Kapitulo 12

Sukli ang Daotang Espirituhanong mga Puwersa

1. Sa unsang paagi si Jesus misanong sa dihang gikaharong niya ang daotang mga espiritu?

 DIHADIHA pagkahuman sa iyang bawtismo, si Jesu-Kristo miadto sa kaawaawan sa Judea aron mag-ampo ug mamalandong. Didto gisulayan ni Satanas nga Yawa nga ipalapas kaniya ang balaod sa Diyos. Hinunoa, gisalikway ni Jesus ang tintasyon sa Yawa ug wala malit-agi niini. Giatubang ni Jesus ang ubang daotang mga espiritu panahon sa iyang ministeryo sa yuta. Apan, sa balikbalik, iyang gibadlong ug gisuklan sila.​—Lucas 4:​1-13; 8:​26-34; 9:​37-43.

2. Unsang mga pangutana ang atong tagdon?

² Ang mga asoy sa Bibliya nga naghubit niadtong mga panagharong angayng magkombinsir kanato nga ang daotang espirituhanong mga puwersa naglungtad gayod. Naningkamot sila sa pagpasalaag sa mga tawo. Hinunoa, makasukol kita niining daotang mga espiritu. Apan diin gikan ang daotang mga espiritu? Nganong naningkamot sila sa paglimbong sa mga tawo? Ug unsay ilang mga paagi sa pagpalampos sa ilang mga katuyoan? Ang pagkakaplag sa mga tubag sa mga pangutanang sama niini makatabang kanimo sa pagsukol sa daotang espirituhanong mga puwersa.

DAOTANG MGA ESPIRITU​—ILANG KAGIKAN UG TUMONG

3. Sa unsang paagi mitungha si Satanas nga Yawa?

³ Dugay nang gibuhat ni Jehova nga Diyos ang daghang espirituhanong mga linalang una pa niya lalanga ang tawo. (Job 38:​4, 7) Ingon sa gisaysay sa Kapitulo 6, usa niining mga manulondaa gitugkan ug tinguha nga ang mga tawo mosimba kaniya inay  mosimba kang Jehova. Sa pagkab-ot sa maong tumong, kining daotang manulonda misukol ug mipasipala sa Maglalalang, mipasabot pa gani sa unang babaye nga bakakon ang Diyos. Nan, haom nga kining rebelyosong espirituhanong linalang nailhan ingong Satanas (tigsukol) nga Yawa (tigpasipala).​—Genesis 3:​1-5; Job 1:6.

4. Sa unsang paagi ang pipila ka manulonda nakasala sa adlaw ni Noe?

⁴ Sa ulahi, ang ubang mga manulonda midapig kang Satanas nga Yawa. Sa mga adlaw sa matarong nga tawo nga si Noe, ang pipila kanila mibiya sa ilang pag-alagad sa langit ug nagsul-ob ug unodnong mga lawas aron tagbawon ang ilang kailibgon sa seksuwal nga pakigrelasyon uban sa yutan-ong mga babaye. Sa walay duhaduha giimpluwensiyahan ni Satanas kadtong mga manulondaa sa paghimo nianang masukihong buhat. Misangpot kini sa ilang pagpatunghag mestisong mga liwat nga gitawag ug Nephilim, nga nahimong mapintas nga mga banyaga. Sa dihang gipahinabo ni Jehova ang dakong Lunop, milaglag kadto sa dunot nga katawhan ug nianang dili-kinaiyanhong mga liwat sa masukihong mga manulonda. Ang rebelyosong mga manulonda nakalingkawas sa kalaglagan pinaagi sa paghubo sa ilang unodnong mga lawas ug sa pagbalik ngadto sa kalibotan sa espiritu. Apan gipugngan sa Diyos kining mga demonyoha pinaagi sa pagpalagpot kanila ngadto sa espirituwal nga kangitngit. (Genesis 6:​1-7, 17; Judas 6) Bisan pa, si Satanas, “ang magmamando sa mga demonyo,” ug ang iyang daotang mga manulonda nagpadayon sa ilang pag-alsa. (Lucas 11:15) Unsay ilang tumong?

