Kapitulo 13

Kon Nganong ang Diyosnong Pagkinabuhi Magdalag Kalipay

1. Nganong makasulti kita nga ang dalan ni Jehova magdalag kalipay?

 SI Jehova mao “ang malipayong Diyos,” ug buot niyang ikaw malipay sa kinabuhi. (1 Timoteo 1:11) Pinaagi sa pagsubay sa iyang dalan, makabenepisyo ka sa imong kaugalingon ug makasinatig halalom ug dumalayong kalinaw, sama sa suba nga walay pagkahubas. Ang pagsubay sa dalan sa Diyos magpalihok usab sa usa ka tawo sa pagbuhat kanunay sa matarong nga mga buhat, “maingon sa mga balod sa dagat.” Kini magdalag tinuod nga kalipay.​—Isaias 48:​17, 18.

2. Sa unsang paagi ang mga Kristohanon magmalipayon bisan tuod dili maayo ang pagtratar kanila usahay?

² Ang pipila ka tawo mahimong motutol, ‘Usahay mag-antos ang mga tawo tungod sa pagbuhat ug matarong.’ Tinuod, ug mao kana ang nahitabo sa mga apostol ni Jesus. Hinunoa, bisan tuod gilutos, sila nagmaya ug mipadayon sa “pagpahayag sa maayong balita bahin sa Kristo.” (Buhat 5:​40-42) Makakat-on kitag importanteng mga leksiyon gikan niini. Usa mao nga ang atong diyosnong pagkinabuhi dili garantiya nga ang pagtratar kanato maayo kanunay. “Sa pagkatinuod,” sulat ni apostol Pablo, “ang tanan kanila nga nagatinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Ang hinungdan niini mao nga si Satanas ug ang iyang kalibotan supak niadtong nagkinabuhi sa diyosnong paagi. (Juan 15:​18, 19; 1 Pedro 5:8) Apan ang tinuod nga kalipay wala magdepende sa gawasnong mga butang. Hinunoa, kini nagagikan sa pagtuo nga kita nagahimo kon unsay matarong ug busa inuyonan sa Diyos.​—Mateo 5:​10-12; Santiago 1:​2, 3; 1 Pedro 4:​13, 14.

3. Sa unsang paagi ang pagsimba kang Jehova angayng makaapektar sa kinabuhi sa usa?

³ May mga tawong nagtuo nga mahagoan nila ang pag-uyon sa  Diyos pinaagi sa panalagsang mga buhat sa pagkamahinalaron apan mahimong kalimtan siya sa ubang mga panahon. Ang matuod nga pagsimba kang Jehova nga Diyos dili sama niana. Kini mag-apektar sa panggawi sa usa ka tawo sa tanang oras sa iyang pagmata, adlaw-adlaw, tuig-tuig. Tungod niana kini gitawag usab ug “Ang Dalan.” (Buhat 19:9; Isaias 30:21) Ang diyosnong paagi sa pagkinabuhi maoy nag-agda kanato sa pagsulti ug paglihok uyon sa Pulong sa Diyos.

4. Nganong mapuslanon ang paghimog mga kausaban aron magkinabuhi sumala sa mga paagi sa Diyos?

⁴ Sa dihang masabtan sa bag-ong mga estudyante sa Bibliya nga kinahanglan silang mohimog pipila ka kausaban sa ilang mga kinabuhi aron pahimut-an si Jehova, hayan sila mahibulong, ‘Ang diyosnong pagkinabuhi ba takos gayod?’ Makatino ka nga kana mao. Ngano? Tungod kay “ang Diyos gugma,” ug busa ang iyang mga dalan maoy alang sa atong kaayohan. (1 Juan 4:8) Ang Diyos maalamon usab ug nahibalo kon unsay kinamaayohan alang kanato. Sanglit si Jehova nga Diyos maoy labing gamhanan, siya makapalig-on kanato aron sa pagtuman sa atong tinguha nga pahimut-an siya pinaagi sa pag-undang sa usa ka daotang bisyo. (Filipos 4:13) Atong tagdon ang pipila ka prinsipyo nga nalangkit sa diyosnong pagkinabuhi ug tan-awon kon sa unsang paagi ang pagpadapat niana magdalag kalipay.

