Mga Tun-anan sa Dinasig nga Kasulatan ug sa Ilang Luyong Kasayoran

Ang Dinasig nga Kasulatan Nagdalag Dayong Kaayohan

1. Unsang mahimayaong panan-awon ang gibuksan sa atong mga mata sa atong repaso sa “tibuok Kasulatan”?

 ANG atong repaso sa “tibuok Kasulatan dinasig sa Diyos” mibukas sa atubangan sa atong mga mata sa mahimayaong panan-awon sa pagkasoberano ni Jehova ug sa katuyoan sa iyang Gingharian. Atong namatikdan ang Bibliya usa ka Basahon, uban sa gamhanang tema—ang bindikasyon sa pagkasoberano ni Jehova ug sa kataposan nga katumanan sa iyang katuyoan sa yuta pinaagi sa iyang Gingharian ubos ni Kristo, ang Sinaad nga Binhi. Gikan sa unang mga panid sa Bibliya, kining tema giugmad ug gitin-aw pinaagi sa mga sinulat nga misunod, hangtod, sa kataposang mga kapitulo niini, ang mahimayaong katinuoran sa dakong katuyoan sa Diyos pinaagi sa iyang Gingharian nahimong tataw. Katalagsaon nga basahon ang Bibliya! Gikan sa makadasig-pagtaha nga paglalang sa materyal nga mga langit ug sa yuta uban sa kinabuhi sa kalalangan, gihatag sa Bibliya kanato ang dinasig ug kasaligang talaan sa pagpakiglabot sa Diyos uban sa katawhan hangtod sa atong panahon ug midala kanato hangtod sa bug-os katumanan sa mahimayaong paglalang ni Jehova sa “usa ka bag-ong langit ug usa ka bag-ong yuta.” (Pin. 21:1) Uban sa iyang dakong katuyoan nga bug-os natuman pinaagi sa Gingharian sa Binhi, si Jehova nga Diyos nakita diha sa relasyon sa usa ka malolotong Amahan ngadto sa usa ka malipayon hiniusa tawhanong pamilya, nga miduyog uban sa tanan langitnong panon sa pagdayeg kaniya ug sa pagbalaan sa iyang balaang ngalan.

2, 3. Sa unsang paagi ang tema nga milangkit sa Binhi giugmad sa latas sa Kasulatan?

² Kahibulongan kining tema nga milangkit sa Binhi giugmad latas sa Kasulatan! Gipahayag ang una dinasig nga tagna, gihatag sa Diyos ang saad nga ‘ang binhi sa babaye’ mosamad sa bitin sa ulo. (Gen. 3:15) Kapin sa 2,000 ka tuig ang miagi, ug gisultihan sa Diyos si Abraham: “Pinaagi sa imong binhi ang tanang kanasoran sa yuta tinong mopanalangin sa ilang kaugalingon.” Kapin sa 800 ka tuig sa ulahi, gihatag ni Jehova ang susamang saad sa usa sa mga kaliwat ni Abraham, ang maunongon Haring David, mipakita nga ang binhi harianon. Samtang milabay ang panahon, ang mga manalagna ni Jehova makapahinam nga miduyog sa pagtagna sa mga himaya sa pagmando sa Gingharian. (Gen. 22:18; 2 Sam. 7:12, 16; Isa. 9:6, 7; Dan. 2:44; 7:13, 14) Unya ang Binhi mismo mipadayag, kapin sa 4,000 ka tuig human sa unang saad sa Eden. Kining Usa, kinsa usab ‘ang binhi ni Abraham,’ mao si Jesu-Kristo, “ang Anak sa Hataas Uyamot,” ug kaniya gihatag ni Jehova “ang trono ni David nga iyang amahan.”—Gal. 3:16; Luc. 1:31-33.

