Mabatonan Nimo ang Usa ka Malipayong Kaugmaon!
Kapitulo 1
Mabatonan Nimo ang Usa ka Malipayong Kaugmaon!
1, 2. Unsay buot sa imong Maglalalang alang kanimo?
USA ka mahigugmaong halog gikan sa imong minahal. Masipang katawa panahon sa usa ka makapatagbawng pagpangaon uban sa minahal nga mga higala. Ang kalipay sa pagtan-aw sa imong mga anak nga sadyang nagduladula. Ang mga yugtong sama niini maoy malipayong mga gutlo sa kinabuhi. Hinunoa, alang sa daghan ang kinabuhi daw nagpadayag ug sunodsunod nga seryosong mga suliran. Kon mao kanay imong naeksperyensiyahan, magmadasigon.
2 Kabubut-on sa Diyos nga matagamtam nimo ang kalipay nga dayon ubos sa kinamaayohang mga kahimtang sa nindot nga mga palibot. Dili kini damgo lamang, tungod kay ang Diyos sa pagkatinuod nagatanyag kanimo sa yawi nianang malipayong kaugmaon. Kanang maong yawi mao ang kahibalo.
3. Unsang kahibalo ang yawi sa kalipay, ug nganong makaseguro kita nga ang Diyos makahatag nianang maong kahibalo?
3 Kita nagahisgot mahitungod sa usa ka linaing matang sa kahibalo nga mas labaw kay sa tawhanong kaalam. Kini mao “ang kahibalo mismo sa Diyos.” (Proverbio 2:5) Duolan sa 2,000 ka tuig kanhi, usa ka magsusulat sa Bibliya miingon: “Ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Hunahunaa ang kahibalo nga nabatonan sa Magbubuhat sa tanang butang! Ang Bibliya nagaingon nga ang Diyos nagaihap ug nagangalan sa tanang bituon. Pagkamakalilisang nga hunahunaon, sanglit dunay gatosan ka bilyong bituon sa atong kaugalingong galaksiya, ug ang mga astronomo nag-ingon nga dunay mga usa ka gatos ka bilyong ubang mga galaksiya! (Salmo 147:4) Ang Diyos nahibalo usab sa tanang butang mahitungod kanato, busa kinsa pa ang makahatag ug mas maayong mga tubag sa mahinungdanong mga pangutana bahin sa kinabuhi?—Mateo 10:30.
4. Nganong angay kitang magdahom nga ang Diyos mohatag ug mga instruksiyon nga mogiya kanato, ug unsang basahon ang nagatagana niining maong panginahanglan?
4 Handurawa ang duha ka lalaking naningkamot nga ayohon ang ilang mga kotse. Kay naglagot, ang usa ka lalaki miundang sa pagtrabaho. Ang laing lalaki kalmadong nagtul-id sa suliran, nagpaandar, ug mipahiyom sa dihang hapsay nga miandar ang makina niini. Dili ka malisdan sa pagtag-an kon kinsa sa duha ka lalaki ang migamit ug basahon sa instruksiyon gikan sa pabrika sa kotse. Dili ba makataronganon nga ang Diyos motaganag mga instruksiyon aron mogiya kanato sa kinabuhi? Ingon sa imong nasayran, ang Bibliya sa tukma nag-angkon nga ingon niana—usa ka basahon sa instruksiyon ug giya gikan sa atong Maglalalang, nga gidesinyo aron mohatag sa kahibalo sa Diyos.—2 Timoteo 3:16.
