Kon Unsaon Nimo Pagduol sa Diyos
Kapitulo 16
Kon Unsaon Nimo Pagduol sa Diyos
1. Unsang mga kaamgiran ang dayag sa daghang relihiyon?
USA ka turista nga miduaw sa usa ka nasod sa Sidlakan nahingangha sa relihiyosong mga rituwal nga iyang nakit-an sa usa ka Budhistang templo. Bisan tuod ang mga larawan dili kang Maria o kang Kristo, daghan sa mga rituwal kaamgid niadtong sa iyang simbahan sa iyang nasod. Pananglitan, iyang namatikdan ang paggamit sa mga rosaryohan ug ang pagyamyam sa mga pag-ampo. Ang uban usab nakahimo sa maong mga pagtandi. Sa Sidlakan man o sa Kasadpan, dayag nga susama ang mga paaging gigamit sa mga debotado sa pagduol sa Diyos o sa mga butang nga ilang gisimba.
2. Giunsa paghubit ang pag-ampo, ug nganong daghang tawo ang nag-ampo?
2 Daghan ang ilabinang naningkamot sa pagduol sa Diyos pinaagi sa pag-ampo kaniya. Ang pag-ampo gihubit ingong “usa ka buhat sa pagpakigkomunikar sa tawo uban sa sagrado o balaan—Diyos, mga diyos, mas labaw nga kalibotan, o dili-kinaiyanhong mga gahom.” (The New Encyclopædia Britannica) Hinunoa, sa pagduol sa Diyos diha sa pag-ampo, ang pipila naghunahuna lamang sa mga bentaha nga ilang makuha gikan niana. Pananglitan, usa ka lalaki ang kas-a nangutana sa usa sa mga Saksi ni Jehova: “Kon iampo mo ako, ang mga suliran kaha nako sa akong pamilya, sa trabaho, ug sa akong panglawas masulbad?” Dayag nga ingon niana ang pagtuo sa maong tawo, apan daghan ang nag-ampo ug nakadiskobre nga nagpabilin gihapon ang ilang mga suliran. Busa makapangutana kita, ‘Nganong kinahanglang moduol pa kita sa Diyos?’
KON NGANONG MODUOL SA DIYOS
3. Kang kinsa angayng itumong ang atong mga pag-ampo, ug ngano?
3 Ang pag-ampo dili usa ka kawang nga rituwal, ni kini usa lamang ka paagi aron mabatonan ang usa ka butang. Ang usa ka dakong katarongan sa pagduol sa Diyos mao ang pagbaton ug suod nga relasyon uban kaniya. Busa ang atong mga pag-ampo angayng itumong kang Jehova nga Diyos. “Si Jehova haduol sa tanan nga nanagsangpit kaniya,” matud sa salmistang si David. (Salmo 145:18) Gidapit kita ni Jehova nga mosulod sa malinawong relasyon uban kaniya. (Isaias 1:18) Kadtong midawat niining maong pagdapit mouyon sa salmista nga nag-ingon: “Alang kanako, ang pagpaduol ngadto sa Diyos maayo alang kanako.” Ngano? Tungod kay kadtong moduol kang Jehova nga Diyos makatagamtam sa tinuod nga kalipay ug kalinaw sa hunahuna.—Salmo 73:28.
4, 5. (a) Nganong mahinungdanong mag-ampo sa Diyos? (b) Unsang matang sa relasyon ang mahimo natong tukoron uban sa Diyos pinaagi sa pag-ampo?
