Kapitulo 5

Kansang Pagsimba ang Dawaton sa Diyos?

1. Unsay buot mahibaloan sa usa ka Samarianhong babaye mahitungod sa pagsimba?

 NAHIBULONG ka ba sukad, ‘Kansang pagsimba ang dawaton sa Diyos?’ Mahimong ang susamang pangutana misantop sa hunahuna sa usa ka babaye sa dihang nakigsulti siya kang Jesu-Kristo duol sa Bukid Gerizim sa Samaria. Sa nagpunting sa kalainan tali sa pagsimba sa mga Samarianhon ug sa mga Hudiyo, siya miingon: “Ang among mga katigulangan nagsimba dinhi niining bukira; apan kamo nagaingon nga sa Jerusalem ang dapit diin ang mga tawo angay mosimba.” (Juan 4:20) Si Jesus ba miingon sa Samarianhong babaye nga gidawat sa Diyos ang tanang pagsimba? O siya ba miingon nga dunay espisipikong mga butang nga gikinahanglan aron mapahimut-an ang Diyos?

2. Sa pagtubag sa Samarianhong babaye, unsay giingon ni Jesus?

² Ang makapakurat nga tubag ni Jesus mao: “Ang takna nagasingabot sa dihang dili dinhi niining bukira ni sa Jerusalem nga kamo mosimba sa Amahan.” (Juan 4:21) Ang mga Samarianhon dugay nang nahadlok kang Jehova ug nagsimba sa ubang mga diyos sa Bukid Gerizim. (2 Hari 17:33) Niadtong tungora si Jesu-Kristo miingon nga dili mahinungdanon ang maong dapit ni ang Jerusalem sa matuod nga pagsimba.

PAGSIMBA PINAAGI SA ESPIRITU UG KAMATUORAN

3. (a) Nganong ang mga Samarianhon wala gayod makaila sa Diyos? (b) Sa unsang paagi ang matinumanong mga Hudiyo ug ang uban makaila sa Diyos?

³ Gisultihan ni Jesus ang Samarianhong babaye: “Kamo nagasimba sa wala ninyo mailhi; kami nagasimba sa among nailhan,  tungod kay ang kaluwasan nagagikan sa mga Judio.” (Juan 4:22) Ang mga Samarianhon dunay bakak relihiyosong mga ideya ug midawat lamang sa unang lima ka basahon sa Bibliya ingong inspirado​—ug kini diha lamang sa ilang kaugalingong rebisyon nga nailhang Samarianhong Pentateuko. Busa, wala gayod sila makaila sa Diyos. Hinunoa, ang mga Hudiyo gisaligan sa Kasulatanhong kahibalo. (Roma 3:​1, 2) Ang Kasulatan naghatag sa matinuohong mga Hudiyo ug kang bisan kinsang maminaw sa gikinahanglan nila aron mailhan ang Diyos.

4. Sumala ni Jesus, unsay kinahanglang buhaton sa mga Hudiyo ug mga Samarianhon aron ang ilang pagsimba pagadawaton sa Diyos?

⁴ Sa pagkatinuod, gipakita ni Jesus nga kinahanglang ipasibo sa mga Hudiyo ug mga Samarianhon ang ilang paagi sa pagsimba aron makapahimuot sa Diyos. Siya miingon: “Ang takna nagasingabot, ug mao na karon, sa dihang ang matuod nga mga magsisimba mosimba sa Amahan pinaagi sa espiritu ug kamatuoran, kay, sa pagkatinuod, ang Amahan nagapangita sa mga ingon kanila nga mosimba kaniya. Ang Diyos maoy usa ka Espiritu, ug silang nagasimba kaniya kinahanglang mosimba pinaagi sa espiritu ug kamatuoran.” (Juan 4:​23, 24) Kinahanglang simbahon nato ang Diyos “pinaagi sa espiritu,” nga gipalihok sa mga kasingkasing nga puno sa pagtuo ug gugma. Posibleng simbahon ang Diyos ‘pinaagi sa kamatuoran’ pinaagi sa pagtuon sa iyang Pulong, ang Bibliya, ug pinaagi sa pagsimba kaniya subay sa iyang gipadayag nga kamatuoran. Matinguhaon ka bang mohimo niana?

