Kapitulo 30

Pagtubag sa Iyang mga Magsusumbong

SA DIHANG gisumbong sa Hudiyong mga relihiyosong pangulo si Jesus sa paglapas sa Igpapahulay, siya mitubag: “Ang akong Amahan nagapadayon sa pagbuhat hangtod karon, ug ako nagapadayon sa pagbuhat.”

Bisan sa giingon sa mga Pariseo, ang buhat ni Jesus dili mao ang matang gidili sa kasugoan sa Igpapahulay. Ang iyang buluhaton sa pagsangyaw ug pagpang-ayo maoy tinudlong-buluhaton gikan sa Diyos, ug sa pagsundog sa panig-ingnan sa Diyos, siya nagpadayon sa pagbuhat niana sa kada adlaw. Bisan pa niana, ang iyang tubag labaw pang nakapasuko sa mga Hudiyo kay sa nangagi, ug sila nagtinguha sa pagpatay kaniya. Ngano?

Kadto tungod kay sa maong panahon sila wala lamang magtuo nga si Jesus naglapas sa Igpapahulay apan nag-isip nga usa ka pasipala ang iyang pag-angkon nga siya personal nga Anak sa Diyos. Bisan pa niana, si Jesus wala mahadlok ug nagtubag kanila sa dugang pa mahitungod sa iyang pinaborang relasyon uban sa Diyos. “Ang Amahan nahigugma sa Anak,” siya miingon, “ug nagapakita kaniya sa tanang butang iya mismong ginabuhat.”

“Maingon nga ang Amahan nagabanhaw sa mga patay,” si Jesus mipadayon, “busa ang Anak nagabuhi usab niadtong buot niya.” Sa pagkamatuod, ang Anak nagabanhaw na sa mga patay sa espirituwal nga paagi! “Ang nagapatalinghog sa akong pulong ug nagtuo sa nagpadala kanako,” matud ni Jesus, “nabalhin na gikan sa kamatayon ngadto sa kinabuhi.” Oo, siya mipadayon: “Ang takna nagsingabot, ug karon mao na, nga ang mga patay makabati sa tingog sa Anak sa Diyos ug kadtong nagapatalinghog mabuhi.”

Bisan pag walay rekord nga si Jesus sa literal nagbanhaw ni bisan kinsa gikan sa mga patay hangtod niadto, siya nagsulti sa iyang mga magsusumbong nga ang maong literal nga pagkabanhaw sa mga patay mahitabo. “Ayaw kahibulong niini,” siya miingon, “kay ang takna nagsingabot nga ang tanang anaa sa handumanang mga lubnganan makabati sa iyang tingog ug manggula.”

Bisan hangtod sa maong panahon, si Jesus lagmit wala pa magbatbat sa dayag sa iyang hinungdanong papel diha sa katuyoan sa Diyos sa linain ug tino nga paagi. Apan nabatonan sa mga magsusumbong ni Jesus ang labaw kay sa pamatuod niya mismo nianang mga butanga. “Kamo nagsugo ug mga tawo ngadto kang Juan,” si Jesus nagpahinumdom kanila, “ug siya nagpamatuod sa kamatuoran.”

Duha ra ka tuig nga miagi, gisultihan ni Juan Bautista ang maong Hudiyong relihiyosong mga pangulo mahitungod sa Usa nga moabot sunod niya. Sa pagpahinumdom kanila bahin sa ilang hataas nga pagtahod sa nangagi sa gibilanggo na nga si Juan, si Jesus miingon: “Kamo sa kadiyut nga panahon andam sa pagkalipay ug dako sa iyang kahayag.” Gipahinumdom kadto ni Jesus sa ilang mga hunahuna sa paglaom nga tabangan, oo, luwason sila. Apan wala siya mosalig sa pamatuod ni Juan.

“Ang mga buhat mismo nga akong ginabuhat [apil ang milagro nga bag-o pa niyang gihimo] nagapamatuod mahitungod kanako nga ang Amahan nagsugo kanako.” Apan gawas pa niana, si Jesus nagpadayon: “Ang Amahan nga nagpadala kanako nagpamatuod mismo mahitungod kanako.” Ang Diyos nagpamatuod mahitungod kang Jesus, pananglitan, sa panahon sa pagbawtismo kaniya, nga miingon: “Kini ang akong Anak, ang pinalangga.”

Sa pagkamatuod, ang mga magsusumbong ni Jesus walay katarongan sa pagsalikway kaniya. Ang Kasulatan mismo nga ilang giingong ilang gisusi nagpamatuod mahitungod kaniya! “Kon kamo nagtuo kang Moises kamo motuo kanako,” mihinapos si Jesus, “kay siya nagsulat mahitungod kanako. Apan kon dili kamo motuo sa mga sinulat niya, unsaon ninyo pagtuo sa akong mga pulong?” Juan 5:17-47; 1:19-27; Mateo 3:17.

▪ Nganong ang buhat ni Jesus dili paglapas sa Igpapahulay?

▪ Giunsa pagbatbat ni Jesus ang iyang hinungdanong papel diha sa katuyoan sa Diyos?

▪ Sa pagpamatuod nga siya Anak sa Diyos, kansang pamatuod ang gipunting ni Jesus?