Kapitulo 82

Si Jesus Mipaingon na Usab sa Jerusalem

SA WALA madugay mipanaw na usab si Jesus, nga nanudlo gikan sa siyudad ngadto sa siyudad ug gikan sa balangay ngadto sa balangay. Lagmit siya didto sa distrito sa Perea, tabok sa Subang Jordan gikan sa Judea. Apan Jerusalem ang iyang destinasyon.

Ang Hudiyonhong pilosopiya nga ang limitadong gidaghanon ang takos sa kaluwasan mao tingaliy nakaaghat sa usa ka tawo sa pagsukna: “Ginoo, diyutay ra ba ang maluwas?” Pinaagi sa iyang tubag, gipugos ni Jesus ang mga tawo sa paghunahuna kon unsay gikinahanglan alang sa kaluwasan: “Panlimbasogi ninyo [nga mao, pakigbisogi, o panghinakiti] ang pagsulod agi sa pultahan nga masigpit.”

Kanang kusog nga panlimbasog kinahanglanon “kay daghan,” mipadayon si Jesus, “ang maninguha sa pagsulod apan dili makahimo.” Nganong dili man sila makahimo? Siya misaysay nga ‘sa diha nga ang tagbalay makatindog na ug makasira sa pultahan ug ang mga tawo manindog sa gawas ug manuktok, nga magaingon, “Ginoo, ablihi kami,” siya moingon: “Ambut tagadiin kamo. Pahawa kamo gikan kanako, kamong tanan nga mamumuhat ug kadaotan!”’

Ang mga tawong nasirhan sa gawas lagmit miabot sa panahong kombenyente lamang sa ilang kaugalingon. Apan sa maong panahon ang pultahan sa kahigayonan gisirhan ug gitrangkahan na. Aron makasulod, angay untang nangabot silang sayosayo, bisan pa sa panahong tingali dili kombenyente ang paghimo niana. Sa pagkamatuod, ang makapasubong sangpotanan nagapaabot niadtong nagalangan sa paghimo sa pagsimba ni Jehova nga panguna nilang katuyoan sa kinabuhi!

Ang mga Hudiyo nga kanila si Jesus gisugo aron sa pag-alagad, sa kinadak-ang bahin, napakyas sa pagpahimulos sa kahibulongan nilang higayon sa pagdawat sa tagana sa Diyos alang sa kaluwasan. Busa miingon si Jesus nga sila mohilak ug mangagot sa ilang ngipon sa dihang sila igalabay sa gawas. Sa laing bahin, ang mga tawo gikan sa “mga bahin sa silangan ug kasadpan, ug gikan sa amihanan ug habagatan,” oo, gikan sa tanang nasod, “mohirag sa lamesa diha sa gingharian sa Diyos.”

Si Jesus mipadayon: “Anaay nangulahi [tinamay nga mga dili-Hudiyo, ingon man ang gidaugdaog nga mga Hudiyo] nga mangauna, ug anaay nagauna [mga Hudiyong pinaboran sa materyal ug relihiyosong paagi] nga mangulahi.” Ang ilang pagkamangulahi nagkahulogang ang maong tapolan, dili-mapasalamatong mga tawo dili gayod makasulod sa Gingharian sa Diyos.

Sa maong panahon ang mga Pariseo nangadto kang Jesus ug nag-ingon: “Pumahawa ka dinhi, kay si Herodes [Antipas] buot mopatay kanimo.” Malagmit nga si Herodes mismo ang nagsugod sa maong hungihong aron si Jesus mopahawa sa teritoryo. Si Herodes tingali nahadlok nga malangkit sa pagkamatay sa laing manalagna sa Diyos sama sa iyang pagkalangkit sa pagpatay kang Juan Bautista. Apan giingnan ni Jesus ang mga Pariseo: “Adtoa ug sultihi kanang singgalong, ‘Tan-awa! Ginapagula ko ang mga demonyo ug ginahimo ko ang pagpang-ayo karong adlawa ug ugma, ug sa ikatulong adlaw matapos na ako.’”

Sa pagkatapos sa iyang buluhaton didto, gipadayon ni Jesus ang iyang panaw paingon sa Jerusalem tungod kay, sumala sa iyang gisaysay, “dili ikatugot nga ang usa ka manalagna mamatay sa gawas sa Jerusalem.” Nganong pagadahomon man nga si Jesus patyon sa Jerusalem? Kay ang Jerusalem mao ang kaulohang siyudad, diin nahimutang ang 71-membro nga hataas nga hukmanan sa Sanhedrin ug diin ginahalad ang mga halad nga hayop. Busa, dili ikatugot nga “ang Kordero sa Diyos” mamatay sa laing dapit gawas sa Jerusalem.

“Jerusalem, Jerusalem, ang nagapatay sa mga manalagna ug nagabato sa mga gisugo nganha kaniya,” miingong masulob-on si Jesus, “pagkadaghan nga gipangandoy ko ang pagtigom sa imong mga anak sa paagi sa pagtigom sa usa ka himungaan sa iyang mga piso ilalom sa iyang mga pako, apan dili ninyo buot kana! Tan-awa! Ang inyong balay gibiyaan kaninyo.” Tungod sa pagsalikway sa Anak sa Diyos, ang nasod gihukman sa kalaglagan!

Sa nagpadayon si Jesus paingon sa Jerusalem, gidapit siya ngadto sa balay sa usa ka punoan sa mga Pariseo. Igpapahulay kadto, ug gibantayan siya pag-ayo sa mga tawo, sanglit may usa ka tawong didto nga may sakit nga panghupong, ang pagkatigom sa tubig lagmit diha sa iyang mga bukton ug mga batiis. Gipakigsultihan ni Jesus ang mga Pariseo ug ang mga batid sa Kasugoan nga didto, nga nangutana: “Uyon ba sa kasugoan ang pag-ayo sa igpapahulay o dili?”

Walay usa nga mitingog. Busa giayo ni Jesus ang tawo ug gipalakaw siya. Dayon siya nangutana: “Kinsa ba kaninyo, kon ang iyang anak o baka mahulog sa atabay, ang dili dayon magkuha kaniya sa adlaw nga igpapahulay?” Sa makausa pa, walay mitingog sa pagtubag. Lucas 13:22–14:6; Juan 1:29.

▪ Unsay gipakita ni Jesus nga gikinahanglan alang sa kaluwasan, ug nganong daghan ang nasirhan sa gawas?

▪ Kinsa ang “mangulahi” nga nagauna, ug ang “nagauna” nga mangulahi?

▪ Nganong lagmit giingon nga buot ni Herodes nga patyon si Jesus?

▪ Nganong dili ikatugot nga ang usa ka manalagna patyon sa gawas sa Jerusalem?