5. Unsay tumong ni Satanas ug sa iyang mga demonyo, ug unsay ilang gigamit sa paglit-ag sa mga tawo?

⁵ Ang daotang tumong ni Satanas ug sa mga demonyo mao ang pagpaliso sa mga tawo batok kang Jehova nga Diyos. Busa, kining daotang mga espiritu nagpasalaag, nanghadlok, ug nag-atake sa katawhan sa tibuok kasaysayan sa tawo. (Pinadayag 12:9) Ang modernong-adlaw nga mga pananglitan nagpamatuod nga ang pag-atake sa demonyo mas daotan karon kay sukad masukad. Sa paglit-ag sa mga tawo, ang mga demonyo subsob nga nagagamit sa tanang matang sa espiritismo. Giunsa paggamit sa mga demonyo kining maong paon, ug unsaon nimo pagpanalipod sa imong kaugalingon?

 KON SA UNSANG PAAGI ANG DAOTANG MGA ESPIRITU NANINGKAMOT SA PAGPASALAAG KANIMO

6. Unsa ang espiritismo, ug unsay pipila ka matang niini?

⁶ Unsay espiritismo? Kini maoy pagkalangkit sa mga demonyo, o daotang mga espiritu, mahimong sa direktang paagi o pinaagi sa espiritista. Ang espiritismo nagasilbi alang sa mga demonyo maingon nga ang paon nagasilbi alang sa mga mangangayam: Kini nagadani sa tukbonon. Ug maingon nga ang mangangayam nagagamit ug lainlaing mga paon aron madani ang mga mananap ngadto sa iyang lit-ag, sa ingon ang daotang mga espiritu nagadasig sa lainlaing mga matang sa espiritismo aron ilang makontrolar ang mga tawo. (Itandi ang Salmo 119:110.) Ang pipila niining matanga mao ang pagpanag-an, salamangka, pagtan-aw sa mga tilimad-on, pagdiwata, paglamat, pagkonsulta sa mga espiritista, ug pagkomunikar sa mga patay.

7. Unsa ka kaylap ang espiritismo, ug nganong kini naglungtad bisan sa gitawag nga Kristohanong mga nasod?

⁷ Ang paon malamposon, tungod kay ang espiritismo nakadani sa mga tawo sa tibuok kalibotan. Kadtong nagpuyo sa mga balangay sa kalasangan moduol sa babaylan, ug ang mga taga-opisina sa dakbayan mokonsulta sa mga astrologo. Ang espiritismo naglungtad bisan sa gitawag nga Kristohanong kanasoran. Gipaila sa panukiduki nga sa Tinipong Bansa lamang, mga 30 ka magasin nga may tingob nga sirkulasyon nga kapin ug 10,000,000 gigahin alang sa lainlaing mga matang sa espiritismo. Ang mga taga-Brazil mogugol ug kapin sa 500 milyong dolyar kada tuig alang sa mga butang nga gigamit sa espiritismo. Apan, 80 porsiento niadtong tigtambongan sa mga sentro sa espiritistikong pagsimba nianang nasora maoy bawtismadong mga Katoliko nga tigtambongan usab sa Misa. Tungod kay ang pipila ka klerigo nagabuhat ug espiritismo, daghang relihiyosong tawo ang naghunahuna nga ang pagbuhat niana dalawaton sa Diyos. Apan tinuod ba?

KON NGANONG ANG BIBLIYA NAGSAWAY SA BUHAT SA ESPIRITISMO

8. Unsay Kasulatanhong panghunahuna bahin sa espiritismo?

⁸ Kon natudloan ka nga ang pila ka matang sa espiritismo  maoy mga paagi sa pagkontak sa maayong mga espiritu, hayan makuratan kang masayod sa ginaingon sa Bibliya mahitungod sa espiritismo. Ang katawhan ni Jehova gipasidan-an: “Dili kamo magliso ngadto sa mga espiritista, ug ayaw pagkonsulta sa mga mananag-an sa mga panghitabo, nga mahugawan pinaagi nila.” (Levitico 19:31; 20:​6, 27) Ang basahon sa Bibliya nga Pinadayag nagpasidaan nga “kadtong nagabuhat sa espiritismo” modangat sa “lanaw nga nagadilaab sa kalayo ug asupre. Kini nagakahulogan sa ikaduhang [walay-kataposang] kamatayon.” (Pinadayag 21:8; 22:15) Ang tanang matang sa espiritismo wala uyoni ni Jehova nga Diyos. (Deuteronomio 18:​10-12) Nganong ingon man niana?

