Kapitulo 67

Sila Napakyas sa Pagdakop Kaniya

SAMTANG gisaulog pa ang Piyesta sa mga Payag, nagpadala ang mga pangulo sa relihiyon ug mga polis sa pagdakop kang Jesus. Siya wala mosulay sa pagtago. Hinunoa, si Jesus nagpadayon sa pagpanudlo sa katilingban, nga nagaingon: “Ako magapakig-uban pa kaninyo sulod sa hamubong panahon ug unya moadto na ako kaniya nga mao ang nagpadala kanako. Kamo mangita kanako, apan dili kamo makakaplag kanako, ug diin atua ako niini dili kamo makaadto.”

Ang mga Hudiyo wala makasabot, ug busa nangutana ang usag usa: “Asa man kahay buot adtoan niining tawhana, nga dili man kuno kita makakaplag kaniya? Buot ba siya moadto sa mga Hudiyo nga nagkatibulaag taliwala sa mga Gresyanhon ug manudlo sa mga Gresyanhon? Unsa may buot niyang ipasabot sa iyang pag-ingon, ‘Kamo mangita kanako, apan dili kamo makakaplag kanako, ug diin atua ako niini dili kamo makaadto’?” Si Jesus, sa pagkatinuod, naghisgot bahin sa iyang taliabot nga kamatayon ug pagkabanhaw sa kinabuhi sa langit, diin didto dili makasunod ang iyang mga kaaway.

Ang ikapito ug ang kataposang adlaw sa piyesta miabot. Kada buntag sa piyesta, ang usa ka saserdote magbubo ug tubig, nga iyang kinuha gikan sa Linaw sa Siloam, busa modagayday kini ngadto sa tiilan sa halaran. Tingali aron ipahinumdom sa mga tawo kining adlaw-adlaw nga seremonya, si Jesus misinggit: “Kon adunay tawong giuhaw, umari siya kanako ug uminom. Siya nga motuo kanako, sumala sa giingon sa Kasulatan, ‘Gikan sa iyang kasingkasing modagayday ang mga tuboran sa buhi nga tubig.’”

Sa pagkatinuod, naghisgot si Jesus dinhi bahin sa dagkong mga kaayohan dihang ibubo ang balaang espiritu. Sa pagkasunod tuig kining pagbubo sa balaang espiritu nahitabo sa Pentekostes. Didto, ang mga tuboran sa buhi nga tubig midagayday dihang ang 120 ka disipulo misugod sa pag-alagad sa mga tawo. Apan hangtod niadto, walay espiritu sa diwa nga walay usa sa mga disipulo ni Kristo ang gidihogan sa balaang espiritu ug gitawag ngadto sa langitnong kinabuhi.

Ingong pagsanong sa pagpanudlo ni Jesus, ang pipila miingon: “Sa pagkatinuod, kini siya mao Ang Propeta,” dayag nga nagpasabot sa propeta nga mas dako kay kang Moises nga gisaad nga moabot. Ang uban miingon: “Kini siya mao ang Kristo.” Ang uban misupak: “Magagikan ba sa Galilea ang Kristo? Dili ba giingon man sa Kasulatan nga ang Kristo magagikan sa kaliwatan ni David, ug gikan sa Bethlehem ang balangay diin didto si David?”

Busa mitungha ang pagbahinbahin sa taliwala sa panon sa mga tawo. Ang uban buot nga ipadakop si Jesus, apan walay misakmit kaniya. Sa dihang mibalik ang mga polis nga wala madala si Jesus, ang labaw nga mga saserdote ug mga Pariseo nangutana: “Nganong wala man ninyo siya dad-a dinhi?”

“Wala pa gayoy tawo nga nakasulti sama niining tawhana,” miingon ang mga polis.

Misilaob sa kasuko, ang mga pangulo sa relihiyon misamot sa pagbiaybiay, pagdaot, ug pagpasipala. Sila miyubit: “Nagpahisalaag ba diay usab kamo? Duna bay usa sa mga magmamando o mga Pariseo nga mituo kaniya? Apan kining mga tawhana nga walay hibangkaagan sa Kasugoan mga tinunglo.”

Niini, si Nicodemo, nga Pariseo ug usa ka magmamando sa mga Hudiyo (sa ato pa, membro sa Sanhedrin), misulti pabor kang Jesus. Tingali mahinumdoman nimo nga duha ug tunga ka tuig sa miagi, si Nicodemo miduol kang Jesus sa kagabhion ug mipahayag sa iyang pagtuo kaniya. Karon si Nicodemo miingon: “Ang atong kasugoan mohukom ba diay kinig tawo aron silotan sa wala unay pagpatalinghog kaniya ug pagpakisayod unsa ang iyang nabuhat?”

Misamot ang kasuko sa mga Pariseo nga gidepensahan sa usa sa ilang membro si Jesus. “Gikan ka ba usab diay sa Galilea?” sila mayubitong mitubag. “Susiha ug imong masuta nga walay mobarog nga propeta nga taga Galilea.”

Bisag walay giingon ang Kasulatan nga motungha ang propeta gikan sa Galilea, kini nagpunting sa Kristo ingon nga nagagikan didto, busa giingon nga “usa ka dakong kahayag” makita niining dapita. Ug dugang pa, si Jesus natawo sa Bethlehem, ug siya maoy anak ni David. Sanglit nahibalo niini ang mga Pariseo, tingali sila mao ang nagpakaylap sa sayop nga pagtuo nga nabatonan sa mga tawo bahin kang Jesus. Juan 7:32-52; Isaias 9:1, 2; Mateo 4:13-17.

▪ Unsay nahitabo matag buntag diha sa piyesta, ug sa unsang paagi nahimong sentro sa pagtagad si Jesus niini?

▪ Nganong napakyas ang mga polis sa pagdakop kang Jesus, ug unsay pagsanong sa mga pangulo sa relihiyon?

▪ Kinsa si Nicodemo, unsay iyang paglantaw kang Jesus, ug unsay pagtratar sa iyang kaubang mga Pariseo kaniya?

▪ Unsay ebidensiya nga motungha ang Kristo gikan sa Galilea?