Kapitulo 73

Usa ka Buotan nga Samarianhon

SI Jesus tingali didto sa duol sa Betania, usa ka balangay nga mga 3 kilometros gikan sa Jerusalem. Usa ka lalaking batid sa Kasugoan ni Moises miduol kaniya nga nangutana: “Magtutudlo, unsay akong buhaton aron makapanunod ug kinabuhing walay kataposan?”

Namatikdan ni Jesus nga ang lalaki, nga usa ka abogado, wala sa yano mangutana aron makabaton ug impormasyon kondili, gusto niyang sulayan siya. Gusto sa abogado nga motubag si Jesus sa paagi nga makasakit sa mga Hudiyo. Busa nakuha ni Jesus ang abogado sa pagpadayag sa iyang hunahuna, nga nangutana: “Unsay nahisulat sa Kasugoan? Unsay imong nabasa?”

Sa pagtubag, ang abogado, nga migamit ug talagsaong salabotan, nagkutlo gikan sa mga kasugoan sa Diyos sa Deuteronomio 6:5 ug Levitico 19:18, nga nag-ingon: “‘Higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog ug sa bug-os mong hunahuna,’ ug, ‘ang imong silingan sama sa imong kaugalingon.’”

“Husto ang imong tubag,” miingon si Jesus. “Ipadayon ang pagbuhat niini ug imong mabatonan ang kinabuhi.”

Bisan pa niana, ang abogado wala matagbaw. Ang tubag ni Jesus dili espisipiko alang kaniya. Gusto niyang pamatud-an ni Jesus nga ang iyang mga hunahuna husto ug busa siya matarong sa iyang pagtratar sa uban. Busa siya nangutana: “Kinsa ba gayod ang akong silingan?”

Ang mga Hudiyo nagtuo nga ang pulong “silingan” aplikado lamang sa isigka-Hudiyo, nga daw maoy gipaila sa konteksto sa Levitico 19:18. Ngani, sa ulahi bisan si apostol Pedro miingon: “Nahibalo kamo nga dili uyon sa kasugoan nga ang usa ka Hudiyo moduyog o moduol sa usa ka tawo sa laing rasa.” Busa ang abogado, ug tingali ang mga disipulo usab ni Jesus, nagtuo nga sila matarong kon magmaluluton sila sa isigka-Hudiyo lamang, sanglit, sa ilang pagtuo, ang mga dili-Hudiyo dili man ilang mga silingan.

Aron dili masilo ang mga namati kaniya, sa unsang paagi si Jesus makatul-id sa ilang pagtuo? Miasoy siya ug usa ka estorya, lagmit gibase sa tinuod nga hitabo. “Ang usa ka [Hudiyo],” miasoy si Jesus, “naglugsong gikan sa Jerusalem paingon sa Jerico ug nahulog ngadto sa kamot sa mga tulisan, kinsa naghubo kaniya ug nagbunal kaniya, ug nanglakaw, nga nagbiya kaniya nga himalatyon.”

“Karon, nahiatol,” si Jesus mipadayon, “ang usa ka saserdote naglugsong niadtong dalana, apan, sa iyang pagkakita kaniya, siya miagi sa pikas. Ingon man usab, ang usa ka Levihanon, sa iyang pagkaabot sa dapit ug sa pagkakita kaniya, miagi sa pikas. Apan ang usa ka Samarianhon nga nagbaktas sa dalan nahiabot ug, sa pagkakita kaniya, siya giabot ug kaluoy.”

Daghang saserdote ug ang ilang Levihanong mga katabang sa templo nagpuyo sa Jerico, sa gilay-ong 23 ka kilometros sa peligrosong dalan nga lugsongon ug 900 ka metros gikan sa dapit diin sila nag-alagad sa templo sa Jerusalem. Ang saserdote ug ang Levihanon madahom nga motabang sa isigka-Hudiyo nga anaa sa kalisod. Apan wala sila motabang. Hinuon, usa ka Samarianhon ang mitabang. Gidumtan kaayo sa mga Hudiyo ang mga Samarianhon nga dili pa dugay ilang giinsulto si Jesus sa labing masakit nga mga pulong pinaagi sa pagtawag kaniya nga “usa ka Samarianhon.”

Unsay gihimo sa Samarianhon sa pagtabang sa Hudiyo? “Siya miduol kaniya,” matud ni Jesus, “ug nagbugkos sa iyang mga samad, nga nagbubog lana ug bino niana. Dayon iyang gipasakay siya sa iyang kaugalingong hayop ug nagdala kaniya sa usa ka abotanan ug nag-atiman kaniya. Ug sa pagkasunod nga adlaw siya mikuhag duha ka denaryo [suhol sa mga duha ka adlaw], iyang gihatag kini sa tag-iya sa abotanan, ug miingon, ‘Atimana siya, ug kon makagasto ka pag labaw niini, bayran ko ra ikaw inigbalik ko dinhi.’”

Tapos sa pagsugid sa estorya, gisukna ni Jesus ang abogado: “Alang kanimo kinsa niining tulo ang naghimo sa iyang kaugalingon nga silingan sa tawong nahulog sa kamot sa mga tulisan?”

Kay dili gustong mohatag ug pasidungog sa usa ka Samarianhon, ang abogado yanong mitubag: “Ang usang naluoy kaniya.”

“Lumakaw ka ug buhata ang sama,” mihinapos si Jesus.

Kon laktud pang gisultihan ni Jesus ang abogado nga ang mga dili-Hudiyo iya usab nga mga silingan, dili lamang nga dili kadto dawaton sa tawo kondili ang kadaghanan sa mamiminaw basin modapig kaniya sa pagpakigdiskusyon kang Jesus. Hinuon, kining tinuod-kinabuhing estorya nagpadayag sa dili-malalis nga paagi nga ang atong mga silingan nagaapil sa mga tawo nga dili sama kanato ug rasa ug nasyonalidad. Kahibulongan gayod ang paagi ni Jesus sa pagpanudlo! Lucas 10:25-37; Buhat 10:28; Juan 4:9; 8:48.

▪ Unsang mga pangutana ang gibangon sa abogado kang Jesus, ug unsay iyang tuyo sa pagpangutana?

▪ Kinsay gituohan sa mga Hudiyo nga maoy ilang mga silingan, ug unsay katarongan sa pagtuo nga bisan ang mga disipulo may pagtuo usab nga sama niini?

▪ Sa unsang paagi gipatin-aw ni Jesus ang hustong panghunahuna nga sa ingon wala makalalis ang abogado?