Kapitulo 93

Sa Dihang Gipadayag ang Anak sa Tawo

SAMTANG didto pa si Jesus sa amihanan (sa Samaria o sa Galilea), ang mga Pariseo nangutana kaniya bahin sa pag-abot sa Gingharian. Sila nagtuo nga kini moabot uban ang dakong pagawal ug seremoniya, apan si Jesus miingon: “Ang gingharian sa Diyos moabot nga dili pagaubanan sa mga tilimad-on nga mapaniid, ug dili usab moingon ang mga tawo, ‘Dia ra!’ o, ‘Tua ra!’ Kay, tan-awa! ang gingharian sa Diyos anaa ra sa taliwala kaninyo.”

Ang mga pulong ni Jesus “anaa ra sa taliwala kaninyo” usahay gihubad “sulod kaninyo.” Ang uban nagtuo nga ang gipasabot ni Jesus nga ang Gingharian sa Diyos naghari na diha sa mga kasingkasing sa mga alagad sa Diyos. Apan, sa dayag, ang Gingharian sa Diyos wala diha sulod sa mga kasingkasing niining dili-magtutuo nga mga Pariseo nga gipakigsultihan ni Jesus. Bisan pa, kini anaa sa ilang taliwala, sanglit ang gitudlong Hari sa Gingharian sa Diyos, si Jesu-Kristo, anaa sa ilang tunga.

Hayan sa nakalakaw na ang mga Pariseo nga dugang gihisgotan ni Jesus uban sa iyang mga tinun-an ang bahin sa umaabot nga Gingharian. Anaa sa iyang hunahuna ang iyang umaabot nga presensiya sa gahom sa Gingharian sa dihang siya mipasidaan: “Ang mga tawo manag-ingon unya kaninyo, ‘Tua ra!’ o, ‘Dia ra!’ Ayaw gayod kamo pag-adto o pagnunot kanila [kining bakak nga mga Mesiyas]. Kay maingon nga ang kilat magakilab ug pagadan-agan niini ang langit gikan sa usa ka bahin ngadto sa laing bahin, maingon man usab unya ang Anak sa Tawo.” Busa, gipaila ni Jesus nga sama sa kilat nga makita ibabaw sa halapad nga dapit, ang ebidensiya sa iyang presensiya sa gahom sa Gingharian klarong makita sa tanang buot motan-aw niana.

Dayon mihimo si Jesus ug panagtandi sa karaang mga hitabo sa pagpakita sa mga tinamdan sa mga tawo sa panahon sa iyang umaabot nga presensiya. Siya misaysay: “Dugang pa, maingon sa nahitabo kaniadto sa mga adlaw ni Noe, maingon man usab unya sa mga adlaw sa Anak sa tawo . . . Maingon man usab sa nahitabo kaniadto sa mga adlaw ni Lot: sila nanagpangaon, nanag-inom, nanagpamalit, nanagpamaligya, ug nanagpananom, nanagtukod ug mga balay. Apan sa adlaw sa pagpahawa ni Lot sa Sodoma gikan sa langit miulan ang kalayo ug asupri ug niini gilaglag silang tanan. Maingon man usab unya niini sa igapadayag na ang adlaw sa Anak sa tawo.”

Si Jesus wala mag-ingon nga ang mga tawo sa mga adlaw ni Noe ug Lot gilaglag tungod kay ilang gipangagpas ang normal nga mga kalihokan sa pagkaon, pag-inom, pagpamalit, ug pagpamaligya, pagpananom, ug pagpanukod. Bisan si Noe ug si Lot ug ang ilang mga pamilya naghimo niining mga butanga. Apan ang uban nagpadayon sa maong adlaw-adlawng mga kalihokan nga walay paghatag pagtagad sa kabubut-on sa Diyos, ug niini nga katarongan nga sila gilaglag. Alang sa samang katarongan, ang mga tawo laglagon sa dihang igapadayag na si Kristo sa panahon sa dakong kasakitan niining sistema sa mga butang.

Nagapasiugda sa bili sa pagsanong dayon sa ebidensiya sa iyang umaabot nga presensiya sa gahom sa Gingharian, si Jesus midugang: “Niadtong adlawa siya nga atua sa atop ug ang iyang mga butang anaa sa sulod sa balay, ayaw na siya pakanauga aron sa pagkuha pa niini, ug siya nga atua sa uma, ayaw na pabalika sa mga butang nga nabilin. Hinumdomi ang asawa ni Lot.”

Sa dihang makita ang ebidensiya sa presensiya ni Kristo, ang mga tawo dili makahimo sa pagtugot sa ilang pagmahal sa materyal nga mga bahandi nga makababag kanila sa paghimog dinaliang aksiyon. Sa iyang paggawas sa Sodoma, ang asawa ni Lot mapangandoyong milingi sa mga butang nga nabilin, ug siya nahimong haliging asin.

Nagpadayon sa iyang pagbatbat sa kahimtang nga maglungtad sa panahon sa iyang umaabot nga presensiya, gisultihan ni Jesus ang iyang mga tinun-an: “Niadto unyang gabhiona duha ka tawo maghigda sa usa ka higdaanan; ang usa kuhaon, apan ang usa ibilin. Duha ka babaye manag-abay sa paggaling; usa kanila kuhaon, apan ang usa ibilin.”

Ang pagkuha katugbang sa pagsulod ni Noe sa arka uban sa iyang pamilya ug sa pagkuha sa manulonda kang Lot ug sa iyang pamilya gawas sa Sodoma. Kini nagkahulogan ug kaluwasan. Sa laing bahin, ang pagkahimong mabiyaan nagkahulogan sa pag-antos sa kalaglagan.

Niini nga punto, ang mga tinun-an nangutana: “Asa man Ginoo?”

“Diin gani ang lawas nga patay, atua usab didto magakatapok ang mga agila,” mitubag si Jesus. Kadtong “kuhaon” alang sa kaluwasan nahisama sa layog-panan-awng mga agila sa pagkaagi nga sila tigomon ngadto sa “lawas.” Ang lawas may kalabotan sa matuod nga Kristo diha sa iyang dili-makitang presensiya sa gahom sa Gingharian ug sa espirituwal nga kombira nga itagana ni Jehova. Lucas 17:20-37; Genesis 19:26.

▪ Sa unsang paagi ang Gingharian anaa sa taliwala sa mga Pariseo?

▪ Sa unsang paagi ang presensiya ni Kristo sama sa kilat?

▪ Nganong ang mga tawo laglagon tungod sa ilang mga lihok sa panahon sa presensiya ni Kristo?

▪ Unsay kahulogan sa pagkahimong kuhaon, ug mabiyaan?