4 Nganong mag-ampo sa Diyos alang sa tabang kon siya ‘nasayod na sa atong gikinahanglan sa dili pa kita mangayo kaniya’? (Mateo 6:8; Salmo 139:4) Gipakita sa pag-ampo nga may pagtuo kita sa Diyos ug naglantaw kaniya ingong ang Tinubdan sa “matag maayong gasa ug matag hingpit nga hatag.” (Santiago 1:17; Hebreohanon 11:6) Si Jehova nahimuot sa atong mga pag-ampo. (Proverbio 15:8) Malipay siya nga maminaw sa atong makahuloganong mga kapahayagan sa pagpabili ug pagdayeg, maingon nga ang usa ka amahan malipay sa pagkadungog sa iyang gamayng bata nga naglitok ug sinserong mga pulong sa pasalamat. (Salmo 119:108) Sa dihang maayo ang amahan-anak nga relasyon, mabination ang komunikasyon. Ang gipangga nga anak gustong makighinabi sa iyang amahan. Tinuod usab kini may kalabotan sa atong relasyon uban sa Diyos. Kon tinuod natong gipabilhan ang mga butang nga atong nakat-onan mahitungod kang Jehova ug ang gugma nga iyang gipakita alang kanato, makabaton kita ug kusganong tinguha nga ipahayag ang atong kaugalingon ngadto kaniya diha sa pag-ampo.—1 Juan 4:16-18.
5 Sa pagduol sa Labing Hataas nga Diyos, kinahanglan nga magmatinahuron kita, bisan tuod wala kinahanglanang mabalaka pag-ayo bahin sa tukmang mga pulong nga atong gamiton. (Hebreohanon 4:16) Kanunay kitang makaduol kang Jehova. Ug pagkadakong pribilehiyo nga kita ‘makabubo sa atong kasingkasing’ ngadto sa Diyos diha sa pag-ampo! (Salmo 62:8) Ang apresasyon kang Jehova motultol ngadto sa suod nga relasyon uban kaniya, sama sa gitagamtam sa matinumanong tawo nga si Abraham ingong higala sa Diyos. (Santiago 2:23) Apan sa dihang mag-ampo sa Soberanong Ginoo sa uniberso, kinahanglang tumanon nato ang iyang mga kinahanglanon sa pagduol kaniya.
MGA KINAHANGLANON SA PAGDUOL SA DIYOS
6, 7. Bisan pag ang Diyos wala magkinahanglag salapi aron dunggon ang atong mga pag-ampo, unsay iyang gikinahanglan kanato sa dihang kita mag-ampo?
6 Gikinahanglan ba ang salapi aron makaduol sa Diyos? Daghang tawo ang nagbayad sa klero aron iampo sila. Ang pila nagtuo pa gani nga dunggon ang ilang mga pag-ampo sumala sa gidak-on sa ilang donasyon. Hinunoa, ang Pulong sa Diyos wala mag-ingon nga kinahanglang maghalad ug salapi aron kita makaduol kang Jehova sa pag-ampo. Ang espirituwal niyang mga tagana ug ang mga panalangin sa relasyon uban kaniya diha sa pag-ampo mabatonan nga walay bayad.—Isaias 55:1, 2.
7 Nan, unsay gikinahanglan? Ang hustong tinamdan sa kasingkasing maoy usa ka kinahanglanon. (2 Cronicas 6:29, 30; Proverbio 15:11) Sa atong kasingkasing kinahanglang magpasundayag kitag pagtuo kang Jehova nga Diyos ingong ang “Tigdungog sa pag-ampo” ug “ang tigganti sa mga matinuorong nagapangita kaniya.” (Salmo 65:2; Hebreohanon 11:6) Kinahanglan usab nga magbaton kitag mapaubsanong kasingkasing. (2 Hari 22:19; Salmo 51:17) Sa usa niya ka ilustrasyon, gipakita ni Jesu-Kristo nga sa pagduol sa Diyos ang usa ka mapaubsanong maniningil ug buhis nga may kasingkasing nga ubos ug tinamdan napamatud-ang labaw nga matarong kay sa mapahitas-ong Fariseo. (Lucas 18:10-14) Sa atong pagduol sa Diyos diha sa pag-ampo, atong hinumdoman nga “ang tagsatagsa nga mapahitas-on ug kasingkasing maoy dulumtanan kang Jehova.”—Proverbio 16:5.
