Kansang Awtoridad ang Angay Nimong Ilhon?
Kapitulo 14
Kansang Awtoridad ang Angay Nimong Ilhon?
1, 2. Ang tanan bang matang sa awtoridad makadaot? Ipatin-aw.
ANG “awtoridad” maoy usa ka pulong nga dulumtanan alang sa daghang tawo. Masabot kini, tungod kay ang awtoridad subsob nga giabusohan—sa dapit-trabahoan, sa pamilya, ug sa mga kagamhanan. Ang Bibliya realistikong nag-ingon: “Ang tawo nagmando sa tawo sa iyang kadaotan.” (Ecclesiastes 8:9) Oo, daghan ang nagmando sa uban sa madaogdaogon ug naghunahuna-sa-kaugalingong-kaayohan nga paagi.
2 Apan dili tanang awtoridad makadaot. Pananglitan, mahimong ingnon nga ang atong lawas dunay awtoridad ibabaw kanato. Kini “nagamando” kanato sa pagginhawa, pagkaon, pag-inom, ug pagkatulog. Kini ba madaogdaogon? Dili. Ang pagsunod niini maoy alang sa atong kaayohan. Bisan tuod ang pagpasakop sa atong lawasnong mga panginahanglan mahimong kinaiyanhon, adunay laing mga matang sa awtoridad nga nagkinahanglan sa atong kinabubut-ong pagpasakop. Tagda ang pila ka pananglitan.
ANG SUPREMONG AWTORIDAD
3. Nganong si Jehova sa husto gitawag ug “Soberanong Ginoo”?
3 Sa Bibliya, si Jehova gitawag ug “Soberanong Ginoo” sa kapin ug 300 ka beses. Ang usa ka soberano maoy usa nga nagbaton ug supremong awtoridad. Unsay naghatag kang Jehova ug katungod alang niining posisyona? Ang Pinadayag 4:11 nagtubag: “Takos ikaw, Jehova, nga mismo among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.”
4. Giunsa paggamit ni Jehova ang iyang awtoridad?
4 Ingong atong Maglalalang, si Jehova dunay katungod sa paggamit sa iyang awtoridad sumala sa iyang gusto. Daw makapalisang kini, ilabina sa dihang atong isipon nga ang Diyos nagbaton ug “dagayang dinamikong enerhiya.” Siya gitawag ug “Diyos nga Labing-Gamhanan”—usa ka termino nga sa Hebreohanon nagpasabot sa ideya sa labaw kaayong kusog. (Isaias 40:26; Genesis 17:1) Apan, gipasundayag ni Jehova ang iyang kusog sa malulutong paagi, tungod kay ang iyang naglabawng hiyas mao ang gugma.—1 Juan 4:16.
5. Nganong dili lisod ang pagpasakop sa awtoridad ni Jehova?
5 Bisan tuod nagpasidaan si Jehova nga iyang silotan kadtong dili-mahinulsolong mga mamumuhat ug daotan, si Moises nakaila kaniya sa dakong bahin ingong “ang matuod nga Diyos, ang matinumanong Diyos, nga nagabantay sa tugon ug mahigugmaong-kalulot sa kahimtang niadtong nahigugma kaniya ug niadtong nagabantay sa iyang mga sugo.” (Deuteronomio 7:9) Hunahunaa lang! Ang Supremong Awtoridad sa uniberso dili mopugos kanato sa pag-alagad kaniya. Hinunoa, kita madani kaniya tungod sa iyang gugma. (Roma 2:4; 5:8) Ang pagpasakop sa awtoridad ni Jehova usa mismo ka kalipay, tungod kay ang iyang mga balaod kanunayng nagalihok alang sa atong kinalabwang kaayohan.—Salmo 19:7, 8.
6. Sa unsang paagi ang isyu bahin sa awtoridad mitungha sa tanaman sa Eden, ug uban sa unsang resulta?
6 Ang una natong mga ginikanan misalikway sa pagkasoberano sa Diyos. Buot nilang modesisyon sa ilang kaugalingon kon unsay maayo ug kon unsay daotan. (Genesis 3:4-6) Ingong resulta, gipalagpot sila gikan sa ilang Paraisong puloy-anan. Human niadto gitugotan ni Jehova ang mga tawo sa pagmugnag mga gambalay sa awtoridad aron sila makaarang sa pagpanimuyo sa usa ka mahusay, bisan tuod dili-hingpit, nga katilingban. Unsay pipila niining mga awtoridara, ug sa unsang sukod nga kita gidahom sa Diyos nga magpasakop niana?