PAGKAMATINUD-ANON MOSANGPOT SA KALIPAY

5. Unsay ginaingon sa Bibliya mahitungod sa pagbakak ug pagpangawat?

⁵ Si Jehova mao “ang Diyos sa kamatuoran.” (Salmo 31:5) Sa walay duhaduha, gusto nimong sundon ang iyang panig-ingnan ug mailhan ingong matinud-anong tawo. Ang pagkamatinud-anon moresulta sa pagtahod-sa-kaugalingon ug sa maayong pagbati. Hinunoa, tungod kay ang pagkadili-matinud-anon kasagaran kaayo niining makasasalang kalibotan, ang mga Kristohanon nanginahanglan niining maong pahinumdom: “Mamulong sa kamatuoran ang matag usa kaninyo sa iyang silingan . . . Ayaw na papangawata ang kawatan, apan hinuon pahagoa siya . . . aron siya adunay ikahatag sa nanginahanglan.” (Efeso 4:​25, 28) Ang Kristohanong mga empleyado motrabahong matinud-anon sa tibuok adlaw. Gawas kon tugotan sila, dili sila mokuha sa mga butang sa ilang amo. Sa trabaho man, sa tunghaan, o sa balay, ang usa ka magsisimba ni Jehova kinahanglang ‘magmatinud-anon sa tanang butang.’  (Hebreohanon 13:18) Ang bisan kinsang naanad sa pagpamakak o pagpangawat dili makabaton sa pag-uyon sa Diyos.​—Deuteronomio 5:19; Pinadayag 21:8.

6. Sa unsang paagi ang pagkamatinud-anon sa diyosnong tawo makadalag himaya kang Jehova?

⁶ Ang pagkamatinud-anon moresulta sa daghang panalangin. Si Selina usa ka kabos nga Aprikanang balo nga nahigugma kang Jehova nga Diyos ug sa iyang matarong nga mga prinsipyo. Usa niana ka adlaw, nakapulot siyag bag nga nasudlan ug libro-de-bangko ug dakong kantidad sa salapi. Pinaagig direktoryo sa telepono, nakontak niya ang tag-iya niini​—usa ka tindero nga gikawatan. Ang lalaki dili makatuo sa iyang nakita sa dihang si Selina, bisan tuod daw nagdaot, miduaw kaniya ug giuli ang tanang sulod sa bag. “Ang maong pagkamatinud-anon kinahanglang magantihan,” matud niya ug gitunolan siya ug salapi. Labaw sa tanan, kining maong lalaki nakadayeg sa relihiyon ni Selina. Oo, ang matinud-anong mga buhat magdayandayan sa pagtulon-an sa Bibliya, maghimaya kang Jehova nga Diyos, ug magdalag kalipay sa iyang matinud-anong mga magsisimba.​—Tito 2:10; 1 Pedro 2:12.

ANG KAMANGGIHATAGON MAGDALAG KALIPAY

7. Unsay daotan sa pagsugal?

⁷ Dunay kalipay sa pagkamanggihatagon, samtang ang hakog nga mga tawo dili “makapanunod sa gingharian sa Diyos.” (1 Corinto 6:10) Ang kasagarang matang sa kahakog mao ang sugal, nga maoy usa ka paningkamot nga makasapi gumikan sa kapildihan sa uban. Wala uyoni ni Jehova kadtong mga “dalo sa limbong nga kinitaan.” (1 Timoteo 3:8) Bisan pag legal ang sugal ug ang usa nagsugal alang sa paglingawlingaw, siya mahimong magiyan ug mahimong magpaluyo sa bisyong nakadaot ug daghang kinabuhi. Ang pagsugal subsob nga magdalag kalisod sa pamilya sa sugarol, nga hayan mabinlan ug diyutayng salapi aron ipalit sa kinahanglanong mga butang sama sa pagkaon ug sapot.​—1 Timoteo 6:10.

8. Sa unsang paagi si Jesus naghatag ug maayong panig-ingnan bahin sa pagkamanggihatagon, ug sa unsang paagi kita mahimong manggihatagon?

