Kapitulo 50

Pag-andam sa Pag-atubang sa Paglutos

TAPOS sa pagpahimangno sa iyang mga apostol bahin sa mga paagi sa pagtuman sa buluhaton sa pagwali, si Jesus nagpasidaan kanila mahitungod sa mga magsusupak. Siya nag-ingon: “Tan-awa! ipadala ko kamo nga daw mga karnero taliwala sa mga lobo . . . Magbantay kamo sa mga tawo; kay kamo igatugyan sa lokal nga mga hukmanan, ug kamo ilang pagahampakon sulod sa ilang mga sinagoga. Aw, kamo pagataralon ngadto sa atubangan sa mga gobernador ug sa mga hari tungod kanako.”

Bisan sa grabeng paglutos nga atubangon sa iyang mga sumusunod, si Jesus mapasaligong misaad: “Sa diha nga kamo igatugyan na nila, ayaw kamo pagkabalaka kon unsaon ninyo pagsulti o kon unsay inyong igasulti; kay ang inyong igasulti igahatag kaninyo niadtong taknaa; kay dili man kamo ang magasulti, kondili ang espiritu sa inyong Amahan pinaagi kaninyo.”

“Dugang pa,” si Jesus nagpadayon, “ang igsoon magatugyan sa igsoon ngadto sa kamatayon, ug ang amahan magatugyan sa iyang anak, ug ang mga anak motindog batok sa mga ginikanan ug magapapatay kanila.” Siya midugang: “Pagadumtan kamo sa tanang tawo tungod sa akong ngalan; apan ang molahutay hangtod sa kataposan mamaluwas.”

Ang pagwali bililhon kaayo. Tungod niini nga katarongan nga gipasiugda ni Jesus nga kinahanglan ang pagkamabinantayon aron magpabiling may kagawasan sa pagpadayon sa buluhaton. “Sa diha nga lutoson kamo sa usa ka siyudad, pangagiw kamo ngadto sa lain,” siya nag-ingon, “kay sa pagkatinuod magaingon ako kaninyo, Dili ninyo mahurot ang paglibot sa mga siyudad sa Israel hangtod nga magaabot na ang Anak sa tawo.”

Matuod nga gihatag ni Jesus kining pahimangno, pasidaan, ug pagdasig ngadto sa iyang 12 ka apostol, apan kini alang usab niadtong moapil sa tibuok-kalibotang pagwali tapos sa iyang kamatayon ug pagkabanhaw. Kini gipakita pinaagi sa iyang pag-ingon nga ang iyang mga tinun-an ‘pagadumtan sa tanang tawo,’ dili ra sa mga Israelinhon kang kinsa ang mga apostol gipadala aron sa pagwali. Dugang pa, lagmit ang mga apostol wala tarala sa atubangan sa mga gobernador ug mga hari sa gipadala sila ni Jesus sa ilang kadiyut nga kampanya sa pagwali. Gawas pa, ang mga magtutuo niadto wala itugyan sa kamatayon pinaagig mga sakop sa pamilya.

Busa sa pag-ingon nga ang iyang mga tinun-an dili makatapos sa ilang paglibot sa pagwali “hangtod nga magaabot ang Anak sa tawo,” si Jesus matagnaong nagpahayag nga ang iyang mga tinun-an dili makahurot sa paglibot sa tibuok gipuy-ang yuta uban sa pagwali sa natukod nga Gingharian sa Diyos una pa moabot ang hinimayang Haring Jesu-Kristo ingong tiglaglag nga opisyal ni Jehova panahon sa Armageddon.

Sa pagpadayon sa iyang mga pahimangno bahin sa pagwali, si Jesus nag-ingon: “Ang tinun-an dili labaw sa iyang magtutudlo, ni ang ulipon labaw sa iyang agalon.” Busa kinahanglang laoman sa mga sumusunod ni Jesus nga madawat ang samang daotang tratasyon ug paglutos sama sa iyang nadawat tungod sa pagwali sa Gingharian sa Diyos. Bisan pa niana siya mitambag: “Ayaw ninyo pagkahadloki sila nga magapatay sa lawas apan dili makapatay sa kalag; mao hinuoy kahadloki siya nga makalaglag sa kalag ug lawas sa Gehenna.”

Si Jesus mihatag sa panig-ingnan niining butanga. Sa kawalay-kahadlok iyang giantos ang kamatayon inay ikompromiso ang iyang pagkamaunongon ngadto sa Usa nga may tanang gahom, si Jehova nga Diyos. Oo, si Jehova makalaglag sa “kalag” sa usa (nga nagkahulogan niining kasoha sa umaabot nga mga kalaoman sa usa ingong buhing kalag) o makabanhaw pa sa usa ka tawo aron makapahimulos sa kinabuhing walay kataposan. Pagkamahigugmaon, maluluy-ong langitnong Amahan si Jehova!

Si Jesus sunod nagdasig sa iyang mga tinun-an uban ang usa ka ilustrasyon nga nagapasiugda sa mahigugmaong pag-atiman ni Jehova kanila. “Dili ba ang duha ka maya ginabaligya man lamang sa usa ra ka diyot?” siya nangutana. “Ngani walay mausa kanila ang mahulog sa yuta nga dili mahibaloan sa inyong Amahan. Apan ang mga buhok mismo sa inyong ulo ang tanan inihap. Busa ayaw kamo pagkahadlok: kamo labaw pag bili kay sa daghang maya.”

Ang mensahe sa Gingharian nga gisugo ni Jesus nga imantala sa iyang mga tinun-an magbahin sa mga panimalay, kay ang pila ka sakop sa pamilya magadawat niini ug ang uban magasalikway niini. “Ayaw kamo paghunahuna nga ako mianhi sa pagdalag kalinaw sa yuta,” siya mipatin-aw. “Ako mianhi sa pagdala, dili sa kalinaw, kondili sa espada hinuon.” Busa, kinahanglan ang kaisog aron ang usa ka sakop sa pamilya modawat sa kamatuoran sa Bibliya. “Siya nga labaw ug gugma sa amahan o inahan kay kanako dili takos kanako,” mipahayag si Jesus, “ug siya nga labaw ug gugma sa anak lalaki o anak babaye kay kanako dili takos kanako.”

Sa pagtapos sa iyang mga pahimangno, si Jesus mipatin-aw nga kadtong magadawat sa iyang mga tinun-an magadawat usab kaniya. “Ug bisan kinsa nga magahatag sa usa lamang ka tasa sa mabugnaw nga tubig aron mainom tungod kay siya usa ka tinun-an, sa pagkatinuod ako magaingon kaninyo, siya dili gayod kawad-an sa iyang balos.” Mateo 10:16-42.

▪ Unsang mga pasidaan ang gihatag ni Jesus sa iyang mga tinun-an?

▪ Unsang pagdasig ug paglipay ang iyang gihatag kanila?

▪ Nganong ang mga pahimangno ni Jesus mapadapat usab sa mga Kristohanon karon?

▪ Sa unsang paagi ang tinun-an ni Jesus dili labaw sa iyang magtutudlo?