9. Nganong makahinapos kita nga ang presenteng-adlaw nga mga mensahe gikan sa kalibotan sa espiritu dili gikan kang Jehova?

⁹ Si Jehova nagpadalag maayong mga espiritu, o matarong nga mga manulonda, sa pagpakigkomunikar sa pipila ka tawo una pa makompleto ang Bibliya. Sukad sa pagkakompleto niini, ang Pulong sa Diyos nagtaganag giya nga gikinahanglan sa mga tawo sa pag-alagad kang Jehova sa dalawatong paagi. (2 Timoteo 3:​16, 17; Hebreohanon 1:​1, 2) Dili niya laktawan ang iyang balaang Pulong pinaagi sa paghatag ug mga mensahe sa mga espiritista. Ang tanang presenteng-adlaw nga mga mensahe gikan sa kalibotan sa espiritu nagagikan sa daotang mga espiritu. Ang buhat sa espiritismo mahimong motultol sa paghasi sa demonyo o gani sa pagkakontrolado sa daotang mga espiritu. Busa, ang Diyos mahigugmaong nagpasidaan kanato nga dili makiglangkit sa bisan unsang espiritistikong mga buhat. (Deuteronomio 18:14; Galacia 5:​19-21) Dugang pa, kon mopadayon kita sa pagbuhat sa espiritismo human masayod sa panglantaw ni Jehova bahin niini, mahimo kitang nagadapig sa rebelyosong daotang mga espiritu ug mahimong mga kaaway sa Diyos.​—1 Samuel 15:23; 1 Cronicas 10:​13, 14; Salmo 5:4.

10. Unsa ang pagpanag-an, ug nganong likayan nato kini?

¹⁰ Usa ka popular nga matang sa espiritismo mao ang pagpanag-an​—ang pagsulay nga mahibalo sa umaabot o sa wala-masayri pinaagi sa tabang sa mga espiritu. Ang pila ka matang sa pagpanag-an mao ang astrolohiya, pagbasa sa bolang kristal, interpretasyon sa mga damgo, panghimalad, ug pagtag-an sa suwerte  pinaagi sa mga barahang tarot. Daghan ang nag-isip sa pagpanag-an ingong dili-makadaot nga kalingawan, apan gipakita sa Bibliya nga ang mga mananag-an sa suwerte ug daotang mga espiritu maoy magkakunsabo. Pananglitan, ang Buhat 16:​16-19 naghisgot sa “usa ka demonyo sa pagpanag-an” nga nakapaarang sa usa ka babaye sa pagbuhat sa “pamaagi sa pagpanag-an.” Apan, ang iyang katakos sa pagtag-an sa umaabot nawala sa dihang gipalagpot ang demonyo. Dayag, ang pagpanag-an maoy usa ka paon nga gigamit sa mga demonyo sa pagdani sa mga tawo ngadto sa ilang lit-ag.

