Angay ba Nimong Tuohan Kini?

NAGTUO ka ba sa Trinidad? Nagtuo ang kadaghanang tawo sa Kakristiyanohan. Kon buot sabton, kini mao ang pangunang doktrina sa mga iglesya sa kasiglohan.

Tungod niini, maghunahuna ka nga walay pagduhaduha bahin niini. Apan aduna, ug sa dili pa dugay ang pipila sa mga tigpaluyo niini nakadugang ug sugnod sa panaglalis.

Nganong ang usa ka ulohang sama niini ugdang kaikagan? Kay si Jesus mismo miingon: “Kini mao ang kinabuhing dayon: ang pagkaila kanimo, ang bugtong matuod nga Diyos, ug kang Jesu-Kristo nga imong gipadala.” Busa ang tibuok natong kaugmaon nagaagad sa atong pagkasayod sa matuod nga kinaiya sa Diyos, ug kana nagkahulogan sa pagtugkad sa panaglalis bahin sa Trinidad. Busa, nganong dili nimo kini susihon mismo?​—Juan 17:​3, Katolikong Jerusalem Bible (JB).

Nagalungtad ang lainlaing mga pagtuo sa Trinidad. Apan kasagaran nga ang pagtulon-ang Trinidad mao nga sa Pagkadiyos adunay tulo ka persona, Amahan, Anak, ug Espiritu Santo; bisan pa niana, sa tingob sila usa ra ka Diyos. Ang doktrina nagaingon nga ang tulo managsama, makagagahom sa tanan, ug wala lalanga, kay naglungtad sa walay kataposan diha sa Pagkadiyos.

Ugaling, ang uban nagaingon nga ang doktrinang Trinidad maoy bakak, nga ang Diyos nga Makagagahom sa Tanan maoy usa ra ingong separado, walay kataposan, ug gamhanan sa tanan. Sila nagaingon nga si Jesus sa wala pa siya magkinabuhi ingong tawo, sama sa mga manulonda, maoy usa ka separadong espiritung persona nga gilalang sa Diyos, ug tungod niini siya may sinugdanan gayod. Sila nagatudlo nga si Jesus dili gayod sama sa Diyos nga Makagagahom sa Tanan sa bisan unsang diwa; siya sa tanang panahon ilalom sa Diyos ug mao gihapon karon. Nagtuo usab sila nga ang espiritu santo dili usa ka persona kondili espiritu sa Diyos, ang iyang aktibong gahom.

Ang mga tigpaluyo sa Trinidad nagaingon nga kini gipasukad dili lamang sa relihiyosong tradisyon kondili sa Bibliya usab. Ang mga kritiko sa doktrina nagaingon nga kini dili pagtulon-an sa Bibliya, nga mipahayag gani ang usa ka basahon sa kasaysayan: “Ang sinugdanan sa [Trinidad] maoy bug-os nga pagano.”​—The Paganism in Our Christianity.

Kon tinuod ang Trinidad, makaulaw kang Jesus ang pag-ingon nga siya dili gayod sama sa Diyos ingong bahin sa Pagkadiyos. Apan kon bakak ang Trinidad, makaulaw sa Diyos nga Makagagahom sa Tanan ang pagtawag kang bisan kinsa nga pareho niya, ug grabe pa ang pagtawag kang Maria nga “Inahan sa Diyos.” Unya, kon bakak ang Trinidad, makapasipala sa Diyos ang pag-ingon, sumala sa giingon sa basahong Catholicism: “Gawas nga huptan [sa katawhan] ang maong Pagtuo nga bug-os ug wala mahugawi, sa walay duhaduha [sila] mangalaglag sa panahong walay kataposan. Ug ang Katolikong Pagtuo mao kini: kami nagasimba sa usa ka Diyos diha sa Trinidad.”

Nan, may maayong mga katarongan nganong angay nga buot kang masayod sa kamatuoran bahin sa Trinidad. Apan sa dili pa susihon ang sinugdanan niini ug ang pag-angkon nga kini matuod, makatabang ang pagbatbat nga mas tino niining doktrinaha. Unsa, sa tukma, ang Trinidad? Sa unsang paagi ginapatin-aw kini sa mga tigpaluyo niini?

 [Mga hulagway sa panid 2]

Wala: Ehiptohanong kinulit sa ikaduhang milenyo (W.K.P.) Trinidad nga si Amon-Ra, Ramses II, ug Mut. Tuo: Ikanapulog-upat nga siglong (K.P.) Trinidad nga kinulit nga si Jesu-Kristo, ang Amahan, ug ang balaang espiritu. Matikdi, tulo ka persona apan upat rag tiil.