“LABAW NGA MGA AWTORIDAD”
7. Kinsa ang “labaw nga mga awtoridad,” ug unsay relasyon sa ilang posisyon sa awtoridad sa Diyos?
7 Si apostol Pablo nagsulat: “Magpasakop ang tanang kalag sa labaw nga mga awtoridad, kay walay awtoridad gawas nga pinaagi sa Diyos.” Kinsa ang “labaw nga mga awtoridad”? Gipakita sa mga pulong ni Pablo sa sunod nga mga bersikulo nga sila mao ang kagamhananong mga awtoridad sa tawo. (Roma 13:1-7; Tito 3:1) Si Jehova wala magmugna sa kagamhananong mga awtoridad sa tawo, apan kini sila naglungtad pinaagi sa iyang pagtugot. Busa si Pablo nakasulat: “Ang nagalungtad nga mga awtoridad napahimutang diha sa ilang relatibong mga posisyon pinaagi sa Diyos.” Unsay gipasabot niini mahitungod sa maong yutan-ong awtoridad? Nga kini maoy ilalom, o ubos, sa awtoridad sa Diyos. (Juan 19:10, 11) Busa, sa dihang dunay panagsumpaki tali sa balaod sa tawo ug sa balaod sa Diyos, ang mga Kristohanon kinahanglang magiyahan sa ilang nabansay-sa-Bibliyang tanlag. Sila “kinahanglang mosugot sa Diyos ingong magmamando inay sa mga tawo.”—Buhat 5:29.
8. Sa unsang paagi makabenepisyo ka gikan sa labawng mga awtoridad, ug sa unsang paagi nimo ikapakita ang imong pagpasakop kanila?
8 Hinunoa, kasagaran ang pangkagamhanang labawng mga awtoridad naglihok ingong ‘ministro sa Diyos nganha kanato alang sa atong ikaayo.’ (Roma 13:4) Sa unsang mga paagi? Aw, hunahunaa ang daghang serbisyo nga gihatag sa labaw nga mga awtoridad, sama sa koreyo, panalipod sa polis ug bombero, sanitasyon, ug edukasyon. “Mao kana kon nganong kamo usab nagabayad ug mga buhis,” sulat ni Pablo, “kay sila publikong mga alagad sa Diyos nga kanunayng nagasilbi niining katuyoana mismo.” (Roma 13:6) Kon bahin sa mga buhis o bisan unsang ubang legal nga obligasyon, angay kitang “managgawi mismo nga matinud-anon.”—Hebreohanon 13:18.
9, 10. (a) Sa unsang paagi ang labawng mga awtoridad motakdo sa kahikayan sa Diyos? (b) Nganong sayop ang pagsupak sa labawng mga awtoridad?
9 Usahay, ang labaw nga mga awtoridad naggamit sa ilang gahom sa sayop nga paagi. Kini ba magpahigawas kanato gikan sa atong responsabilidad nga magpabiling nagpasakop kanila? Dili, dili kini magpahigawas kanato. Nakita ni Jehova ang mga kasaypanan niining maong mga awtoridad. (Proverbio 15:3) Ang pagtugot niya sa pagmando sa tawo wala magpasabot nga dili niya tagdon ang kadunotan niini; ni gidahom niya kita sa pagbuhat sa ingon. Sa pagkatinuod, sa dili madugay ‘dugmokon ug taposon sa Diyos kining tanang gingharian,’ nga pulihan kana sa pagmando sa iyang kaugalingong matarong nga kagamhanan. (Daniel 2:44) Apan samtang wala pa kini mahitabo, ang labaw nga mga awtoridad nagsilbi ug mapuslanong katuyoan.
10 Gipatin-aw ni Pablo: “Siya nga nagasupak sa awtoridad mibarog batok sa kahikayan sa Diyos.” (Roma 13:2) Ang labaw nga mga awtoridad maoy “kahikayan” sa Diyos sa paagi nga kini nagpatunhay sa usa ka sukod sa kahusay, nga kon wala kini ang kaguliyang ug anarkiya maoy maghari. Ang pagsupak niana dili kasulatanhon ug pagkawalay-salabotan. Sa pag-ilustrar: Handurawa nga ikaw gidisdisan ug ang tahi maoy nagpakipot sa samad. Bisan tuod ang mga tahi langyaw sa lawas, kini nagsilbi sa usa ka katuyoan sulod sa limitadong panahon. Ang ahat nga pagtastas niini mahimong makadaot. Sa susamang paagi, ang kagamhananong mga awtoridad sa tawo maoy dili bahin sa orihinal nga katuyoan sa Diyos. Hinunoa, samtang ang iyang Gingharian wala pa sa bug-os magmando sa yuta, ang tawhanong mga kagamhanan nagbugkos sa katilingban, nga nagbuhat sa usa ka buluhatong mitakdo sa kabubut-on sa Diyos alang sa presenteng panahon. Busa kinahanglang magpabilin kitang nagpasakop sa labaw nga mga awtoridad, samtang giuna nato ang balaod ug awtoridad sa Diyos.