8. Kon buot natong tubagon sa Diyos ang atong mga pag-ampo, pagahinloan nato ang atong mga kaugalingon sa unsa?
8 Kon buot natong tubagon sa Diyos ang atong mga pag-ampo, kinahanglang hinloan nato ang atong mga kaugalingon sa makasasalang panggawi. Sa dihang gidasig sa tinun-ang si Santiago ang uban nga moduol sa Diyos, iyang gidugang: “Hinloi ang inyong mga kamot, kamong mga makasasala, ug lunsaya ang inyong mga kasingkasing, kamong mga maduhaduhaon.” (Santiago 4:8) Bisan ang mga mamumuhat ug kalapasan makasulod sa malinawong relasyon uban kang Jehova kon sila maghinulsol ug biyaan ang kanhi nilang paagi sa pagkinabuhi. (Proverbio 28:13) Dili kita makaatubang kang Jehova kon kita nagpakaaron-ingnon lamang nga nakahinlo na sa atong dalan. “Ang mga mata ni Jehova anaa sa mga matarong, ug ang iyang mga dalunggan gikiling sa ilang pangamuyo; apan ang nawong ni Jehova maoy batok niadtong nagabuhat sa daotang mga butang,” nag-ingon ang Pulong sa Diyos.—1 Pedro 3:12.
9. Pinaagi kang kinsa kita angay moduol kang Jehova, ug ngano?
9 Ang Bibliya nagpahayag: “Walay tawo nga matarong sa ibabaw sa yuta nga nagapadayon sa pagbuhat ug maayo ug wala magpakasala.” (Ecclesiastes 7:20) Busa makapangutana ka: ‘Nan, sa unsang paagi makaduol kita kang Jehova nga Diyos?’ Ang Bibliya nagtubag: “Kon aduna may makahimo ug sala, aduna kitay magtatabang uban sa Amahan, si Jesu-Kristo, usa nga matarong.” (1 Juan 2:1) Bisan tuod kita mga makasasala, makaduol kita sa Diyos uban sa kagawasan sa pagsulti pinaagi kang Jesu-Kristo, nga namatay ingong lukat alang kanato. (Mateo 20:28) Siya lamang ang agianan nga niana kita makaduol kang Jehova nga Diyos. (Juan 14:6) Dili kita angay maghunahuna nga ang halad lukat ni Jesus awtomatikong magtabon sa tanan natong mga sala bisan pag sa tinuyo nabatasan nato ang pagpakasala. (Hebreohanon 10:26) Hinunoa, kon gihimo nato ang atong maarangan sa paglikay sa daotan ug bisan pa makasala usahay, makahinulsol kita ug makapangayog kapasayloan sa Diyos. Sa dihang duolon nato siya uban sa mapaubsanong kasingkasing, maminaw siya kanato.—Lucas 11:4.
MGA KAHIGAYONAN SA PAGPAKIGSULTI SA DIYOS
10. Kon bahin sa pag-ampo, sa unsang paagi masundog nato si Jesus, ug unsay pipila ka okasyon alang sa pribadong pag-ampo?
10 Gipabilhan gayod ni Jesu-Kristo ang iyang relasyon uban kang Jehova. Busa, si Jesus migahin ug panahon sa pagpakigsulti sa Diyos sa pribadong pag-ampo. (Marcos 1:35; Lucas 22:40-46) Maayo nga atong sundogon ang panig-ingnan ni Jesus ug regular nga mag-ampo sa Diyos. (Roma 12:12) Haom nga sugdan ang adlaw pinaagi sa pag-ampo, ug una matulog, sa husto makapasalamat kita kang Jehova tungod sa kalihokan sa adlaw. Sa tibuok adlaw, tinoa nga makaduol sa Diyos “sa matag okasyon.” (Efeso 6:18) Gani makaampo kita sa hilom diha sa atong kasingkasing, kay nasayod nga si Jehova makadungog kanato. Ang pribadong pagpakigsulti sa Diyos makatabang kanato sa pagpalig-on sa atong relasyon uban kaniya, ug ang pag-ampo kang Jehova matag adlaw motabang kanato nga mahimong mas suod kaniya.
11. (a) Nganong ang mga pamilya kinahanglang magkaubang mag-ampo? (b) Unsay ipasabot sa dihang ikaw moingong “Amen” sa pagkatapos sa pag-ampo?
