Basahon sa Bibliya Numero 53​—2 Mga Taga-Tesalonica

Magsusulat: Pablo

Dapit Gisulatan: Corinto

Sinulat Nahuman: k. 51 K.P.

1. Unsa ang mitimaan sa panahon ug dapit sa pagsulat, ug unsa ang mitukmod sa ikaduhang sulat sa mga taga-Tesalonica?

 ANG ikaduhang sulat ni apostol Pablo sa mga taga-Tesalonica suod misunod sa una. Hibalo kita kini gisulat wamadugay human sa unang sulat, ug usab gikan sa samang siyudad sa Corinto, kay ang samang mga igsoon, sila Silvano ug Timoteo, usab miduyog kang Pablo sa pagtimbaya sa kongregasyon sa Tesalonica. Sila tanan nagpanaw nga mga alagad sa sayo Kristohanong kongregasyon, ug walay rekord nga ang tanang tulo mianha nga magkakuyog usab human niining panag-uban sa Corinto. (2 Tes. 1:1; Buh. 18:5, 18) Gipasabot sa ulohan ug sa kinaiya sa diskusyon nga gibati ni Pablo ang dinaliang panginahanglan sa pagtul-id gilayon sa kongregasyon maylabot sa sayop diin kini nahulog.

2. Unsa ang pamatuod sa pagkakasaligan sa Ikaduhang Mga Taga-Tesalonica?

² Ang pagkakasaligan sa sulat ingon man ka maayo gimatud-an ingon sa pagkakasaligan sa Unang Mga Taga-Tesalonica. Gikutlo usab kini ni Irenaeus (ikaduhang siglo K.P.) ingon man sa uban sayong mga magsusulat, lakip ni Justin Martyr (usab sa ikaduhang siglo), kinsa dayag mipunting sa 2 Tesalonica 2:3 sa dihang misulat mahitungod sa “tawo sa kalapasan [sala].” Makita kini sa sama sayong mga katalogo ingon sa Unang Mga Taga-Tesalonica. Bisan pa kini karon wala na sa Chester Beatty Papiro Num. 2 (P⁴⁶), kini pihong diha sa unang duha sa pito ka panid nga nawala human sa Unang Mga Taga-Tesalonica.

3, 4. (a) Unsang suliran ang mibangon sa kongregasyon sa Tesalonica? (b) Kanus-a ug diin ang sulat gisulat, ug unsa ang gipaningkamotan ni Pablo nga mahimo niini?

³ Unsa ang katuyoan niining sulat? Gikan sa tambag nga gitanyag ni Pablo sa mga taga-Tesalonica, atong hibaloan nga ang pipila sa kongregasyon nangatarongan nga ang presensiya sa Ginoo haduol na, nga kining mga ispikulador aktibong miwali niining teoriya nila, ug nga sila mipahinabo sa dakong kaguliyang sa kongregasyon. Mipadayag kini nga ang uban migamit niini ingon pasangil alang sa dili pagtrabaho sa pagtagana alang sa ilang kaugalingon. (2 Tes. 3:11) Sa iyang unang sulat, si Pablo mihimog reperensiya sa presensiya sa Ginoo, ug wayduda sa dihang kining mga ispikulador nakadungog sa sulat nga gibasa, tulin ra sila nga mituis sa mga pulong ni Pablo ug mibasa kanila sa mga kahulogan nga bisan kanus-a wala tuyoa. Posible usab ang usa ka sulat nga sayop giingon iya ni Pablo giinterpretar nga mipasabot nga “ang adlaw ni Jehova ania na.”—2:1, 2.

⁴ Mipadayag si Pablo nakadawat ug report niining kahimtang, lagmit gikan sa tawo nga mihatod sa iyang unang sulat sa kongregasyon, ug siya busa mahinamon kaayo sa pagtul-id sa hunahuna sa iyang mga igsoon kang kinsa siya dunay dakong pagbati. Busa sa tuig 51 K.P., si Pablo, duyog sa iyang duha ka kauban, mipadala ug sulat gikan sa Corinto ngadto sa kongregasyon sa Tesalonica. Dugang pa sa pagtul-id sa sayop nga panlantaw sa presensiya ni Kristo, gihatag ni Pablo ang mainitong pagdasig sa pagbarog nga malig-on sa kamatuoran.

KAUNDAN SA IKADUHANG MGA TAGA-TESALONICA

5. Alang sa unsa gipasalamatan ang Diyos ni Pablo ug sa iyang mga kauban, ug unsang pasalig ang ilang gihatag, ug unsa ang ilang giampo?

