Kapitulo 15

Unang Milagro ni Jesus

MAHIMONG usa pa o duha ka adlaw sukad si Andres, Pedro, Juan, Filipe, Nataniel, ug tingali si Santiago nahimong unang mga tinun-an ni Jesus. Kini sila nanglakaw aron mamauli ngadto sa distrito sa Galilea, nga maoy gigikanan nilang tanan. Ang ilang destinasyon mao ang Cana, ang lungsod ni Nataniel, nga nahimutang sa kabungtoran dili layo sa Nazareth, diin si Jesus mismo nagtubo. Gidapit sila sa usa ka kombira sa kasal sa Cana.

Ang inahan ni Jesus usab miadto sa kasal. Ingong higala sa pamilya sa mga kaslonon, mipatim-aw nga si Maria miapil sa pag-atiman sa mga panginahanglan sa daghang dinapit. Mao nga dali siyang nakamatikod sa usa ka kakulang, nga iyang gitaho ngadto kang Jesus: “Wala na silay bino.”

Sa pagkamatuod, sa dihang si Maria sa ingon misugyot nga may buhaton si Jesus bahin sa kakulang sa bino, si Jesus sa sinugdan nagpanuko. “Unsay imong labot kanako?” siya nangutana. Ingong tinudlo sa Diyos nga Hari, siya dili pagbut-an sa pamilya o mga higala sa iyang kalihokan. Busa maalamong gitugyan ni Maria ang butang diha sa mga kamot sa iyang anak, nga giingnan na lang ang mga sulugoon: “Buhata ninyo kon unsay iyang isugo kaninyo.”

Aw, dihay unom ka dagkong tadyaw sa tubig, nga ang matag usa niini kasudlan sa kapin sa 40 litros. Gisugo ni Jesus kadtong mga sulugoon: “Pun-a ninyog tubig ang mga tadyaw.” Ug gipuno kana sa mga sulugoon hangtod sa ngabil. Dayon si Jesus miingon: “Pagkabo na kamog diyutay niana karon ug dad-a kana ngadto sa punoan sa kombira.”

Ang punoan nakadayeg sa maayong matang sa bino, nga wala masayod nga kadto milagrosong pagkabuhat. Sa pagtawag sa pamanhonon, siya miingon: “Ang ubang tawo nagadalit pag-una sa maayong bino, ug sa dihang mahubog na ang mga tawo, sa menos nga bino. Imong gitagoan ang maayong bino hangtod karon.”

Kini ang unang milagro ni Jesus, ug sa ilang pagkakita niadto, nalig-on ang pagtuo sa iyang bag-ong mga tinun-an. Human niadto, kauban sa iyang inahan ug sa iyang mga igsoon sa inahan, sila mipaingon sa siyudad sa Capernaum duol sa Dagat sa Galilea. Juan 2:1-12.

▪ Panahon sa ministeryo ni Jesus kanus-a nahitabo ang kasal sa Cana?

▪ Nganong mitutol si Jesus sa sugyot sa iyang inahan?

▪ Unsang milagro ang gibuhat ni Jesus, ug unsay epekto niadto diha sa uban?