Kapitulo 18

Sa Unsang Paagi Ako Makakuwarta?

“Gusto kong mopalit ug awto.”​—Sergio.

“Ganahan kaayo kong mamalit.”​—Laurie-Ann.

“Daghan kaayog nindot nga palitonon, ug kapaliton kaayo ko; pero wala intawoy ikapalit ang akong ginikanan.”​—Mike.

TINGALI mao usab kini ang imong rason kon nganong gusto kang makakuwarta. O basin nagkinahanglan kag kuwarta sa pag-abag sa imong pamilya. Bisag dili ka moamot para sa mga galastohan sa balay, ang imong ginikanan dili kaayo mabug-atan kon ikay mopalit sa imong kaugalingong sinina ug ubang personal nga mga panginahanglan.

Sa pagkatinuod, ang pagbaton ug mga butang alang sa imong kaugalingon o sa imong pamilya nagkinahanglag kuwarta. Bisag nagsaad si Jesus nga motagana ang Diyos niadtong ‘nagauna sa  Gingharian sa Diyos,’ ang usa ka Kristohanon kinahanglan gihapong mangitag paagi aron makasapi. (Mateo 6:33; Buhat 18:1-3; 2 Tesalonica 3:10) Busa unsay imong himoon aron makakuwarta ka? Labaw sa tanan, unsay imong himoon aron dili maapektohan ang imong pag-alagad sa Diyos?

Kon Unsay Himoon Aron Makakitag Trabaho

Kon gikinahanglan gayod nimo ang usa ka butang nga dili mapalit sa imong ginikanan, pangitag trabaho aron imo kining mapalit. Ipahibalo sa imong ginikanan nga gusto kang motrabaho. Tingali malipay sila niana. Ibutang ta nga misugot sila ug nga anaa ka na sa hustong edad sa pagtrabaho, aniay upat ka sugyot aron makakita kag trabaho.

Isulti sa uban nga nangita kag trabaho. Sultihi ang imong mga silingan, mga magtutudlo, ug mga paryente nga nangita kag trabaho. Kon maulaw ka sa pagpangutana kanila kon duna ba silay nahibaloang bakanteng trabaho, pangutan-a sila kon unsang trabaho ang ilang gisudlan niadtong parehas pa nimo silag edad. Kon daghang tawo ang mahibalo nga nangita kag trabaho, mas dakog posibilidad nga makakita kag trabaho.

Pakisusi kon diin ang bakanteng trabaho. Tan-awa ang mga paanunsiyo sa mantalaan o sa Internet ug ang mga paskinanan ug impormasyon diha sa mga tindahan, sa eskuylahan, ug sa ubang publikong mga dapit. “Nakakita kog trabaho nianang paagiha,” miingon ang batan-ong si Dave. “Nangita kog trabaho sa paanunsiyo diha sa mantalaan, nagpadala akog aplikasyon pinaagig fax, ug mitawag sab ko sa  telepono.” Kon dili ka makakitag trabaho niining paagiha, mahimong kombinsihon nimo ang usa ka tawo nga siya nagkinahanglan sa imong serbisyo.

Pag-apod-apod ug aplikasyon. Isulat diha sa usa ka papel kon asa ka makontak ug ilista ang imong mga kuwalipikasyon ug kon unsay imong trabaho kaniadto. Kon wala kay mahunahunaang kuwalipikasyon, pamalandong ug maayo. Nakabantay ka na ba sa imong manghod o sa anak sa uban? Sa ato pa responsable ka. Nakatabang ka na ba sa imong papa sa pag-ayog sakyanan? Nagpakita lang kini nga maayo kang moayo-ayog mga butang. Makamao ka bang momakenilya o mogamit ug kompiyuter? O nakakuha ka bag dakong grado tungod sa usa ka proyekto nga imong nahimo? Kini nga mga kuwalipikasyon ang gipangita niadtong nanginahanglag mga trabahante. Ilakip kini diha sa imong aplikasyon. Iapod-apod ang imong aplikasyon ngadto sa mga tawo nga posibleng modawat nimo sa trabaho ug hangyoa ang imong mga higala ug mga paryente sa paghatag niini kang bisan kinsa nga ilang nahibaloan nga nangitag mga trabahante.

Panarbaho nga walay amo. Pananglitan, ang imo bang mga silingan nagkinahanglag mga butang o mga serbisyo nga walay makatanyag? Ibutang ta nga hilig kag mananap. Pwede nimong tanyagan ang imong silingan sa pagkaligo o pagtupi sa iyang binuhi nga may bayad. O kon makamao kang motugtog ug instrumento sa musika, pwede kang makatudlo sa uban sa pagtugtog. O mahimo usab nga modawat kag trabaho nga dili gusto sa uban, sama sa pagpanglaba o paghinlog sakyanan. Ang usa ka Kristohanon dili maulaw sa mga trabaho nga giisip sa uban nga ubos. (Efeso 4:28) Siyempre, kon motrabaho ka nga walay amo, kinahanglang porsigido ka, disiplinado, ug molihok nga dili na mistil sultihan.

Aniay tambag: Susiha una kon unsay mga galastohan ug gikinahanglan sa usa ka partikular  nga trabaho nga imong sugdan. (Lucas 14:28-30) Pakigsulti una sa imong ginikanan. Pakigsulti usab sa uban nga nakahimo na niining matanga sa trabaho. May bayranan ka bang buhis? Kinahanglan bang magkuha kag lisensiya o permit? Pakisusi sa lokal nga pamunoan bahin niini.​—Roma 13:1.