⁸ Tungod sa ilang mahigugmaong pagkamanggihatagon, ang mga Kristohanon nakakaplag ug kalipay sa pagtabang sa uban, ilabina sa kabos nga mga isigkamagtutuo. (Santiago 2:​15, 16) Sa wala pa moanhi sa yuta si Jesus, iyang naobserbahan ang pagkamanggihatagon sa Diyos ngadto sa katawhan. (Buhat 14:16, 17) Si Jesus  mismo naghatag sa iyang panahon, iyang mga abilidad, ug gani sa iyang kinabuhi alang sa katawhan. Busa, siya takos kaayo sa pag-ingon: “Adunay labaw nga kalipay sa paghatag kay sa pagdawat.” (Buhat 20:35) Si Jesus nakadayeg usab sa kabos nga balo nga sa kamanggihatagon naghulog ug duha ka gagmayng sinsilyo sa panudlanag bahandi sa templo, tungod kay iyang gihatag ang “iyang tibuok kabuhian.” (Marcos 12:​41-44) Ang karaang mga Israelinhon ug ang unang-siglong mga Kristohanon naghatag ug panig-ingnan sa malipayong pagkamanggihatagon sa paghatag ug materyal nga suportar sa kongregasyon ug sa buluhaton sa Gingharian. (1 Cronicas 29:9; 2 Corinto 9:​11-14) Ingong dugang sa paghatag ug materyal nga mga kontribusyon alang niining maong mga katuyoan, ang presenteng-adlaw nga mga Kristohanon malipayong nagdayeg sa Diyos ug naggamit sa ilang mga kinabuhi diha sa iyang pag-alagad. (Roma 12:1; Hebreohanon 13:15) Si Jehova nagpanalangin kanila tungod sa paggamit sa ilang panahon, enerhiya, ug ubang mga kahinguhaan, lakip na sa ilang mga salapi, aron pagsuportar sa matuod nga pagsimba ug pagpauswag sa tibuok-kalibotang buluhaton sa pagwali sa maayong balita sa Gingharian.​—Proverbio 3:​9, 10.

UBANG MGA HINUNGDAN NGA MAGPAUSBAW SA KALIPAY

9. Unsay daotan sa hinobrang pag-inom ug alkoholikong mga ilimnon?

⁹ Aron magmalipayon, ang mga Kristohanon kinahanglan usab nga ‘magbantay sa ilang mga katakos sa panghunahuna.’ (Proverbio 5:​1, 2) Kini nagkinahanglan nga sila mobasa ug mamalandong sa Pulong sa Diyos ug sa maayong literatura sa Bibliya. Apan may mga butang nga pagalikayan. Pananglitan, ang hinobrang pag-inom ug alkoholikong mga ilimnon makapahinabo sa usa ka tawo nga dili makapugong sa iyang panghunahuna. Sa maong kahimtang, daghang tawo ang nalangkit sa imoral nga panggawi, nagmapintason, ug nakapahinabog makamatay nga mga aksidente. Dili ikahibulong nga ang Bibliya nagaingon nga ang mga palahubog dili makapanunod sa Gingharian sa Diyos! (1 Corinto 6:10) Kay determinadong magpabiling “himsog sa pangisip,” ang matuod nga mga Kristohanon maglikay sa paghubog, ug kini makatabang sa pagpausbaw sa kalipay sa ilang taliwala.​—Tito 2:​2-6.

10. (a) Nganong ang mga Kristohanon dili manabako? (b) Unsang mga kaayohan ang makuha gikan sa pag-undang sa makagiyang mga bisyo?

¹⁰ Ang mahinlong lawas makaamot sa kalipay. Apan, daghan  ang nagiyan sa makadaot nga mga substansiya. Pananglitan, tagda ang paggamit ug tabako. Ang World Health Organization nagtaho nga ang pagpanabako “mopatay ug tulo ka milyong tawo kada tuig.” Ang pag-undang sa bisyo sa pagpanabako mahimong malisod tungod sa temporaryong mga epekto sa pag-undang. Sa laing bahin, daghang tigtabako-kanhi ang nakadiskobre nga sila dunay mas maayong panglawas ug mas daghang salapi alang sa panginahanglan sa panimalay. Oo, ang pagbuntog sa bisyo sa pagpanabako o pagkagiyan sa ubang makadaot nga mga substansiya makaamot sa usa ka mahinlong lawas, mahinlong tanlag, ug tinuod nga kalipay.​—2 Corinto 7:1.