³ Bisan pa kining Binhi, ang dinihogang Hari sa Diyos, gisamdan sa kamatayon sa yutan-ong binhi sa Bitin, gibanhaw siya sa Diyos gikan sa mga minatay ug mituboy kaniya sa Iya mismo tuo nga kamot, diin siya mihulat sa igong panahon sa Diyos sa ‘pagdugmok sa ulo ni Satanas.’ (Gen. 3:15; Heb. 10:13; Roma 16:20) Unya gidala sa Pinadayag ang entiro nga panan-awon sa mahimayaong sangkoanan. Si Kristo misulod sa gahom sa Gingharian ug gilabog “ang orihinal nga bitin, ang usa  nga ginganlan Yawa ug Satanas,” gikan sa langit nganhi sa yuta. Sulod sa mubong panahon, gidala sa Yawa ang kaalaot sa yuta ug nakiggubat batok sa ‘nahibilin sa binhi sa babaye sa Diyos.’ Apan si Kristo, ingon “Hari sa mga hari,” mibunal sa kanasoran. Ang orihinal nga Bitin, si Satanas, gihagbong sa bung-aw ug unya sa kaulahian laglagon sa walay kataposan. Sa kasamtangan, pinaagi sa Bag-ong Jerusalem, ang pangasaw-onon sa Kordero, ang kaayohan sa halad ni Kristo ipadapat sa katawhan alang sa panalangin sa tanang kabanayan sa yuta. Sa ingon, ang matahom nga tema sa dinasig nga Kasulatan mibukhad sa atong atubangan sa tanan makapahinam nga kahalangdon!—Pin. 11:15; 12:1-12, 17; 19:11-16; 20:1-3, 7-10; 21:1-5, 9; 22:3-5.

PAGPAHIMULOS NIINING DINASIG NGA REKORD

4. Sa unsang paagi kita makabaton sa kinadak-ang kaayohan sa Balaang Kasulatan, ug ngano?

⁴ Sa unsang paagi kita makabaton sa kinadak-ang kaayohan gikan sa Balaang Kasulatan? Makapahimulos kita pinaagi sa pagtugot sa Bibliya nga mopalihok sa atong kinabuhi. Pinaagi sa matag adlaw nga pagtuon ug pagpadapat sa dinasig nga Kasulatan, makabaton kita sa giya sa Diyos. “Ang pulong sa Diyos buhi ug may gahom,” ug kini mahimong kahibulongang gahom sa pagkamatarong sa atong kinabuhi. (Heb. 4:12) Kon kita padayong motuon ug mosunod sa pagtultol sa Pulong sa Diyos, mahimong kita “makasul-ob sa bag-ong personalidad nga gilalang sumala sa kabubut-on sa Diyos sa matuod nga kamatarong ug kamaunongon.” Mahimong bag-o kita sa puwersa nga mopalihok sa atong hunahuna, ug mahimong mausab kita pinaagi sa pagbag-o sa atong hunahuna, aron pamatud-an sa atong kaugalingon “ang maayo ug madawat ug hingpit nga kabubut-on sa Diyos.”—Efe. 4:23, 24; Roma 12:2.

5. Unsa ang atong makat-onan sa tinamdan ug panig-ingnan ni Moises?

⁵ Makakat-on kita ug dako pinaagi sa pagpaniid kon sa unsang paagi ang uban matinumanong mga alagad sa Diyos mipahimulos gikan sa pagtuon sa Pulong sa Diyos ug sa pagpalandong niini. Pananglitan, naa si Moises, ‘ang kinaaghopan sa tanang tawo,’ kinsa kanunay matudloan ug sugot sa pagkat-on. (Num. 12:3) Kinahanglan kita kanunay duna sa sama maampoong pagpabili sa pagkasoberano ni Jehova ingon sa iyang nabatonan. Si Moises ang miingon: “O Jehova, ikaw mismo namatud-ang matuod nga puloy-anan alang kanamo sulod sa kaliwatan tapos kaliwatan. Una pa ang kabukiran mismo nahimugso, o mipadayon ka sa pagpatungha uban sa mga pagbati sa pagpanganak sa yuta ug sa mabungahong yuta, bisan gikan sa panahon nga walay katinoan ngadto sa panahon nga walay katinoan ikaw ang Diyos.” Si Moises sa bug-os sinati sa kaalam sa Diyos, kay siya gigamit ni Jehova sa pagsulat sa unang mga basahon sa Bibliya. Busa, iyang nasabtan ang importansiya sa matag adlaw nga pagpangita sa kaalam gikan kang Jehova. Busa, siya miampo sa Diyos: “Ipakita kanamo unsaon sa pag-ihap sa among mga adlaw aron kami makabaton sa kasingkasing sa kaalam.” Sanglit “ang mga adlaw sa atong panuigon” mahimong pipila ra, mga 70 ka tuig, o 80 enkaso may “linaing kagahom,” maalamon kita kon kita mopista matag adlaw sa iyang Pulong, kay unya “ang kahimuot ni Jehova nga atong Diyos mapamatud-an nga diha kanato,” ingon kini diha sa iyang matinumanong alagad si Moises.—Sal. 90:1, 2, 10, 12, 17.