11. Sa unsang paagi ang mga paningkamot nga makigkomunikar uban sa mga patay motultol ngadto sa lit-ag?

¹¹ Kon nagabangotan ka sa kamatayon sa usa ka minahal nga membro sa pamilya o usa ka suod nga higala, dali kang madani sa laing paon. Ang usa ka espiritista mahimong mohatag kanimo ug linaing impormasyon o mahimong mosulti pinaagi sa tingog nga daw iya sa namatay. Pagbantay! Ang mga paningkamot sa pagpakigkomunikar uban sa mga patay motultol ngadto sa lit-ag. Ngano? Tungod kay ang mga patay dili makasulti. Ingon sa malagmit imong mahinumdoman, ang Pulong sa Diyos tin-awng nagaingon nga sa pagkamatay ang usa ka tawo “mobalik sa iyang yuta; nianang adlawa ang iyang mga hunahuna mahanaw.” Ang mga patay “dili mahibalo sa bisan unsa.” (Salmo 146:4; Ecclesiastes 9:​5, 10) Gawas pa, sa pagkatinuod ang mga demonyo diay mao ang nasayrang mosundog sa tingog sa mga patay ug mohatag ug impormasyon sa usa ka espiritista mahitungod sa usa nga namatay. (1 Samuel 28:​3-19) Busa “ang bisan kinsang mangutana sa mga patay” maoy nalit-agan sa daotang mga espiritu ug nagalihok nga supak sa kabubut-on ni Jehova nga Diyos.​—Deuteronomio 18:​11, 12; Isaias 8:19.

GIKAN SA PAGDANI NGADTO SA PAG-ATAKE

12, 13. Unsang ebidensiya ang anaa nga ang mga demonyo padayon nga nagatintal ug nagahasi sa katawhan?

¹² Sa dihang nagsunod ka sa tambag sa Pulong sa Diyos may kalabotan sa espiritismo, imong gisalikway ang paon sa mga demonyo. (Itandi ang Salmo 141:​9, 10; Roma 12:9.) Kini ba nagpasabot nga ang daotang mga espiritu mohunong na sa paglit-ag kanimo? Dili gayod! Human tintala ug katulo si Jesus, si Satanas  “mibiya kaniya hangtod sa laing haom nga higayon.” (Lucas 4:13) Sa susama, ang gahian nga mga espiritu dili lamang mangdanig mga tawo apan mangatake usab kanila.

¹³ Hinumdomi ang mas sayo natong pagtuon mahitungod sa pag-atake ni Satanas sa alagad sa Diyos nga si Job. Gipahinabo sa Yawa ang pagkamatay sa iyang mga hayop ug ang kamatayon sa kadaghanan sa iyang mga alagad. Gipamatay pa gani ni Satanas ang mga anak ni Job. Sunod, si Job mismo gihampak niya sa mangutngot nga sakit. Apan si Job nagpabilin sa iyang integridad sa Diyos ug gipanalanginan pag-ayo. (Job 1:​7-19; 2:​7, 8; 42:12) Sukad niadto, ang mga demonyo naghimo sa pila ka tawo nga amang o buta ug nagpadayon sa pagsadya tungod sa pag-antos sa mga tawo. (Mateo 9:​32, 33; 12:22; Marcos 5:​2-5) Karong adlawa, gipakita sa mga taho nga ang mga demonyo sa seksuwal nga paagi naghasi sa pipila ug nagduso sa uban nga mabuang. Gihulhogan pa nila ang uban nga mopatay ug maghikog, nga maoy mga sala batok sa Diyos. (Deuteronomio 5:17; 1 Juan 3:15) Bisan pa, linibo sa katawhan nga kaniadto nalit-agan niining daotang mga espiritu nakalingkawas gikan niini. Sa unsang paagi kini nahimong posible alang kanila? Gihimo nila kini pinaagi sa paghimog mahinungdanong mga lakang.

KON UNSAON PAGSUKOL SA DAOTANG MGA ESPIRITU

14. Subay sa panig-ingnan sa unang-siglong mga Kristohanon nga taga-Efeso, sa unsang paagi makasukol ka sa daotang mga espiritu?