KALIPAY SA KAMINYOON

11. Unsay gikinahanglan aron mabatonan ang legal ug dumalayong dungganong kaminyoon?

¹¹ Kinahanglang tinoon sa matag nag-ipon pagpuyo ingong bana ug asawa nga ang ilang kaminyoon rehistrado sa sibil nga mga awtoridad. (Marcos 12:17) Kinahanglan usab nilang isipon ang kaminyoon ingong usa ka seryosong responsabilidad. Tinuod, ang panagbulag mahimong kinahanglanon sa mga kaso sa tinuyong dili-pagsuportar, naghingaping pagdagmal, o absolutong kapeligrohan sa espirituwalidad. (1 Timoteo 5:8; Galacia 5:​19-21) Apan ang mga pulong ni apostol Pablo sa 1 Corinto 7:​10-17 nagdasig sa mga kapikas nga magpabiling nag-ipon. Siyempre, alang sa tinuod nga kalipay kinahanglang magmaunongon sila sa usag usa. Si Pablo nagsulat: “Himoang dungganon ang kaminyoon taliwala sa tanan, ug ang higdaanan sa kaminyoon nga walay kahugawan, kay hukman sa Diyos ang mga makihilawason ug ang mga mananapaw.” (Hebreohanon 13:4) Ang terminong “higdaanan sa kaminyoon” nagpasabot sa seksuwal nga panaglambigit tali sa lalaki ug babayeng legal nga kasado sa usag usa. Walay laing seksuwal nga pakigrelasyon, sama sa pagkaminyo ngadto sa kapin sa usa ka asawa, ang mahimong hubiton ingong ‘dungganon sa tanan.’ Dugang pa, ang Bibliya nagtunglo sa pakigsekso nga wala pay kasal ug sa homoseksuwalidad.​—Roma 1:​26, 27; 1 Corinto 6:18.

12. Unsay pipila ka dili-maayong mga bunga sa pakighilawas?

¹² Ang pakighilawas mahimong modalag pipila ka yugto sa unodnong kalalim, apan kini dili mosangpot sa tinuod nga kalipay. Dili kini makapahimuot sa Diyos ug makahasol kini sa tanlag sa usa. (1 Tesalonica 4:​3-5) Ang makapasubong mga sangpotanan  sa gidili nga pakigsekso mao tingali ang AIDS ug ubang mga sakit nga mapasa agig pakigsekso. “Gibanabana nga kapin ug 250 ka milyong tawo sa tibuok kalibotan ang matakboyan matag tuig sa gonorea, ug mga 50 ka milyon sa sipilis,” pahayag sa usa ka medikal nga taho. Anaa usab ang suliran mahitungod sa wala-tuyoang mga pagsabak. Ang International Planned Parenthood Federation nagtaho nga, sa tibuok kalibotan, kapin ug 15 ka milyong dalagita tali sa pangedarong 15 ug 19 ang magmabdos matag tuig, ug ang ikatulong bahin nila ang magpaaborsiyon. Gipakita sa usa ka pagtuon nga sa usa ka Aprikanhong nasod, ang mga komplikasyon sa aborsiyon misangpot sa 72 porsiento sa tanang kamatayon taliwala sa mga dalagita. Ang pipila ka makihilawason mahimong makaikyas sa sakit o pagsabak apan dili sila makaikyas sa emosyonal nga kadaot. Daghan ang nawad-an sa ilang pagtahod-sa-kaugalingon ug gani nagdumot sa ilang kaugalingon.

13. Unsang dugang mga suliran ang ipahinabo sa pagpanapaw, ug unsay umaabot niadtong wala moundang sa pagkamakihilawason ug pagkamananapaw?

¹³ Bisan tuod ang panapaw mahimong pasayloon, kini maoy usa ka balidong Kasulatanhong pasikaranan alang sa diborsiyo sa bahin sa inosenteng kapikas. (Mateo 5:32; itandi ang Oseas 3:​1-5.) Sa dihang ang maong imoralidad mosangpot sa pagkabungkag sa usa ka kaminyoon, mahimo kining magbilin ug halalom emosyonal nga mga ulat sa inosenteng kapikas ug sa mga anak. Alang sa kaayohan sa tawhanong banay, gipunting sa Pulong sa Diyos nga ang iyang mabatokong paghukom moabot ngadto sa dili-mahinulsolong mga makihilawason ug mga mananapaw. Dugang pa, kini sa tin-aw nagpakita nga kadtong nagabatasan sa seksuwal nga imoralidad “dili makapanunod sa gingharian sa Diyos.”​—Galacia 5:​19, 21.