5. Unsa ka bililhon ang kahibalo nga anaa sa Bibliya?
5 Kon tinuod ang pangangkon sa Bibliya, hunahunaa ang pagkadakong bahandi sa kahibalo nga nahisulod nianang maong basahon! Sa Proverbio 2:1-5, kini nagaaghat kanato nga pangitaon ang kaalam, nga kaloton kana ingon nga nangita kita ug tinipigang bahandi—dili diha sa yuta sa tawhanong panghunahuna, kondili diha sa kaugalingong Pulong sa Diyos. Kon mangita kita dinha, atong “makaplagan ang kahibalo mismo sa Diyos.” Sanglit nasabtan sa Diyos ang atong mga limitasyon ug mga panginahanglan, naghatag siya ug instruksiyon kanato aron tabangan kita nga magkinabuhing malinawon ug malipayon. (Salmo 103:14; Isaias 48:17) Dugang pa, ang kahibalo sa Diyos nagahatag kanato ug makalilipay nga maayong balita.
KINABUHING WALAY KATAPOSAN!
6. Unsang pasalig ang gihatag ni Jesu-Kristo may kalabotan sa kahibalo sa Diyos?
6 Ang iladong makasaysayanhong tawo nga si Jesu-Kristo tin-aw nga naghubit niining bahina sa kahibalo sa Diyos. Siya miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Tiaw mo kana—kahibalo nga motultol sa kinabuhing walay kataposan!
7. Unsay ebidensiya nga wala tuyoa sa Diyos nga kita mamatay?
7 Ayaw pagdalidalig salikway sa kinabuhing walay kataposan ingong usa lamang ka damgo. Hinunoa, susiha kon sa unsang paagi gigama ang lawas sa tawo. Kini talagsaong pagkadesinyo aron makaila sa lami, makadungog, makasimhot, makakita, ug mobati. Dunay daghang butang sa yuta nga makapatagbaw sa atong mga sentido—lamiang pagkaon, mananoy nga awit sa langgam, humot nga kabulakan, nindot nga talan-awon, masadyaong panagkauban! Ug ang atong katingalahang utok maoy labaw pa kay sa usa ka supercomputer, tungod kay kini makapaarang kanato sa pag-apresyar ug sa pagpahimulos niining tanang butang. Nagtuo ka ba nga buot sa atong Maglalalang nga mamatay kita ug mawad-an niining tanan? Dili ba kaha mas makataronganong mohinapos nga buot niya kitang mabuhing malipayon ug motagamtam sa kinabuhi hangtod sa hangtod? Aw, mahimong mao kana ang kahulogan sa kahibalo sa Diyos alang kanimo.
KINABUHI SA PARAISO
8. Unsay ginaingon sa Bibliya mahitungod sa kaugmaon sa katawhan?
8 Ang ginaingon sa Bibliya mahitungod sa kaugmaon sa yuta ug katawhan mahimong tingbon sa usa ka pulong—Paraiso! Si Jesu-Kristo naghisgot bahin niana sa dihang iyang giingnan ang usa ka himalatyong tawo: “Ikaw mahiuban kanako sa Paraiso.” (Lucas 23:43) Ang paghisgot sa Paraiso sa walay duhaduha nagpahinumdom sa maong tawo sa malipayong kahimtang sa atong unang mga ginikanan, si Adan ug Eva. Sa dihang gilalang sila sa Diyos, sila mga hingpit ug nagpuyo sa samag-tanamang parke nga gidesinyo ug gihimo sa Maglalalang. Kadto haom nga gitawag ug tanaman sa Eden, nga kanang ngalana nagpasabot sa kalipay.
9. Nahisama sa unsa ang pagpuyo sa orihinal nga Paraiso?
9 Pagkamakalilipay kadtong maong tanaman! Usa kadto ka tinuod nga paraiso. Taliwala sa nindot niining kakahoyan mao kadtong nagapamungag lamiang mga bunga. Samtang gisusi ni Adan ug Eva ang ilang puloy-anan, nga miinom gikan sa lunsay ug lami nga katubigan niini, ug namupo sa mga bunga gikan sa mga kahoy niini, walay hinungdan nga sila mabalaka o mahadlok. Bisan ang mga hayop dili hulga, tungod kay ang Diyos nagpahimutang sa lalaki ug sa iyang asawa sa mahigugmaong pagmando ibabaw kanilang tanan. Dugang pa, ang unang tawhanong magtiayon mahimsog kaayo. Samtang magpabilin sila nga masinugtanon sa Diyos, ang walay-kataposan, malipayong kaugmaon nagahulat kanila. Sila gihatagan ug makapatagbaw nga buluhaton sa pag-atiman sa ilang kahibulongang Paraisong puloy-anan. Dugang pa, gihatagan sa Diyos ug mando si Adan ug Eva nga “pun-on ang yuta ug gamhan kini.” Sila ug ang ilang mga anak magpauswag sa mga utlanan sa Paraiso hangtod ang tibuok natong planeta mahimong usa ka dapit nga manindot ug makalilipay.—Genesis 1:28.