¹⁴ Unsay usa ka paagi nga ikaw makasukol sa daotang mga espiritu ug panalipdan ang imong kaugalingon ug imong pamilya gikan sa ilang mga lit-ag? Ang unang-siglong mga Kristohanon sa Efeso nga nagbuhat ug espiritismo una pa mahimong mga magtutuo mihimog positibong mga lakang. Atong mabasa nga “ubay-ubay niadtong mga nanaggamit ug mga kalaki sa salamangka mitapok sa ilang mga basahon ug misunog niini atubangan sa tanan.” (Buhat 19:19) Bisan pa kon wala ka magbuhat ug espiritismo, likayi ang tanang butang nga gigamit sa espiritismo o masugyoton niini. Kini naglakip sa mga basahon, magasin, video, poster, mga rekord sa awit, ug mga butang nga gigamit alang sa espiritistikong mga katuyoan. Nalakip usab ang mga diyosdiyos,  mga anting-anting ug ubang mga butang nga gisul-ob ingong panagang, ug mga gasang nadawat gikan sa mga mamumuhat ug espiritismo. (Deuteronomio 7:​25, 26; 1 Corinto 10:21) Sa pag-ilustrar: Usa ka magtiayon sa Thailand dugay nang gihasi sa mga demonyo. Dayon ilang giwagtang ang mga butang nga nalangkit sa espiritismo. Unsay resulta? Wala nay demonyohanong mga pag-atake kanila ug human niadto nakahimog tinuod nga pag-uswag sa espirituwal.

15. Sa pagsukol sa daotang espirituhanong mga puwersa, unsa ang laing kinahanglanong lakang?

¹⁵ Aron makasukol sa daotang mga espiritu, ang laing kinahanglanong lakang mao ang pagpadapat sa tambag ni apostol Pablo sa pagsul-ob sa kompletong hinatag-sa-Diyos nga espirituwal nga armadora. (Efeso 6:​11-17) Kinahanglang lig-onon sa mga Kristohanon ang ilang mga depensa batok sa daotang mga espiritu. Unsay nalakip niining maong lakang? “Labaw sa tanang butang,” matud ni Pablo, “dad-a ang dakong taming sa pagtuo, nga pinaagi niini kamo makahimo sa pagpalong sa tanang nagadilaab nga mga udyong sa tuman-kadaotang usa.” Sa pagkamatuod, sa dihang mas lig-on ang imong pagtuo, mas labaw ang imong katakos nga makasukol sa daotang espirituhanong mga puwersa.​—Mateo 17:​14-20.

16. Sa unsang paagi mapalig-on nimo ang imong pagtuo?

¹⁶ Unsaon nimo pagpalig-on sa imong pagtuo? Pinaagi sa padayong pagtuon sa Bibliya ug sa pagpadapat sa tambag niini sa imong kinabuhi. Ang kalig-on sa pagtuo sa usa nagdependeg dako sa kalig-on sa pundasyon niini​—ang kahibalo sa Diyos. Dili ka ba mouyon nga ang tukmang kahibalo nga imong nabatonan ug gihatagag seryosong pagtagad samtang gitun-an nimo ang Bibliya nakapalig-on sa imong pagtuo? (Roma 10:​10, 17) Busa, sa walay duhaduha, samtang ipadayon nimo kini nga pagtuon ug batasanon ang pagtambong sa mga tigom sa mga Saksi ni Jehova, ang imong pagtuo dugang pang molig-on. (Roma 1:​11, 12; Colosas 2:​6, 7) Mahimo kining gamhanang panalipod batok sa mga pag-atake sa demonyo.​—1 Juan 5:5.

17. Unsang dugang mga lakang ang mahimong kinahanglanon sa pagsukol sa daotang espirituhanong mga puwersa?

¹⁷ Unsang dugang mga lakang ang mahimong himoon sa usa  ka tawo nga determinadong mosukol sa daotang espirituhanong mga puwersa? Ang mga Kristohanon sa Efeso nagkinahanglag panalipod tungod kay sila nagpuyo sa dakbayan nga kaylap ang demonismo. Busa, si Pablo miingon kanila: “Padayon kamo sa pag-ampo sa tanang higayon diha sa espiritu.” (Efeso 6:18) Sanglit kita nagpuyo sa kalibotan nga kaylap ang demonismo, ang mainitong pag-ampo alang sa panalipod sa Diyos mahinungdanon sa pagsukol sa daotang mga espiritu. (Mateo 6:13) Mapuslanon niining bahina mao ang espirituwal nga tabang ug mga pag-ampo sa tinudlong mga ansiano diha sa Kristohanong kongregasyon.​—Santiago 5:​13-15.

IPADAYON ANG IMONG PAKIGBUGNO BATOK SA DAOTANG MGA ESPIRITU

18, 19. Unsay mahimo kon ang mga demonyo mosamok pag-usab sa usa ka tawo?

