Basahon sa Bibliya Numero 64​—3 Juan

Magsusulat: Apostol Juan

Dapit Gisulatan: Efeso, o duol

Sinulat Nahuman: k. 98 K.P.

1. Kang kinsa gisulat ang Ikatulong Juan, ug unsa ang nahibaloan labot kaniya?

 KINING sulat gisulat kang Gayo, usa ka matinumanong Kristohanon kinsa matuod nga gihigugma ni Juan. Ang ngalan Gayo kumon sa mga adlaw sa sayong kongregasyon. Makita kini upat ka beses sa ubang bahin sa Kristohanon Gregong Kasulatan, nga mipunting sa dimomenos tulo ug lagmit upat ka lainlaing lalaki. (Buh. 19:29; 20:4; Roma 16:23; 1 Cor. 1:14) Walay impormasyon ang mabatonan nga tinong mopaila sa Gayo nga gisulatan ni Juan gikan sa uban. Ang tanan atong nahibaloan mahitungod kang Gayo mao nga siya membro sa usa ka Kristohanong kongregasyon, nga siya espesyal nga higala ni Juan, ug ang sulat gipadala kaniya personal, nga alang sa maong katarongan ang pulong “you” o “ikaw” kanunay pangusahan.

2. Unsa ang mipaila sa magsusulat, panahon, ug dapit sa pagsulat sa Ikatulong Juan?

² Sanglit ang estilo sa mibukas ug mitiklop nga mga timbaya sama nianang sa Ikaduhang Juan ug ang magsusulat sa makausa pa mipaila sa iyang kaugalingon ingon “tigulang lalaki” o “ansiyano,” waykwestiyon nga si apostol Juan usab ang misulat niining sulat. (2 Juan 1) Ang kasusama sa unod ug pinulongan usab misugyot nga kini gisulat, ingon sa kaso sa ubang duha ka sulat, sa o duol sa Efeso, mga 98 K.P. Tungod sa ka mubo niini, kini panagsa rang gikutlo sa sayong mga magsusulat, apan uban sa Ikaduhang Juan, kini makaplagan sa sayong mga katalogo sa dinasig nga Kasulatan. a

3. Unsa ang gipahayag ni Juan pinaagi sa Ikatulong Juan, ug unsang makapainteres nga pasiplat ang atong nabatonan sa panagsoon sa sayong mga Kristohanon?

³ Niining sulat gipahayag ni Juan ang pagpabili sa kamaabiabihon ni Gayo nga gipakita nganha sa nagpanaw nga mga igsoon, ug iyang gihinambitan ang pipila ka kasamok uban sa ambisyoso nga Diotrepes. Ang Demetrio nga gihinambitan daw mao ang usa kinsa midala niining sulat kang Gayo, busa kini posible nga siya gipadala ni Juan ug nanginahanglan sa kamaabiabihon ni Gayo sa iyang panaw, nga maoy tuyo sa sulat. Ingon sa kaso ni Gayo, walay atong nahibaloan mahitungod kang Diotrepes ug Demetrio saylo sa atong mabasa dinhi. Bisan pa, ang sulat mihatag sa makapainteres nga pasiplat sa suod internasyonal nga panagsoon sa sayong mga Kristohanon. Apil sa ubang butang, kini milakip sa batasan sa pagdawat nga maabiabihon kadtong nagpanaw ‘alang sa ngalan,’ bisan pa kini sila wala sa personal hiilhi sa ilang tig-abiabi.—3Ju Ber. 7.

KAUNDAN SA IKATULONG JUAN

4. Alang sa unsa gidayeg ni Juan si Gayo, ug unsang badlonganong paggawi ang iyang gikondenar, ug unsang maayong tambag ang iyang gihatag?

⁴ Gitambag sa apostol ang kamaabiabihon ug maayong mga buhat (ber. 1-14). Nalipay si Juan nga si Gayo sa gihapon “naglakaw sa kamatuoran.” Iyang gidayeg siya alang sa pagbuhat sa matinumanong buhat, kanang pagpakita sa mahigugmaong pagtagad alang sa nagduaw nga mga igsoon. “Kita . . . ubos sa obligasyon,” matod ni Juan, “sa pagdawat sa maong mga tawo nga maabiabihon, aron kita mahimong kaubanang mga magbubuhat sa kamatuoran.” Si Juan sa una misulat sa kongregasyon, apan ang mituboy-kaugalingon nga Diotrepes wala modawat sa bisan unsa kang Juan o sa uban nga mga responsable uban sa respeto. Si Juan, kon moanha siya, mohusay kaniya alang sa iyang ‘pagyawit uban sa daotang mga pulong.’ Ang hinigugmang Gayo gitambagan nga “mahimong  manig-ingon, dili sa daotan, apan sa maayo.” Si Demetrio gisitar ingon dalayegong ehemplo. Inay sa pagsulat sa daghang butang, gipahayag ni Juan ang paglaom sa dimadugay nga pagpakigkita kang Gayo nawong-sa-nawong.—Ber. 4, 8, 10, 11.

NGANONG MAPUSLANON

5. (a) Sa unsang paagi gipakita ni Juan ang iyang kaugalingon nga sulondan nga magtatan-aw, ug unsang espiritu ang importante nga tipigan? (b) Nganong si Juan prangka batok kang Diotrepes? (c) Alang sa unsa kita karon kinahanglan madasigon, subay sa unsang prinsipyo nga gipahayag ni Juan?

⁵ Gipakita sa apostol Juan ang iyang kaugalingon ingon sulondang magtatan-aw sa iyang kadasig sa pagpanalipod sa kongregasyon batok sa makatakod nga impluwensiya. Ang espiritu sa gugma ug kamaabiabihon nga mituhop sa kongregasyon dalayegon, ug sa matuod kini ilang obligasyon sa pagtipig niining malipayong kahimtang, aron ang lokal nga mga igsoon ug “mga estranghero” (mga indibiduwal nga kanhi wala hiilhi sa ilang Kristohanong tig-abiabi) kinsa moanha taliwala kanila mahimong moalagad sa tingob ingon “kaubanang mga magbubuhat sa kamatuoran.” (Ber. 5, 8) Bisan pa, si Diotrepes dunay mapahitas-ong mga mata, butang dulumtanan kang Jehova, ug siya direspetoso sa teokratikong awtoridad, bisan ngani sa pagyawit nga daotan mahitungod kang apostol Juan. (Prov. 6:16, 17) Iyang gipahaluna ang ali sa dalan sa Kristohanong kamaabiabihon sa kongregasyon. Dikahibulongan nga si Juan prangka batok niining daotan ug pabor sa dalisay Kristohanong gugma sa kongregasyon. Kinahanglan kita ingon ka madasigon karon alang sa paghupot sa kamapaubsanon, paglakaw sa kamatuoran, ug pagbatasan sa diyosnong gugma ug kamaabiabihon, subay sa prinsipyo nga gipahayag ni Juan: “Siya nga nagbuhat sa maayo gikan sa Diyos. Siya nga nagbuhat sa daotan wala makakita sa Diyos.”—3 Juan 11.

[Footnote]

[Mga Pangutana sa Pagtuon]