10. Sa dihang mihisgot si Jesus bahin sa Paraiso, unsay diha sa iyang hunahuna?
10 Hinunoa, sa dihang gihisgotan ni Jesus ang Paraiso, wala siya maghangyo sa himalatyong tawo nga maghunahuna bahin sa kanhiay pang mga panahon. Wala, si Jesus naghisgot bahin sa umaabot! Siya nasayod nga ang atong tibuok yutan-ong puloy-anan mahimong paraiso. Sa ingon tumanon sa Diyos ang iyang orihinal nga katuyoan alang sa katawhan ug sa atong yuta. (Isaias 55:10, 11) Oo, ang Paraiso mapasig-uli! Ug mahisama kini sa unsa? Pasagdi ang Pulong sa Diyos, ang Balaang Bibliya, nga motubag.
KINABUHI SA NAPASIG-ULING PARAISO
11. Sa napasig-uling Paraiso, unsay mahitabo sa sakit, pagkatigulang, ug kamatayon?
11 Ang sakit, pagkatigulang, ug kamatayon mawala na. “Nianang panahona ang mga mata sa mga buta mangabuka, ug ang mga igdulungog sa mga bungol makadungog. Nianang panahona ang piang mokatkat sama sa lagsaw, ug ang dila sa amang magaawit sa kalipay.” (Isaias 35:5, 6) “Ang Diyos mismo mouban [sa katawhan]. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:3, 4.
12. Nganong makaseguro kita nga walay krimen, kapintasan, ug pagkadaotan sa umaabot nga Paraiso?
12 Ang krimen, kapintasan, ug pagkadaotan mawala na hangtod sa hangtod. “Ang mga mamumuhat ug daotan pagaputlon . . . Sa dili na madugay, ug ang daotan mawala na . . . Siya mahanaw na. Apan ang mga maaghop magapanunod sa yuta.” (Salmo 37:9-11) “Mahitungod sa mga daotan, sila pagaputlon gikan sa yuta mismo; ug mahitungod sa mga maluibon, sila pagalangkaton gikan niana.”—Proverbio 2:22.
13. Sa unsang paagi ipahinabo sa Diyos ang kalinaw?
13 Molungtad ang kalinaw sa tibuok yuta. “Siya [Diyos] nagapahunong sa mga gubat hangtod sa kinatumyan sa yuta. Gibali niya ang pana ug giputolputol ang bangkaw.” (Salmo 46:9) “Molambo ang mga matarong, ug ang kadagaya sa pakigdait hangtod nga ang bulan mahanaw na.”—Salmo 72:7.
14, 15. Unsay ginaingon sa Bibliya mahitungod sa puloy-anan, trabaho, ug pagkaon sa napasig-uling Paraiso?
14 Ang puloy-anan segurado ug makapahimuot ang trabaho. “Sila magatukod ug mga balay ug magapuyo niana . . . Sila dili magatukod ug lain ang magapuyo; sila dili magatanom ug lain ang magakaon. Kay ingon sa mga adlaw sa usa ka kahoy mao man ang mga adlaw sa akong katawhan; ug ang buhat sa ilang mga kamot pagapahimuslan sa bug-os sa akong mga pinili. Sila dili magahago sa walay kapuslanan, ni sila manganak alang sa kasamok.”—Isaias 65:21-23.