¹⁸ Hinunoa, bisan human makahimo niining pangunang mga lakang, ang pipila gisamok sa daotang mga espiritu. Pananglitan, usa ka lalaki sa Côte d’Ivoire nagtuon sa Bibliya uban sa mga Saksi ni Jehova ug nagwagtang sa tanan niyang mga anting-anting. Human niadto, maayo ang iyang pag-uswag, nagpahinungod sa iyang kinabuhi kang Jehova, ug nabawtismohan. Apan usa ka semana human sa iyang bawtismo, ang mga demonyo misugod sa pagsamok kaniya pag-usab, ug dihay mga tingog nga nagsulti kaniya nga biyaan ang iyang bag-ong-kaplag nga tinuohan. Kon kini nahitabo kanimo, nagpasabot ba kini nga nawad-an ka sa panalipod ni Jehova? Dili gayod.

¹⁹ Bisan tuod nga ang hingpit nga tawong si Jesu-Kristo dunay langitnong panalipod, nakadungog siya sa tingog sa daotang espiritung linalang nga si Satanas nga Yawa. Gipakita ni Jesus kon unsay buhaton sa maong kahimtang. Iyang giingnan ang Yawa: “Pahilayo, Satanas!” (Mateo 4:​3-10) Sa susamang paagi, dili ka angay maminaw sa mga tingog gikan sa espirituhanong kalibotan. Sukli ang daotang mga espiritu pinaagi sa pagpangayog tabang kang Jehova. Oo, pag-ampo ug kusog nga gigamit ang ngalan sa Diyos. Ang Proverbio 18:10 nag-ingon: “Ang ngalan ni Jehova maoy usa ka malig-ong torre.  Ang matarong magadalagan nganha niana ug mapanalipdan.” Gihimo kana sa Kristohanong lalaki sa Côte d’Ivoire, ug ang daotang mga espiritu mihunong sa paghasi kaniya.​—Salmo 124:8; 145:18.

20. Sa pagsumaryo, unsay imong mahimo sa pagsukol sa daotang mga espiritu?

²⁰ Gitugotan ni Jehova ang daotang mga espiritu nga padayong maglungtad, apan iyang gipakita ang iyang gahom, ilabina alang sa iyang katawhan, ug ang iyang ngalan ginapahayag sa tibuok nga yuta. (Exodo 9:16) Kon magpabilin kang suod sa Diyos, dili ka angay mahadlok sa daotang mga espiritu. (Numeros 23:​21, 23; Santiago 4:​7, 8; 2 Pedro 2:9) Ang ilang gahom limitado. Sila gisilotan niadtong kapanahonan ni Noe, gipalagpot gikan sa langit niining ulahing kapanahonan, ug karon nagahulat sa kataposang paghukom. (Judas 6; Pinadayag 12:9; 20:1-3, 7-10, 14) Sa pagkatinuod, ilang gikahadlokan ang ilang umaabot nga kalaglagan. (Santiago 2:19) Busa sa dihang danihon ka sa daotang mga espiritu pinaagi sa usa ka matang sa paon o atakehon ka sa bisan unsang paagi, makasukol ka kanila. (2 Corinto 2:11) Likayi ang tanang matang sa espiritismo, ipadapat ang tambag sa Pulong sa Diyos, ug paninguhaa ang pag-uyon ni Jehova. Himoa kini nga walay langan, tungod kay ang imong kinabuhi nagdepende sa imong pagsukol sa daotang espirituhanong mga puwersa!

TAKSA ANG IMONG KAHIBALO

Sa unsang paagi gisulayan sa daotang mga espiritu pagpasalaag ang mga tawo?

Nganong gitunglo sa Bibliya ang espiritismo?

Sa unsang paagi ang usa makalingkawas gikan sa daotang espirituhanong mga puwersa?

Nganong ipadayon nimo ang pagsukol sa daotang mga espiritu?

[Mga Pangutana sa Pagtuon]

 [Hulagway sa panid 110]

Unsay imong pag-isip sa espiritismo sa daghang matang niini?