Kapitulo 11

Unsay Pwede Nakong Isul-ob?

Taligawas na si Heather, ug nakurat ang iyang ginikanan dihang ilang nakita siya.

“Kanay imong isul-ob?” miingon ang iyang amahan.

“Ngano man diay?” mitubag si Heather nga daw nahibulong. “Sa mall lang man mi mangadto.”

“Pag-ilis didto!” miingon ang iyang inahan.

“Pero Ma,” nagbagulbol si Heather, “ingon niinig sininaan ang tanang tin-edyer karon. Ug gawas pa, angayan ko ini!”

“Pero wa mi makaangay ana!” miingon ang iyang amahan. “Hala, balik sa kuwarto ug pag-ilis kay kon dili ka mag-ilis, di ka makalakaw!”

 SUKAD pa sa una lalisan gyod ang bahin sa kon unsay isul-ob. Tingali mao usab kini ang gilalisan sa imong ginikanan ug sa ilang ginikanan niadtong batan-on pa sila. Ug ang imong reaksiyon karon tingali mao poy ilang reaksiyon kaniadto! Apan karon sila na ang imong gikalalis, ug mao ra gihapon ang inyong giawayan.

Moingon ka: Komportable man ko ini.

Moingon sila: Di na pormal.

Moingon ka: Nindot man ni!

Moingon sila: Seksi ra kaayo na.

Moingon ka: Katunga ra sa presyo ang akong gibayad niini.

Moingon sila: Katunga na man lang poy nahibilin ana!

Duna bay paagi aron dili mo maglalis? Duna! Si Megan, nga 23 anyos, nahibalo sa sekreto. “Dili kinahanglang maglalis mo,” siya miingon. “Kinahanglang magkompromisohay lang mo.” Magkompromisohay? Sa ato pa diay magtinigulang kag sinina? Aw, dili pod! Ang pagkompromisohay nagpasabot nga inyong estoryahan ang problema ug mangita kamog ubang sinina nga pareho ninyong maangayan. Unsay kaayohan niini?

1. Nindot kang tan-awon, bisan sa imong mga higala.

2. Tingali dili ka badlongon sa imong ginikanan sa imong gisul-ob.

3. Kon makita sa imong ginikanan nga responsable ka niining bahina, basig hatagan ka pa nilag dugang kagawasan.

Busa aniay sugyot. Hunahunaa ang sinina nga imong nakit-an nga gusto nimong paliton. Ang una nimong himoon mao kini:

 Tagda ang mga Prinsipyo sa Bibliya

Ang Bibliya wala kaayoy gisulti bahin sa sinina. Sa pagkatinuod, mahuman nimog basa sa pipila lang ka minutos ang tanang teksto sa Bibliya nga direktang naghisgot bahin niini! Apan makakita kag maayo ug praktikal nga mga tambag. Pananglitan:

● Ang Bibliya nagtambag nga ang mga babaye ‘magmakasaranganon’ ug magmaalamon sa ilang pagpamesti. *—1 Timoteo 2:9, 10.

Ang pulong ‘makasaranganon’ tingali makapabalaka nimo. ‘Magminantinil na lang diay kog sinina?’ tingali mangutana ka. Dili pod! Niini nga konteksto, ang makasaranganon nagkahulogan nga ang imong pagpamesti magpakita nga may respeto ka sa imong kaugalingon ug may konsiderasyon sa uban. (2 Corinto 6:3) Daghang sinina nga desente. “Tingali maglisod kag pili,” miingon si Danielle nga 23 anyos, “pero makasunod gihapon ka sa uso basta desente lang.”

● Ang Bibliya nag-ingon nga kon bahin sa panagway, angay nimong hatagag importansiya ang ‘imong pagkatawo.’—1 Pedro 3:4.

Ang seksi nga sinina tingali makadani, apan ang imong pagkatawo maoy makapadanig pagtahod sa mga hamtong ug mga batan-on. Makadanig pagtahod sa  mga batan-on? Oo—bisan sila tingali lainan pod sa dili desenteng sinina. “Hilas kaayong tan-awon ang mga babaye nga daw nangdanig mga lalaki tungod sa ilang sininaan!” miingon ang 16-anyos nga si Brittany. Si Kay miuyon. Siya miingon bahin sa iyang amiga kaniadto: “Ang tanan niyang sinina makadani gyod ug mga lalaki. Gusto niyang tan-awon siya sa mga lalaki, busa mosul-ob siyag kinaseksihang sinina.”

Pangutan-a ang Imong Ginikanan

Dili maayong magdala kag seksing sinina sa eskuylahan ug mao kini ang imong isul-ob didto. Mas mosalig ang imong ginikanan nimo kon matinud-anon ka, bisan sa mga butang nga sa imong hunahuna matago nimo gikan nila. Maayong mangutana ka nila kon mamili kag isul-ob. (Proverbio 15:22)—Gamita ang “Giya Kon Mamilig Sinina” sa panid 82 ug 83.

 Apan nganong mangutana pa man ka nila? Dili ba but-an man ka nila kon unsay imong isul-ob? Dili pod. Tinuod, ang imong ginikanan lahig panglantaw kay kanimo, pero usahay mao kanay imong gikinahanglan. Ang 17-anyos nga si Nataleine miingon: “Mapasalamaton ko sa tambag sa akong ginikanan kay dili ko gustong maulawan iniggawas nako sa balay o mahimong sumsoman sa tabi.”

Gawas pa, kini ang tinuod: Kon anaa ka pa sa poder sa imong ginikanan, angay kang magpasakop nila. (Colosas 3:20) Pero kon makasabot ka nila—ug sila makasabot  nimo—imong makita nga magkauyonay ra diay kamo. Busa dili na kamo mag-away bahin sa sinina!

