Kapitulo 7

Si Jesus ug ang mga Astrologo

DIHAY pila ka mga lalaki ang nangabot gikan sa Sidlakan. Sila maoy mga astrologo—mga tawo nga nag-angkon nga makahubad sa posisyon sa mga bitoon. Samtang didto sila sa pinuy-anan sa Sidlakan, sila nakakitag usa ka bag-ong bitoon, ug ilang gisundan kini sa gatosan ka milya ngadto sa Jerusalem.

Sa dihang nakaabot ang mga astrologo sa Jerusalem, sila nangutana: “Diin ba natawo ang hari sa mga Hudiyo? Kay nakita namo ang iyang bitoon didto sa Sidlakan, ug nanganhi kami aron sa pagsimba kaniya.”

Sa dihang nakadungog si Haring Herodes sa Jerusalem mahitungod niini, nasuko kaayo siya. Busa iyang gipatawag ang pangulong mga saserdote ug nangutana kon diin matawo ang Kristo. Gipasukad ang ilang tubag sa Kasulatan, sila mitubag: “Sa Bethlehem.” Niana, gipatawag ni Herodes ang mga astrologo ngadto kaniya ug gisultihan sila: “Adtoa ug pangitaa ninyo pag-ayo ang bata, ug sa makaplagan ninyo siya balitai ako ninyo, aron ako usab moadto sa pagsimba kaniya.” Apan, sa pagkamatuod, nagtinguha si Herodes sa pagpatay kaniya!

Sa nakagikan na sila, usa ka katingalahang butang ang nahitabo. Ang bitoon nga ilang nakita didto sa Sidlakan nag-una kanila. Dayag, dili kini ordinaryong bitoon, apan kini ilabinang gitagana aron sa pagtultol kanila. Ang mga astrologo nagpadayon sa pagsunod niana hangtod nga mihunong kini sa ibabaw sa balay nga gipuy-an ni Jose ug Maria.

Sa misulod ang mga astrologo sa balay, ilang nakita si Maria uban ang iyang anak, si Jesus. Niana sila mihapa sa atubangan kaniya. Ug ilang gipagawas sa ilang mga bag ang ilang mga gasa nga bulawan, insienso, ug mirra. Tapos niadto, sa mopauli na unta sila ug sultihan si Herodes kon diin ang bata, sila gipasidan-an sa Diyos pinaagi sa damgo sa dili paghimo niadto. Busa namauli sila sa ilang kaugalingong yuta sa laing dalan.

Kinsa sa imong hunahuna ang mitagana sa bitoon nga mipanaw sa langit aron sa pagtultol sa mga astrologo? Hinumdomi, ang bitoon wala motultol kanila direkta kang Jesus didto sa Bethlehem. Hinunoa, sila giagak ngadto sa Jerusalem nga didto nagkita sila ni Haring Herodes, nga nagtinguha sa pagpatay kang Jesus. Ug iyang nahimo unta kadto kon wala pa mangilabot ang Diyos ug nagpasidaan sa mga astrologo sa dili pagtug-an kang Herodes kon hain si Jesus. Kadto mao ang kaaway sa Diyos, si Satanas nga Yawa, nga nagtinguha sa pagpatay kang Jesus, ug iyang gigamit ang maong bitoon aron matuman ang iyang katuyoan. Mateo 2:1-12; Miqueas 5:2.

▪ Unsay nagpakita nga ang bitoong nakita sa mga astrologo dili ordinaryong bitoon?

▪ Diin si Jesus sa nakit-an siya sa mga astrologo?

▪ Nganong nahibalo kita nga si Satanas ang mitagana sa bitoon aron sa pagtultol sa mga astrologo?