Kapitulo 32

Unsa bay Uyon sa Kasugoan sa Igpapahulay?

LAING Igpapahulay na usab kadto sa miduaw si Jesus sa usa ka sinagoga haduol sa Dagat sa Galilea. Diha ang usa ka tawong may nakuyos nga tuong kamot. Ang mga eskriba ug ang mga Pariseo nagbantay pag-ayo sa pagtan-aw kon ayohon ba siya ni Jesus. Sa kataposan sila nangutana: “Uyon ba sa kasugoan ang pagpang-ayo sa adlaw nga igpapahulay?”

Nagtuo ang Hudiyong relihiyosong mga pangulo nga ang pagpang-ayo uyon lamang sa kasugoan sa Igpapahulay kon ang kinabuhi nameligro. Sila nagtudlo, pananglitan, nga sa adlaw sa Igpapahulay dili uyon sa kasugoan ang pagpanghilot sa nabali nga bukog o pagbendahe sa lisa. Busa gikuwestiyon sa mga eskriba ug mga Pariseo si Jesus sa paningkamot nga sila may ikasumbong batok kaniya.

Ugaling, si Jesus nasayod sa ilang mga pangatarongan. Sa samang panahon, siya nahibalong ilang gisagop ang hinobra, dili-kasulatanhong hunahuna bahin sa kon unsay paglapas sa gikinahanglan sa adlaw nga Igpapahulay nga nagdili sa pagbuhat. Busa gipahamutang ni Jesus ang kahimtang alang sa dramatikanhong pagharongay pinaagi sa pagsulti sa tawong may nakuyos nga kamot: “Tindog ug umari ka sa taliwala.”

Karon, nga miliso ngadto sa mga eskriba ug mga Pariseo, si Jesus miingon: “Kinsa bang tawhana sa inyong taliwala nga adunay usa ka karnero ug, kon kini mahulog sa usa ka gahong sa igpapahulay, nga dili gunitan kini ug birahon aron mahigawas?” Sanglit ang usa ka karnero nagahawas sa usa ka puhunan, dili nila kana biyaan sa gahong hangtod sa sunod nga adlaw, nga tingali magmasakiton ug mopahinabo kanila ug kapildihan. Gawas pa, ang Kasulatan nagaingon: “Ang matarong nagaatiman sa kalag sa iyang binuhing hayop.”

Sa paghimog panagtandi, si Jesus mipadayon: “Sa pag-isip sa tanan, pagkabililhon ang tawo kay sa karnero! Busa uyon sa kasugoan ang pagbuhat ug maayong butang sa adlaw nga igpapahulay.” Ang relihiyosong mga pangulo wala makalalis nianang lohiko, maluluy-ong pangatarongan, ug sila nahilom.

Nga may kasuko, ingon man kasubo tungod sa ilang pagkagahian, si Jesus mitan-aw sa palibot. Dayon siya miingon ngadto sa tawo: “Ituy-od ang imong kamot.” Ug iya kanang gituy-od ug ang kamot naayo.

Inay malipay nga naayo ang kamot sa tawo, ang mga Pariseo nanglakaw ug dihadiha nakigsabot sa mga sumusunod sa partido ni Herodes sa pagpatay kang Jesus. Ang maong partido politikanhon lagmit naglakip sa mga sakop sa relihiyosong mga Saduseo. Kasagaran, ang maong politikanhong partido ug ang mga Pariseo dayag nagkontrahay sa usag usa, apan sila lig-ong nahiusa sa ilang pagsupak kang Jesus. Mateo 12:9-14; Marcos 3:1-6; Lucas 6:6-11; Proverbio 12:10; Exodo 20:8-10.

▪ Unsa ang pasiunang hitabo sa dramatikanhong pagharongay tali ni Jesus ug sa Hudiyong relihiyosong mga pangulo?

▪ Unsay gituohan ni Jesus mahitungod sa pagpang-ayo sa Igpapahulay?

▪ Unsang ilustrasyon ang gigamit ni Jesus sa paglalis sa sayop nilang mga hunahuna?