6. Sa unsang paagi kita, ingon ni Josue, mahimong molampos sa atong dalan?

⁶ Kakinahanglanon niini sa pagpalandong sa matag adlaw sa Pulong sa Diyos! Gitin-aw kini ni Jehova sa sumusunod ni Moises, si Josue, sa pag-ingon: “Magmaisogon lamang ug magmakusganon sa pag-atiman sa pagbuhat sumala sa tanan sa kasugoan nga gisugo kanimo sa akong alagad si Moises. Ayaw pagtipas niini ngadto sa tuo o sa wala, aron molihok ka nga maalamon bisan asa ka moadto. Kining basahon sa kasugoan kinahanglan dili mobiya sa imong baba, ug kinahanglan mobasa ka niini sa ubos-tono adlaw ug gabii, aron imong maatiman ang pagbuhat sumala sa tanan nga gisulat niini; kay niana magmalamposon ka ug unya magmaalamon ka.” Ang padayon nga pagbasa ba ni Josue sa Kasugoan ni Jehova ‘mihimo sa iyang dalan nga malamposon’? Ang panalangin ni Jehova sa iyang maisogong kampanya sa Kanaan mitagana sa tubag.—Jos. 1:7, 8; 12:7-24.

7. Sa unsang paagi gipahayag ni David ang iyang pagpabili sa kaalam sa Diyos, ug sa unsang paagi ang samang pagpabili gipahayag sa Salmo 119?

⁷ Palandonga, usab, ang hinigugmang David, usa pa nga lalom mibahandi sa kaalam ni Jehova. Kadako kinasingkasing nga pagpabili ang iyang gipakita sa “kasugoan,” “pahinumdom,” “mga mando,” “mga sugo,” ug “mga hudisyal desisyon” ni Jehova! Ingon sa gipahayag ni David: “Mas labi sila nga tinguhaon kay sa bulawan, oo, kay sa daghan pino nga bulawan; ug mas tam-is kay sa dugos ug sa miagos nga dugos gikan sa putyokan.” (Sal. 19:7-10) Kining mahimayaong tema gipahalapad ug gisubli sa laing salmista uban sa makapagimok-kalag nga katahom latas sa Salmo 119. Samtang kita sa matag adlaw motuon sa Pulong sa Diyos ug mosunod sa maalamong tambag niini, hinaot unta kita makaingon kang Jehova: “Ang imong pulong maoy lamparahan sa akong tiil, ug kahayag sa akong alagianan. Ang imong mga pahinumdom kahibulongan. Mao kana ngano ang akong kalag mituman kanila.”—Sal. 119:105, 129.

8. Unsang mga pulong ni Solomon ang atong himoon atong kaugalingon?

⁸ Sa mga adlaw sa iyang kamatinumanon, ang anak ni David si Solomon usab mikinabuhi pinaagi sa Pulong sa Diyos, ug sa iyang panultihon usab, atong makaplagan ang makapalihok nga mga pahayag sa pagpabili nga mobuhat kita ug maayo kon atong himoon nga kaugalingon. Pinaagi sa matag adlaw nga pagbasa ug pagpadapat sa Bibliya, makadangat kita sa bug-os nga pagsabot sa sulod nga giladmon sa kahulogan sa mga pulong ni Solomon: “Malipayon ang tawo nga nakakaplag sa kaalam, ug ang tawo nga nakabaton sa pagsabot. Ang gitas-on sa mga adlaw naa sa tuo nga kamot niini; sa wala nga kamot naa ang bahandi ug himaya. Ang mga dalan niini mga dalan sa kahimuot, ug ang tanang alagianan niini malinawon. Kini usa ka kahoy sa kinabuhi niadtong kinsa mikupot niini, ug kadtong kinsa lig-on nga mihawid niini tawgon nga malipayon.” (Prov. 3:13, 16-18) Ang matag adlaw nga pagtuon ug pagsugot sa Pulong sa Diyos motultol sa kinadakoang kalipay karon, uban sa pasalig sa “gitas-on sa mga adlaw”—kinabuhing walay kataposan sa bag-ong kalibotan ni Jehova.

