Kapitulo 18

Si Juan Nagakunhod, si Jesus Nagatubo

HUMAN sa Paskuwa sa tingpamulak sa 30 K.P., si Jesus ug ang iyang mga tinun-an mibiya sa Jerusalem. Bisan pa niana, wala sila mamalik sa ilang mga pinuy-anan sa Galilea apan nangadto sa kabanikanhan sa Judea, diin sila nanagbawtismo. Si Juan Bautista nagbuhat sa samang buluhaton sa mga usa na ka tuig, ug siya may mga tinun-an gihapon nga nakig-uban kaniya.

Sa pagkamatuod, wala mamawtismo si Jesus mismo, apan gihimo kana sa iyang mga tinun-an ubos sa iyang pagdumala. Ang ilang bawtismo may samang kahulogan sama sa gibuhat ni Juan, nga mao usa ka simbolo sa paghinulsol sa usa ka Hudiyo sa mga sala batok sa tugon sa Kasugoan sa Diyos. Bisan pa niana, tapos sa iyang pagkabanhaw, gisugo ni Jesus ang iyang mga tinun-an nga magbawtismo nga may laing kahulogan. Ang Kristohanong bawtismo karong adlawa maoy usa ka simbolo sa pagpahinungod sa usa ka tawo sa pag-alagad kang Jehova nga Diyos.

Hinuon, sa maong sayong bahin sa ministeryo ni Jesus, si Juan ug siya, bisan pag nagbuhat nga bulag, nanudlo ug nagbawtismo sa mga mahinulsolon. Apan ang mga tinun-an ni Juan nasina ug mireklamo kaniya mahitungod kang Jesus: “Rabbi, . . . tan-awa, kini siya nagabawtismo ug ang tanan nagapangadto kaniya.”

Inay nga masina, si Juan nalipay sa kalamposan ni Jesus ug buot usab nga malipay ang iyang mga tinun-an. Iyang gipahinumdoman sila: “Kamo mismo nagapamatuod kanako nga ako miingon, Ako dili mao ang Kristo, apan, ako gipadala nga una kaniya.” Dayon gigamit niya ang usa ka matahom nga ilustrasyon: “Siya nga nagbaton sa pangasaw-onon mao ang pamanhonon. Ugaling, ang higala sa pamanhonon, sa dihang siya mobarog ug makadungog kaniya, may dakong kalipay tungod sa tingog sa pamanhonon. Busa kining kalipay nako natugob.”

Si Juan, ingong higala sa Pamanhonon, nagkalipay mga unom ka bulan nga sayosayo sa iyang gipailaila ang iyang mga tinun-an kang Jesus. Ang pipila kanila nahimong umaabot nga mga membro sa langitnong matang sa pangasaw-onon ni Kristo nga pagalangkoban sa mga Kristohanon nga gidihogan sa espiritu. Buot ni Juan nga ang iyang presenteng mga tinun-an mosunod kang Jesus, sanglit ang iyang katuyoan mao ang pag-andam sa dalan alang sa malamposong ministeryo ni Kristo. Sumala sa gisaysay ni Juan Bautista: “Siya kinahanglang magatubo, apan ako kinahanglang magakunhod.”

Ang bag-ong tinun-an ni Jesus nga si Juan, si kinsa sayosayo nahimong tinun-an ni Juan Bautista, misulat mahitungod sa sinugdanan ni Jesus ug sa Iyang hinungdanong papel sa kaluwasan sa tawo, nga miingon: “Siya nga gikan sa langit labaw sa tanan. . . . Ang Amahan nahigugma sa Anak ug nagtugyan sa tanang butang ngadto sa iyang kamot. Ang motuo sa Anak may kinabuhing walay kataposan; ang dili mosugot sa Anak dili makakitag kinabuhi, apan ang kapungot sa Diyos magapabilin diha kaniya.”

Wala madugay tapos sa paghisgot ni Juan Bautista sa pagkunhod sa iyang kauglingong kalihokan, siya gidakop ni Haring Herodes. Gipangasawa ni Herodes si Herodias, ang asawa ni Felipe nga iyang igsoon, ug sa dihang sa dayag gibutyag ni Juan ang iyang mga buhat ingong dili maayo, gipabilanggo siya ni Herodes. Sa nadunggan ni Jesus ang pagdakop kang Juan, siya mibiya sa Judea uban sa iyang mga tinun-an ug nangadto sa Galilea. Juan 3:22–4:3; Buhat 19:4; Mateo 28:19; 2 Corinto 11:2; Marcos 1:14; 6:17-20.

▪ Unsa ang kahulogan sa mga bawtismong gihimo ubos sa pagdumala ni Jesus una sa iyang pagkabanhaw? Ug human sa iyang pagkabanhaw?

▪ Giunsa pagpadayag ni Juan nga ang reklamo sa iyang mga tinun-an dili angay?

▪ Nganong si Juan gibilanggo?