AWTORIDAD DIHA SA PAMILYA
11. Unsaon nimo pagpatin-aw ang prinsipyo sa pagkaulo?
11 Ang pamilya maoy paninugdang bahin sa tawhanong katilingban. Sulod niini ang bana ug asawa makakaplag ug magantihong panagkauban, ug ang mga bata mapanalipdan ug mabansay alang sa pagkahamtong. (Proverbio 5:15-21; Efeso 6:1-4) Ang maong hamiling kahikayan kinahanglang organisahon sa paagi nga ang mga membro sa pamilya makahimo sa pagkinabuhi diha sa kalinaw ug panag-uyon. Ang paagi ni Jehova sa pagpatuman niini maoy pinaagi sa prinsipyo sa pagkaulo, nga gitingob niining mga pulonga, nga makaplagan sa 1 Corinto 11:3: “Ang ulo sa matag lalaki mao ang Kristo; sa baylo ang ulo sa usa ka babaye mao ang lalaki; sa baylo ang ulo sa Kristo mao ang Diyos.”
12, 13. Kinsay ulo sa pamilya, ug unsay makat-onan gikan sa paagi ni Jesus sa paggamit sa pagkaulo?
12 Ang bana mao ang ulo sa pamilya. Ugaling, may labaw pa nga ulo kaniya—si Jesu-Kristo. Si Pablo nagsulat: “Mga bana, padayong higugmaa ang inyong mga asawa, maingon nga ang Kristo usab nahigugma sa kongregasyon ug mitugyan sa iyang kaugalingon alang niini.” (Efeso 5:25) Ang bana nagbanaag sa iyang pagpasakop kang Kristo sa dihang iyang gitratar ang iyang asawa sa paagi nga kanunayng gitratar ni Jesus ang kongregasyon. (1 Juan 2:6) Dakong awtoridad ang gihatag kang Jesus, apan iya kining gigamit uban sa hilabihang kabuotan, gugma, ug pagkamakataronganon. (Mateo 20:25-28) Ingong usa ka tawo, si Jesus wala gayod mag-abuso sa iyang awtoridad. Siya maoy “malumog-buot ug mapaubsanon sa kasingkasing,” ug ang iyang mga sumusunod gitawag niyang “mga higala” inay “mga ulipon.” “Ako magapalagsik kaninyo,” saad niya kanila, ug mao kanay iyang gihimo.—Mateo 11:28, 29; Juan 15:15.
13 Ang panig-ingnan ni Jesus nagtudlo sa mga bana nga ang Kristohanong pagkaulo dili usa ka posisyon sa binagis nga pagdumala. Hinunoa, usa kini ka pagdumala nga adunay pagkamatinahuron ug nagsakripisyo-sa-kaugalingong gugma. Tin-aw nga kini wala mag-apil sa pisikal o binaba nga pagmaltratar sa kapikas. (Efeso 4:29, 31, 32; 5:28, 29; Colosas 3:19) Busa kon ang usa ka Kristohanong lalaki magmaltratar sa iyang asawa, ang iyang ubang maayong mga buhat mahimong walay bili, ug ang iyang mga pag-ampo mababagan.—1 Corinto 13:1-3; 1 Pedro 3:7.
14, 15. Sa unsang paagi ang kahibalo mahitungod sa Diyos makatabang sa usa ka asawa nga magpasakop sa iyang bana?
14 Sa dihang sundogon sa usa ka bana ang panig-ingnan ni Kristo, mas sayon ang pagsunod sa iyang asawa sa mga pulong sa Efeso 5:22, 23: “Papasakopa ang mga asawa sa ilang mga bana sama ug ngadto sa Ginoo, tungod kay ang bana maoy ulo sa iyang asawa maingon nga ang Kristo usab maoy ulo sa kongregasyon.” Maingon nga ang bana nagpasakop kang Kristo, ang asawa kinahanglang magpasakop sa iyang bana. Gipatin-aw usab sa Bibliya nga ang takos nga mga asawa angayng pasidunggan ug dayegon tungod sa ilang diyosnong kaalam ug kakugi.—Proverbio 31:10-31.