9. Unsang pagdasig ang atong mabatonan sa panig-ingnan ni Jeremias?

 ⁹ Dili hisayloan taliwala niadtong kinsa nagmahal ug nagsugot sa dinasig nga Kasulatan mao ang matinumanong mga manalagna sa Diyos. Si Jeremias, pananglitan, dunay lisod kaayo nga tulomanon. (Jer. 6:28) Ingon niya: “Ang pulong ni Jehova nahimo alang kanako nga hinongdan sa pagtamay ug pagyubit sa tibuok adlaw.” Apan maayo kaayo siya pagkalig-on sa iyang mga pagtuon sa Pulong sa Diyos, ug sa matuod, siya mismo gigamit sa pagsulat sa upat ka basahon sa dinasig nga Kasulatan—Una ug Ikaduhang Hari, Jeremias, ug Lamentaciones. Busa, unsa ang nahitabo sa dihang ang kahiubos daw miputos kang Jeremias ug iyang gihunahuna nga mohunong na sa pagwali sa “pulong ni Jehova”? Pasagdi si Jeremias mismo motubag: “Sa akong kasingkasing kini namatud-an ingon sa nagsigang kalayo nga natuob sulod sa akong mga bukog; ug gikapoyan ako sa pagpugong, ug ako dili na makaantos.” Napugos siya sa pagsulti sa mga pulong ni Jehova, ug sa pagbuhat niini, nakaplagan niya nga si Jehova naa kaniya “ingon sa makalilisang usa nga gamhanan.” Kon kita motuon ug mopadayon sa pagtuon sa Pulong sa Diyos, sa pagkaagi nga kini nahimong bahin na kanato ingon ni Jeremias, nan ang dimabuntog nga gahom ni Jehova mahimong uban kanato, ug makahimo kita sa pagdaog sa tagsa ka babag sa pagpadayon sa pagsulti sa Iyang mahimayaong katuyoan sa Gingharian.—Jer. 20:8, 9, 11.

10. Unsang papel ang gidula sa Kasulatan sa kinabuhi ni Jesus, ug unsa ang iyang giampo alang sa iyang mga disipolo?

¹⁰ Karon, unsa na man ang atong kinadak-ang panig-ingnan, “ang Pangulong Ahente ug Maghihingpit sa atong pagtuo, si Jesus”? Sinati ba siya sa dinasig nga Kasulatan ingon sa tanang manalagna ug uban matinumanong tawo una kaniya? Dayag oo, ingon sa klarong gipakita sa iyang daghang pagkutlo ug sa iyang kurso sa kinabuhi harmonya sa Kasulatan. Uban sa Pulong sa Diyos sa hunahuna nga iyang gipresentar ang iyang kaugalingon sa pagbuhat sa kabubut-on sa iyang Amahan dinhi sa yuta: “Nia ako mianhi, sa rolyo sa basahon kini nahisulat mahitungod kanako. Sa pagbuhat sa imong kabubut-on, O Diyos ko, ako nalipay, ug ang imong kasugoan naa sa sulod nakong mga bahin.” (Heb. 12:2; Sal. 40:7, 8; Heb. 10:5-7) Busa, gidula sa Pulong sa Diyos ang yawing papel sa pagbalaan ni Jehova kang Jesus, o sa pagpinig kaniya alang sa iyang pag-alagad. Miampo si Jesus nga unta ang iyang mga sumusunod mahimong balaanon usab: “Balaana sila pinaagi sa kamatuoran; ang imong pulong mao ang kamatuoran. Ingon nga imong gipadala ako sa kalibotan, ako usab gipadala sila sa kalibotan. Ug akong gibalaan ang akong kaugalingon alang kanila, aron nga sila usab mahimong mabalaan pinaagi sa kamatuoran.”—Juan 17:17-19.

11. (a) Unsa ang gipasiugda ni Pedro sa dinihogang mga Kristohanon maylabot sa Pulong sa Diyos? (b) Ngano ang pagtuon sa Bibliya importante usab sa dakong panon?

¹¹ Ingon gibalaan “pinaagi sa kamatuoran,” ang inanak-espiritu ug dinihogang sumusunod sa tunob ni Jesus kinahanglan ‘mopabilin sa iyang pulong’ aron mahimong iyang matuod nga mga disipolo. (Juan 8:31) Busa, gipasiugda ni Pedro, sa pagsulat “niadtong nakabaton sa pagtuo,” ang panginahanglan sa padayon nga pagtuon ug pagtagad sa Pulong sa Diyos: “Alang niining katarongan ako andam kanunay sa pagpahinumdom kaninyo niining mga butang, bisan pa kamo nahibalo kanila ug lig-on nga nahaluna sa kamatuoran nga naa kaninyo.” (2 Ped. 1:1, 12) Ang padayon nga mga pahinumdom, ingon nianang makaplagan sa matag adlaw nga pagbasa ug pagtuon sa Pulong sa Diyos, importante usab sa tanan kinsa milaom nga mahilakip sa “dakong panon” nga nakita ni Juan sa panan-awon human gibatbat ang 144,000 ka tinimrihan sa mga tribo sa espirituwal nga Israel. Gawas kon sila mopadayon sa pagbaton sa tubig sa kamatuoran sa kinabuhi, sa unsang paagi kining dakong panon intelihente nga “makapadayon sa pagsinggit uban sa makusog nga tingog, nga miingon: ‘Ang kaluwasan utang nato sa atong Diyos, kinsa milingkod sa trono, ug sa Kordero’”?—Pin. 7:9, 10; 22:17.

