palas-anon sa dili-matarong nga mga tradisyon, ug tungod niini, ang relihiyosong mga pangulo naningkamot sa pagpatay kaniya.

Unsay kahulogan nga ‘siya dili makiglalis, ni mopadako sa iyang tingog aron dili madunggan diha sa dagkong kadalanan’? Sa dihang giayo ang mga tawo, si Jesus ‘nagpina kanila sa dili pagsugilon kon kinsa siya.’ Dili siya gusto ug masabang paanunsiyo sa iyang kaugalingon diha sa kadalanan o makabaton ug tinuis nga mga taho nga maikagong ipasa gikan sa baba ug baba.

Dugang pa, gidala ni Jesus ang iyang makapalipay nga balita ngadto sa mga tawo nga sa mahulagwayon sama sa tangbo nga nabasag, nabawog ug nayatakan. Sila sama sa nagkaawop nga pabilo, kansang kataposang pangidlap sa kinabuhi hapit nang mapalong. Si Jesus dili magabali sa tangbo nga nabasag na o mopalong sa nagpid-ok-pid-ok, nag-asong pabilo. Apan uban sa kalulot ug gugma, mahanason niyang gituboy ang mga maaghop. Tinuod, si Jesus mao ang usa nga pagalaoman sa kanasoran! Mateo 12:15-21; Marcos 3:7-12; Isaias 42:1-4.

▪ Sa unsang paagi gipatin-aw ni Jesus ang hustisya, nga dili siya makiglalis o mopadako sa iyang tingog diha sa dagkong kadalanan?

▪ Kinsa ang sama sa tangbo nga nabasag na ug sa pabilo, ug unsay pagtratar ni Jesus kanila?