Kapitulo 65

Usa ka Sekretong Panaw Ngadto sa Jerusalem

TINGHUNLAK kadto sa 32 K.P., ug hapit na ang Piyesta sa mga Payag. Sa dakong bahin gihimo ni Jesus ang iyang kalihokan sa Galilea sukad sa Paskuwa sa 31 K.P., dihang misulay ang mga Hudiyo sa pagpatay kaniya. Malagmit, mao lamang kadtong panahona nga nakaduaw si Jesus sa Jerusalem aron sa pagtambong sa tulo ka tinuig nga mga piyesta sa mga Hudiyo.

Ang mga igsoon ni Jesus karon miagda kaniya: “Bumiya ka niining dapita ug lakaw ngadto sa Judea.” Ang Jerusalem mao ang pangunang siyudad sa Judea ug ang relihiyosong sentro sa tibuok nasod. Ang iyang mga igsoon nangatarongan: “Kay walay tawo nga magabuhat sa tago samtang siya mismo nagapaningkamot nga mailhan sa katilingban.”

Bisan pa nga si Santiago, Simon, Jose, ug Judas wala motuo sa ilang magulang nga igsoon, si Jesus, nga mao gayod ang Mesiyas, buot nila nga iyang ipakita ang iyang milagrosong mga gahom sa tanang nanagkatigom diha sa piyesta. Apan, si Jesus, nahibalo sa kapeligrohan. “Ang kalibotan walay katarongan sa pagdumot kaninyo,” siya miingon, “apan kini nagadumot kanako, tungod kay gipanghimatud-an ko man kini nga daotan ang mga buhat niini.” Busa gisultihan ni Jesus ang iyang mga igsoon: “Pangadto kamo sa piyesta; dili ako motungas ngadto niining piyestaha.”

Pito ka adlaw ang pagsaulog sa Piyesta sa mga Payag. Sa ikawalong adlaw kini taposon pinaagi sa solemneng mga kalihokan. Ang piyesta nagtimaan sa kataposan sa tuig sa pagpanguma ug maoy panahon sa dakong pagsadya ug pasalamat. Mga pila ka adlaw human nga migikan ang mga igsoon ni Jesus sa pagtambong uban sa mga pundok sa mga magpapanaw, siya ug ang iyang mga disipulo sekretong miadto, nagpalayo sa mga mata sa katilingban. Miagi sila sa Samaria, inay sa dalan nga agianan sa daghang mga tawo duol sa Suba sa Jordan.

Sanglit si Jesus ug ang iyang mga kauban nagkinahanglan man ug kapuy-an diha sa lungsod sa Samaria, nagpadala siyang daan ug mga sinugo aron sa pagpangandam. Apan, ang mga tawo midumili sa pagbuhat ug bisan unsa alang kang Jesus dihang nahibalo nga nagapaingon siya sa Jerusalem. Sa kasuko, si Santiago ug Juan nangutana: “Ginoo, buot ka ba nga among ingnon ang kalayo sa pagkanaog gikan sa langit ug sa pag-ut-ot kanila?” Gibadlong sila ni Jesus sa pagsugyot sa maong butang, ug mibiyahe sila sa laing balangay.

Samtang nanglakaw sila sa dalan, usa ka eskriba miingon kang Jesus: “Magtutudlo, mosunod ako kanimo bisan asa ikaw moadto.”

“Ang mga milo dunay kalobloban ug ang mga langgam sa kalangitan dunay kabatogan,” mitubag si Jesus, “apan ang Anak sa tawo walay dapit nga kapahulayan sa iyang ulo.” Nagsaysay si Jesus nga makaeksperyensiya ang eskriba ug kalisod kon siya mahimong Iyang sumusunod. Ug mopatim-aw nga ang eskriba mapahitas-on kaayo sa pagdawat niining kahimtanga sa kinabuhi.

Sa laing tawo, si Jesus miingon: “Sumunod ka kanako.”

“Tugoti una ako sa pag-adto ug sa paglubong sa akong amahan,” mitubag ang tawo.

“Pasagdi ang mga patay nga maoy magalubong sa ilang kaugalingong mga minatay,” miingon si Jesus, “apan lumakaw ka ug imantala mo ang gingharian sa Diyos.” Dayag nga wala mamatay ang amahan sa tawo, kay kon siya namatay pa, dili gayod mahitabo nga ang iyang anak makaanhi dinhi sa pagpamati kang Jesus. Matin-aw nga ang anak nangayog panahon sa paghulat nga mamatay ang iyang amahan. Dili pa siya andam sa pag-una sa Gingharian sa Diyos diha sa iyang kinabuhi.

Samtang nagpadayon sila sa dalan paingon sa Jerusalem, laing tawo miingon kang Jesus: “Mosunod ako kanimo, Ginoo; apan tugoti una ako sa pagpanamilit kanila nga atua sa akong panimalay.”

Sa pagtubag si Jesus miingon: “Walay tawo nga angayan alang sa gingharian sa Diyos kon kini siya, sa nagakupot na sa daro, molingi pa sa likod.” Kinahanglang isentro niadtong nahimong mga disipulo ni Jesus ang ilang mga mata diha sa pag-alagad sa Gingharian. Mohiwi ang linya sa tudling kon ang magdadaro dili magpadayon sa pagtan-aw sa unahan, busa ang bisan kinsa nga magatan-aw sa likod niining daang sistema sa mga butang mapandol sa dalan paingon sa kinabuhing dayon. Juan 7:2-10; Lucas 9:51-62; Mateo 8:19-22.

▪ Kinsa ang mga igsoon ni Jesus, ug unsay ilang pagbati kaniya?

▪ Nganong walay batasan ang mga taga Samaria, ug unsay buot buhaton ni Santiago ug Juan?

▪ Unsa ang tulo ka pagsultihay nga nasugatan ni Jesus diha sa dalan, ug sa unsang paagi iyang gipasiugda ang panginahanglan sa pagsakripisyo sa kaugalingon diha sa pag-alagad?