“DILI BAHIN SA KALIBOTAN”

14. (a) Unsay pila ka matang sa idolatriya nga pagalikayan sa usa ka diyosnong tawo? (b) Unsang giya ang gitagana sa Juan 17:14 ug Isaias 2:4?

¹⁴ Kadtong buot magpahimuot kang Jehova ug makatagamtam sa mga panalangin sa Gingharian molikay sa idolatriya sa bisan unsang matang niini. Gipakita sa Bibliya nga sayop ang paghimo ug pagsimba sa mga larawan, lakip niadtong kang Kristo, o sa inahan ni Jesus, si Maria. (Exodo 20:​4, 5; 1 Juan 5:21) Busa, ang matuod nga mga Kristohanon dili mosimba sa mga rebulto, mga krus, ug mga larawan. Likayan usab nila ang mas malinglahong mga  matang sa idolatriya, sama sa mga buhat sa pagkamahinalaron ngadto sa mga bandera ug sa pag-awit ug mga awit nga nagahimaya sa mga nasod. Sa dihang gipit-os sa paghimo sa maong mga buhat, ilang hinumdoman ang mga pulong ni Jesus ngadto kang Satanas: “Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.” (Mateo 4:​8-10) Si Jesus miingon nga ang iyang mga sumusunod “dili bahin sa kalibotan.” (Juan 17:14) Kini nagpasabot sa pagkaneyutral sa politikal nga mga kalihokan ug pagkinabuhi nga malinawon kaharmoniya sa Isaias 2:​4, nga nagaingon: “Siya [si Jehova nga Diyos] sa tino magahukom sa taliwala sa mga nasod ug magapanul-id sa mga butang may kalabotan sa daghang katawhan. Ug ilang salsalon ang ilang mga espada ingong mga lipya sa daro ug ang ilang mga bangkaw himoon nga mga galab. Ang nasod dili mobakyaw sa espada batok sa nasod, ni makakat-on pa sila ug gubat.”

15. Unsa ang Dakong Babilonya, ug unsay gihimo sa daghang bag-ong mga estudyante sa Bibliya aron makagula gikan kaniya?

¹⁵ Ang pagkahimong “dili bahin sa kalibotan” nagpasabot usab  ug pagputol sa tanang pakig-uban sa “Dakong Babilonya,” ang tibuok kalibotang empiryo sa bakak nga relihiyon. Ang mahugawng pagsimba mikaylap gikan sa karaang Babilonya hangtod nga kini nakabaton ug makadaot nga espirituwal nga paggahom ibabaw sa katawhan sa tibuok yuta. Ang “Dakong Babilonya” nagsakop sa tanang relihiyon kansang mga doktrina ug mga tulumanon dili kaharmoniya sa kahibalo sa Diyos. (Pinadayag 17:​1, 5, 15) Walay matinumanong magsisimba ni Jehova ang makiglabot sa mga kalihokan sa panagtapo sa pagtuo pinaagi sa pagpakig-ambit sa pagsimba uban sa lainlaing mga relihiyon o pinaagi sa espirituwal nga pagpakig-uban sa bisan unsang bahin sa Dakong Babilonya. (Numeros 25:​1-9; 2 Corinto 6:14) Ingong resulta, daghang bag-ong mga estudyante sa Bibliya ang magpadalag sulat sa pagluwat sa relihiyosong organisasyon nga ilang gianiban kanhi. Kini mas nakapasuod kanila ngadto sa matuod nga Diyos, ingon sa gisaad: “‘Gumula kamo gikan sa taliwala kanila, ug ilain ang inyong kaugalingon,’ nagaingon si Jehova, ‘ug hunong na sa paghikap sa dili-hinlong butang’; ‘ug pasudlon ko kamo.’” (2 Corinto 6:17;  Pinadayag 18:​4, 5) Dili ba imong gitinguha ang maong pagkadinawat sa atong langitnong Amahan?