Magmatimbang

Handurawa nga nagbisikleta ka ug sa samang higayon nagdala kag daghang butang sama sa bag, bola, ug tingali pipila ka bulsita sa mga pinalit. Maglisod kag panimbang kon daghan kag dala! Ingon usab niini kon modawat kag daghang trabaho nga dili nimo maakatar. Kon daghan kaayong panahon ug kusog ang gikinahanglan sa imong trabaho human sa klase, mahimong maapektohan ang imong panglawas ug ang imong grado. Labaw sa tanan, dili na nimo maatiman ang mga tigom, pagtuon sa Bibliya, ug pagpakigbahin sa Kristohanong ministeryo kay hago ka na kaayo. “Dili ako makatambong ug mga tigom kay kapoy na kaayo ko human sa klase ug sa trabaho,” miingon ang batan-ong si Michèle.

 Ayaw himoa ang salapi ingong pangunang butang sa imong kinabuhi! Si Jesus miingon nga malipayon kadtong “mahunahunaon sa ilang espirituwal nga panginahanglan.” (Mateo 5:3) Siya miingon usab: “Bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Lucas 12:15) Kining tambaga gipadapat sa Kristohanong batan-on nga si Maureen. “Wala ako magpalinga sa pagpangitag kuwarta,” siya miingon. “Nahibalo ako nga madaot ang akong relasyon sa Diyos kon puliki ako sa pagpangitag sapi.”

Tinuod, diha sa ubang nasod ang mga batan-on kinahanglang magtrabaho ug daghang oras aron lang mabuhi ang ilang pamilya. Kon dili ingon niana ang imong situwasyon, nan nganong mangamas ka man ug maayo sa pagpangitag kuwarta? Sumala sa kadaghanang tigpanukiduki, ang pagtrabaho ug kapin sa 20 oras sa usa ka semana samtang nagtungha dili gayod magsilbi. Ang ubang eksperto miingon nga dili maayo kon motrabaho kag kapin sa walo ngadto sa napulo ka oras matag semana. Ang maalamong Haring Solomon miingon: “Mas maayo pa ang usa ka hakop nga pahulay kay sa duha ka hakop nga kahago ug paggukod sa hangin.”​—Ecclesiastes 4:6.

Hinumdomi, “ang malimbongong gahom sa mga bahandi” makababag sa pagtuman nimo sa imong buluhaton ingong Kristohanon.  (Marcos 4:19) Busa kon motrabaho ka human sa klase, areglaha ang imong eskedyul aron imong kahatagan ug pangunang pagtagad ang imong mga obligasyon ingong Kristohanon. Iampo kini kang Jehova nga Diyos. Siya makalig-on kanimo sa pagsagubang sa mga kalisod ug makatabang kanimo sa pagpatunhay ug maayong relasyon kaniya.

BASAHA ANG DUGANG PA BAHIN NIINI NGA ULOHAN DIHA SA TOMO 1, KAPITULO 21

SA SUNOD NGA KAPITULO

Ikaw bay nagkontrol sa imong kuwarta o ikaw ba hinuoy gikontrol niini? Susiha kon unsay imong himoon aron dili ka makontrolar sa kuwarta.

TEKSTO

“Bisag unsa pay pangandoyon sa tapolan, dili gayod niya kini maangkon. Apan maangkon sa kugihan ang tanan niyang pangandoyon.”​—Proverbio 13:4, Today’s English Version.

SUGYOT

Ipadala ang imong aplikasyon ngadto sa mga kompaniya bisag wala kini magpaanunsiyo nga dunay bakanteng trabaho.

NAHIBALO KA BA . . . ?

Sa ubang mga dapit, mga 85 porsiyento sa bakanteng mga trabaho wala ipaanunsiyo.

ANG AKONG PLANONG HIMOON!

Kini ang akong himoon aron makakita akog trabaho ․․․․․

Limitahan nako ang akong oras sa pagtrabaho ug ․․․․․ ka oras matag semana.

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Nganong kinahanglan kang mangitag kuwarta?

● Unsang mga problema ang imong maatubang kon mangita kag trabaho?

● Sa unsang paagi makabaton kag timbang nga panglantaw sa kuwarta?

[Blurb sa panid 153]

“Kon ang imong kalipay nag-agad lang sa pagbaton ug materyal nga mga butang, nan dili ka gayod magmalipayon. Duna gayoy butang nga bag-o nga imong pangandoyon. Kinahanglang magmakontento ka sa kon unsay imong nabatonan.”​—Jonathan

[Kahon sa panid 155]

Ang Kuwarta Mapuslanon Apan Ayaw Kinig Higugmaa

Ang hait nga kutsilyo mapuslanon kaayo sa maayong laki nga kosinero. Apan kon ang mogamit niini danghag o dili antigo, siya masamad. Ang kuwarta samag hait nga kutsilyo. Kon maayo kang mogamit niini, mapuslan nimo kini. Apan kon magpataka kag gasto, alaot ka! Pananglitan, si apostol Pablo nagpasidaan batok sa paghigugma sa salapi. Sa pagpangagpas ug bahandi, nadaot sa uban ang ilang relasyon sa ilang mga higala, sa pamilya, ug bisan ang ilang relasyon sa Diyos. Tungod niini, ilang ‘gitusak-tusak ang ilang kaugalingon sa daghang kasakitan.’ (1 Timoteo 6:9, 10) Unsang leksiyon ang atong makat-onan niini? Pagtuon sa pagbadyet. Ang kuwarta mapuslanon, apan ayaw kinig higugmaa!

[Hulagway sa panid 153]

Maglisod kag panimbang kon daghan kaayo kag akatahon