Kapitulo 51

Pagpatay sa Panahon sa Kombira sa Adlawng Natawhan

HUMAN sa paghatag ug mga tugon sa iyang mga apostoles, gipadala sila ni Jesus sa teritoryo nga tinagurha. Tingali ang magsoong Pedro ug Andres nagkuyog, ingon man si Santiago ug Juan, si Felipe ug Bartolome, si Tomas ug Mateo, si Santiago ug Tadeo, ug si Simon ug Judas Iscariote. Ang unom ka parisang mga ebanghelisador nagmantala sa maayong balita sa Gingharian ug mihimog milagrosong mga pagpanambal bisan asa sila miadto.

Kasamtangan, si Juan Bautista atua pa gihapon sa bilanggoan. Halos duha na ka tuig siya didto. Tingali imong mahinumdoman nga giyagyag ni Juan sa katilingban nga daotan alang kang Herodes Antipas sa pagkuha kang Herodias, nga asawa sa iyang igsoong si Felipe, ingong iyang asawa. Sanglit nangangkon man si Herodes Antipas nga nagbantay sa Moisesnong Kasugoan, hayan tukmang giladlad ni Juan kining pagpanapaw. Busa gipabilanggo ni Herodes si Juan, tingali sa paghulhog ni Herodias.

Nahibalo si Herodes Antipas nga matarong nga tawo si Juan ug gani malipay nga mamati kaniya. Busa, naglibog siya kon unsay iyang buhaton kaniya. Si Herodias, sa laing bahin, nagdumot kang Juan ug nangitag paagi sa pagpatay kaniya. Sa kataposan, mitungha ang higayon nga iyang gipaabot.

Sa wala pa ang Paskuwa sa 32 K.P., naghikay si Herodes ug dakong kombira alang sa kasumaran sa iyang adlawng natawhan. Nagtigom alang sa salosalo ang tanang taas ug ranggong mga opisyal ni Herodes ug ang mga opisyal sa kasundalohan, ug ang prominenteng mga lungsoranon sa Galilea. Sa naglakat ang gabii, si Salome, nga dalagitang anak ni Herodias sa iyang unang banang si Felipe, gikuha aron pasayawon alang sa mga dinapit. Nabihag ang mga lalaki nga nakakita sa iyang pagsayaw.

Nalipay kaayo si Herodes kang Salome. “Pangayo kanako bisan unsay imong gusto, ug akong ihatag kini kanimo,” siya miingon. Siya nanumpa pa gani: “Bisan unsay imong pangayoon kanako, akong ihatag kanimo, bisan ang katunga sa akong gingharian.”

Sa wala pa motubag, miadto si Salome sa pagpangutana sa iyang inahan. “Unsay akong pangayoon?” siya miingon.

Mao na kini ang higayon! “Ang ulo ni Juan nga tigbawtismo,” dihadihang mitubag si Herodias.

Mibalik dayon si Salome kang Herodes ug nangayo: “Gusto kong ihatag kanako karon dayon diha sa bandiha ang ulo ni Juan Bautista.”

Nasubo kaayo si Herodes. Apan tungod kay nakadungog man ang iyang mga dinapit sa iyang panumpa, maulaw siya sa dili paghatag niini, bisag nagkahulogan kini sa pagpatay ug tawong walay sala. Gipadala dayon ang berdugo ngadto sa bilanggoan nga may mangilngig nga mga tugon. Siya mibalik nga nagdala sa ulo ni Juan diha sa bandiha, ug iyang gitunol kini ngadto kang Salome. Sa baylo, gidala kini niya ngadto sa iyang inahan. Sa dihang nadunggan sa mga disipulo ni Juan ang nahitabo, miabot sila ug gikuha ang iyang lawas ug gilubong kadto, ug dayon ilang gitaho kining butanga kang Jesus.

Sa ulahi, dihang nadunggan ni Herodes nga nanagpang-ayog mga sakit si Jesus ug nagpagawas ug mga demonyo, nalisang siya, nahadlok nga si Jesus sa aktuwal mao si Juan nga mibangon gikan sa mga patay. Tapos niadto, dako kaayo ang iyang tinguhang makigkita kang Jesus, dili sa pagpamati sa iyang wali, kondili sa pagsusi kon aduna ug wala bay pasikaranan ang iyang mga kahadlok. Mateo 10:1-5; 11:1; 14:1-12; Marcos 6:14-29; Lucas 9:7-9.

▪ Nganong nabilanggo si Juan, ug nganong dili gustong mopatay kaniya si Herodes?

▪ Sa unsang paagi milampos sa kataposan si Herodias sa pagpatay kang Juan?

▪ Tapos nga namatay si Juan, nganong nagtinguha si Herodes nga makigkita kang Jesus?