12. Nganong kita kinahanglan mopadayon sa pagpalandong sa Pulong sa Diyos?

¹² Dili kita makaikyas niini! Ang paagi sa pagbaton sa kinadak-ang kaayohan gikan sa dinasig nga Kasulatan, ang paagi sa pagkaplag sa kaluwasan sa kinabuhing walay kataposan, mao ang pagtuon niadtong Kasulatan ug magkinabuhi pinaagi kanila matag adlaw sa atong kinabuhi. Kinahanglan kita padayon nga mopalandong sa Pulong sa Diyos, uban sa sama maampoong tinamdan sa pagpabili nga gipahayag sa salmista: “Akong hinumdoman ang mga buhat ni Jah; kay akong hinumdoman ang imong kahibulongang buhat sa kanhi. Ug ako tinong mopalandong sa tanan nimong kalihokan.” (Sal. 77:11, 12) Ang pagpalandong sa ‘kahibulongang buhat ug kalihokan’ ni Jehova mopalihok usab kanato nga mahimong aktibo sa maayong mga buhat, uban sa tumong sa walay kataposang kinabuhi. Ang katuyoan niining basahon, “Ang Tibuok Kasulatan Dinasig sa Diyos ug Mapuslanon,” mao ang pagdasig sa bisan kinsa nga nahigugma sa pagkamatarong sa pagpakig-ambit sa dayon ug makatagbaw nga kaayohan nga mahipos sa padayon nga pagtuon ug pagpadapat sa Pulong sa Diyos.

SA “KRITIKAL NGA MGA PANAHON”

13. Sa unsang “kritikal nga mga panahon” kita nagkinabuhi?

¹³ Kining modernong panuigon mao ang labing kritikal nga panahon sa tawhanong kasaysayan. Kini mabutohon uban sa makapahibulong nga mga posibilidad. Matuod, mahimo kining ikaingon nga ang mismong kaluwasan sa tawhanong rasa naa sa peligro. Haom kaayo, nan, ang mga pulong sa apostol Pablo: “Apan hibaloi kini, nga sa kataposang mga adlaw ang kritikal nga mga panahon lisod sagubangon moabot. Kay ang mga tawo mahimong mahigugmaon sa ilang kaugalingon, mahigugmaon sa salapi, mapagawalon, hambogiro, tampalasan, masukihon sa mga ginikanan, dimapasalamaton, dimaunongon, walay natural nga pagbati, dili bukas sa bisan unsang kasabotan, mabutangbutangon, walay pagpugong sa kaugalingon, mabangis, walay gugma sa kamaayo mabudhion, gahig-ulo, garboso, mahigugmaon sa kalingawan inay kay mahigugmaon sa Diyos, nga duna sa dagway sa diyosnong debosyon apan namatud-an nga palso sa gahom niini; ug gikan niini pahilayo.”—2 Tim. 3:1-5.