PAGTIMBANGTIMBANG SA TINUIG NGA MGA SAULOG

16. Nganong ang matuod nga mga Kristohanon dili magsaulog ug Pasko?

¹⁶ Ang diyosnong kinabuhi magpahigawas kanato gikan sa subsob makapabug-at nga pagsaulog sa kalibotanong mga pangilin. Pananglitan, ang Bibliya wala magbutyag sa tukmang adlaw sa pagkatawo ni Jesus. ‘Abi nakog si Jesus natawo sa Disyembre 25!’ ang pipila mahimong moingon. Dili kini mahimo tungod kay namatay siya sa tingpamulak sa 33 K.P. sa pangedarong 33 1/2 anyos. Dugang pa, sa panahon sa iyang pagkatawo, ang mga pastol “nag-estar sa gawas ug nanagbantay sa ilang mga panon sa hayop sa kagabhion.” (Lucas 2:8) Sa nasod sa Israel, ang ulahing bahin sa Disyembre maoy tugnaw, ting-ulan nga panahon nga niana ang mga karnero huptan sa mga silonganan sa tibuok gabii aron panalipdan sila gikan sa panahon sa tingtugnaw. Sa pagkatinuod, ang Disyembre 25 gigahin sa mga Romano ingong adlaw sa pagkahimugso sa ilang diyos nga adlaw. Daghang siglo human sa pag-anhi ni Jesus sa yuta, ang apostatang mga Kristohanon misagop niining petsaha alang sa pagsaulog sa pagkatawo ni Kristo. Tungod niini, ang matuod nga mga Kristohanon dili magsaulog ug Pasko o sa bisan unsang ubang pangilin nga pinasikad sa bakak relihiyosong mga tinuhoan. Tungod kay sila naghatag ug eksklusibong debosyon kang Jehova, sila usab dili magsaulog sa mga pangilin nga nag-idolo sa makasasalang mga tawo o mga nasod.

17. Nganong ang diyosnong mga tawo dili magsaulog ug mga adlawng-natawhan, ug bisan pa nganong ang Kristohanong kabataan malipayon?

¹⁷ Ang Bibliya sa espisipiko naghisgot lamang ug duha ka pagsaulog sa adlawng-natawhan, nga parehong naglangkit ug mga lalaking wala mag-alagad sa Diyos. (Genesis 40:​20-22; Mateo 14:​6-11) Sanglit ang Kasulatan wala magbutyag sa petsa sa pagkatawo sa hingpit nga tawong si Jesu-Kristo, nganong mohatag kita ug linaing pagtagad sa mga adlawng-natawhan sa dili-hingpit nga mga tawo? (Ecclesiastes 7:1) Natural, ang diyosnong mga ginikanan dili maghulat ug linaing adlaw aron pakitaan ug gugma ang ilang mga anak. Usa ka 13-anyos Kristohanong dalagita nag-ingon: “Kami sa akong pamilya malipayon. . . . Suod kaayo ako sa akong mga ginikanan, ug sa dihang mangutana ang ubang kabataan kon  nganong dili ako magsaulog ug mga pangilin, ingnan nako sila nga nagsaulog ako kada adlaw.” Matud sa usa ka Kristohanong batan-on nga 17 anyos: “Sa among balay, daghang beses kami nga maghatagay ug mga gasa sa tibuok tuig.” Mas dakong kalipay ang moresulta sa dihang ang mga gasa ihatag nga kinabubut-on.

18. Unsang bugtong tinuig nga pagsaulog ang gisugo ni Jesus nga saulogon sa iyang mga sumusunod, ug unsay gipahinumdom niini kanato?