⁵ Pagpadayag sa Ginoong Jesus (1:1-12). Gipasalamatan ni Pablo ug sa iyang mga kauban ang Diyos tungod sa maayong pagtubo sa pagtuo sa mga taga-Tesalonica ug sa ilang gugma sa usa ug usa. Ang ilang paglahutay ug pagtuo ubos sa paglutos pruweba sa matarong hukom sa Diyos nga sila giisip takos sa Gingharian. Ang Diyos mobayad sa kalisdanan niadtong kinsa mihimo niini alang sa kongregasyon, ug siya mohatag kahupayan niadtong kinsa miantos. Kini sa “pagpadayag sa Ginoong Jesus gikan sa langit uban sa iyang gamhanang mga manolonda . . . sa panahon nga siya moanha aron mahimaya maylabot sa iyang mga balaan.” (1:7, 10) Si Pablo ug ang iyang mga kauban kanunay miampo alang sa mga taga-Tesalonica, nga isipon unta sa Diyos nga takos sila sa Iyang pagtawag ug ang ngalan sa Ginoong Jesus mahimaya kanila ug sila sa paghiusa uban kaniya.

6. Unsa ang kinahanglan moabot una pa sa adlaw ni Jehova, ug sa unsang paagi?

⁶ Apostasiya moabot una sa presensiya ni Jesus (2:1-12). Ang mga igsoon kinahanglan dili maukay sa bisan unsang mensahe nga ang adlaw ni Jehova ania na. “Dili kini moabot hangtod mahitabo una ang apostasiya ug ang tawo sa kalapasan ihikyad, ang anak sa kalaglagan.” Karon hibalo sila sa “butang milihok ingon pugong,” apan ang misteryo niining kalapasan milihok na. Sa dihang kining pugong mawala na, “nan, sa matuod, ang usa nga malapason ibutyag, kinsa laglagon sa Ginoong Jesus pinaagi sa  espiritu sa iyang baba ug dad-on sa pagkawala pinaagi sa pagpadayag sa iyang presensiya.” Ang presensiya sa usa nga malapason sumala sa pagpalakaw ni Satanas uban sa gamhanang mga buhat ug limbong, ug tugtan sa Diyos ang palakaw sa sayop nga moadto niadtong kinsa wala modawat sa gugma sa kamatuoran aron sila motuo sa bakak.—2:3, 6, 8.

7. Sa unsang paagi ang mga igsoon mobarog nga malig-on ug makakaplag proteksiyon gikan sa usa nga daotan?

⁷ Barog nga malig-on sa pagtuo (2:13–3:18). Mipadayon si Pablo: “Kita obligado sa pagpasalamat sa Diyos kanunay alang kaninyo, mga igsoon nga hinigugma ni Jehova, tungod kay kamo gipili sa Diyos gikan sa sinugdan alang sa kaluwasan pinaagi sa pagbalaan kaninyo uban sa espiritu ug pinaagi sa inyong pagtuo sa kamatuoran.” Alang niining katuyoan ang maayong balita gipahayag kanila. Busa ang mga igsoon kinahanglan mobarog nga malig-on ug mentinahon ang ilang paghawid sa mga tradisyon nga gitudlo kanila, nga si Jesu-Kristo ug ang Amahan, kinsa sa mahigugmaon mihatag sa walay kataposang kalipay ug paglaom, mohimo kanila nga “malig-on sa tagsa ka maayong buhat ug pulong.” (2:13, 17) Gihangyo ni Pablo ang ilang mga pag-ampo, “aron ang pulong ni Jehova mahimong mopadayon nga matulin ug gihimaya.” (3:1) Ang Ginoo, kinsa matinumanon, mohimo kanilang malig-on ug mobantay kanila gikan sa daotan, ug kini ang pag-ampo ni Pablo nga ang Ginoo mopadayon sa pagtultol sa ilang mga kasingkasing nga malamposon sa gugma sa Diyos ug sa paglahutay alang kang Kristo.

