Kapitulo 40

Usa ka Pagtulon-an sa Kaluoy

SI Jesus tingali didto pa sa Nain, diin bag-o pa siyang nagbanhaw sa usa ka anak lalaki sa usa ka babayeng balo, o tingali siya nagduaw sa usa ka siyudad sa duol. Ang usa ka Pariseo nga ginganlag si Simon buot motan-aw sa duol sa usang nagbuhat niadtong talagsaong mga buhat. Busa iyang gidapit si Jesus nga mokaon uban kaniya.

Si Jesus, kay nag-isip sa okasyon nga usa ka higayon sa pag-alagad niadtong presente, nagdawat sa imbitasyon, samang siya nagdawat ug mga imbitasyon sa pagpangaon uban sa mga maniningil sa buhis ug mga makasasala. Apan, sa pagsulod ni Jesus sa balay ni Simon, wala madawat ni Jesus ang mainitong pagtagad nga kasagarang ihatag sa mga bisita.

Ang sinapinag-sandalyas nga mga tiil mahimong init ug hugaw tungod sa pagpanaw sa abogong kadalanan, ug naandang buhat sa pag-abiabi ang paghugas sa mga tiil sa mga bisita sa bugnawng tubig. Apan ang mga tiil ni Jesus wala hugasi sa iyang pag-abot. Ni nadawat niya ang halok sa pagdawat, nga maoy kasagarang pamatasan. Ug ang naandang lana sa pag-abiabi wala itagana alang sa iyang buhok.

Sa lakat sa pagpangaon, samtang ang mga bisita nanghirag sa lamesa, ang usa ka dili-dinapit nga babaye mihinok sa pagsulod sa lawak. Siya ilado sa siyudad sa pagkinabuhig imoral nga kinabuhi. Lagmit nakadungog siya sa mga pagpanudlo ni Jesus, apil ang iyang imbitasyon sa ‘tanan nga nabudlayan sa pagduol kaniya alang sa pahulay.’ Ug kay dulot natandog sa iyang nakita ug nadungog, iyang gipangita niadto si Jesus.

Ang babaye miduol sa likod ni Jesus diha sa lamesa ug miluhod sa iyang tiilan. Samtang nangatagak ang mga luha diha sa iyang mga tiil, iyang gipahiran kana sa iyang buhok. Mikuha usab siyag humot nga lana gikan sa iyang sudlanan, ug samtang iyang mabinationg gihalokan ang iyang mga tiil, kana iyang gibuboan sa lana. Si Simon mitan-aw nga wala makauyon. “Kining tawhana, kon siya usa ka manalagna,” siya nangatarongan, “makaila unta ug masayod kon unsang matanga kini sa babaye nga nagahikap kaniya, nga siya usa ka makasasala.”

Kay nasabtan ang iyang gihunahuna, si Jesus miingon: “Simon, ako dunay igasulti kanimo.”

“Magtutudlo, isulti kana!” siya mitubag.

“Duha ka lalaki utangan sa usa ka tigpautang,” si Jesus misugod. “Ang usa utangan ug lima ka gatos ka denario, apan ang lain sa kalim-an. Sa dihang sila walay ikabayad, iyang gipasaylo silang duha. Busa, hain sa duha ang labaw nga mahigugma kaniya?”

“Sa akong pagtuo,” matud ni Simon, nga tingali uban ang pagkadili-matinagdanon sa morag pagkadili-angay sa pangutana, “ang usa nga iyang gipasaylo nga labaw.”

“Husto ang imong hukom,” miingon si Jesus. Ug dayon sa pagliso ngadto sa babaye, siya miingon kang Simon: “Imo bang nakita kining babayhana? Ako misulod sa imong balay; ako wala nimo hatagig tubig alang sa akong mga tiil. Apan kining babayhana nagbasa sa akong mga tiil pinaagi sa iyang mga luha ug nagpahid niana pinaagi sa iyang buhok. Ikaw wala mohatag kanako sa usa ka halok; apan kining babayhana, sukad sa takna sa akong pag-abot, wala mobiya sa paghalok nga mabination sa akong mga tiil. Wala nimo pahiri sa lana ang akong ulo; apan kining babayhana nagpahid sa akong mga tiil sa humot nga lana.”

Ang babaye sa ingon naghatag ug pamatuod sa kinasingkasing nga paghinulsol tungod sa iyang imoral nga kagahapon. Busa si Jesus mihinapos, nga nagaingon: “Tungod niini, ako magaingon kaninyo, ang iyang mga sala, bisan pag daghan, gipasaylo, tungod kay dako ang iyang paghigugma; apan siya nga gipasaylo sa diyutay, mahigugmag diyutay.”

Si Jesus wala maghatag ug katarongan o magkonsentir sa imoralidad. Hinunoa, kining hitaboa nagapadayag sa iyang maluluy-ong pagsabot sa mga tawo nga nakahimog mga sayop sa kinabuhi apan unya magpadayag nga sila nasubo tungod niana ug busa moduol kang Kristo alang sa kahupayan. Aron ihatag ang tinuod nga pahulay ngadto sa babaye, si Jesus miingon: “Ang imong mga sala gipasaylo na. . . . Ang imong pagtuo nagluwas kanimo; lumakaw ka sa kalinaw.” Lucas 7:36-50; Mateo 11:28-30.

▪ Giunsa si Jesus pagdawat sa iyang tig-abiabi, si Simon?

▪ Kinsay nangita kang Jesus, ug ngano?

▪ Unsang ilustrasyon ang gihatag ni Jesus, ug sa unsang paagi iyang gipadapat kini?