5. (a) Unsay kahulogan sa “pagsimba”? (b) Unsay kinahanglan natong buhaton kon gusto nato nga dawaton sa Diyos ang atong pagsimba?

⁵ Gipasiugda ni Jesus nga gusto sa Diyos ang matuod nga pagsimba. Kini nagpakita nga dunay mga dagway sa pagsimba nga dili dalawaton kang Jehova. Ang pagsimba sa Diyos nagkahulogan nga hatagan siya ug masimbahong pasidungog ug sagradong pag-alagad. Kon buot nimong pasidunggan ang usa ka gamhanang magmamando, malagmit matinguhaon kang moalagad kaniya ug mohimo sa butang nga makapahimuot kaniya. Nan, sa walay duhaduha, buot natong pahimut-an ang Diyos. Busa, inay sa pagsulti lamang, ‘Gusto nako ang akong relihiyon,’ kinahanglang  atong tinoon nga ang atong pagsimba nakatuman sa mga kinahanglanon sa Diyos.

PAGBUHAT SA KABUBUT-ON SA AMAHAN

6, 7. Nganong wala ilha ni Jesus ang pipila nga nangangkong iyang mga tinun-an?

⁶ Atong basahon ang Mateo 7:​21-23 ug tan-awon kon makita nato ang usa ka mahinungdanong butang nga motino kon ang tanang pagsimba dalawaton sa Diyos. Si Jesus miingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kundili ang usa nga nagabuhat sa kabubut-on sa akong Amahan nga anaa sa mga langit. Daghan ang moingon kanako nianang adlawa, ‘Ginoo, Ginoo, wala ba kami managpropesiya sa imong ngalan, ug nanghingilin ug mga demonyo [daotang espirituhanong linalang] sa imong ngalan, ug mihimog daghan gamhanang mga buhat sa imong ngalan?’ Apan unya akong ipahayag ngadto kanila: Wala ko gayod kamo hiilhi! Pahilayo gikan kanako, kamong mga mamumuhat sa kalapasan.”

⁷ Ang pag-ila kang Jesu-Kristo ingong Ginoo maoy mahinungdanon sa matuod nga pagsimba. Apan kining kasulatana nagpaila nga mahimong adunay nakulang sa pagsimba sa daghan niadtong nangangkong mga tinun-an ni Jesus. Siya miingon nga ang pipila mohimog “gamhanang mga buhat,” sama kintahay sa milagrosong mga pagpanambal. Apan, mahimong mapakyas sila sa pagbuhat sa giingon ni Jesus nga mahinungdanon. Mahimong wala sila “magbuhat sa kabubut-on sa [iyang] Amahan.” Kon buot natong makapahimuot sa Diyos, kinahanglang masayod kita sa kabubut-on sa Amahan ug dayon buhaton kana.

TUKMANG KAHIBALO​—USA KA PANALIPOD

8. Aron mabuhat nato ang kabubut-on sa Diyos, unsay gikinahanglan, ug unsang sayop nga mga panghunahuna ang kinahanglang likayan?

⁸ Ang pagbuhat sa kabubut-on sa Diyos nagkinahanglan ug tukmang kahibalo kang Jehova nga Diyos ug kang Jesu-Kristo. Ang maong kahibalo motultol sa kinabuhing walay kataposan. Nan, sa walay duhaduha, kitang tanan buot nga magmaseryoso sa pagkuhag tukmang kahibalo gikan sa Pulong sa Diyos, ang Bibliya. Ang pipila nag-ingon nga walay angay kabalak-an basta  sinsero kita ug masiboton sa atong pagsimba. Ang uban nangangkon, ‘Kon gamay ang imong nahibaloan, gamay ra usab ang dahomon kanimo.’ Apan, ang Bibliya nagadasig kanato nga palamboon ang atong kahibalo sa Diyos ug sa iyang mga katuyoan.​—Efeso 4:13; Filipos 1:9; Colosas 1:9.

