Maayong Panig-ingnan—Timoteo

Si Timoteo hapit nang mobiya sa iyang pamilya—dili aron talikdan ang iyang responsibilidad kondili aron mouban kang apostol Pablo ingong misyonaryo! Tingali hapit na siyang mag-20 anyos niadto, apan usa na siya ka responsableng batan-on nga dinayeg sa mga igsoon sa Listra ug Iconio. (Buhat 16:2) Si Pablo masaligon nga dakog mahimo si Timoteo sa pag-alagad sa Diyos, ug wala siya masayop! Paglabay sa mga tuig, si Timoteo miadto sa daghang lugar nga nagtukod ug mga kongregasyon ug nagdasig sa mga igsoon. Tungod sa iyang maayong mga hiyas, nasuod siya kang Pablo. Gani paglabayg mga 11 ka tuig, si Pablo miingon sa mga taga-Filipos: “Wala akoy laing kauban sama kaniya nga tinuoray gayong nahingawa kaninyo.”—Filipos 2:20, Ang Bag-ong Maayong Balita Biblia.

Andam ka bang mosakripisyo sa pag-alagad sa Diyos? Kon mao, panalanginan ka gayod ni Jehova! Pabilhan niya ang mga batan-on nga ‘nagtanyag sa ilang kaugalingon nga kinabubut-on.’ (Salmo 110:3) Dugang pa, makasalig ka nga si Jehova nga Diyos dili gayod malimot sa imong pagsakripisyo.—Hebreohanon 6:10.