Sugyot Kon Unsay Isul-ob: Kon magsul-ob ug sinina, ayaw lag kakontento sa imong makita diha sa samin. Ang sinina nga sa imong tan-aw desente na, mahimong dili desente iniglingkod na nimo o kon duna kay puniton. Kon mahimo, pangutan-a ang imong ginikanan o kasaligang higala.

SA SUNOD NGA KAPITULO

Maglagot ka ba sa imong kaugalingon? Unsay imong mahimo kon dili ka ganahan sa imong kaugalingon?

[Footnote]

TEKSTO

“Himoa nga ang inyong dayandayan dili anha sa . . . pagsul-ob ug panggawas nga mga besti, kondili diha sa natago nga pagkatawo sa kasingkasing.”—1 Pedro 3:3, 4.

SUGYOT

Ayaw pagsul-ob ug seksing sinina. Kon mosul-ob ka niana, mora kag desperado kaayo ug kulag atensiyon.

NAHIBALO KA BA . . . ?

Ang unang impresyon sa mga tawo kanimo sagad magdepende sa imong isul-ob.

ANG AKONG PLANONG HIMOON!

Kini nga membro sa pamilya o hamtong nga higala ang akong pangutan-on bahin sa sinina nga akong paliton: ․․․․․

Sa sunod higayong mopalit kog sinina, kini ang akong palandongon: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Nganong ang ginikanan ug mga anak maglalis bahin sa sinina?

● Unsay imong makat-onan dihang maghisgot kamo sa imong ginikanan bahin sa sinina?

[Blurb sa panid 81]

“Inigkakita nakog babaye nga magsul-ob ug seksing sinina, moubos ang akong paglantaw niya. Apan kon makakita kog tawo nga magsul-ob ug uso apan desenteng sinina, moingon ko sa akong kaugalingon, ‘Mao kanay panagway nga akong gustong ipakita ngadto sa mga tawo.’”—Nataleine

 [Kahon/Mga hulagway sa panid 82, 83]

Worksheet

Giya Kon Mamilig Sinina

Instruksiyon: Kopyaha kining mga panira. Tubaga ang walang bahin ug ipatubag sa imong ginikanan ang tuong bahin. Dayon pagbayloay kamog papel, ug hisgoti ang inyong mga tubag. Nakurat ba kamo sa inyong mga tubag? Unsay inyong nakat-onan sa inyong mga panglantaw nga wala ninyo mahibaloi kaniadto?

Para Nimo Paghunahunag sinina nga gusto nimong isul-ob o paliton.

Nganong gusto ka man niini? Numerohi sumala sa pagkaimportante sa mga rason.

․․․․․ Tatak

․․․․․ Makapadani sa kaatbang nga sekso

․․․․․ Nindot para sa akong mga higala

․․․․․ Komportable

․․․․․ Presyo

․․․․․ Uban pa ․․․․․

Posibleng reaksiyon sa akong ginikanan

□ “Dili na pwede!”

□ “Sige na lang.”

□ “Okey.”

Posibleng rason kon nganong dili sila mosugot

□ “Seksi ra kaayo.”

□ “Sobra ra ka kaswal.”

□ “Sunod ra kaayo sa uso.”

□ “Maulawan kami.”

□ “Mahal ra kaayo.”

□ Uban pa ․․․․․

Unsay Among  Masabotan Bahin Niini?

Nganong maayong tagdon ang panglantaw sa akong ginikanan?

․․․․․

Maremedyohan pa ba ang sinina?

․․․․․

Para sa Imong Ginikanan Paghunahunag sinina nga gustong isul-ob o paliton sa imong anak.

Sa imong hunahuna, nganong gusto kini sa imong anak? Numerohi ang mga rason sumala sa imong hunahuna nga maoy importante para niya.

․․․․․ Tatak

․․․․․ Makapadani sa kaatbang nga sekso

․․․․․ Nindot para sa iyang mga higala

․․․․․ Komportable

․․․․․ Presyo

․․․․․ Uban pa ․․․․․

Akong reaksiyon

□ “Dili na pwede!”

□ “Sige na lang.”

□ “Okey.”

Ang rason kon nganong dili ko mosugot

□ “Seksi ra kaayo.”

□ “Sobra ra ka kaswal.”

□ “Sunod ra kaayo sa uso.”

□ “Maulawan kami.”

□ “Mahal ra kaayo.”

□ Uban pa ․․․․․

Unsay Among Masabotan Bahin Niini?

Supak ba kami tungod lang kay wala kami makaangay niini?

□ Oo □ Tingali □ Dili

Maremedyohan pa ba ang sinina?

․․․․․

Desisyon ․․․․․

[Kahon sa panid 84]

Komosta Kon Bahin sa mga Lalaki?

Ang mga prinsipyo sa Bibliya nga gihisgotan niining kapituloha mapadapat usab sa mga lalaki. Magmaligdong. Ipakita ang imong tinuod nga pagkatawo. Kon mamilig sinina, pangutan-a ang imong kaugalingon: ‘Unsay ikaingon niini bahin nako? Mapadayag ba niini kon kinsa gyod ko?’ Hinumdomi nga ang imong sininaan magpaila sa imong pagkatawo. Paneguroa nga makita sa imong sininaan nga nagsunod ka sa mga prinsipyo nga imong gituohan!

[Hulagway sa panid 80]

Ang imong sinina samag karatula nga magpahibalo sa mga tawo kon unsa ka nga pagkatawo. Unsay ikaingon sa imong sinina bahin kanimo?