15 Ang pagsugot sa Kristohanong asawa sa iyang bana maoy relatibo. Kini nagpasabot nga Diyos ang sugton inay tawo kon ang pagpasakop sa usa ka butang mosangpot sa paglapas sa balaang balaod. Bisan pa, ang malig-ong baroganan sa asawa kinahanglang tinimplahan sa “malinawon ug malumong espiritu.” Kinahanglang madayag nga ang kahibalo sa Diyos nakahimo kaniya nga mas maayong asawa. (1 Pedro 3:1-4) Ang susama kinahanglang mapadapat usab sa Kristohanong lalaki kansang asawa dili magtutuo. Ang iyang pagsunod sa mga prinsipyo sa Bibliya angayng maghimo kaniya nga mas maayong bana.
16. Sa unsang paagi ang mga anak makasundog sa panig-ingnan ni Jesus sa dihang siya bata pa?
16 Ang Efeso 6:1 naglaraw sa papel sa mga anak, nga nag-ingon: “Magmasinugtanon sa inyong mga ginikanan kahiusa sa Ginoo, kay kini maoy matarong.” Gisunod sa Kristohanong mga bata ang panig-ingnan ni Jesus, nga padayong nagpasakop sa iyang mga ginikanan samtang siya nagtubo. Ingong masinugtanong batang lalaki, siya “padayong nagauswag sa kaalam ug sa lawasnong pagtubo ug sa pabor sa Diyos ug sa mga tawo.”—Lucas 2:51, 52.
17. Ang paagi sa paggamit sa mga ginikanan sa awtoridad may unsang epekto sa ilang mga anak?
17 Ang paagi sa pag-abaga sa mga ginikanan sa ilang mga responsabilidad makaimpluwensiya sa pagtahod o pag-alsa sa ilang mga anak batok sa awtoridad. (Proverbio 22:6) Busa makaayo nga ang mga ginikanan mangutana sa ilang mga kaugalingon, ‘Gigamit ko ba ang akong awtoridad sa mahigugmaon o sa binagis nga paagi? Ako ba matinugoton?’ Ang usa ka diyosnong ginikanan gidahom nga magmahigugmaon ug magmahunahunaon, apan malig-on sa pagsunod sa diyosnong mga prinsipyo. Uyon niini, si Pablo nagsulat: “Mga amahan, ayawg palagota ang inyong mga anak [sa literal, ‘pasuk-on sila’], kundili padayong matutoa sila diha sa disiplina ug mapasiboong pagdumala-sa-kaisipan ni Jehova.”—Efeso 6:4; Colosas 3:21.
18. Sa unsang paagi ipadapat ang ginikananhong disiplina?
18 Kinahanglang susihon sa mga ginikanan ang ilang mga pamaagi sa pagbansay, ilabina kon buot nilang magmasinugtanon ang ilang mga anak ug sa ingon magdala kanilag kalipay. (Proverbio 23:24, 25) Sa Bibliya, ang disiplina sa kinadak-ang bahin maoy usa ka matang sa instruksiyon. (Proverbio 4:1; 8:33) Kini gilambigit sa gugma ug kalumo, dili sa kasuko ug kabangis. Busa, ang Kristohanong mga ginikanan kinahanglang molihok nga maalamon ug magpabilin silang mapugnganon sa dihang nagadisiplina sa ilang mga anak.—Proverbio 1:7.
AWTORIDAD DIHA SA KONGREGASYON
19. Sa unsang paagi ang Diyos nakataganag kahusay diha sa Kristohanong kongregasyon?
19 Sanglit si Jehova maoy usa ka mahusay nga Diyos, makataronganon nga siya motaganag katuohan ug organisadong pagpanguna alang sa iyang katawhan. Tungod niana, iyang gitudlo si Jesus ingong Ulo sa Kristohanong kongregasyon. (1 Corinto 14:33, 40; Efeso 1:20-23) Ubos sa dili-makitang pagpanguna ni Kristo, ang Diyos nagtugot sa usa ka kahikayan diin ang tinudlong mga ansiano sa matag kongregasyon magabantay sa panon sa paaging maikagon, kinabubut-on, ug mahigugmaon. (1 Pedro 5:2, 3) Ang ministeryal nga mga alagad nagatabang kanila sa lainlaing mga paagi ug nagabuhat ug bililhong pag-alagad sulod sa kongregasyon.—Filipos 1:1.