9. Sa unsang paagi ang tukmang kahibalo magapanalipod kanato, ug nganong gikinahanglan nato ang maong panalipod?

⁹ Ang maong kahibalo usa ka panalipod aron dili mahugawan ang atong pagsimba. Si apostol Pablo mihisgot mahitungod sa usa ka espirituhanong linalang nga nagpakaaron-ingnong “manulonda sa kahayag.” (2 Corinto 11:14) Sa ingon nagtakoban, kining espirituhanong linalang​—si Satanas​—naningkamot sa pagpahisalaag kanato sa pagbuhat sa mga butang nga supak sa kabubut-on sa Diyos. Ang ubang espirituhanong mga linalang nga nakig-uban kang Satanas naghugaw usab sa pagsimba sa mga tawo, tungod kay si Pablo nag-ingon: “Ang mga butang nga ginahalad sa mga nasod ilang ginahalad ngadto sa mga demonyo, ug dili ngadto sa Diyos.” (1 Corinto 10:20) Malagmit, daghan ang nagtuo nga sila nagasimba sa hustong paagi, bisan tuod wala sila magabuhat sa buot ipabuhat sa Diyos. Sila gipahisalaag ngadto sa mahugaw bakak nga pagsimba. Kita makakat-on ug dugang pa mahitungod kang Satanas ug sa mga demonyo sa ulahi, apan kining maong mga kaaway sa Diyos sa walay duhaduha nagahugaw sa pagsimba sa katawhan.

10. Unsay imong buhaton kon dunay tinuyong naghilo sa imong abiyo sa tubig, ug ang tukmang kahibalo sa Pulong sa Diyos magsangkap kanato sa pagbuhat sa unsa?

¹⁰ Kon nasayod kang dunay tinuyong naghilo sa imong abiyo sa tubig, mopadayon ka ba sa pag-inom gikan niana? Sa walay duhaduha, dihadiha molihok ka sa pagpangitag tinubdan sa luwas, hinlo nga tubig. Aw, ang tukmang kahibalo sa Pulong sa Diyos nagasangkap kanato sa pag-ila sa matuod nga relihiyon ug sa pagsalikway sa mga hugaw nga nagahimo sa pagsimba nga dili dalawaton sa Diyos.

MGA SUGO SA MGA TAWO INGONG MGA DOKTRINA

11. Unsay sayop sa pagsimba sa daghang Hudiyo?

¹¹ Sa dinhi pa si Jesus sa yuta, daghang Hudiyo ang wala maglihok  sumala sa tukmang kahibalo sa Diyos. Busa nawad-an silag kahigayonan nga makabaton ug mahinlong baroganan sa atubangan ni Jehova. Bahin kanila, si Pablo nagsulat: “Ako nagasaksi mahitungod nila nga sila may kasibot sa Diyos; apan dili sumala sa tukmang kahibalo.” (Roma 10:2) Nagkinaugalingon sila sa pagdesisyon kon unsaon pagsimba ang Diyos inay nga maminaw kon unsay iyang giingon.

12. Unsay nakahugaw sa pagsimba sa Israel, ug unsay sangpotanan?

¹² Ang mga Israelinhon sa sinugdan nagtuman sa hinatag-sa-Diyos nga putling relihiyon, apan kini nahugawan sa mga pagtulon-an ug mga pilosopiya sa mga tawo. (Jeremias 8:​8, 9; Malakias 2:​8, 9; Lucas 11:52) Bisan tuod ang Hudiyong relihiyosong mga pangulo nga nailhang mga Fariseo naghunahuna nga ang ilang pagsimba dalawaton sa Diyos, giingnan sila ni Jesus: “Si Isaias haom nga mipropesiya bahin kaninyong mga salingkapaw, maingon sa nahisulat, ‘Kini nga katawhan nagapasidungog kanako pinaagi sa ilang mga ngabil, apan ang ilang mga kasingkasing layo nga nahimulag kanako. Kawang nga sila nagsigig simba kanako, tungod kay ilang ginatudlo ingong mga doktrina ang mga sugo sa mga tawo.’”​—Marcos 7:​6, 7.