11 Maminaw usab si Jehova sa mga pag-ampo nga gitanyag alang sa mga grupo sa katawhan. (1 Hari 8:22-53) Makaduol kita sa Diyos ingong usa ka pamilya, uban sa ulo sa panimalay nga manguna sa pag-ampo. Kini maglig-on sa bugkos sa pamilya, ug si Jehova mahimong tinuod alang sa mga bata sa dihang ilang madungog ang ilang mga ginikanan nga mapaubsanong nag-ampo sa Diyos. Komosta na man kon dunay maghawas sa usa ka grupo sa pag-ampo, tingali sa usa ka tigom sa mga Saksi ni Jehova? Kon kita kauban sa mamiminaw, maminaw kitag maayo aron nga sa kataposan sa pag-ampo, sa kinasingkasing makaingon kita ug “Amen,” nga nagkahulogang “Hinaot unta.”—1 Corinto 14:16.
MGA PAG-AMPO NGA GIDUNGOG NI JEHOVA
12. (a) Nganong wala tubaga sa Diyos ang pila ka pag-ampo? (b) Nganong dili lamang nato tagdon ang personal nga mga panginahanglan sa dihang mag-ampo?
12 Mahimong bation sa pipila nga wala dungga sa Diyos ang ilang mga pag-ampo bisan pag sila nag-ampo kaniya pinaagi ni Kristo. Hinunoa, si apostol Juan nag-ingon: “Walay sapayan kon unsay atong pangayoon sumala sa kabubut-on [sa Diyos], kita iyang dunggon.” (1 Juan 5:14) Busa, kinahanglan diay nga ang atong hangyoon maoy nahiuyon sa kabubut-on sa Diyos. Sanglit interesado siya sa atong espirituwal nga kaayohan, ang bisan unsang butang nga nagaapektar sa atong espirituwalidad haom nga hisgotan sa pag-ampo. Kinahanglang suklan nato ang tintasyon nga magtagad lamang sa pisikal nga mga panginahanglan. Pananglitan, bisan pag haom nga mag-ampo alang sa salabotan ug kalig-on sa pag-atubang sa sakit, ang mga kabalaka sa panglawas dili angay mangibabaw sa espirituwal nga intereses. (Salmo 41:1-3) Kay nakaamgo nga siya naghinobra ka mabalak-on mahitungod sa iyang panglawas, usa ka Kristohanong babaye nangayog tabang kang Jehova aron makabaton ug haom nga panghunahuna bahin sa iyang sakit. Ingong resulta, wala na kaayo siya mabalaka sa iyang mga suliran sa panglawas, ug gibati niya nga gihatagan siyag “gahom nga labaw sa kasarangan.” (2 Corinto 4:7) Naglabi pa ang iyang tinguha nga makatabang sa espirituwal nga paagi sa uban, ug nahimo siya nga bug-os-panahong magmamantala sa Gingharian.
13. Ingong gipaila sa Mateo 6:9-13, unsay pila ka angayang mga ulohan nga mahimo natong ilakip sa atong mga pag-ampo?
13 Unsay angay natong ilakip sa atong mga pag-ampo aron si Jehova mahimuot sa pagpaminaw niana? Gitudloan ni Jesu-Kristo ang iyang mga tinun-an kon unsaon pag-ampo. Sa modelong pag-ampo nga natala sa Mateo 6:9-13, naghatag siyag hularan sa mga ulohan nga sa husto mahimo natong iampo. Unsay labaw natong kabalak-an diha sa atong mga pag-ampo? Ang ngalan ni Jehova nga Diyos ug ang Gingharian kinahanglang isipon nga labawng mahinungdanon. Haom ang pag-ampo alang sa atong materyal nga mga panginahanglan. Mahinungdanon usab nga mangayog kapasayloan sa atong mga sala ug kaluwasan gikan sa mga tintasyon ug sa daotang usa, si Satanas nga Yawa. Dili buot ni Jesus nga yamyamon nato kining pag-ampoa o sumayon kinig balikbalik, nga gisag-ulo nga wala hunahunaa ang kahulogan niini. (Mateo 6:7) Unsang matanga sa relasyon kana kon ang usa ka bata naggamit ug samang mga pulong sa matag higayon nga siya makigsulti sa iyang amahan?
