Introduksiyon

Asa Ako Makakitag Labing Maayong Tambag?

Alang sa Batan-ong mga Babaye

Wala ka mahimutang kay nagpunay lang kag hunahuna sa guwapong estudyante nga bag-ong balhin. ‘Dili gani siya motan-aw nako,’ ikaw nakaingon, ‘busa unsa may daotan kon maghanduraw ko niya pirme?’ Gawas pa, dili lang ikaw ang naibog niya. Gigukod siya sa daghang babaye. Nahibalo ka niini tungod kay siya lang kanunay ang ginaestoryahan sa mga babaye.

Dayon kalit lang nga mitan-aw siya nimo. Nakalitan ka sa iyang makatunaw nga pahiyom. Imo pod siyang gipahiyoman. Giduol ka niya.

“Hi,” siya maulawong miingon.

“Hi,” mitubag ka.

“Ako diay si Brett.”

 “Bag-ong abot ka dinhi, di ba?” nangutana ka.

“Oo.”

Di ka makatuo nga nakig-estorya nimo si Brett!

“Lain pay ato,” miingon si Brett, “magparti ko sa balay human sa klase. Adto baya ha?”

Dayon mihunghong siya nimo ug nangidhat.

“Ug abi nimo,” siya miingon, “wala sa balay ang akong papa ug mama, makainom-inom gyod ta. Ayawg kalimot ha?”

Si Brett naghulat sa imong tubag. Walay babaye sa imong eskuylahan ang mobalibad sa imbitasyon!

Unsay imong itubag?

 Alang sa Batan-ong mga Lalaki

Duha nimo ka eskolmet nagpaingon nimo. Gigil- asan ka kay duha ka beses na niining semanaha nga gihagad ka nila sa pagpanigarilyo. Ikatulo na nila kining pagpanghagad.

Ang unang batan-on miingon: “Nag-inusara ka na pod? Duna koy ipailaila nimo nga amigo.” Kusog niyang gisulti ang pulong “amigo” samtang may gikuot siya sa iyang bulsa ug iya kining gitunol nimo.

May nakita ka nga giipitan sa mga tudlo sa batan-on nga morag sigarilyo. Nahibalo ka kon unsa kini, ug gigil-asan kag samot.

“Pasensiya na,” miingon ka. “Giingnan ta na mo nga dili ko . . .”

Misalga ang ikaduhang batan-on: “Tungod ba sa imong relihiyon? Sa ato pa diay di ka makalingaw-lingaw!”

“O talawan ka lang?” miingon ang unang batan-on.

“Talawan god tawon!” nangugat ka nga mitubag.

Dayon giagbayan ka sa ikaduhang batan-on. “Ayaw nag langas diha, dawata na na,” siya mihunghong.

Gipaduol sa unang batan-on ang sigarilyo sa imong nawong ug gihunghongan ka niya: “Ato-ato ra ni. Way mahibalo niini.”

Unsay imong himoon?

 ANG susama niini nga mga kahimtang nagakahitabo halos sa tanang suok sa kalibotan. Apan ang tinuod may mga batan-on nga mas makamaong moatubang niining mga situwasyona kay sa uban. Kon maipit, ang batan-on nga gitental sa pagpanigarilyo tingalig maghunahuna: ‘Dili ko gustong magpadala, apan naglisod na ko sa pagsigeg balibad. Unsa may akong himoon aron maghunahuna sila nga normal sab ko?’ O kaha ang batan-ong dalaga nga gihagad sa pagpakigdeyt tingali makaingon sa iyang kaugalingon: ‘Pormal siya. Unsa kaha kon mouban ko niya bisag kas-a lang?’

Sa laing bahin, daghang batan-on nabansay sa pagbarog sa ilang gituohan. Tungod niini dili kaayo sila maglisod sa pag-atubang sa pagpamit-os. Gusto ka bang mahisama niining mga batan-ona? Pwede kang mahisama nila! Sa unsang paagi?

Ang Bibliya makatabang kanimo sa pagsagubang sa mga problema sa mga batan-on. Makita dinhi ang labing maayong tambag kay kini inspiradong Pulong sa Diyos. (2 Timoteo 3:16, 17) Unsang mga problemaha nga makatabang kanimo ang Bibliya? Tan-awa ang listahan sa ubos, ug kudlitig ✔ ang mga topiko nga makapainteres nimo.

□ Kaatbang nga sekso

□ Pagsabot sa mga kausaban sa akong lawas

□ Pagpakighigala

□ Pagsulbad sa mga problema sa eskuylahan

□ Pagbadyet sa akong kuwarta

□ Pagpakiglabot sa akong ginikanan

□ Pagpugong sa akong pagbati

□ Pagpamalandong kon unsang kalingawan ang maayo para nako

□ Pagpauswag sa akong relasyon sa Diyos

Sumala sa imong makita diha sa Kaundan sa panid 4 ug 5, ang mga topiko nga gilista sa ibabaw hisgotan sa siyam ka seksiyon niining libroha. Hain niini ang imong gimarkahan? Tingali kining mga seksiyona maoy gusto nimong unahon ug basa. Ang mga prinsipyo sa Bibliya makatabang kanimo sa  matag usa niini nga mga alatubangon sa kinabuhi. Gipakita niining maong libro nga imong gibasa kon unsaon. *

Gidasig ka usab niining libroha sa pagpadayag sa imong hunahuna. Pananglitan, sa kataposan sa matag kapitulo makakita kag kahon nga nag-ulohang “Ang Akong Planong Himoon!” Diha niana hangyoon ka sa pagsulat kon unsay imong himoon aron imong mapadapat ang imong nabasa. Ang linaing mga panid​—sama sa “Kon Unsay Himoon Kon Pit-oson” sa panid 132 ug 133—​makatabang kanimo sa pagpamalandong ug maayo sa mga problema nga imong giatubang ug sa pagpangitag praktikal nga mga solusyon. Dugang pa, sa kataposan sa matag seksiyon may panid nga nag-ulohang “Akong Notahanan,” nga mahimo nimong sulatan kon nganong ang usa ka partikular nga bahin sa topiko aplikado sa imong kinabuhi. Makakita ka usab ug siyam ka panid diha sa lainlaing bahin sa libro nga nag-ulohang “Maayong Panig-ingnan.” Gihisgotan niini ang nagkalainlaing mga karakter sa Bibliya nga maayong sundogon.

Giagda ka sa Bibliya: “Batoni ang kaalam, batoni ang pagsabot.” (Proverbio 4:5) Ang mga pulong “kaalam” ug “pagsabot” nagkahulogan ug labaw pa kay sa pagkahibalo lang sa husto ug sayop. Kinahanglang mahibalo ka sa tanang butang nga nalangkit. Pananglitan, matabangan ka sa pag-atubang sa mga pagpit-os sa mga higala kon mahibalo ka kon unsay mga sangpotanan sa pagsubay ug daotang dalan ug kon unsay mga ganti sa pagbuhat ug matarong.

Makasalig ka niini: Dili lang kay ikaw ray dunay mga problema. Ang uban nakaatubang ug malamposong nakasulbad sa mga problema nga sama sa imoha. Makasulbad ka usab niini! Pahimuslig maayo ang librong Mga Pangutanang Gisukna sa mga Batan-on​—Mga Tubag nga Mosaler, Tomo 2. Pinaagi niini imong mapamatud-an nga ang Bibliya nasudlan sa kinamaayohang tambag!

[Footnote]