13. Sa unsang paagi mahimo natong mabuhat ang gihimo sa mga Fariseo?

¹³ Posible bang makahimo kita sa gihimo sa mga Fariseo? Mahitabo kini kon atong ginasunod ang relihiyosong mga tradisyon nga gikabilin kanato inay susihon kon unsay ginaingon sa Diyos mahitungod sa pagsimba. Sa nagpasidaan labot niining tinuod nga kapeligrohan, si Pablo nagsulat: “Ang inspiradong pamulong nagaingon sa tino nga sa ulahing mga yugto sa panahon adunay pipila nga mahulog gikan sa pagtuo, nga managtagad sa nagapahisalaag nga inspiradong mga pamulong ug mga pagtulon-an sa mga demonyo.” (1 Timoteo 4:1) Busa dili lamang igo nga hunahunaon nga ang atong pagsimba makapahimuot sa Diyos. Sama sa Samarianhong babaye nga nakahibalag kang Jesus, mahimong gipanunod nato ang atong paagi sa pagsimba gikan sa atong mga ginikanan. Apan kinahanglang atong tinoon nga kita nagabuhat sa mga butang nga giuyonan sa Diyos.

 PAGBANTAY BATOK SA PAGPASUKO SA DIYOS

14, 15. Bisan pa kon duna kitay kahibalo sa kabubut-on sa Diyos, nganong kinahanglan kitang magmaampingon?

¹⁴ Gawas kon kita mag-amping, hayan makahimo kitag butang nga dili dalawaton sa Diyos. Pananglitan, si apostol Juan mihapa sa tiilan sa usa ka manulonda “sa pagsimba kaniya.” Apan ang manulonda mipasidaan: “Pagbantay! Ayaw kana buhata! Ako usa lamang ka isigkaulipon nimo ug sa imong mga igsoon nga may buluhaton sa pagpanaksi bahin kang Jesus. Simbaha ang Diyos.” (Pinadayag 19:10) Busa imo bang nakita ang panginahanglan nga tinoon ang imong pagsimba nga wala mahugawi sa bisan unsang matang sa idolatriya?​—1 Corinto 10:14.

¹⁵ Sa dihang ang pipila ka Kristohanon misugod sa pagtuman sa relihiyosong mga kustombre nga wala makapahimuot sa Diyos, si Pablo nangutana: “Naunsa bang kamo nanagpamalik man pag-usab ngadto sa mahuyang ug barot nga paninugdang mga butang ug buot magpaulipon niini nila pag-usab? Kamo makutihong nagabantay ug mga adlaw ug mga bulan ug mga yugto sa panahon ug mga tuig. Nahadlok ako alang kaninyo, nga sa unsa mang paagi ako nagbudlay sa walay kapuslanan labot kaninyo.” (Galacia 4:​8-11) Kadtong maong mga indibiduwal nakabaton ug kahibalo sa Diyos apan sa ulahi nasayop tungod sa pagbantay sa relihiyosong mga kustombre ug balaang mga adlaw nga dili dalawaton kang Jehova. Sama sa giingon ni Pablo, kita kinahanglang ‘padayong motino kon unsa ang dalawaton sa Ginoo.’​—Efeso 5:10.

16. Sa unsang paagi ang Juan 17:16 ug 1 Pedro 4:3 makatabang kanato sa pagdesisyon kon ang mga pangilin ug mga kustombre makapahimuot ba sa Diyos?

