Kapitulo 66

Sa Piyesta sa mga Payag

SI Jesus nabantog sulod sa halos tulo ka tuig sukad sa pagbawtismo kaniya. Libolibo ang nakakita sa iyang mga milagro, ug ang mga taho mahitungod sa iyang mga buhat mikatap sa tibuok nasod. Karon, samtang nagkatigom ang mga tawo alang sa Piyesta sa mga Payag sa Jerusalem, gipangita nila siya didto. “Hain ba kadtong tawhana?” sila buot masayod.

Si Jesus nahimong ulohan sa panaglantugi. “Siya maayong tawo,” matud sa pipila. “Siya dili maayong tawo, apan nagalimbong sa panon,” nagpatuo ang uban. May ingon nga dakong hulongihong sa unang mga adlaw sa piyesta. Apan walay mausa ang nagmaisogon sa pagpahayag sa dayag pabor kang Jesus. Tungod kadto kay sila nahadlok sa panimalos gikan sa mga Hudiyong pangulo.

Sa nanungatunga na ang piyesta, si Jesus miabot. Siya miadto sa templo, diin ang mga tawo natingala sa iyang kahibulongang katakos sa pagpanudlo. Sanglit si Jesus wala man makaatender ug mga tunghaan sa rabbi, ang mga Hudiyo nahibulong: “Sa unsang paagi kining tawhana may dakong kaalam, sa dihang wala siya makatungha sa mga tunghaan?”

“Ang akong ginatudlo dili akoa,” misaysay si Jesus, “kondili iya sa nagpadala kanako. Kon adunay buot mobuhat sa Iyang kabubut-on, siya mahibalo kon ang pagtulon-an gikan ba sa Diyos o ako ba nagasulti sa akong kaugalingong pagbuot.” Ang pagtulon-an ni Jesus maoy sumala gayod sa kasugoan sa Diyos. Busa, madayag kaayo nga siya nagatinguha sa himaya sa Diyos, dili sa iyang kaugalingon. “Si Moises mihatag kaninyo sa Kasugoan, dili ba?” si Jesus nangutana. Ingong pagbadlong, siya miingon: “Walay mausa kaninyo ang nagatuman sa Kasugoan.”

“Nganong kamo nagatinguha man sa pagpatay kanako?” dayon nangutana si Jesus.

Ang mga tawo diha sa panon, lagmit mga dumuduaw alang sa piyesta, wala mahibalo sa maong paninguha. Giisip nila nga dili mahanduraw nga may buot mopatay sa maong talagsaong magtutudlo. Busa nagtuo sila nga may deperensiya kang Jesus sa paghunahuna niadto. “Ikaw adunay demonyo,” matud nila. “Kinsa man ang nagatinguha sa pagpatay kanimo?”

Buot sa Hudiyong mga pangulo nga si Jesus mapatay, bisan pag ang panon tingali wala masayod niana. Sa diha nga giayo ni Jesus ang usa ka tawo sa Igpapahulay usa ka tuig ug tunga nga miagi, gisulayan sa mga pangulo ang pagpatay kaniya. Busa sa maong panahon gipunting ni Jesus ang ilang pagkadili-makataronganon pinaagi sa pagsukot kanila: “Kon ang usa ka tawo sirkunsidahan sa usa ka igpapahulay aron dili malapas ang kasugoan ni Moises, kamo ba masukong mapintason kanako kay giayo ko sa bug-os ang lawas sa usa ka tawo sa igpapahulay? Hunong na kamo sa paghukom sumala sa gawas nga panagway, apan panghukom kamo uban ang matarong nga paghukom.”

Ang mga molupyo sa Jerusalem, kinsa nasayod sa kahimtang, karon miingon: “Dili ba kini ang tawo nga buot nilang patyon? Ug bisan pa niana, tan-awa! siya nagasulti sa dayag, ug sila walay ginasulti kaniya. Ang mga magmamando tinong wala mahibalo nga kini mao ang Kristo, dili ba?” Kining mga molupyo sa Jerusalem nagpatin-aw nganong sila dili motuo nga si Jesus mao ang Kristo: “Kami nahibalo kon diin gikan kining tawhana; apan inig-abot ni Kristo, walay usa ang mahibalo kon diin siya gikan.”

Si Jesus mitubag: “Kamo nakaila kanako ug nahibalo kon diin ako gikan. Gawas pa, ako wala moanhi sa akong kaugalingong pagbuot, apan ang nagpadala kanako maoy tinuod, ug kamo wala makaila kaniya. Ako nakaila kaniya, tungod kay ako usa ka hawas gikan kaniya, ug Siya nagpadala kanako.” Niadto ilang gisulayan ang pagsakmit kaniya, tingali aron siya ibalhog sa bilanggoan o ipapatay. Apan sila wala molampos tungod kay kadto dili pa panahon aron mamatay si Jesus.

Bisan pa niana, daghan ang nagtuo kang Jesus, sumala sa angay gayod. Aw, siya nakalakaw ibabaw sa tubig, nagpakalma sa mga hangin, nagpalinaw sa gibagyong kadagatan, milagrosong nagpakaon sa libolibo sa pila ra ka tinapay ug mga isda, nag-ayo sa mga masakiton, nagpalakaw sa bakol, nagbuka sa mga mata sa buta, nag-ayo sa mga sanlahon, ug nagbanhaw pa sa mga patay. Busa sila nangutana: “Inig-abot sa Kristo, dili ba niya buhaton ang labaw nga mga ilhanan kay sa gibuhat niining tawhana?”

Sa diha nga ang mga Pariseo nakadungog sa panon nga nagbagulbol niining mga butanga, sila ug ang pangulong mga saserdote nagpadalag mga polis sa pagdakop kang Jesus. Juan 7:11-32.

▪ Kanus-a moabot si Jesus alang sa piyesta, ug unsay gisulti sa mga tawo bahin kaniya?

▪ Nganong ang pipila nakaingon nga si Jesus may demonyo?

▪ Unsay hunahuna sa mga molupyo sa Jerusalem bahin kang Jesus?

▪ Nganong daghan ang nagtuo kang Jesus?