15 Dagaya ang makapahimsog nga pagkaon. “Aduna unyay daghang trigo sa yuta; sa tumoy sa kabukiran adunay pag-awas.” (Salmo 72:16) “Ang yuta mohatag sa iyang bunga; ang Diyos, ang atong Diyos, magapanalangin kanato.”—Salmo 67:6.
16. Nganong ang kinabuhi sa Paraiso makalilipay?
16 Makalilipay ang kinabuhing walay kataposan sa paraisong yuta. “Ang mga matarong magapanunod sa yuta, ug magapuyo sila sa ibabaw niini sa walay kataposan.” (Salmo 37:29) “Ang kamingawan ug ang mala nga yuta magmasadya, ug ang desyertong kapatagan magakalipay ug mamulak sama sa rosas.”—Isaias 35:1.
ANG KAHIBALO UG ANG IMONG KAUGMAON
17. (a) Unsay angay nimong himoon kon madanihon kanimo ang kinabuhi sa Paraiso? (b) Sa unsang paagi kita nasayod nga ipahinabo sa Diyos ang dagkong mga kausaban sa yuta?
17 Kon nadani ka sa kinabuhi sa Paraiso, ayawg itugot nga dunay bisan unsang butang nga makapugong kanimo gikan sa pagkuhag kahibalo sa Diyos. Nahigugma siya sa katawhan ug magapahinabo sa mga kausaban nga gikinahanglan aron himoon ang yuta nga usa ka paraiso. Aw, kon ikaw dunay gahom sa pagtapos sa kalisdanan ug inhustisya nga kaylap kaayo sa kalibotan, dili ba nimo kana himoon? Dahomon ba nato ang Diyos nga mohimo ug menos niana? Sa pagkatinuod, ang Bibliya tin-aw nga nagahisgot mahitungod sa panahon sa dihang wagtangon sa Diyos kining puno-sa-kasamok nga sistema ug alisdan kini sa usa ka hingpit, matarong nga pagmando. (Daniel 2:44) Apan labaw pa ang gihimo sa Bibliya kay sa pagtug-an kanato mahitungod niining tanan. Kini nagpakita kanato kon sa unsang paagi kita makalabang-buhi ngadto sa gisaad sa Diyos nga bag-ong kalibotan.—2 Pedro 3:13; 1 Juan 2:17.
18. Unsay mahimo sa kahibalo sa Diyos alang kanimo karon?
18 Ang kahibalo sa Diyos dako usab ug mahimo alang sa imong kaayohan karon. Ang labing makapatugaw nga mga pangutana sa kinabuhi gitubag diha sa Bibliya. Ang pagdawat sa giya niini makatabang kanimo sa pag-ugmad ug panaghigala uban sa Diyos. Pagkadakong pribilehiyo! Ug kini makapaarang kanimo sa pagtagamtam sa kalinaw nga Diyos lamang ang makahatag. (Roma 15:13, 33) Sa pagsugod nimog kuha niining hinungdanong kahibalo, gisugdan nimo ang labing mahinungdanon ug magantihong pangagpas sa imong kinabuhi. Dili ka gayod magbasol nga nakakuha ug kahibalo sa Diyos nga motultol sa kinabuhing walay kataposan.
19. Unsang pangutana ang atong pagatagdon sa sunod nga kapitulo?
19 Kami nagpunting sa Bibliya ingong ang basahon nga naundan sa kahibalo sa Diyos. Apan, unsaon nato pagkasayod nga kini, dili basahon sa tawhanong kaalam, kondili usa ka butang nga mas labaw pa? Atong tagdon kining maong pangutana sa sunod nga kapitulo.
TAKSA ANG IMONG KAHIBALO
Nganong ang kahibalo sa Diyos motultol kanimo sa kalipay nga dayon?
Mahisama sa unsa ang kinabuhi sa umaabot nga yutan-ong Paraiso?
Nganong makabenepisyo ka sa pagkuha ug kahibalo sa Diyos karon?
[Mga Pangutana sa Pagtuon]