¹⁶ Kinahanglang atong tinoon nga likayan nato ang relihiyosong mga pangilin ug ubang mga kustombre nga nagalapas sa mga prinsipyo sa Diyos. (1 Tesalonica 5:21) Pananglitan, si Jesus nag-ingon bahin sa iyang mga sumusunod: “Sila dili bahin sa kalibotan, maingon nga ako dili bahin sa kalibotan.” (Juan 17:16) Ang imo bang relihiyon nalangkit sa mga seremonyas ug mga pangilin nga nagalapas sa prinsipyo sa neyutralidad may kalabotan sa mga kalihokan niining kalibotana? O ang  mga sumusunod ba sa imong relihiyon usahay makig-ambit sa mga kustombre ug mga piyesta nga mahimong naglangkit sa mga panggawi nga katumbas sa gihubit ni apostol Pedro? Siya misulat: “Igo na ang nangaging panahon sa inyong paghimo sa kabubut-on sa kanasoran sa nanagpadayon kamo diha sa mga buhat sa malaw-ayng panggawi, daotang mga pangibog, mga pagpatuyang sa bino, mga hudyaka, mga palabwanayg inom, ug sa ginadili nga mga idolatriya.”​—1 Pedro 4:3.

17. Nganong angay natong likayan ang bisan unsang butang nga nagabanaag sa espiritu sa kalibotan?

¹⁷ Gipasiugda ni apostol Juan ang panginahanglan nga molikay sa bisan unsang mga tulumanon nga nagbanaag sa espiritu sa dili-diyosnong kalibotan sa atong palibot. Si Juan nagsulat: “Ayaw ninyo higugmaa ang kalibotan o ang mga butang nga anaa sa kalibotan. Kon ang usa nagahigugma sa kalibotan, ang gugma sa Amahan wala diha kaniya; tungod kay ang tanang butang nga anaa sa kalibotan​—ang tinguha sa unod ug ang tinguha sa mga mata ug ang mapagawalong pagpasundayag sa kahinguhaan sa kinabuhi sa usa​—wala magagikan sa Amahan, kundili nagagikan sa kalibotan. Labot pa, ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:​15-17) Nakamatikod ka ba nga kadtong ‘nagabuhat sa kabubut-on sa Diyos’ magpabilin hangtod sa hangtod? Oo, kon atong buhaton ang kabubut-on sa Diyos ug likayan ang mga kalihokan nga nagabanaag sa espiritu niining kalibotana, atong mabatonan ang paglaom sa kinabuhing walay kataposan!

SUNDA ANG HATAAS NGA MGA SUKDANAN SA DIYOS

18. Sa unsang paagi ang pipila ka taga-Corinto nasayop mahitungod sa panggawi, ug unsay angay natong makat-onan gikan niini?

¹⁸ Buot sa Diyos ingong iyang mga magsisimba kadtong mga nagasunod sa iyang hataas moral nga mga sukdanan. Ang pipila sa karaang Corinto nasayop sa pagtuo nga tugotan sa Diyos ang imoral nga panggawi. Atong makita pinaagi sa pagbasa sa 1 Corinto 6:​9, 10 nga sila nasayop gayod. Kon buot natong mosimba sa Diyos sa paaging dalawaton, kinahanglang pahimut-an nato  siya sa pulong ug sa buhat. Ang imo bang matang sa pagsimba nakapaarang kanimo sa paghimo niana?​—Mateo 15:8; 23:​1-3.

19. Sa unsang paagi ang matuod nga pagsimba makaapektar sa atong pagtratar sa uban?

¹⁹ Ang atong mga pagpakiglabot sa ubang mga tawo angay usab nga magbanaag sa mga sukdanan sa Diyos. Si Jesu-Kristo nagdasig kanato nga tratahon ang uban sa paagi nga buot nato silang motratar kanato, tungod kay kini maoy bahin sa matuod nga pagsimba. (Mateo 7:12) Matikdi usab ang iyang gisulti mahitungod sa pagpasundayag sa inigsoong gugma: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Ang mga tinun-an ni Jesus kinahanglang maghigugmaay sa usag usa ug mobuhat ug maayo sa isigkamagsisimba ug sa uban.​—Galacia 6:10.

TIBUOK-KALAG NGA PAGSIMBA

20, 21. (a) Unsang matang sa pagsimba ang gikinahanglan sa Diyos? (b) Nganong gisalikway ni Jehova ang pagsimba sa Israel sa kapanahonan ni Malakias?

