Kapitulo 56

Unsay Makapahugaw sa Tawo?

ANG pagkamasupakon kang Jesus misamot. Dili lang kay mibulag ang daghan sa iyang mga tinun-an apan ang mga Hudiyo sa Judea nagtinguha sa pagpatay kaniya, sama sa ilang gibuhat sa didto siya sa Jerusalem panahon sa Paskuwa sa 31 K.P.

Karon panahon sa Paskuwa sa 32 K.P. Lagmit, nahiuyon sa sugo sa Diyos nga motambong niana, si Jesus mitungas sa Jerusalem alang sa Paskuwa. Hinuon, mabinantayon niyang gihimo kana kay nameligro ang iyang kinabuhi. Tapos niadto siya mibalik sa Galilea.

Si Jesus tingali didto sa Capernaum dihang ang mga Pariseo ug mga eskriba gikan sa Jerusalem miadto kaniya. Sila nangitag mga hinungdan sa pagsumbong kaniya sa relihiyosong paglapas. “Nganong ang imong mga tinun-an nagalapas sa kalagdaan nga gikabilinbilin sa mga tawo sa karaang mga panahon?” sila nangutana. “Pananglitan, nganong sila dili maghunaw sa ilang mga kamot sa dayon nang pangaon.” Kini wala isugo sa Diyos, apan giisip sa mga Pariseo nga seryosong sala ang dili pagtuman sa maong tradisyonal nga rituwal, nga nag-apil sa pagpanghugas abot sa mga siko.

Inay tubagon ang ilang sumbong, gipunting ni Jesus ang ilang daotan ug tinuyong paglapas sa Kasugoan sa Diyos. “Ngano man usab nga kamo nagalapas sa sugo sa Diyos tungod sa inyong gikabilinbilin nga kalagdaan?” siya buot masayod. “Pananglitan, ang Diyos nag-ingon, ‘Tahora ninyo ang inyong amahan ug ang inyong inahan’; ug, ‘Ang nagasultig daotan sa amahan o inahan angay nga mamatay.’ Apan kamo nagaingon, ‘Si bisan kinsa nga nagaingon sa iyang amahan o inahan: “Bisan unsa nga akong nabatonan nga pinaagi niana kamo makapahimulos gikan kanako maoy usa ka gasa nga gipahinungod sa Diyos,” siya dili na kinahanglang magtahod sa iyang amahan.’”

Sa pagkamatuod, ang mga Pariseo nagatudlong ang salapi, propiedad, o bisan unsa nga gipahinungod sa Diyos ingong gasa iyaha sa templo ug dili magamit sa laing katuyoan. Apan, sa pagkamatuod, ang gipahinungod nga gasa gihuptan pa sa tawong nagpahinungod niana. Sa maong paagi ang usa ka anak lalaki, pinaagi sa pag-ingon lamang nga ang iyang salapi o propiedad maoy “corban”—usa ka gasang gipahinungod sa Diyos o sa templo—nagalikay sa iyang responsabilidad sa pagtabang sa tigulang niyang mga ginikanan, nga tingali nagalisod.

Kay matarong nga masuko sa daotang pagtuis sa mga Pariseo sa Kasugoan sa Diyos, si Jesus nag-ingon: “Inyong gipakawalay pulos ang pulong sa Diyos tungod sa inyong gikabilinbilin nga kalagdaan. Mga maot, tukmang nagtagna si Isaias mahitungod kaninyo sa miingon siya, ‘Kining mga tawhana nagapasidungog kanako pinaagi sa ilang mga ngabil, apan ang ilang kasingkasing halayo kanako. Kawang lamang nga sila nagapadayon sa pagsimba kanako, tungod kay sila nagatudlo ingong mga doktrina sa mga sugo sa mga tawo.’”

Tingali ang panon miiway aron ang mga Pariseo makasukna kang Jesus. Karon, sa dihang ang mga Pariseo wala makatubag sa masakit nga pagbadlong ni Jesus kanila, iyang gitawag ang mga panon sa pagpaduol. “Patalinghog kamo kanako,” siya nag-ingon, “ug sabta ninyo kini. Walay bisan unsa sa gawas sa tawo nga magasulod kaniya ang makapahugaw kaniya; apan ang mga butang nga nagagula sa usa ka tawo mao ang mga butang makapahugaw sa tawo.”

Sa ulahi, sa misulod sila sa usa ka balay, ang iyang mga tinun-an nangutana: “Nahibalo ka bang ang mga Pariseo napandol sa pagkadungog sa imong gipamulong?”

“Ang matag tanom nga wala itanom sa akong langitnong Amahan pagaibton,” mitubag si Jesus. “Pasagdi lamang sila. Sila maoy mga magtutultol nga buta. Nan, kon ang usa ka tawong buta magaguyod sa usa ka tawong buta, sa gahong mahulog silang duha.”

Si Jesus daw natingala dihang, alang sa mga tinun-an, si Pedro nangayog katin-awan bahin sa kon unsay makapahugaw sa tawo. “Ikaw ba usab walay salabotan?” mitubag si Jesus. “Wala ka ba mahibalo nga ang tanan nga nagasulod sa baba moagi sa tinai ug ipagawas ngadto sa hugawanan? Hinunoa, ang mga butang nagagula sa baba nagagikan sa kasingkasing, ug ang maong mga butang makapahugaw sa tawo. Pananglitan, gikan sa kasingkasing nagagula ang daotang mga pangatarongan, mga pagpatay, mga panapaw, mga pakighilawas, mga pangawat, bakak nga mga pagsaksi, mga pasipala. Kini mao ang mga butang makapahugaw sa tawo; apan ang pagkaon pinaagi sa mga kamot nga wala mahunawi dili makapahugaw sa tawo.”

Si Jesus dinhi wala magbugnaw sa kasagarang panghinlo. Siya wala maglalis nga ang usa ka tawo dili na kinahanglang manghunaw sa iyang mga kamot una maglutog pagkaon o mokaon. Hinunoa, si Jesus nagatunglo sa pagkamaot sa relihiyosong mga lider nga malalangong naningkamot sa paglapas sa matarong nga mga kasugoan sa Diyos pinaagi sa pagpugos sa pagpasunod sa dili-kasulatanhong mga tradisyon. Oo, ang daotang binuhatan mao ang makapahugaw sa tawo, ug gipakita ni Jesus nga kini nagagikan sa kasingkasing sa usa ka tawo. Juan 7:1; Deuteronomio 16:16; Mateo 15:1-20; Marcos 7:1-23; Exodo 20:12; 21:17; Isaias 29:13.

▪ Unsang pagsupak ang giatubang karon ni Jesus?

▪ Unsa ang sumbong sa mga Pariseo, apan sumala kang Jesus, sa unsang paagi ang mga Pariseo tinuyong nagalapas sa kasugoan sa Diyos?

▪ Unsang mga butang ang gipadayag ni Jesus nga makapahugaw sa tawo?