14. Gawas sa mga pangaliya, unsang mga pag-ampo ang angay natong itanyag?
14 Gawas pa sa mga pangaliya ug kinasingkasing nga mga pagpangaliyupo, kinahanglang mag-ampo kita nga may pagdayeg ug pagpasalamat. (Salmo 34:1; 92:1; 1 Tesalonica 5:18) Makaampo usab kita alang sa uban. Ang mga pag-ampo may kalabotan sa atong espirituwal nga mga igsoong lalaki ug babaye nga nagsakit o gilutos nagpakita sa atong interes kanila, ug si Jehova nahimuot sa pagpaminaw kanato nga nagpahayag sa maong kabalaka. (Lucas 22:32; Juan 17:20; 1 Tesalonica 5:25) Sa pagkamatuod, si apostol Pablo nagsulat: “Ayaw pagkabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos; ug ang kalinaw sa Diyos nga nagalabaw sa tanang panghunahuna magabantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”—Filipos 4:6, 7.
LUMAHUTAY SA PAG-AMPO
15. Unsay angay natong hinumdoman kon ang atong mga pag-ampo daw wala tubaga?
15 Bisan pag nagauswag ka sa kahibalo mahitungod sa Diyos, usahay mahimong bation nimo nga wala tubaga ang imong mga pag-ampo. Mahimong ingon niana ang kahimtang tungod kay basin dili pa panahon aron tubagon sa Diyos ang usa ka espisipikong pag-ampo. (Ecclesiastes 3:1-9) Mahimong tugotan ni Jehova nga magpadayon sa makadiyot ang usa ka kahimtang, apan sa pagkatinuod siya magtubag sa mga pag-ampo ug nasayod sa kinamaayohang panahon sa paghimo niana.—2 Corinto 12:7-9.
16. Nganong angay kitang maglahutay sa pag-ampo, ug sa unsang paagi ang pagbuhat niini makaapektar sa atong relasyon uban sa Diyos?
16 Ang atong paglahutay sa pag-ampo magpadayag sa atong kinasingkasing nga interes sa ginapamulong nato sa Diyos. (Lucas 18:1-8) Pananglitan, mahimo natong hangyoon si Jehova nga tabangan kita nga mabuntog ang usa ka kahuyangan. Pinaagi sa paglahutay sa pag-ampo ug paglihok kaharmoniya sa atong mga pangaliyupo, atong gipakita ang atong pagkasinsero. Kinahanglang magmaespisipiko kita ug magmatinud-anon sa atong mga pangaliya. Ilabinang mahinungdanon ang pag-ampo nga mainiton sa dihang nagaatubang kita sa tintasyon. (Mateo 6:13) Sa dihang padayon kitang nag-ampo samtang naningkamot sa pagkontrolar sa atong makasasalang mga kiling, makita nato kon sa unsang paagi si Jehova nagtabang kanato. Kini maglig-on sa atong pagtuo ug maglig-on sa atong relasyon uban kaniya.—1 Corinto 10:13; Filipos 4:13.
17. Sa unsang paagi kita makabenepisyo gikan sa mainampoong tinamdan sa pag-alagad sa Diyos?
17 Pinaagi sa pag-ugmad sa mainampoong tinamdan diha sa sagradong pag-alagad kang Jehova nga Diyos, hiamgohan nato nga wala kita mag-alagad kaniya sa atong kaugalingong kusog. Si Jehova ang naghatag ug kusog kanato aron makaalagad kaniya. (1 Corinto 4:7) Ang pag-ila niini makatabang kanato nga magmapainubsanon ug magpalambo sa atong relasyon uban kaniya. (1 Pedro 5:5, 6) Oo, duna kitay lig-ong mga katarongan aron molahutay sa pag-ampo. Ang atong mainitong mga pag-ampo ug bililhong kahibalo kon unsaon sa pagduol sa atong mahigugmaong langitnong Amahan maghimo sa atong kinabuhi nga tinuod nga malipayon.