¹⁸ Alang niadtong nagasubay sa diyosnong kinabuhi, dunay usa ka adlaw matag tuig nga sa linain gisaulog. Mao kini ang Panihapon sa Ginoo, nga kasagarang gitawag ug Memoryal sa kamatayon ni Kristo. Mahitungod niini, si Jesus nagsugo sa iyang mga sumusunod: “Padayong buhata kini sa paghandom kanako.” (Lucas 22:​19, 20; 1 Corinto 11:​23-25) Sa dihang gisugdan ni Jesus kining maong panihapon sa gabii sa Nisan 14, 33 K.P., siya migamit ug tinapay nga walay igpapatubo ug bino nga pula, nga naghawas sa iyang walay-sala tawhanong lawas ug sa iyang hingpit nga dugo. (Mateo 26:​26-29) Kining mga emblemaha pakig-ambitan sa mga Kristohanong dinihogan sa balaang espiritu sa Diyos. Sila gidala nganha sa bag-ong pakigtugon ug sa pakigtugon alang sa Gingharian, ug sila may langitnong paglaom. (Lucas 12:32; 22:​20, 28-30; Roma 8:​16, 17; Pinadayag 14:​1-5) Bisan pa, ang mga benepisyo maeksperyensiyahan niadtong tanang presente sa gabii nga tumbas sa Nisan 14 sa karaang Hudiyonhong kalendaryo. Sila mapahinumdoman sa gugma nga gipakita ni Jehova nga Diyos ug ni Jesu-Kristo diha sa nagatabon-sa-sala nga halad lukat nga nagpaposible sa kinabuhing walay kataposan alang niadtong makabaton sa diyosnong pag-uyon.​—Mateo 20:28; Juan 3:16.

PANARBAHO UG KALINGAWAN

19. Unsang suliran ang giatubang sa mga Kristohanon sa pagpangitag kabuhian?

¹⁹ Ang matuod nga mga Kristohanon obligadong magkugi ug tagan-an ang ilang mga panginahanglan. Ang pagtuman niini magdalag katagbawan sa mga ulo sa pamilya. (1 Tesalonica 4:​11, 12) Siyempre, kon ang trabaho sa usa ka Kristohanon maoy supak sa Bibliya, kini magwagtang sa iyang kalipay. Apan, usahay malisod alang sa usa ka Kristohanon nga makakitag trabaho nga kaharmoniya sa mga sukdanan sa Bibliya. Pananglitan, ang pila ka empleyado gibaoran sa ilang mga amo nga lansisan ang mga pumapalit. Sa laing bahin, daghang amo ang monunot aron pauyonan ang tanlag sa usa ka matinud-anong trabahante, kay dili gustong  mawad-an ug usa ka kasaligang empleyado. Hinunoa, bisag unsay mosangpot, makatino ka nga ang Diyos magapanalangin sa imong mga paningkamot nga makakitag trabaho nga mohatag kanimo ug mahinlong tanlag.​—2 Corinto 4:2.

20. Nganong angay kitang magmapilion sa kalingawan?

²⁰ Sanglit buot sa Diyos nga magmalipayon ang iyang mga alagad, kinahanglan natong timbangan ang kuging trabaho sa makarepreskong mga panahon sa lulinghayaw ug pahulay. (Marcos 6:31; Ecclesiastes 3:​12, 13) Ang kalibotan ni Satanas nagpasiugda ug dili-diyosnong mga kalingawan. Apan aron makapahimuot sa Diyos, kinahanglang magmapilion kita sa mga basahon nga atong basahon, mga programa sa radyo ug musika nga atong paminawon, ug mga konsiyerto, pelikula, drama, programa sa telebisyon, ug mga video nga atong tan-awon. Kon ang kalingawan nga atong gipili sa miagi supak sa mga pasidaan diha sa mga kasulatan sama sa Deuteronomio 18:​10-12, Salmo 11:​5, ug Efeso 5:​3-5, makapahimuot kita kang Jehova ug labaw kitang magmalipayon kon mohimo kitag mga pagpasibo.

PAGTAHOD ALANG SA KINABUHI UG DUGO

21. Sa unsang paagi ang pagtahod alang sa kinabuhi makaapektar sa atong pag-isip sa aborsiyon, ingon man sa atong mga batasan ug panggawi?