14. Tungod sa panahon, unsang tambag ni Pablo ang atong patalinghogan?

¹⁴ Nganong mopahilayo sa ingon kanila? Tungod kay ang ilang waydiyos nga paagi sa madali matapos sa  kalaglagan! Hinonoa, pasagdi kita, uban sa tanang mabuot-kasingkasing, moliso sa himsog nga mga pagtulon-an sa dinasig nga Kasulatan, mohimo niining Kasulatan nga mismong patukoranan sa atong matag adlaw nga kinabuhi. Pasagdi atong patalinghogan ang mga pulong ni Pablo sa batan-ong Timoteo: “Ikaw, bisan pa, padayon sa mga butang imong nakat-onan ug nadani sa pagtuo.” (2 Tim. 3:14) Oo, “padayon” kanila, matod ni Pablo. Sa pagbuhat niana, mapainubsanon nga pasagdan nato ang Kasulatan sa pagtudlo, pagbadlong, pagtul-id sa mga butang, ug sa pagdisiplina kanato sa pagkamatarong. Si Jehova nahibalo kon unsa ang kinahanglan nato, kay ang iyang hunahuna mas taas kay sa atong hunahuna. Pinaagi sa iyang dinasig nga Kasulatan, iyang gitug-an kanato kon unsa ang mapuslanon kanato aron kita mahimong bug-os masangkapan ug takos sa maayong bulohaton sa pagsaksi sa iyang ngalan ug Gingharian. Gihatag ni Pablo kining talagsaong tambag sa konteksto sa paghubit sa “kritikal nga mga panahon” nga moabot “sa kataposang mga adlaw”: “Ang tibuok Kasulatan dinasig sa Diyos ug mapuslanon sa pagtudlo, sa pagbadlong, sa pagtul-id sa mga butang, sa pagmatuto sa pagkamatarong, aron ang tawo sa Diyos mahimong sa bug-os takos, bug-os masangkapan alang sa tagsa ka maayong bulohaton.” Hinaot unta kitang tanan makalabang buhi niining kritikal nga mga panahon pinaagi sa pagpatalinghog niining dinasig nga tambag!—2 Tim. 3:16, 17; Isa. 55:8-11.

15. (a) Unsa ang miresulta sa dipagsugot? (b) Unsang mahimayaong oportunidad ang gibuksan sa pagsugot ni Kristo?

¹⁵ Ang pagsugot sa dinasig nga Kasulatan kinahanglan mao ang atong tumong. Pinaagi sa dipagsugot sa pulong ug sugo ni Jehova nga ang unang tawo nahulog sa sala ug kamatayon, “ug busa ang kamatayon mikuyanap sa tanang tawo.” Busa ang tawo nawad-an sa oportunidad nga mahimo unta iya sa Paraiso sa Eden sa “aktuwal nga pagkuha usab sa bunga sa kahoy sa kinabuhi ug mokaon ug mabuhi sa panahon nga walay katinoan.” (Roma 5:12; Gen. 2:17; 3:6, 22-24) Apan pinaagi sa pagsugot ni Kristo ug sa sukaranan sa halad niining “Kordero sa Diyos” nga si Jehova mopahinabo sa “usa ka suba sa tubig sa kinabuhi, klaro ingon sa kristal,” sa pag-agos sa kaayohan sa tanan sa katawhan kinsa mopahanungod sa ilang kaugalingon Kaniya sa pagsugot. Ingon nakita ni apostol Juan sa panan-awon: “Ug niining daplina sa suba ug nianang daplina dihay mga kahoy sa kinabuhi nga nagpamungag napulog-duha ka abot sa bunga, nga naghatag sa ilang mga bunga matag bulan. Ug ang mga dahon sa mga kahoy alang sa pag-ayo sa mga nasod.”—Juan 1:29; Pin. 22:1, 2; Roma 5:18, 19.

16. Unsa ang dayong kaayohan sa dinasig nga Kasulatan?

¹⁶ Makausa pa ang dalan pa kinabuhing walay kataposan gibuksan sa katawhan. Malipayon, nan, kadtong mopatalinghog sa dinasig nga kasulatan: “Kinahanglan imong pilion ang kinabuhi aron mabuhi ikaw, ikaw ug ang imong kaliwatan, pinaagi sa paghigugma kang Jehova nga imong Diyos, pinaagi sa pagpatalinghog sa iyang tingog ug pinaagi sa pagtapot kaniya; kay siya ang imong kinabuhi ug ang gitas-on sa imong mga adlaw.” (Deut. 30:19, 20) Bulahan si Jehova, ang Diyos ug Amahan sa atong Ginoong Jesu-Kristo, nga mihimo niining dakong tagana sa kinabuhi pinaagi sa halad sa iyang Anak ug pinaagi sa iyang walay kataposang Gingharian. Kadako sa atong kasadya ug pagpasalamat nga kita makabasa ug makabasa-usab, makatuon ug makatuon-usab, ug makapalandong niining bililhong kamatuoran, kay sa matuod “ang tibuok Kasulatan dinasig sa Diyos ug mapuslanon,” nga motultol sa dayong kinabuhi sa langit o sa paraisong yuta. (Juan 17:3; Efe. 1:9-11) Unya ang tanang butang mahimong ‘balaan kang Jehova.’—Zac. 14:20; Pin. 4:8.

[Mga Pangutana sa Pagtuon]