Kapitulo 70

Pag-ayo sa Usa ka Tawong Natawo nga Buta

SA DIHANG gisulayan sa mga Hudiyo ang pagbato kang Jesus, siya wala mobiya sa Jerusalem. Sa ulahi, sa Igpapahulay, siya ug ang iyang mga tinun-an naglakaw sa siyudad sa dihang ilang nakita ang usa ka tawo nga buta sukad sa pagkatawo. Ang tinun-an nangutana kang Jesus: “Rabbi, kinsa ang nakasala, kining tawhana o ang iyang mga ginikanan, mao nga siya natawo nga buta?”

Tingali ang mga tinun-an nagtuo, sumala sa gituohan sa pila ka rabbi, nga ang usa ka tawo mahimong makasala diha sa tagoangkan sa iyang inahan. Apan si Jesus mitubag: “Ni kining tawhana o ang iyang mga ginikanan nakasala, apan aron ang mga buhat sa Diyos ikapadayag sa iyang kahimtang.” Ang pagkabuta sa tawo dili mao ang sangpotanan sa usa ka tinong sayop o sala nga nahimo sa tawo o sa iyang mga ginikanan. Ang sala sa unang tawong si Adan misangpot nga ang tanang tawo dili hingpit, ug sa ingon nailalom sa mga depekto sama sa pagkatawo nga buta. Ang maong depekto sa tawo sa maong panahon nagtaganag higayon nga ikapaila ni Jesus ang mga buhat sa Diyos.

Gipasiugda ni Jesus ang pagkadinalian sa pagbuhat sa maong mga buhat. “Kinahanglang atong buhaton ang mga buhat sa nagpadala kanako samtang adlaw pa,” siya nag-ingon. “Ang gabii taliabot sa dihang walay tawo ang makabuhat. Samtang ako ania sa kalibotan, ako mao ang kahayag sa kalibotan.” Sa wala madugay ang pagkamatay ni Jesus nagbalhog kaniya ngadto sa kangitngitan sa lubnganan diin siya dili na makabuhat sa bisan unsa. Kasamtangan, siya maoy usa ka tinubdan sa kahayag sa kalibotan.

Tapos sa pagsulti niadtong mga butanga, nanglowa si Jesus sa yuta ug pinaagi sa laway mihimog diyutayng lapok. Iya kadtong gipahid sa mga mata sa tawong buta ug miingon: “Umadto ka ug manghilam-os sa lanaw sa Siloam.” Ang tawo misugot. Ug sa dihang siya nanghilam-os, siya nakakita na! Dako gayod ang iyang kalipay sa iyang paghibalik, kay nakakita sa unang panahon sa iyang kinabuhi!

Ang mga silingan ug uban nga nakaila kaniya nahibulong. “Kini mao ang tawo nga tiglingkod ug tigpakilimos, dili ba?” sila nangutana. “Mao kana siya,” mitubag ang pipila. Apan ang uban dili makatuo niana: “Dili gayod, apan siya kaamgid niya.” Apan ang tawo miingon: “Ako mao siya.”

“Nan, naunsa ba nga nabuka ang imong mga mata?” buot masayod ang mga tawo.

“Ang tawong ginganlag si Jesus mihimog lapok ug nagpahid niana sa akong mga mata ug miingon kanako, ‘Umadto ka sa Siloam ug manghilam-os.’ Busa ako miadto ug nanghilam-os ug nakakita na.”

“Hain man ang maong tawo?” sila nangutana.

“Ambut,” siya mitubag.

Ang mga tawo sa maong panahon nagdala sa tawong sa nangagi buta ngadto sa ilang relihiyosong mga pangulo, ang mga Pariseo. Sila nangutana usab kaniya sa unsang paagi siya nakakita. “Siya nagpahid ug lapok sa akong mga mata, ug ako nanghilam-os ug nakakita,” misaysay ang tawo.

Segurado, angay gayod ang mga Pariseo magkalipay duyog sa makililimos nga giayo! Apan, ila hinuong gisaway si Jesus. “Kining tawhana dili gikan sa Diyos,” sila miangkon. Nganong miingon sila niadto? “Tungod kay siya wala magbantay sa Igpapahulay.” Ug bisan pa niana ang ubang Pariseo nahibulong: “Sa unsang paagi ang usa ka tawo nga makasasala makahimog mga ilhanan sa maong matang?” Busa may pagkabahin taliwala kanila.

Busa, sila nangutana sa tawo: “Unsay imong ikasulti bahin kaniya, sa pagkakitang iyang gibuka ang imong mga mata?”

“Siya usa ka manalagna,” siya mitubag.

Ang mga Pariseo dili motuo niana. Sila kombinsido nga may sekretong panagsabot tali ni Jesus ug sa maong tawo aron sa paglimbong sa mga tawo. Busa aron masulbad ang butang, ilang gipatawag ang mga ginikanan sa makililimos aron sa pagsukit kanila. Juan 8:59; 9:1-18.

▪ Unsay hinungdan sa pagkabuta sa tawo, ug unsay dili mao ang hinungdan?

▪ Unsa ang gabii nga walay tawong makabuhat?

▪ Sa dihang giayo ang tawo, unsa ang reaksiyon niadtong nakaila kaniya?

▪ Sa unsang paagi ang mga Pariseo nabahin mahitungod sa pagkaayo sa tawo?