²¹ Aron mabatonan ang matuod nga kalipay, kinahanglang isipon nato ang tawhanong kinabuhi ingong sagrado, sama sa pangisip ni Jehova. Ang iyang Pulong nagdili kanato sa pagbuno. (Mateo 19:​16-18) Sa pagkamatuod, ang Balaod sa Diyos alang sa Israel nagpakita nga iyang giisip ang gisabak ingong usa ka bililhong kinabuhi​—dili usa ka butang nga pagalaglagon. (Exodo 21:​22, 23) Bahin niana, kinahanglang dili nato isipon ang kinabuhi ingong usa ka butang nga diyutayg bili pinaagi sa paggamit ug tabako, pag-abuso sa atong lawas pinaagig mga droga o alkoholikong ilimnon, o paghimog wala-kinahanglanang mga pagpameligro. Ni angay kitang makiglabot sa bisan unsang nagpameligro-sa-kinabuhi nga mga pangagpas ni angay kitang dili-magtagad sa mga pasidaan alang sa kaluwasan, nga mahimong moresulta sa pagkasad-an sa dugo.​—Deuteronomio 22:8.

22. (a) Unsa ang diyosnong panghunahuna bahin sa dugo ug sa gamit niini? (b) Kansang dugo lamang ang sa pagkatinuod nagaluwas ug kinabuhi?

²² Si Jehova nag-ingon kang Noe ug sa iyang pamilya nga ang dugo naghawas sa kalag, o kinabuhi. Busa, gidid-an sila sa Diyos sa pagkaon sa bisan unsang dugo. (Genesis 9:​3, 4) Sanglit kita ilang  mga kaliwat, kanang balaora kinahanglang tumanon natong tanan. Giingnan ni Jehova ang mga Israelinhon nga ang dugo igabubo sa yuta ug dili pagagamiton alang sa kaugalingong mga katuyoan sa tawo. (Deuteronomio 12:​15, 16) Ug ang balaod sa Diyos bahin sa dugo gisubli sa dihang ang unang-siglo nga mga Kristohanon gihatagag instruksiyon: “Padayong magaayad . . . sa dugo.” (Buhat 15:​28, 29) Tungod sa pagtahod alang sa pagkabalaan sa kinabuhi, ang diyosnong mga tawo dili modawat sa mga pag-abuno sa dugo, bisan pa kon ang uban moinsister nga ang maong pamaagi makaluwas sa kinabuhi. Daghang kapilian sa panambal nga dalawaton sa mga Saksi ni Jehova ang napamatud-ang epektibo kaayo ug dili magladlad sa usa ngadto sa mga kapeligrohan sa mga pag-abuno sa dugo. Ang mga Kristohanon nasayod nga ang giula nga dugo ni Jesus lamang ang sa pagkatinuod nagaluwas ug kinabuhi. Ang pagtuo niana magdalag kapasayloan ug paglaom sa kinabuhing walay kataposan.​—Efeso 1:7.

23. Unsay pipila ka ganti sa diyosnong pagkinabuhi?

²³ Dayag, ang diyosnong pagkinabuhi nagkinahanglag paningkamot. Mahimo kining moresulta sa pagbiaybiay gikan sa mga membro sa pamilya o sa mga kaila. (Mateo 10:​32-39; 1 Pedro 4:4) Apan ang mga ganti sa pagkinabuhi nianang paagiha labawng bililhon kay sa bisan unsang mga pagsulay. Kini mosangpot sa usa ka mahinlong tanlag ug magtaganag maayong panagkauban sa mga isigkamagsisimba ni Jehova. (Mateo 19:​27, 29) Dayon, handurawa usab ang pagkinabuhing walay kataposan diha sa matarong nga bag-ong kalibotan sa Diyos. (Isaias 65:​17, 18) Ug pagkadakong kalipay ang ihatag sa pagsunod sa tambag sa Bibliya ug sa ingon makapalipay sa kasingkasing ni Jehova! (Proverbio 27:11) Dili ikahibulong nga ang diyosnong pagkinabuhi magdalag kalipay!​—Salmo 128:​1, 2.

TAKSA ANG IMONG KAHIBALO

Unsay pila ka katarongan kon nganong ang diyosnong pagkinabuhi magdalag kalipay?

Ang diyosnong pagkinabuhi mahimong magkinahanglan ug unsang mga kausaban?

Nganong buot nimong magkinabuhi ug diyosnong kinabuhi?

[Mga Pangutana sa Pagtuon]

[Hulagway sa panid 124, 125]

Ang espirituwal nga mga kalihokan nga gibalanse sa mga yugto sa lulinghayaw makaamot sa kalipay niadtong nagkinabuhig diyosnong kinabuhi