8. Unsang kusganong tambag ang gihatag, ug diin si Pablo ug ang iyang kaubanan mipahalunag panig-ingnan?

⁸ Misunod ang kusganong tambag: “Karon kami mihatag kaninyo sa mga sugo, mga igsoon, sa ngalan sa Ginoong Jesu-Kristo, sa pagpahilayo gikan sa tanang igsoon nga naglakaw nga samokan ug dili sumala sa tradisyon nga inyong nadawat gikan kanamo.” (3:6) Gipahinumdom sila sa apostol ang panig-ingnan nga gihatag sa iyang misyonerong grupo, mihago sa gabii ug sa adlaw aron dili mahimong gastos kanila, sa pagkaagi sila makaarang sa paghatag sa sugo: “Kon si bisan kinsa dili buot motrabaho, dili siya pakan-a.” Apan karon nakadungog sila nga may pipila ka samokan nga wamotrabaho ug hilabtanon. Kini sila kinahanglan manginabuhi alang sa ilang kaugalingong pagkaon.—2 Tes. 3:10; 1 Tes. 4:11.

9. Unsa ang giingon ni Pablo mahitungod sa pagbuhat sa maayo ug sa pagpakaulaw sa dimasinugtanon, ug giunsa niya pagtapos ang iyang sulat?

⁹ Ang mga igsoon kinahanglan dili mohunong sa pagbuhat sa maayo. Apan kon ang usa kanila dimasinugtanon sa sulat ni Pablo, ang kongregasyon kinahanglan mopakaulaw kaniya pinaagi sa pagmarka kaniya ug dili na makig-uban kaniya, sa samang panahon tambagan siya ingon igsoon. Gipahayag ni Pablo ang pag-ampo nga ang Ginoo sa kalinaw mohatag unta kanila sa “kalinaw kanunay sa tanang paagi,” ug iyang gitiklopan ang iyang sulat uban sa mga timbaya sa iya mismong kamot.—2 Tes. 3:16.

NGANONG MAPUSLANON

10. Unsa ang pipila sa pasukaranang pagtulon-an ug prinsipyo ang gikobrehan sa Ikaduhang Mga Taga-Tesalonica?

¹⁰ Gitandog niining mubo dinasig nga sulat sa mga taga-Tesalonica ang dakong kahan-ayan sa Kristohanong kamatuoran, tanan niini mapuslanon alang sa pagpalandong. Tagda ang mosunod paninugdang pagtulon-an ug prinsipyo nga gikobrehan: Si Jehova ang Diyos sa kaluwasan, ug siya nagbalaan pinaagi sa espiritu ug pagtuo sa kamatuoran (2:13); ang Kristohanon kinahanglan molahutay sa pag-antos aron isipon takos sa Gingharian sa Diyos (1:4, 5); ang mga Kristohanon tigomon tingob sa Ginoong Jesu-Kristo sa iyang presensiya (2:1); si Jehova mopakanaog sa matarong hukom niadtong kinsa mosupak sa maayong balita (1:5-8); kadtong gitawag himayaon sa paghiusa uban ni Kristo Jesus, sumala sa dili takos nga kalolot sa Diyos (1:12); gitawag sila pinaagi sa pagwali sa maayong balita (2:14); ang pagtuo hinongdanong kinahanglanon (1:3, 4, 10, 11; 2:13; 3:2); husto ang trabaho sa pagtagana sa kaugalingon sa ministeryo; kon ang tawo dili motrabaho, mahimo siyang tapolan ug mosugod sa pagpanghilabot sa mga butang waylabot kaniya (3:8-12); ang gugma sa Diyos nalangkit uban sa paglahutay (3:5). Kadakong bahandi sa makapalig-ong impormasyon ang makaplagan sa mubo dinasig nga sulat!

11. Unsang importante nga impormasyon ug pasalig ang gipresentar maylabot sa Gingharian?

¹¹ Niining sulat gipakita ni Pablo ang lalom nga kabalaka alang sa espirituwal nga kaayohan sa iyang mga igsoon sa Tesalonica ug alang sa paghiusa ug prosperidad sa kongregasyon. Iyang gitul-id sila sa panahon sa adlaw ni Jehova, mipakita nga “ang tawo sa kalapasan” kinahanglan mopadayag una, sa paglingkod sa “templo sa Diyos, publikong mipakita sa iyang kaugalingon nga usa ka diyos.” Bisan pa, kadtong “giisip nga takos sa gingharian sa Diyos” mahimong may absolutong pasalig nga ang Ginoong Jesus sa igong panahon ibutyag gikan sa langit, sa pagpanimalos sa nagdilaab nga kalayo “sa panahon nga siya moanha aron himayaon maylabot sa iyang mga balaan ug isipon nianang adlawa uban sa kahibulong maylabot sa tanan niadtong kinsa dunay pagtuo.”—2:3, 4; 1:5, 10.

[Mga Pangutana sa Pagtuon]