20. Nganong angay kitang magpasakop sa tinudlong Kristohanong mga ansiano, ug nganong kini makaayo?
20 Mahitungod sa Kristohanong mga ansiano, si Pablo nagsulat: “Magmasinugtanon kamo kanilang nagapanguna taliwala kaninyo ug magmapinasakopon, kay sila padayong nagabantay sa inyong mga kalag ingon nga sila maoy maghatag ug husay; aron buhaton nila kini uban ang kangaya ug dili uban ang pagpanghupaw, kay kini makadaot kaninyo.” (Hebreohanon 13:17) Sa maalamon, gisalig sa Diyos ngadto sa Kristohanong mga magtatan-aw ang responsabilidad sa pag-atiman sa espirituwal nga mga panginahanglan niadtong diha sa kongregasyon. Kining mga ansianoha wala maglangkob sa usa ka klerong matang. Sila mga alagad ug mga ulipon sa Diyos, nga nagaalagad sa mga panginahanglan sa ilang mga isigkamagsisimba, maingon sa gibuhat sa atong Agalon, si Jesu-Kristo. (Juan 10:14, 15) Ang pagkasayod nga dunay Kasulatanhon kuwalipikadong mga lalaki nga interesado sa atong pag-uswag ug pagtubo sa espirituwal magadasig kanato nga mahimong kooperatibo ug mapinasakopon.—1 Corinto 16:16.
21. Sa unsang paagi naningkamot ang tinudlong mga ansiano nga makatabang sa espirituwal nga paagi sa mga isigka-Kristohanon?
21 Usahay, ang karnero masalaag o mameligro tungod sa kalibotanong mga hinungdan. Ubos sa pagpanguna sa Pangunang Magbalantay, ang mga ansiano ingong luyoluyong mga magbalantay maoy igmat sa mga panginahanglan niadtong ubos sa ilang pag-atiman ug sa makugihon naghatag kanilag personal nga pagtagad. (1 Pedro 5:4) Ilang duawon ang mga membro sa kongregasyon ug mamulong sa mga pulong sa pagdasig. Kay nasayod nga ang Yawa naningkamot sa pagbungkag sa kalinaw sa katawhan sa Diyos, ang mga ansiano nagagamit sa kaalam gikan sa itaas sa pag-atubang sa bisan unsang mga suliran. (Santiago 3:17, 18) Makugihon silang naningkamot aron mamentinar ang panaghiusa ug pagkausa sa pagtuo, usa ka butang nga alang niana si Jesus mismo nag-ampo.—Juan 17:20-22; 1 Corinto 1:10.
22. Unsang tabang ang ihatag sa mga ansiano sa mga kaso sa buhat nga daotan?
22 Komosta na man kon ang usa ka Kristohanon nag-antos sa usa ka daotang buhat o naluya tungod kay nakasala? Ang makapahupay nga tambag sa Bibliya ug ang kinasingkasing nga pag-ampo sa mga ansiano alang kaniya makatabang sa pagpasig-uli kaniya sa espirituwal nga kahimsog. (Santiago 5:13-15) Kining mga lalakiha, nga tinudlo sa balaang espiritu, may awtoridad usab sa pagdisiplina ug pagbadlong kang bisan kinsang nagasubay sa dalan sa kalapasan o kinsa nagpameligro sa espirituwal ug moral nga kahinlo sa kongregasyon. (Buhat 20:28; Tito 1:9; 2:15) Aron mamentinar ang kahinlo sa kongregasyon, mahimong kinahanglanon nga itaho sa mga indibiduwal ang seryosong buhat nga daotan. (Levitico 5:1) Kon ang usa ka Kristohanon nga nakahimog seryosong sala modawat sa Kasulatanhong disiplina ug pagbadlong ug magpakitag ebidensiya sa tininuod nga paghinulsol, siya matabangan. Siyempre, palagpoton kadtong balikbalik ug dili-mahinulsolong mga tiglapas sa balaod sa Diyos.—1 Corinto 5:9-13.