KOMUNIKASYON UBAN KANG JEHOVA DILI USAG-KILIRAN
18. Sa unsang paagi makapaminaw kita sa Diyos?
18 Kon gusto natong dunggon sa Diyos ang atong mga pag-ampo, kinahanglang maminaw kita sa iyang ginaingon. (Zacarias 7:13) Siya wala na magpadalag mga mensahe pinaagi sa dinasig nga mga propeta ug tino nga wala magagamit ug espiritistikong mga paagi. (Deuteronomio 18:10-12) Apan makapaminaw kita sa Diyos pinaagi sa pagtuon sa iyang Pulong, ang Bibliya. (Roma 15:4; 2 Timoteo 3:16, 17) Maingon nga gikinahanglan natong ugmaron ang gana sa pisikal nga pagkaon nga makaayo kanato, kita giawhag sa “pagpangandoy sa walay-sambog nga gatas nga iya sa pulong.” Ugmara ang gana alang sa espirituwal nga pagkaon pinaagi sa pagbasa sa Pulong sa Diyos matag adlaw.—1 Pedro 2:2, 3; Buhat 17:11.
19. Unsay kaayohan sa pagpamalandong bahin sa atong gibasa diha sa Bibliya?
19 Pamalandonga ang imong gibasa sa Bibliya. (Salmo 1:1-3; 77:11, 12) Kana nagkahulogan nga hinuktokan ang materyal. Ikapanag-ing nimo kini sa paghilis sa pagkaon. Makahilis ka sa espirituwal nga pagkaon pinaagi sa paglangkit sa imong ginabasa sa mga butang nga imo nang nahibaloan. Tagda kon sa unsang paagi ang materyal makaapekto sa imong kinabuhi, o palandonga kon unsay gipadayag niini mahitungod sa mga hiyas ug mga pakiglabot ni Jehova. Busa pinaagi sa personal nga pagtuon, makakaon ka sa espirituwal nga pagkaon nga gitagana ni Jehova. Kini labi pang magpaduol kanimo sa Diyos ug makatabang kanimo sa pag-atubang sa adlaw-adlaw nga mga suliran.
20. Sa unsang paagi ang pagtambong sa Kristohanong mga tigom makatabang kanato sa pagduol sa Diyos?
20 Makaduol ka usab sa Diyos pinaagi sa pagpaminaw sa iyang Pulong nga gihisgotan diha sa Kristohanong mga tigom, maingon nga ang mga Israelinhon naminaw pag-ayo sa dihang sila nagtigom aron maminaw sa katilingbanong pagbasa sa Balaod sa Diyos. Gipatin-aw sa mga instruktor niadtong panahona ang ilang pagbasa sa Balaod, sa ingon gitabangan ang ilang mga mamiminaw nga makasabot ug mapalihok nga ipadapat ang ilang nadunggan. Kini mitultol sa dakong kalipay. (Nehemias 8:8, 12) Busa batasana ang pagtambong sa mga tigom sa mga Saksi ni Jehova. (Hebreohanon 10:24, 25) Kini makatabang kanimo sa pagsabot ug dayon pagpadapat sa kahibalo sa Diyos diha sa imong kinabuhi ug magdala kanimog kalipay. Ang pagkahimong bahin sa tibuok-kalibotang Kristohanong panag-igsoonay makatabang kanimong magpabiling suod kang Jehova. Ug ingon sa atong makita, makakaplag ka ug tinuod nga seguridad taliwala sa katawhan sa Diyos.
TAKSA ANG IMONG KAHIBALO
Nganong kinahanglang moduol ka kang Jehova?
Unsay pipila ka kinahanglanon sa pagduol sa Diyos?
Unsay mahimo nimong ilakip sa imong mga pag-ampo?
Nganong kinahanglang molahutay ka sa pag-ampo?
Sa unsang paagi makapaminaw ka kang Jehova karon?
[Mga Pangutana sa Pagtuon]
[Tibuok-panid nga hulagway sa panid 157]