²⁰ Sa imong kasingkasing, hayan buot nimong simbahon ang Diyos sa dalawatong paagi. Kon mao, kinahanglang batonan nimo ang panghunahuna ni Jehova sa pagsimba. Gipasiugda sa tinun-ang si Santiago nga ang panghunahuna sa Diyos mao ang mahinungdanon, dili ang atoa. Si Santiago miingon: “Ang dagway sa pagsimba nga hinlo ug wala mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo diha sa ilang kasakitan, ug ang pag-amping sa kaugalingon nga dili mabulingan sa kalibotan.” (Santiago 1:27) Uban sa tinguha nga pahimut-an ang Diyos, ang matag usa kanato kinahanglang mosusi sa atong pagsimba sa pagtino nga wala kini mahugawi sa dili-diyosnong mga buhat o nga wala kitay gikalimtang butang nga iyang giisip nga mahinungdanon.​—Santiago 1:26.

²¹ Ang hinlo, tibuok-kalag nga pagsimba lamang ang makapahimuot kang Jehova. (Mateo 22:37; Colosas 3:23) Sa dihang menos niana ang gihatag sa nasod sa Israel ngadto sa Diyos, siya miingon: “Ang anak nga lalaki, sa iyang bahin, nagatahod sa amahan; ug ang usa ka sulugoon, sa iyang agalon. Busa kon ako usa ka amahan, hain ang akong pasidungog? Ug kon ako agalon,  hain man ang kahadlok kanako?” Ilang gipasuko ang Diyos pinaagi sa paghalad kaniya ug buta, bakol, ug masakiton nga mga hayop, ug iyang gisalikway ang maong mga buhat sa pagsimba. (Malakias 1:​6-8) Si Jehova maoy takos sa kinaputliang dagway sa pagsimba ug nagadawat lamang sa bug-os nga debosyon.​—Exodo 20:5; Proverbio 3:9; Pinadayag 4:11.

22. Kon gusto nato nga dawaton sa Diyos ang atong pagsimba, unsay likayan nato, ug unsay atong buhaton?

²² Ang Samarianhong babaye nga nakigsulti kang Jesus dayag nga interesado sa pagsimba sa Diyos sa paaging may langitnong pag-uyon. Kon mao kanay atong tinguha, likayan nato ang tanang makahugaw nga mga pagtulon-an ug mga tulomanon. (2 Corinto 6:​14-18) Hinunoa, manlimbasog kita sa atong kaugalingon nga mokuha ug tukmang kahibalo sa Diyos ug buhaton ang iyang kabubut-on. Suod natong sundon ang iyang mga kinahanglanon alang sa dalawatong pagsimba. (1 Timoteo 2:​3, 4) Ang mga Saksi ni Jehova naningkamot gayod sa paghimo niana, ug sila mainitong nagadasig kanimo nga makig-ambit kanila sa pagsimba sa Diyos “pinaagi sa espiritu ug kamatuoran.” (Juan 4:24) Si Jesus nag-ingon: “Ang Amahan nagapangita sa mga ingon kanila nga mosimba kaniya.” (Juan 4:23) Gipanghinaot nga ikaw maoy ingon nga tawo. Sama niadtong Samarianhong babaye, sa walay duhaduha buot nimong makabaton ug kinabuhing walay kataposan. (Juan 4:​13-15) Apan nakita nimo nga ang mga tawo matigulang ug mamatay. Ang sunod nga kapitulo magpatin-aw kon ngano.

TAKSA ANG IMONG KAHIBALO

Ingon sa gipakita sa Juan 4:​23, 24, unsang pagsimba ang ginadawat sa Diyos?

Sa unsang paagi nato matino kon ang Diyos nahimuot ba sa pipila ka mga kustombre o mga pangilin?

Unsay pipila ka kinahanglanon alang sa dalawatong pagsimba?

[Mga Pangutana sa Pagtuon]

 [Tibuok-panid nga hulagway sa panid 44]