Kapitulo 31

Nangutlog Uhay sa Igpapahulay

WALA magdugay si Jesus ug ang iyang mga tinun-an mihawa sa Jerusalem aron mobalik sa Galilea. Panahon kadto sa tingpamulak, ug ang mga trigo sa kaumahan didto nanguhay. Gipanggutom ang mga tinun-an. Busa sila nangutlog mga uhay ug nangaon. Sanglit Igpapahulay man kadto, namatikdan ang ilang gihimo.

Ang relihiyosong mga pangulo sa Jerusalem bag-o pang naglaraw sa pagpatay kang Jesus tungod sa gisumbong nga paglapas sa Igpapahulay. Karon ang mga Pariseo miakusar. “Tan-awa ra! Ang imong mga tinun-an nagahimo sa supak nga pagabuhaton sa adlaw nga igpapahulay,” sila misumbong.

Ang mga Pariseo nag-ingon nga ang pagpangutlog uhay ug pagbagnod niini sa kamot aron kaonon maoy pag-ani ug paggiok. Apan ang ilang hingaping interpretasyon sa kon unsa ang matawag nga trabaho maoy nakahimo sa Igpapahulay nga mabudlay, sanglit gilaraw man unta kini nga usa ka malipayon, makapalig-on sa espirituwal nga panahon. Busa mitubag si Jesus pinaagi sa Kasulatanhong mga pananglitan sa pagpakita nga dili katuyoan ni Jehova nga Diyos ang maong hingaping pagpasunod sa Iyang kasugoan sa Igpapahulay.

Si Jesus miingon nga sa dihang gigutom si David ug ang iyang mga kauban, sila mihunong sa tabernakulo ug mikaon sa mga tinapay nga gihalad. Ang maong mga tinapay gikabutang na sa atubangan ni Jehova ug gipulihan ug bag-ong mga tinapay, ug sa kasagaran ginareserba kadto aron pagakan-on sa mga saserdote. Apan, ilalom sa mga sirkumstansiya, wala hukmi si David ug ang iyang kauban sa pagkaon niadto.

Mihatag ug laing pananglitan, si Jesus miingon: “Wala ba ninyo hibasahi sa Kasugoan nga sa adlaw nga igpapahulay ang mga saserdote sulod sa templo nagtagad sa igpapahulay nga dili balaan apan wala sila makasala?” Oo, bisan sa Igpapahulay ang mga saserdote padayong nanag-ihaw ug naghimog ubang mga buluhaton diha sa templo sa pagpangandam sa mga halad nga mananap! “Apan sultihan ko kamo,” miingon si Jesus, “nga aniay usa karon dinhi nga labaw pa kay sa templo.”

Gitambagan ang mga Pariseo, si Jesus mipadayon: “Kon kamo nakasabot pa lamang sa kahulogan niini, ‘Maoy kahimut-an ko ang pagkaluoy, ug dili ang halad,’ dili unta ninyo hukman ang mga walay sala.” Unya siya mihinapos: “Kay ang Anak sa tawo mao ang Ginoo sa igpapahulay.” Unsay buot ipasabot ni Jesus niadto? Naghisgot si Jesus sa iyang malinawong pagmando sa Gingharian sa usa ka libo ka tuig.

Sulod na sa 6,000 ka tuig karon, ang katawhan nag-antos sa mabudlayng pagkaulipon ilalom kang Satanas nga Yawa, uban sa kabangisan ug gubat nga maoy pagkabutang karon. Sa laing bahin, ang dakong pagmando sa Igpapahulay ni Kristo maoy panahon sa pagpahulay gikan sa tanang pag-antos ug paglupig. Mateo 12:1-8; Levitico 24:5-9; 1 Samuel 21:1-6; Numeros 28:9; Oseas 6:6.

▪ Unsang sumbong ang gihimo batok sa mga tinun-an ni Jesus, ug sa unsang paagi gitubag ni Jesus kadto?

▪ Unsang kapakyasan sa mga Pariseo ang gipaila ni Jesus?

▪ Sa unsang paagi si Jesus mao ang “Ginoo sa igpapahulay”?