23. Unsay itagana sa Kristohanong mga magtatan-aw alang sa kaayohan sa kongregasyon?
23 Ang Bibliya nagtagna nga ubos ni Jesu-Kristo ingong Hari, ang hamtong sa espirituwal nga mga lalaki igatudlo sa pagtaganag paghupay, panalipod, ug pagpalagsik sa katawhan sa Diyos. (Isaias 32:1, 2) Sila manguna ingong mga ebanghelisador, mga magbalantay, ug mga magtutudlo aron ituboy ang espirituwal nga pagtubo. (Efeso 4:11, 12, 16) Bisan pag usahay ang Kristohanong mga magtatan-aw mahimong magbadlong, magpahimangno, ug magpahinumdom sa mga isigkamagtutuo, ang pagpadapat sa mapuslanong pagpanudlo sa mga ansiano nga binase sa Pulong sa Diyos makatabang sa pagmentinar sa tanan nga nagasubay sa dalan sa kinabuhi.—Proverbio 3:11, 12; 6:23; Tito 2:1.
DAWATA ANG PANGLANTAW NI JEHOVA MAHITUNGOD SA AWTORIDAD
24. Tungod sa unsang isyu nga kita gisulayan matag adlaw?
24 Ang unang lalaki ug babaye gisulayan bahin sa isyu sa pagpasakop sa awtoridad. Dili ikatingala, kita nag-atubang ug susamang pagsulay matag adlaw. Si Satanas nga Yawa nagpasiugda sa espiritu sa pag-alsa taliwala sa katawhan. (Efeso 2:2) Ang dalan sa pagkinaugalingon gipakita nga daw labawng madanihon kay sa dalan sa pagpasakop.
25. Unsay mga kaayohan sa pagsalikway sa maalsahong espiritu sa kalibotan ug sa pagkamapinasakopon sa awtoridad nga gigamit o gitugotan sa Diyos?
25 Hinunoa, kinahanglang isalikway nato ang maalsahong espiritu sa kalibotan. Sa pagbuhat niini, atong makaplagan nga ang diyosnong pagpasakop magdalag dagayang mga panalangin. Pananglitan, malikayan nato ang mga kabalaka ug mga kahigawad nga kasagarang naagoman niadtong nakigbatok sa sekular nga mga awtoridad. Atong mamenosan ang dili-pagsinabtanay nga maoy kasagaran sa daghang pamilya. Ug atong tagamtamon ang mga kaayohan sa mainit, mahigugmaong pakig-uban sa atong Kristohanong mga isigkamagtutuo. Labaw sa tanan, ang atong diyosnong pagpasakop mosangpot sa usa ka maayong relasyon uban kang Jehova, ang Supremong Awtoridad.
TAKSA ANG IMONG KAHIBALO
Giunsa paggamit ni Jehova ang iyang awtoridad?
Kinsa ang “labaw nga mga awtoridad,” ug sa unsang paagi kita makapabilin sa pagpasakop kanila?
Unsang responsabilidad ang gibutang sa prinsipyo sa pagkaulo sa matag membro sa pamilya?
Sa unsang paagi kita makapakitag pagpasakop diha sa Kristohanong kongregasyon?
[Mga Pangutana sa Pagtuon]
[Kahon sa panid 134]
MAPINASAKOPON, DILI MAALSAHON
Pinaagi sa ilang kalihokan nga pagwali sa katilingban, ang mga Saksi ni Jehova nagpunting sa Gingharian sa Diyos ingong bugtong paglaom sa katawhan alang sa tinuod nga kalinaw ug kasegurohan. Apan kining masibotong mga magmamantala sa Gingharian sa Diyos dili gayod maalsahon sa mga kagamhanan nga ubos niana sila nagpuyo. Sa kasukwahi, ang mga Saksi nahilakip niadtong labing matinahoron ug matinumanon-sa-balaod nga mga lungsoranon. “Kon ang tanang relihiyosong mga denominasyon maoy sama sa mga saksi ni Jehova,” matud sa usa ka opisyal sa usa ka Aprikanhong nasod, “wala unta kitay mga pagbuno, mga paglungkab, mga delingkuwensiya, mga binilanggo ug mga bomba atomika. Ang mga pultahan dili na kanunayng trangkahan.”
Sa pag-ila niini, ang opisyales sa daghang kanasoran nagtugot sa buluhatong pagwali sa mga Saksi nga magpadayon nga dili pinugngan. Sa ubang kanasoran, ang mga pagdili o mga pagpig-ot gikuha na sa dihang ang mga awtoridad nakasabot nga ang mga Saksi ni Jehova maoy usa ka impluwensiya alang sa maayo. Sama kini sa gisulat ni apostol Pablo mahitungod sa pagsugot sa labawng mga awtoridad: “Padayon sa pagbuhat ug maayo, ug ikaw makabatog pagdayeg gikan niini.”—Roma 13:1, 3.
